Nan A Buska e Kaminda Smal

KASI 550 aña pasá, gruponan chikí di hende ku a deklará di ta kristian i ku tabata biba na Praga, Chelčice, Vilémov, Klatovy i otro statnan ku awe ta keda den Repúblika Cheko, a bandoná nan kas. Nan a establesé nan mes serka di e pueblito Kunwald, den un vaye den parti nortost di Bohemia. Ei nan a konstruí nan kasita, a kultivá e tera, a lesa nan Beibel i a yama nan mes Union di Ruman, òf Unitas Fratrum na latin.

E pobladónan aki a konsistí di hende di vários antesedente. Nan tabata kampesino, hende di noblesa, studiante di universidat, riku i pober, hòmber i muhé, biuda i huérfano, i tur tabatin e mesun deseo. Nan a skirbi: “Nos a akudí na Dios mes den orashon i a rog’é pa E revelá su gran boluntat na nos den tur kos. Nos kier a kana den Su kaminda.” Sí, e Union di Ruman aki, òf e Rumannan Cheko manera despues nan a yama e komunidat aki di kreyente, tabata buska e ‘kaminda smal ku ta hiba na bida.’ (Mateo 7:13, 14) Kua ta e bèrdatnan bíbliko ku nan búskeda a revelá? Kon nan kreensianan a diferensiá for di esnan aseptá den e era ei, i kiko nos por siña for di nan?

Nan A Rechasá Violensia i A Nenga di Komprometé Nan Siñansanan

Vários movementu religioso a kontribuí na formashon di Union di Ruman meimei di siglo 15. Un di nan tabata e waldensenan, un movementu ku tabata data for di siglo 12. Inisialmente, e waldensenan a  separá nan mes for di katolisismo romano, ku tabata e religion di estado na Europa Sentral. Sin embargo, despues nan a regresá parsialmente na siñansanan katóliko. Un otro grupo di hopi influensia tabata e husitanan, siguidónan di Jan Hus. Nan a representá e religion di e mayoria di e poblashon cheko, pero nan no tabata niun tiki uní. Un fakshon tabata bringa riba kuestionnan sosial, miéntras ku un otro a usa religion pa promové kousanan polítiko. E Union di Ruman a ser influensiá tambe dor di gruponan ku a kere den e Reinado di Mil Aña i dor di ekspertonan lokal i stranhero riba tereno bíbliko.

Peter Chelčický (un reformadó i eksperto di Beibel ku a biba alrededor di aña 1390 pa 1460), tabata konosí ku e siñansanan di e waldensenan i e husitanan. El a rechasá e husitanan pasobra nan movementu a kuminsá usa violensia, i el a kita for di e waldensenan debí ku nan tabata komprometé nan siñansanan. Chelčický a kondená guera komo algu ku no ta kristian. E tabata di opinion ku “e lei di Kristu” mester dirigí un kristian, sin importá ki konsekuensianan esei lo tabatin. (Galationan 6:2; Mateo 22:37-39) Na aña 1440, Chelčický a skirbi su siñansanan den e buki Net of the Faith (Reda di e Fe).

Gregory di Praga, un kontemporáneo mas hóben di Chelčický, tabata asina enkantá ku e siñansanan di Chelčický ku el a bandoná e movementu husita. Na 1458, Gregory a konvensé gruponan chikí di eks-husita pa bandoná nan kas den diferente parti di Chekia. Nan  tabata entre esnan ku a siguié te na e pueblito Kunwald, kaminda nan a establesé un komunidat religioso nobo. Despues, gruponan di waldense cheko i aleman a djòin nan ei.

Un Bista den Pasado

Di aña 1464 pa 1467, e grupo nobo pero kresiente aki a tene vários asamblea religioso den e region di Kunwald i a aseptá vários resolushon ku a definí nan movementu religioso nobo. Nan a registrá tur resolushon kuidadosamente den un seri di buki, konosí awe komo Acta Unitatis Fratrum (Akta di e Union di Ruman) ku ainda ta eksistí. E Acta ta sirbi komo un bentana ku ta laga nos mira den pasado, dunando un kuadro bibu di loke e Union di Ruman a kere. E bukinan ta kontené karta, kopia di diskurso, i asta detayenan di nan disputanan.

