Siña for di Hesus Su Famia Riba Tera

KIKO bo sa di Hesus su famia di kas, e hendenan ku el biba huntu kuné durante e promé 30 añanan di su bida riba tera te ora ku el a batisá? Kiko e relatonan di Evangelio ta konta nos? Kiko nos por siña for di un análisis di su famia? Bo por benefisiá di e kontestanan.

Hesus a nase ku un kuchara di plata den su boka, esta, den un famia riku? Su tata di kriansa, Hosé, tabata un karpinté. Esaki a nifiká trabou duru ku hopi bes a enserá kap palu for di den mondi pa traha kuné. Ora Hesus su mayornan humano a bai Yerusalèm mas o ménos 40 dia despues ku el a nase, nan a ofresé un ofrenda di sakrifisio ku e Lei a preskribí. Nan a ofresé un lamchi huntu ku un pichon òf tòrteldúif manera e Lei a stipulá? Nò. Ta parse ku nan no por a afòrt e ofrendanan ei. Sin embargo, e Lei tabatin areglo pa hende pober. Kumpliendo ku e areglo aki, Hosé ku Maria a ofresé “dos tòrteldúif òf dos pichon.” E echo ku nan a skohe e animalnan di mas barata a mustra ku nan tabata un famia pober.—Lukas 2:22-24; Levítiko 12:6, 8.

Bo por mira ku Hesukristu, e futuro Gobernante di humanidat kompletu, a nase den un famia pober, entre hendenan ku mester a traha duru pa kumpli ku e nesesidatnan básiko.  Ora el a bira grandi el a bira karpinté meskos ku su tata di kriansa. (Mateo 13:55; Marko 6:3) “Ounke [Hesus] tabata riku” komo un kriatura spiritual poderoso den shelu, Beibel ta bisa ku el a “bira pober” pa nos motibu. El a aseptá un posishon mas humilde komo hende i a krese den un famia di hende komun i koriente. (2 Korintionan 8:9; Filipensenan 2:5-9; Hebreonan 2:9) Hesus no a nase den un famia bon pará, i esaki kisas a pone ku algun hende por a identifiká nan mes kuné. Su status òf posishon no a stroba nan. Nan por a apresi’é pa su siñansa, su kualidatnan atraktivo i su obranan maravioso. (Mateo 7:28, 29; 9:19-33; 11:28, 29) Nos por mira Yehova Dios su sabiduria den e echo ku el a laga Hesus nase den un famia komun.

Laga nos konsiderá e miembronan di Hesus su famia i wak kiko nos por siña for di nan.

Hosé—Un Hòmber Hustu

Ora Hosé a haña sa ku su komprometida tabata na estado “promé ku nan a kasa,” lo e mester a sintié hopi angustiá pasobra e mester a skohe entre su amor pa Maria i su asko pa e supuesto inmoralidat. Henter e situashon a parse di ta un violashon di su derecho komo futuro esposo di Maria. Den su tempu, nan tabata konsiderá un muhé komprometí igual ku esposa di e hòmber. Despues di a pensa basta riba e asuntu, Hosé a disidí di divorsiá Maria den sekreto pa evitá ku Maria lo a ser piedrá komo adúltero.—Mateo 1:18, Beibel na papiamentu koriente; Deuteronomio 22:23, 24.

Despues un angel a aparesé den un soño na Hosé i a bis’é: “No tene miedu di tuma Maria komo bo esposa; pasobra loke a wòrdu konsebí den dje ta di spiritu santu. I e lo haña un yu hòmber; i lo bo dun’é e nòmber Hesus, pasobra ta e ta esun ku lo salba su pueblo di nan pikánan.” Despues ku Hosé a risibí e instrukshon aki for di Dios, el a aktua konforme ku esaki i a bai kas ku Maria.—Mateo 1:20-24.

