Sea Prepará pa e Dia di Yehova

“Sea prepará, pasobra e Yu di hende lo bin na un ora ku boso no ta pensa.”—MATEO 24:44.

1. Dikon nos mester ta masha interesá den e dia di Yehova?

E DIA di Yehova lo ta un dia di bataya i furia, di agonia i angustia, di skuridat i desolashon. Yehova su “dia grandi i temibel” lo bini sigur riba e sistema malbado aki, meskos ku e Diluvio a hoga e mundu malbado di tempu di Noe. Definitivamente lo e bini. Sin embargo, “ken ku invoká e nòmber di [“Yehova,” NW] lo wòrdu librá.” (Joel 2:30-32; Amos 5:18-20) Dios lo destruí su enemigunan i salba su pueblo. Ku un urgensia, profeta Sofonias a deklará: “E gran dia di SEÑOR ta serka; e ta serka i e ta bin masha lihé mes.” (Sofonias 1:14) Pero ki dia e huisio divino aki lo ser ehekutá?

2, 3. Dikon ta di sumo importansia pa nos prepará nos mes pa e dia di Yehova?

² “Ma di e dia i e ora ei ningun hende no sa, ni e angelnan di shelu tampoko, ni e Yu, sino  e Tata so,” Hesus a bisa. (Mateo 24:36) Siendo ku nos no sa e dia ni e ora eksakto, ta di sumo importansia pa nos tuma na pechu e palabranan di nos teksto di aña pa 2004: “Sea alerta . . . Sea prepará.”—Mateo 24:42, 44.

³ Pa indiká kon diripiente esnan ku ta prepará lo ser hibá na siguridat miéntras ku otronan lo ser bandoná, Hesus a bisa: “Lo tin dos hòmber den kunuku; ún lo wòrdu tumá i e otro lo wòrdu lagá atras. Dos muhé lo ta mula na mulina; ún lo wòrdu tumá i e otro lo wòrdu lagá atras.” (Mateo 24:40, 41) Na e etapa krusial ei, kon nos situashon personal lo ta? Nos lo ta prepará, òf e dia ei lo kohe nos for di base? Esei ta dependé hopi di e medidanan ku nos ta tuma awor. Pa demostrá ku nos ta prepará pa e dia di Yehova nos mester evitá un sierto aktitut ku ta reina awe, nos no mester entregá na un estado spiritual en partikular i nos mester keda leu for di sierto estilonan di bida.

Evitá un Aktitut Despreokupá i Satisfecho ku Nos Mes

4. Ki aktitut e hendenan di e tempu di Noe tabatin?

⁴ Konsiderá e tempu di Noe. “Pa medio di fe Noe, siendo spièrtá pa Dios tokante di kosnan ku no a wòrdu mirá ainda, ku temor di Dios a prepará un arka pa salbashon di e hendenan di su kas,” Beibel ta deklará. (Hebreonan 11:7) E arka lo tabata algu ekstraordinario i basta riparabel. Ademas, Noe tabata “un predikadó di hustisia.” (2 Pedro 2:5) Ni Noe su konstrukshon di e arka ni su predikashon no a motivá e hendenan di su tempu pa kambia nan rumbo. Dikon? Pasobra nan ‘tabata kome i bebe, hòmbernan tabata kasa i muhénan a ser duná den matrimonio.’ E hendenan ku Noe a prediká na dje tabata asina apsorbá den asuntunan personal i plaser ku “nan no a hasi kaso te ku e diluvio a bini i a bari nan tur.”—Mateo 24:38, 39, NW.

5. Ki punto di bista e habitantenan di Sodoma tabatin den tempu di Lòt?

⁵ Den tempu di Lòt tabata meskos. E Skritura ta bisa nos: “Nan tabata kome, nan tabata bebe, nan tabata kumpra, nan tabata bende, nan tabata planta, nan tabata traha kas; ma riba e dia ku Lòt a sali for di Sodoma a yobe kandela i suafel for di shelu i a destruí nan tur.” (Lukas 17:28, 29) Despues ku angel a spièrta Lòt di e destrukshon inminente, Lòt a bai papia ku su yernonan tokante loke tabata bai sosodé. Pero, den nan bista “tabata parse ku ta chansa e tabata chansa.”—Génesis 19:14.