Relashoná ku e kreensianan di e Union di Ruman, e Acta ta deklará: “Nos ta determiná pa establesé nos atministrashon eksklusivamente a base di lesamentu di Beibel i a base di e ehèmpelnan di nos Señor i e apòstelnan santu den meditashon, humildat i pasenshi, stimando nos enemigunan, hasiendo bon na  nan i deseando bon pa nan, i resando pa nan.” E obranan skirbí ta mustra tambe ku na komienso e Union di Ruman tabata hasi e trabou di prediká. Nan tabata kana dos-dos, i hende muhé a resultá di tin bon éksito komo misionero lokal. E Union di Ruman a apstené di puestonan polítiko, nan no a hura, no a partisipá den aktividatnan militar, ni a karga arma.

Di Union pa Desunion

Pero despues di algun dékada, e Union di Ruman no tabata kumpli mas ku e nifikashon di su nòmber. Disputa tokante kon literal mester pega na nan kreensianan a hiba na divishon. Na aña 1494 e Union di Ruman a parti den dos grupo: Partido Mayor i Partido Menor. Miéntras ku Partido Mayor a suavisá su kreensianan original, Partido Menor a prediká ku e Rumannan mester keda firme den nan posishon kontra polítika i mundu.—Wak e kuadro “Kiko A Para di Partido Mayor?”

Por ehèmpel, un miembro di Partido Menor a skirbi: “Hende ku ta kana den dos kaminda muy probablemente lo no keda ku Dios, ya ku  masha poko bes i solamente den kosnan chikí nan ta dispuesto pa sakrifiká nan mes i someté na Dje, miéntras ku den kosnan grandi nan ta sigui nan propio kaminda. . . . Nos ke ser kontá entre esnan ku tin mente firme i bon konsenshi, ku tur dia ta sigui Señor Kristu riba e kaminda smal ku nan krus.”

Miembronan di Partido Menor a konsiderá spiritu santu komo Dios su forsa aktivo, e “dede” di Dios. Nan komprondementu di e reskate di Hesus tabata ku e hòmber perfekto Hesus, a paga ku su bida pa loke e pekadó Adam a pèrdè. Nan no tabata venerá Maria, mama di Hesus. Nan a restorá e doktrina ku tur kreyente por aktua komo saserdote i ku no tin ku hasi voto di selibato. Nan a enkurashá tur miembro di e kongregashon pa partisipá den predikashon públiko i nan a ekspulsá pekadó ku no a repentí. Nan a keda estriktamente separá di aktividatnan militar i polítiko. (Wak e kuadro “Loke e Rumannan di Partido Menor A Kere.”) Komo ku Partido Menor a pega estrechamente na e resolushonnan di e Acta, e partido a konsiderá su mes e berdadero heredero di e Union di Ruman original.

Franko i Persiguí

E Partido Menor na un manera franko i abierto a kritiká otro religionnan, inkluso Partido Mayor. Tokante e religionnan ei nan a skirbi: “Boso ta siña hende pa batisá mucha chikí ku no tin nan propio fe, i den esaki boso ta sigui e institushon di un obispu ku yama Dionisio, kende riba instigashon di algun hende imprudente a enfatisá boutismo di mucha . . . Kasi tur maestro i doktor ta hasi meskos, Luther, Melanchthon, Bucerus, Korvín, Jiles̆, Bullinger, . . . e Partido Mayor, tur ta hala serka otro.”

Nada straño ku nan a persiguí Partido Menor. Na aña 1524 nan a suta un di su lidernan, Jan Kalenec, ku bara i a kima parti di su kurpa. Despues nan a kima tres miembro di Partido Menor na staka. Parse ku Partido Menor a pasa pa olvido rònt di aña 1550, despues di morto di nan último lider.

Pero asina mes, e kreyentenan di Partido Menor a laga nan marka riba e situashon religioso di Europa di Edat Media. Ta sierto ku komo ku ainda e berdadero “konosementu” no a oumentá den tempu di Partido Menor, nan no a logra kore ku e skuridat spiritual ku tabat’ei pa hopi tempu. (Daniel 12:4) No opstante, nan deseo fuerte pa buska e kaminda smal i pa siguié apesar di oposishon ta algu ku kristiannan djawe por tuma nota di dje.

[Komentario na página 13]

Ekspertonan ta bisa ku 50 di e 60 bukinan bohemio (cheko) imprimí entre aña 1500 pa 1510 a ser skirbí dor di miembronan di Union di Ruman

[Kuadro na página 11]

Kiko A Para di Partido Mayor?

