Graduadonan di Galaad Enkurashá pa Papia di “Echonan Poderoso”

UN GRUPO grandi di 6.635 hende for di 52 pais tabata presente na e programa di graduashon di e di 115 klas di e Skol Bíbliko di Galaad di Watchtower dia 13 di sèptèmber 2003.

Nan a tende e animashon basá riba Beibel ku e 48 studiantenan di e klas a risibí pa nan proklamá “e echonan poderoso di Dios” na hende di 17 pais. (Echonan 2:11) Aktualmente e graduadonan ei ta kumpliendo ku nan trabou di misionero na e paisnan ei.

Den su palabranan di introdukshon, Stephen Lett, un miembro di Kuerpo Gobernante di Testigunan di Yehova i ku a fungi komo presidente di e programa di graduashon, a rekordá e studiantenan: “Ora boso sali rumbo pa boso asignashon, sin importá unda boso bai òf kiko boso eksperensiá, lo tin mas ku ta ku boso ku tin kontra boso.” Usando kapítulo 6 di Segundo Reinan, Ruman Lett a rekordá e studiantenan ku nan por konta ku e apoyo di Yehova Dios i di un kantidat grandi di angel segun ku nan ta proklamá “e echonan poderoso di Dios.” (2 Reinan 6:15, 16) Kristiannan di promé siglo a konfrontá oposishon i personanan indiferente den nan trabou di prediká i siña hende, i misioneronan kristian djawe tambe ta konfrontá sirkunstansianan similar. Sin embargo, nan por konta ku sosten for di shelu i tambe for di Yehova su organisashon riba tera.—Salmo 34:7; Mateo 24:45.

Papia di “e Echonan Poderoso di Dios”

Despues di e palabranan di introdukshon di e presidente, Harold Corkern di e Komité di Sukursal di Merka a papia riba e tema “Ekspektativanan Realístiko Ta e Klave pa Sirbishi Gososo i Eksitoso.” Ruman Corkern a trese dilanti ku, manera Proverbionan 13:12 ta mustra, speransa ku no kumpli por hiba na desepshon. Sin embargo, hopi bes desepshon ta bini dor ku hende tin ekspektativanan irealístiko ku no ta ser kumplí. E graduadonan mester tin un punto di bista balansá i realístiko di nan mes i di otro hende. Nan mester ta konsiente ku nan lo kometé algun eror, pero esaki no mester hasi nan demasiado tristu miéntras ku nan ta hasi esfuerso pa yuda otro hende komprondé “e echonan poderoso di Dios.” Ruman Corkern a enkurashá e misioneronan nobo pa dependé riba Yehova, “Esun ku ta rekompensá esnan ku ta busk’é.”—Hebreonan 11:6.

E siguiente diskursante tabata Daniel Sydlik, un miembro di Kuerpo Gobernante, ku a papia riba e tema “E Speransa Kristian—Kiko E Ta?” El a deklará: “Speransa ta un birtut kristian. Birtut ta un norma di loke ta korekto ku ta trese un persona den un relashon apropiá ku Dios. Ta imposibel pa un hende ku no ta kristian karga speransa manera nos.” Anto Ruman Sydlik a deskribí diferente aspekto di e speransa kristian ku ta yuda nos keda optimista apesar di difikultatnan di bida. “Ku speransa, nos por konfrontá bida diario ku diligensia i ku un spiritu viktorioso.” E speransa di un kristian ta yud’é mira  Yehova komo un Dios di propósito i alegrá den su sirbishi na Yehova.—Romanonan 12:12.

Wallace Liverance, sekretario di Skol di Galaad, a animá e studiantenan pa “Sigui Kana Segun e Spiritu.” (Galationan 5:16) El a mustra kon Baruk, e sekretario di Jeremias, kasi a stòp di kana segun e spiritu. Na dado momentu, Baruk a kansa i a kuminsá buska kosnan grandi pa su mes. (Jeremias 45:3, 5) Ruman Liverance e ora ei a mustra ku algun hende a stòp di sigui Hesus i a rechasá bèrdat spiritual, lokual ta nesesario pa salbashon. Nan a hasi esei pasobra nan no a komprondé kiko Hesus tabata siña, i nan tabata desepshoná ku nan ekspektativanan karnal no a kumpli na e tempu ei. (Juan 6:26, 27, 51, 66) Kiko misioneronan, ku tin e trabou di dirigí atenshon na e Kreadó i su propósito, por siña for di e relatonan aki? E studiantenan a haña e animashon pa nan no preokupá pa haña sierto puesto òf rekonosementu serka hende, ni usa un asignashon teokrátiko pa ganashi personal.

Mark Noumair, instruktor di Galaad, a plantia e pregunta: “Lo Bo Ta Un Ku Ta Duna òf Un Ku Ta Tuma?” El a basa su komentarionan riba Huesnan 5:2, kaminda israelitanan individual a ser elogiá pasobra boluntariamente i sin egoismo nan a ofresé nan mes pa sirbi den e ehérsito di Barak. E studiantenan di Galaad a ser elogiá pasobra nan tambe boluntariamente a  reakshoná riba e yamada di Barak Mayor, Hesukristu, pa bira mas aktivo den guera spiritual. Sòldánan di Kristu mester ta interesá den haña e aprobashon di esun ku a reklutá nan. Ruman Noumair a rekordá e studiantenan: “Ora nos kuminsá konsentrá riba agradá nos mes, nos ta stòp di bringa kontra e enemigu. . . . Sirbishi di misionero no ta tokante abo. E ta tokante Yehova, su derecho di goberná komo Soberano di universo i e echo ku su boluntat ta kumpli. Nos no ta sirbi komo misionero pasobra nos ke pa Yehova hasi nos felis, nos ta sirbié pasobra nos stim’é.”—2 Timoteo 2:4.

