Pregunta di Lektor

Hesus a indiká den su orashon modelo ku Dios su boluntat tabata sosodé den shelu ounke e angelnan malbado no a ser ekspulsá ainda?

Segun Mateo 6:10, Hesus a bisa: “Ku bo boluntat sosodé na tera meskos ku den shelu.” Bo por komprondé e petishon aki den dos manera. Promé, komo un petishon pa Dios su boluntat sosodé riba tera meskos ku e tabata sosodé kaba den shelu òf, di dos, komo un petishon pa e kumpli kompletamente tantu den shelu komo riba tera. E nifikashon di Hesus su palabranan mas promé, esta, “ku bo reino bin” ta indiká ku e di dos punto di bista ta mas na armonia ku e Skritura. I e ta reflehá e situashon ku a eksistí ora Hesus tabata riba tera i hopi tempu despues di esei. Kon asina?

E buki di Revelashon ta señalá na dos resultado distinto ku establesimentu di e Reino di Dios den shelu tabatin. E promé tin influensia riba shelu mes, i esun di dos ta afektá e tera. Revelashon 12:7-9 i 12 ta bisa: “Tabatin guera den shelu, Miguel i su angelnan tabata hasi guera kontra e dragon. I e dragon i su angelnan tabata hasi guera, i nan no a prevalesé, i no tabatin lugá mas pa nan den shelu. I e gran dragon a wòrdu tirá abou, e kolebra di antigwedat, kende ta wòrdu yamá Diabel i Satanas, kende ta gaña henter mundu; el a wòrdu tirá abou riba tera, i su angelnan a wòrdu tirá abou huntu kuné. Pa e motibu aki, regosihá, o shelunan i boso ku ta biba den nan. Ai di tera i laman, pasobra diabel a baha bin serka boso ku gran furia, sabiendo ku ta ked’é solamente un poko tempu mas.”

Ora ku Satanas i e demoñonan a ser ekspulsá for di shelu despues di 1914, e region ei a keda liber di tur spiritu rebelde, i esaki a trese hopi goso pa Yehova su yunan angelikal leal, kendenan ta forma e gran mayoria di su kreashon spiritual. (Jòb 1:6-12; 2:1-7; Revelashon 12:10) Asina e petishon den Hesus su orashon modelo a keda kumpli pa loke ta shelu. Tur esnan ku a keda den e region selestial tabata angelnan leal na Yehova i kompletamente sumiso na su gobernashon supremo.

Mester enfatisá sí ku asta promé ku esei, ora e angelnan malbado ainda tabatin akseso na shelu, nan tabata ekskluí for di e famia di Dios i tabata bou di sierto restrikshonnan definitivo. Por ehèmpel, Hudas 6 ta revelá ku for di den promé siglo kaba di nos era, nan tabata “na kadena eterno den skuridat [spiritual] pa e huisio di e gran dia.” Segundo Pedro 2:4 tambe ta bisa: “Dios no a spar angelnan ora nan a peka, ma a tira nan den fièrnu [na griego original, Tártaro ku ta representá un estado kompletamente degradá] i a kondená nan na posnan di skuridat [spiritual], pa wòrdu reservá pa huisio.” *

Distinto for dje echo ku e angelnan malbado tabata ekskluí ounke nan tabata den shelu ainda, riba tera sí nan tabatin hopi poder. De echo,  e Palabra di Dios ta yama Satanas “e prens di e mundu” i e demoñonan e ta yama “e forsanan mundial di e skuridat aki.” (Juan 12:31; Efesionan 6:11, 12; 1 Juan 5:19) Debí na su poder, e Diabel por a ofresé Hesus “tur e reinonan di mundu i nan gloria” a kambio di un solo akto di adorashon. (Mateo 4:8, 9) Ta klara anto ku lo tin kambionan drástiko ora e Reino di Dios “bin,” pa loke ta toka e tera.

Aki riba tera, e ‘binimentu’ di e Reino di Dios lo resultá den un sistema di kosnan kompletamente nobo. E reino di Dios lo destruí tur gobièrnu ku hende a forma i e lo bira e úniko gobièrnu riba tera. Na mesun tempu, su súpditonan humano temeroso di Dios lo forma “un tera nobo.” (2 Pedro 3:13; Daniel 2:44) Tambe e Reino lo eliminá piká for di humanidat obediente i ku tempu lo e kambia henter e tera i hasié un paradeis mundial. Asina e ta eliminá delaster un rastro di e gobernashon di Satanas.—Romanonan 8:20, 21; Revelashon 19:17-21.

Na konklushon di e Milenio, ora ku e Reino Mesiániko a kumpli ku Dios su boluntat p’e, “e Yu mes tambe lo wòrdu sometí na Esun, kende a someté tur kos na dje, pa Dios por ta tur den tur.” (1 Korintionan 15:28) Anto lo tin un prueba final, despues di kua Satanas, su demoñonan i tur hende rebelde ku nan gaña lo ser eliminá pa semper den “e di dos morto.” (Revelashon 20:7-15) Despues di esei, tur kreashon inteligente den shelu i riba tera lo tin goso den keda sumiso na Yehova su soberania amoroso pa semper. Den tur sentido, esei lo ta e kumplimentu kompletu di e palabranan den Hesus su orashon modelo.—1 Juan 4:8.

[Nota]