6. Ki aktitut nos tin ku evitá?

⁶ Hesus a bisa ku meskos ku den e tempu di Noe i Lòt, “asina e binida di e Yu di hende lo ta.” (Mateo 24:39; Lukas 17:30) Sí, e aktitut ku ta reina awe serka mayoria hende ta un aktitut despreokupá i satisfecho ku nan mes. Nos tin ku vigilá pa nos no ser influensiá pa un aktitut asina. No tin nada malu den disfrutá di bon kuminda i bebida ku moderashon. Asina tambe, matrimonio ta un areglo di Dios. Sin embargo, si e kosnan ei a bira lo mas importante den nos bida i nos a pone interesnan spiritual un banda, nos lo por bisa ku personalmente nos ta prepará pa e dia temibel di Yehova?

7. Ki pregunta importante nos mester hasi nos mes promé ku nos partisipá den kualke aktividat, i dikon?

⁷ Apòstel Pablo a bisa: “Tempu ta kòrtiku, asina ta ku for di awor esnan ku tin esposa mester ta komo si fuera nan no tin esposa.” (1 Korintionan 7:29-31) Ta un tempu limitá a resta pa nos terminá e trabou ku Dios a duna nos di prediká e Reino. (Mateo 24:14) Pablo a spièrta asta esnan ku ta kasá pa nan no konsentrá asina tantu riba nan kasá ku nan ta pone interesnan di Reino na di dos lugá den  nan bida. Ta bisto ku e inklinashon mental ku Pablo tabata rekomendá ta lo kontrario di un aktitut despreokupá i satisfecho ku bo mes. Hesus a bisa: “Ma buska promé e reino di Dios i su hustisia.” (Mateo 6:33) Ora di tuma kualke desishon òf promé ku nos bai partisipá den kualke aktividat, ta sumamente importante pa nos puntra: ‘Ki efekto esaki lo tin riba mi esfuerso pa mantené interesnan di Reino na promé lugá den mi bida?’

8. Kiko nos mester hasi si ta aktividatnan di bida diario a bira nos preokupashon prinsipal?

⁸ Pero kiko si nos realisá ku ya kaba nos ta asina okupá ku aktividatnan di bida diario ku no tin lugá pa asuntunan relashoná ku kosnan spiritual? Tin masha tiki diferensia entre nos estilo di bida i e esun di nos bisiñanan ku no tin konosementu eksakto di e Skritura i ku no ta proklamadó di Reino? Si esei ta e kaso, anto nos tin ku hasi orashon tokante e asuntu aki. Yehova por yuda nos haña e aktitut mental korekto. (Romanonan 15:5, NW; Filipensenan 3:15) E por yuda nos mantené interesnan di Reino na promé lugá, hasi loke ta korekto i kumpli ku e obligashon ku nos tin kuné.—Romanonan 12:2; 2 Korintionan 13:7.

Lucha pa Nos No Kabishá Spiritualmente

9. Segun Revelashon 16:14-16, dikon ta importante pa nos lucha pa no kabishá spiritualmente?

⁹ E profesia ku ta papia di e binidero “guera di e gran dia di Dios Todopoderoso” na Armagedón ta spièrta ku algun hende lo no keda lantá. Señor Hesukristu ta bisa: “Mira, mi ta bin manera ladron. Bendishoná ta esun ku keda lantá i keda ku su pañanan bistí, pa e no kana sunú i hende mira su bèrgwensa.” (Revelashon 16:14-16) E pañanan menshoná aki ta referí na loke ta identifiká nos komo Testigunan kristian di Yehova. Esaki ta entre otro nos trabou komo proklamadó di Reino i nos komportashon kristian. Si pokopoko nos bira inaktivo komo si fuera nos a pega soño, nos lo pèrdè nos identidat kristian i keda sunú. Esei ta un bèrgwensa i e ta peligroso. Nos mester lucha pa nos no bira flou òf kabishá spiritualmente. Kon nos por resistí tal inklinashon?