Lawrence Bowen, instruktor di Galaad, tabata e siguiente moderadó di e parti “Santifiká Nan den e Bèrdat.” (Juan 17:17) El a remarká ku e studiantenan di e di 115 klas ta sirbidónan santifiká di Dios. Durante ku nan tabata den e skol nan a partisipá tambe den sirbishi di vèlt, buskando amantenan sinsero di e bèrdat. Meskos ku Hesus i su promé disipelnan, e studiantenan no a papia di “nan mes outoridat.” (Juan 12:49, 50) Ku selo nan a presentá e palabra inspirá di bèrdat ku ta duna bida. E studiantenan a konta i presentá rekonstrukshon di nan eksperensianan ku a demostrá e efekto poderoso ku Beibel tabatin riba esnan ku nan a haña kontakto kuné.

Konseho i Eksperensia Ta Duna Animashon

Anthony Perez i Anthony Griffin, miembronan di e Departamentu di Sirbishi di e sukursal di Merka, a entrevistá miembronan di Komiténan di Sukursal di rònt mundu. E rumannan aki a papia tokante e difikultatnan ku misioneronan nobo ta konfrontá i a duna konseho práktiko basá riba nan eksperensia personal. Algun di e retonan ta entre otro, diferensianan kultural, un klima tropikal henter aña, òf un ambiente religioso i polítiko ku ta diferente for di loke e studiantenan a kustumbrá kuné. Kiko por yuda misioneronan nobo trata ku éksito ku nan ambiente nobo? Amor pa Yehova, amor pa hende, no wak patras i no aktua deskabeyá. Un miembro di komité di sukursal a bisa: “E hendenan den nos asignashon a biba einan pa hopi siglo promé ku nos. Awèl nos tambe sigur lo por biba einan i adaptá nos mes. Kada biaha ku nos a topa difikultat, nos a konsiderá nan komo oportunidat pa mehorá nos karakter. Bo ta dependé riba orashon i riba e spiritu di Yehova, i bo ta eksperensiá e bèrdat di e palabranan di Hesus: ‘Mi ta ku boso.’”—Mateo 28:20.

Samuel Herd, un miembro di Kuerpo Gobernante, a hiba e programa na un punto kulminante ku su diskurso, “Sigui Papia di e Echonan Poderoso di Dios.” E dramamentu di spiritu santu riba dia di Pentekòste di aña 33 di nos era, a duna e disipelnan di Hesus e vigor pa papia di “e echonan poderoso di Dios.” Kiko por yuda misioneronan nobo awe papia ku mesun selo tokante e Reino di Dios? E mesun spiritu santu. Ruman Herd a animá e studiantenan ku a kaba di gradua pa nan ta “ferviente den spiritu,” entusiasmá ku nan asignashon, i nunka lubidá e entrenamentu ku a invertí den nan. (Romanonan 12:11) “Beibel ta un di e kosnan poderoso di Dios,” Ruman Herd a bisa. “Nunka balotá su balor. Su mensahe ta bibu. E ta penetrá te den kurason di un asuntu. Us’é pa korigí kosnan den boso bida. Lag’é kambia e manera ku boso ta pensa. Protehá boso kapasidat di pensa dor di studia, lesa i meditá riba e Skritura . . . Pone komo boso meta i determinashon pa usa boso entrenamentu di Galaad pa sigui papia di ‘e echonan poderoso di Dios.’”

Despues di e lesamentu di saludonan for di rònt mundu i e presentashon di diploma, un graduado a lesa un karta di e klas pa ekspresá nan apresio pa e entrenamentu ku nan a risibí. Anto Ruman Lett a konkluí e okashon gososo aki apropiadamente dor di referí na 2 Krónikanan 32:7 i Deuteronomio 20:1 i 4. Konektando su palabranan final na su palabranan di introdukshon, el a konkluí: “P’esei kerido graduadonan, kòrda segun ku boso ta bai, segun ku boso ta marcha drenta e bataya spiritual den boso asignashon nobo, ku Yehova lo ta marchando huntu ku boso. Nunka lubidá e echo ku tin mas ku ta ku boso ku tin kontra boso.”

[Kuadro na página 25]

ESTADÍSTIKANAN DI E KLAS

Kantidat di pais representá: 7

Kantidat di pais na kua a asigná nan: 17

Kantidat di studiante: 48

Edat promedio: 33,7

Promedio di aña den e bèrdat: 17,8

Promedio di aña den sirbishi di tempu kompletu: 13,5

[Plachi na página 26]

E di 115 Klas di Graduadonan di e Skol Bíbliko di Galaad di Watchtower

Den e lista aki bou, e reinan ta numerá di dilanti bai patras, i e nòmbernan ta bai di robes pa drechi den kada rei.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.