Kiko a para di Partido Mayor? Despues ku Partido Menor a stòp di eksistí, Partido Mayor a sigui komo un movementu religioso, konosí te awe komo Union di Ruman. Ku tempu, e grupo aki a ahustá su kreensianan original. Na fin di siglo 16, e Union di Ruman a forma un konfederashon ku e utrakistanan cheko, * kendenan básikamente tabata luterano. Sin embargo, e Union di Ruman a keda aktivo, tradusiendo i publikando Beibel i tambe otro bukinan religioso. Un kos interesante ta ku e página di título di nan promé publikashonnan tabata kontené e Tetragramaton, manera nan ta yama e kuater lèternan hebreo di Dios su nòmber personal.

Na aña 1620, e reino cheko a ser fòrsá pa bai bèk bou di dominio katóliko romano. Konsekuentemente, hopi di e Rumannan di Partido Mayor a bandoná e pais i a sigui ku nan aktividatnan den eksterior. Den eksterior, e grupo a bira konosí despues komo Iglesia di Moravia ku ta eksistí te ainda (Moravia tabata un parti di e paisnan cheko).

[Nota]

[Kuadro na página 12]

Loke e Rumannan di Partido Menor A Kere

E siguiente sitanan saká for di e Acta Unitatis Fratrum di siglo 15 i 16, ta mustra algun di e kreensianan di Partido Menor. E deklarashonnan, skirbí dor di lidernan di Partido Menor, ta ser dirigí prinsipalmente na Partido Mayor.

Trinidat: “Si boso pasa dor di Beibel di dilanti te patras, boso lo no haña ku Dios ta partí den un tipo di Trinidat, tres persona ku nan nòmber, manera hende a inventá den nan imaginashon.”

Spiritu santu: “Spiritu santu ta e dede di Dios i un don di Dios, òf un konsoladó, òf e Poder di Dios, ku e Tata ta duna na kreyentenan a base di e méritonan di Kristu. Nos no ta haña den e Skritura Santu ku mester yama spiritu santu un Dios òf un Persona; e siñansanan apostóliko tampoko no ta mustra esei.”

Saserdosio: “Eróneamente nan ta duna boso e título “saserdote”; sin boso korona di kabes feitá i boso ungwento di dede, boso ta den mesun posishon ku e laiko di mas komun. San Pedro a rekerí di tur kristian pa ta saserdote, bisando: Boso ta e saserdosio santu ku ta ofresé sakrifisio spiritual. (1 Pedro 2)”

Boutismo: “Señor Kristu a bisa su apòstelnan: Bai den henter mundu, prediká e Evangelio na tur kriatura, na esnan ku lo kere. (Marko, kapítulo 16) I ta despues di e palabranan ei numa: i [nan] wòrdu batisá, nan lo ta salbá. I boso ta siña hende pa batisá mucha chikí ku no tin nan propio fe.”

Neutralidat: “Loke boso rumannan di promé a konsiderá komo malu i impuru, drenta ehérsito i mata hende òf kana riba kaminda ku arma, tur esei boso ta konsiderá bon . . . P’esei nos ta sinti ku boso, huntu ku otro maestronan, ta wak solamente ku boso wowo robes na loke e palabranan profétiko ta señalá: Pues el a kibra e poder di bog, e eskudo i e spada i e guera. (Salmo 75 [Salmo 76, Beibel Santu]) I atrobe: Nan lo no kousa daño ni destrukshon den henter mi seru santu, pasobra e tera di Señor lo ta yen di konosementu divino, etcetera. (Isaias, kapítulo 11).”

Predikashon: “Nos sa bon ku, inisialmente, muhénan a yuda mas hende bini na arepentimentu ku tur e saserdotenan huntu ku obispu. I awor e saserdotenan a establesé nan mes na nan lugá i na nan pastorí asigná. Ki un eror! Bai den henter mundu. Prediká . . . na tur kriatura.”

[Mapanan na página 10]

(Pa e teksto den su formato kompleto, wak e publikashon)

ALEMANIA

POLONIA

REPÚBLIKA CHEKO

BOHEMIA

Riu Elba

PRAGA

Riu Vltava

Klatovy

Chelčice

Kunwald

Vilémov

MORAVIA

Riu Danube

[Plachinan na página 10, 11]

Banda robes: Peter Chelčický; abou: un página di “Net of the Faith”

[Plachi na página 11]

Gregory di Praga

[Rekonosementu pa Potrèt na página 13]

Tur plachi: S laskavým svolením knihovny Národního muzea v Praze, C̆esko