10. Dikon lesamentu di Beibel tur dia ta yuda nos keda spiritualmente alerta?

¹⁰ Beibel bes tras bes ta enfatisá e nesesidat di keda lantá i keda ku sano huisio (sobrio). Por ehèmpel, e relatonan di Evangelio ta  rekordá nos: “Sea alerta” (Mateo 24:42; 25:13; Marko 13:35, 37); “sea prepará” (Mateo 24:44; Lukas 12:40); “tene kuidou, keda alerta” (Marko 13:33). Despues di deklará ku e dia di Yehova ta bai bini inesperadamente riba e mundu aki, apòstel Pablo a urgi su rumannan den fe: “No laga nos drumi manera otronan ta hasi, ma laga nos ta alerta i sobrio.” (1 Tesalonisensenan 5:6) Den e último buki di Beibel, Kristu Hesus glorifiká ta enfatisá kon repentino su binida lo ta, bisando: “Mi ta bin pronto.” (Revelashon 3:11; 22:7, 12, 20) Hopi di e profetanan hebreo tambe a deskribí Yehova su gran dia di huisio i a spièrta hende p’e. (Isaias 2:12, 17; Jeremias 30:7; Joel 2:11; Sofonias 3:8) Lesa e Palabra di Dios tur dia i reflekshoná riba loke nos lesa, ta un gran yudansa pa keda spiritualmente alerta.

11. Dikon studio di Beibel personal ta esensial pa keda spiritualmente lantá?

¹¹ Sí, studio personal diligente di e Skritura, usando publikashonnan perkurá dor di e “esklabo fiel i prudente,” ta un gran estímulo pa nos keda spiritualmente lantá! (Mateo 24:45-47) Sin embargo, pa studio personal produsí benefisio, e mester ta progresivo i konsistente. (Hebreonan 5:14–6:3) Nos tin ku alimentá nos mes ku regularidat ku kuminda spiritual sólido. Podisé awendia no ta fásil pa haña e tempu pa hasi esaki. (Efesionan 5:15, 16) Sin embargo, no ta basta pa lesa Beibel i publikashonnan bíbliko solamente ora esei ta kumbiniente. Studio personal regular ta esensial pa nos por keda lantá i “sano den fe.”—Tito 1:13.

12. Kon reunion-, asamblea- i kongresonan kristian ta yuda nos kombatí kabishamentu spiritual?

¹² Reunion-, asamblea- i kongresonan kristian tambe ta yuda nos kombatí kabishamentu spiritual. Kon? Pa medio di e instrukshon ku nos ta risibí. No ta asina ku regularmente nos ta ser rekordá na e reunionnan aki ku e dia di Yehova ta hopi serka? Tambe reunionnan kristian semanal ta perkurá oportunidat pa “stimulá otro pa stima i hasi bon obra.” Tal stimulashon ta yuda un persona keda spiritualmente lantá. P’esei no ta nada straño ku nos ta ser mandá pa reuní regularmente segun ku nos ta “mira ku e dia ta yegando serka.”—Hebreonan 10:24, 25.

13. Kon e sirbishi kristian ta yuda nos keda spiritualmente lantá?

¹³ Un otro kos ku ta yuda nos keda lantá ta ora nos ta partisipá di henter alma den e sirbishi kristian. E mihó manera pa keda konsiente di e señalnan di e tempunan i nan nifikashon ta dor di papia ku otro hende tokante nan. I ora nos mira e personanan ku nos ta studia Beibel kuné hasi progreso i kuminsá aktua di akuerdo ku loke nan ta siña, nos propio sentido di urgensia ta oumentá. Apòstel Pedro a bisa: “Fortifiká boso mente pa aktividat, mantené boso sano huisio kompletamente.” (1 Pedro 1:13, NW) Un bon remedi pa ora nos ta spiritualmente grògi ta di ‘semper abundá den e trabou di Señor.’—1 Korintionan 15:58.