Debí na e desishon aki e hòmber hustu i fiel ei a bira parti di e kumplimentu di loke Yehova a papia mediante profeta Isaias: “Mira, un bírgen lo sali na estado i lo haña un yu hòmber, i e lo dun’é e nòmber Emanuel.” (Isaias 7:14) Hosé sigur tabata un hòmber spiritual ku a apresiá e privilegio di por a bira e tata di kriansa di e Mesias, ounke Maria su primogénito lo no tabata su propio yu.

Hosé no a tene relashon seksual ku Maria promé ku su yu hòmber a nase. (Mateo 1:25) Pa e pareha ku awor a kaba di kasa, apstinensia di relashon seksual lo por tabata un desafio, pero aparentemente nan kier a evitá tur malkomprendementu tokante ken tabata Tata dje beibi. Esta un maravioso ehèmpel di dominio propio! Hosé a pone balornan spiritual promé ku su deseonan natural.

Na kuater okashon, Hosé a risibí instrukshon angelikal tokante kon pa lanta su yu di kriansa. Tres di esakinan tabata relashoná ku e sitio pa kria e mucha. Obedensia inmediato tabata vital pa e yu por a keda na bida. Na tur e okashonnan aki, Hosé a aktua mesora. Promé el a bai Egipto ku e mucha i despues a hib’é bèk Israel. Esaki a protehá e chikitin Hesus for di Herodes su masakre riba yu hòmbernan chikitu. Hosé su obedensia a resultá tambe den kumplimentu di profesianan relashoná ku e Mesias.—Mateo 2:13-23.

Hosé a siña Hesus un ofishi di manera ku e por a perkurá pa su mes. Pues, Hesus no tabata konosí solamente komo “yu di e karpinté” sino tambe komo “e karpinté.” (Mateo 13:55; Marko 6:3) Apòstel Pablo a skirbi ku Hesus “a wòrdu tentá den tur kos meskos ku nos.” Ta lógiko ku esaki a enserá traha duru pa yuda sostené e famia.—Hebreonan 4:15.

 Finalmente nos ta mira evidensia di Hosé su deboshon na adorashon berdadero den e último relato den kua e ta aparesé den Skritura Griego Kristian. Hosé a hiba su famia Yerusalèm pa selebrá Pasku Hudiu. Segun e Lei ta e hende hòmbernan so tabatin e obligashon di asistí, pero Hosé tabatin e kustumber di bai “tur aña” ku su famia kompletu Yerusalèm pa selebrá Pasku. El a hasi hopi sakrifisio pa nan por a kana mas o ménos 100 kilometer for di Názarèt te na Yerusalèm. Sin embargo, na e okashon ku Beibel ta papia di dje, Hesus a alehá for di e grupo. Nan a hañ’é den tèmpel ta skucha i hasi e maestronan di Lei pregunta. Ounke Hesus tabatin 12 aña so, el a manifestá gran sabiduria i konosementu di e Palabra di Dios. E insidente aki ta laga nos komprondé ku Hesus su mayornan mester a eduk’é bon, lant’é di tal manera ku e por a bira un mucha hòmber spiritual. (Lukas 2:41-50) Ta parse ku Hosé a muri algun tempu despues di e insidente aki pasobra e relatonan mas despues den e Skritura no ta hasi menshon di dje.

Sí, Hosé tabata un hòmber hustu ku a perkurá bon pa su famia, tantu spiritualmente komo físikamente. Abo tambe ta hasi manera Hosé, bo ta pone interesnan spiritual na promé lugá den bo bida ora bo diserní loke ta Dios su boluntat pa nos awe? (1 Timoteo 2:4, 5) Bo ta kla pa obedesé Dios su bos ekspresá den Su Palabra dor di mustra sumishon manera esun di Hosé? Bo ta siña bo yunan pa nan por kòmbersá riba tópikonan spiritual ku otro hende?