Evitá Estilonan di Bida Ku Ta Kousa Daño Spiritual

14. Manera tin pará skirbí na Lukas 21:34-36, kontra ki estilonan di bida Hesus a duna spièrtamentu?

¹⁴ Den Hesus su profesia remarkabel tokante e señal di su presensia, el a duna un otro spièrtamentu mas. El a bisa: “Tene kuidou pa boso kurason no ta kargá pa kousa di paranda [“komementu di mas,” NW] i buracheria i e preokupashonnan di bida, i e dia ei no bin diripiente riba boso manera un trampa; pasobra e lo bin riba tur esnan ku ta biba riba superfisie di henter mundu. Ma sea alerta tur ora bai, hasiendo orashon pa boso por tin forsa pa skapa di tur e kosnan aki ku ta bai tuma lugá, i pa para dilanti di e Yu di hende.” (Lukas 21:34-36) Hesus a deskribí presis e estilonan di bida ku hende en general ta sigui: kome di mas, bebe burachi i hiba un bida ku ta trese preokupashon.

15. Dikon nos tin ku evitá di kome i bebe di mas?

 ¹⁵ Komementu di mas i bebementu pisá ta kontra prinsipionan di Beibel i nos mester evitá nan. Beibel ta deklará: “No anda ku esnan ku ta gusta dal nan biña, ni ku esnan ku ta golos pa kome karni.” (Proverbionan 23:20) Pero komementu i bebementu no mester yega dje leu ei pa nan ta peligroso. Hopi promé ku nos hasié na un manera di mas, e por hasi nos grògi i floho. Un proverbio di Beibel ta bisa: “Alma di e hende floho ta antohá i no ta haña nada.” (Proverbionan 13:4) Un persona asina kisas ke hasi e boluntat di Dios, pero pa motibu di negligensia su deseo no ta kumpli.

16. Kon nos por evitá ku preokupashon relashoná ku nos famia ta bira un peso pa nos?

¹⁶ Kua ta e preokupashonnan di bida ku Hesus a spièrta p’e? Nan ta enserá preokupashonnan personal, kon pa mantené nos famia, i kosnan por estilo. Lo ta un bobedat pa nos laga e kosnan aki bira un peso pa nos! Hesus a puntra: “Kual di boso, dor di preokupá, por añadí ún kodo na su haltura,” es desir, na su durashon di bida? El a konsehá su oyentenan: “No preokupá boso mes anto, bisando: ‘Kiko nos lo kome?’ òf ‘Kiko nos lo bebe?’ òf ‘Kiko nos lo bisti?’ Pasobra tur e kosnan aki e paganonan ta buska; ma boso Tata selestial sa ku boso tin mester di tur e kosnan aki.” Dor di pone interesnan di Reino na promé lugá den nos bida i konfia ku Yehova lo perkurá pa nos nesesidatnan, nos lo por kontrolá nos preokupashonnan i keda lantá.—Mateo 6:25-34.

17. Kon korementu tras di aktividatnan materialista por kousa preokupashon?

¹⁷ Kore tras di aktividatnan materialista tambe por kousa preokupashon. Por ehèmpel, tin hende ta kompliká nan bida dor di biba for di nan forsa. Otronan a ser atraí dor di plannan pa gana hopi plaka den un tempu kòrtiku i dor di invershonnan finansiero riskante. Pa otro hende, sigui tras di edukashon komo un  manera pa alkansá éksito finansiero ta bira un trampa. Mester atmití sí ku un sierto nivel di edukashon por ta útil pa haña empleo. Sin embargo, ta un echo ku algun hende den nan búskeda di un edukashon avansá ku ta kita hopi tempu, a kousa daño spiritual na nan mes. Ta masha peligroso pa ta den un situashon asina segun ku e dia di Yehova ta aserká! Beibel ta atvertí: “Esnan ku ke bira riku ta kai den tentashon i den trampa i den hopi deseonan loko i dañino, kualnan ta hundi hende den ruina i destrukshon.”—1 Timoteo 6:9.

18. Ki abilidat nos tin ku kultivá pa evitá ku nos ta kai den un estilo di bida materialista?

¹⁸ Un faktor importante pa evitá ku nos ta kai den un estilo di bida materialista ta di kultivá e abilidat di distinguí entre loke ta bon i loke ta malu ora di tuma desishon. Nos ta desaroyá e abilidat aki dor di alimentá nos mes regularmente ku ‘kuminda sólido ku ta pa hende madurá’ i dor di ‘entrená nos mente mediante práktika.’ (Hebreo 5:13, 14) Hasi sigur “di e kosnan mas importante” ora di fiha nos prioridatnan, tambe lo protehá nos di tuma desishonnan robes.—Filipensenan 1:10, NW.

19. Kiko nos mester hasi si nos ripará ku nos tin masha tiki tempu pa aktividatnan spiritual?

¹⁹ Un estilo di bida materialista por siega nos, i laga masha tiki tempu òf nada mes pa aktividatnan spiritual. Kon nos por eksaminá nos mes i evitá di kai den e trampa di un estilo di bida asina? Nos tin ku hasi orashon i konsiderá kon nos por simplifiká nos bida i te na ki grado. Rei Salomon di Israel di antigwedat a bisa: “Soño di e hòmber trahadó ta dushi, sea ku e ta kome poko òf hopi. Ma barika-yen di e hòmber riku no ta lag’é drumi.” (Eklesiastés 5:12) Akaso gran parti di nos tempu i energia ta ser usá pa atendé poseshonnan material innesesario? Mas kos nos tin, mas kos nos tin ku mantené, sigurá i protehá. Nos lo por benefisiá si nos simplifiká nos bida dor di deshasí di sierto pertinensianan?

Di Tur Manera, Sea Prepará

20, 21. (a) Ki garantia apòstel Pedro ta duna relashoná ku e dia di Yehova? (b) Menshoná algun kos ku nos mester ta hasiendo, ku ta kai bou di kondukta santu i deboto, pa demostrá ku nos ta prepará pa e dia di Yehova.

²⁰ Tempu a kaba pa e mundu di e dianan di Noe, i lo e kaba pa e sistema aktual. Apòstel Pedro ta sigurá nos: “E dia di Señor lo bin manera un ladron, den kual e shelunan lo pasa bai ku un boroto inmenso, i e elementonan lo wòrdu destruí ku un kalor intenso, i e tera i su obranan lo wòrdu kimá kompletamente.” Ni e shelunan simbóliko—gobièrnunan malbado—ni e tera simbóliko—humanidat alehá for di Dios—lo sobrebibí e furia di Dios su rabia ardiente. Indikando kon nos por demostrá di ta prepará pa e dia ei, Pedro a deklará: “Komo ku tur e kosnan aki lo wòrdu destruí di e manera aki, ki sorto di hende boso mester ta den un kondukta santu i deboto, sperando i purando e binida di e dia di Dios!”—2 Pedro 3:10-12.

²¹ Un parti di e kondukta deboto aki ta enserá asistí regularmente na reunionnan kristian i partisipá den predikashon di e bon nobo. Laga nos hasi nan ku deboshon sinsero na Dios miéntras ku nos ta warda ku pasenshi riba e gran dia di Yehova. Laga nos ta ‘diligente pa Dios haña nos den pas, sin mancha i sin kulpa.’—2 Pedro 3:14.

Bo Ta Kòrda?

• Dikon nos mester demostrá ku nos ta prepará pa e dia di Yehova?

• Kiko nos mester hasi si ta aktividatnan normal di bida a bira nos preokupashon prinsipal?

• Kiko lo yuda nos den nos lucha pa no kabishá spiritualmente?

• Ki estilonan di bida ku ta kousa daño nos tin ku evitá, i kon?

[Preguntanan di Estudio]

[Plachinan na página 20, 21]

E hendenan den tempu di Noe no a hasi kaso di e huisio inminente, abo si ta hasi kaso?

[Plachi na página 23]

Bo por simplifiká bo bida pa bo haña mas tempu pa aktividatnan spiritual?