Maria—Un Sirbidó Inegoista di Dios

Maria mama di Hesus tabata un ekselente sirbidó di Dios. Ora angel Gabriel a bisa Maria ku lo e duna lus, el a keda sorprendí. E tabata “un bírgen,” e no a yega di tene relashon ku hende hòmber. Ora ku el a haña sa ku e nasementu dje yu lo a tuma lugá mediante e spiritu santu, el a aseptá e mensahe humildemente bisando: “Ata e sirbidó di Señor; laga sosodé ku mi segun bo palabra.” (Lukas 1:30-38) El a balorá e privilegio spiritual ei asina tantu ku e tabata dispuesto pa soportá kualke difikultat ku su desishon lo por a trese kuné.

Sí, dor di aseptá e tarea aki, henter su bida komo hende muhé a kambia. Ora ku Maria a bai Yerusalèm p’e wòrdu purifiká, un hòmber deboto ku yama Simeon a bis’é: “Un spada lo traspasá asta bo mes alma.” (Lukas 2:25-35) Evidentemente e tabata referí na e manera ku Maria lo a sinti ora e mira kon hopi hende ta rechasá Hesus i finalmente klab’é na un staka di tormento.

 Segun ku Hesus tabata krese, Maria tabata sigui retené den su mente loke a tuma lugá den bida di Hesus, el a “keda pensa riba nan den su kurason.” (Lukas 2:19, 51) Meskos ku Hosé, e tabata un persona spiritual i el a atesorá e suseso- i dichonan ku a kumpli ku profesia. Loke angel Gabriel a bis’é mester a keda ankrá den su mente: “E lo ta grandi i lo wòrdu yamá Yu di e Haltísimo; i Señor Dios lo dun’é e trono di su tata David; i e lo reina riba e kas di Jakòb pa semper, i su reino lo no tin fin.” (Lukas 1:32, 33) Sí, el a tuma su privilegio di por bira mama humano di e Mesias masha na serio.

Maria su spiritualidat tabata bisto tambe ora el a topa ku Elisabet, un famia di dje ku tambe a sali na estado milagrosamente. Ora ku Maria a mir’é, Maria a glorifiká Yehova i a revelá su amor pa e Palabra di Dios. El a referí na Ana su orashon ku nos ta haña den 1 Samuel kapítulo 2 i a inkluí pensamentunan di otro bukinan di e Skritura Hebreo. E konosementu ei di e Skritura a mustra ku e tabata kualifiká pa bira un mama deboto i temeroso di Dios. Lo el a koperá ku Hosé pa eduká nan yu hòmber spiritualmente.—Génesis 30:13; 1 Samuel 2:1-10; Malakias 3:12; Lukas 1:46-55.

Maria tabatin fe fuerte den su yu hòmber komo e Mesias, i esaki no a mengua ni despues di Hesus su morto. Djis despues di Hesus su resurekshon, e tabata entre e fiel disipelnan di Hesus ku a reuní pa hasi orashon huntu ku e apòstelnan. (Echonan 1:13, 14) El a mantené su fieldat, ounke e tabatin ku soportá e agonia di mira su yu stimá muri na un staka di tormento.

Kon bo por benefisiá di loke nos ta siña for di e bida di Maria? Bo ta aseptá e privilegio di sirbi Dios sin importá e sakrifisionan ku esaki ta enbolbé? E seriedat di e privilegio aki tin bo pleno atenshon awe? Bo ta tene na mente loke Hesus a predisí i ta kompar’é ku loke ta sosodé awe, esta, ‘pensa riba nan den bo kurason’? (Mateo, kapítulo 24 i 25; Marko, kapítulo 13; Lukas, kapítulo 21) Bo ta imitá Maria dor di familiarisá bo mes bon ku e Palabra di Dios, i us’é libremente ora bo ta kòmbersá? Abo lo mantené bo fe den Hesus apesar di angustia mental ku lo bo por haña bo kuné pa motibu ku bo ta su siguidó?

Hesus Su Rumannan —Hende Por Kambia

Ta parse ku ta despues di Hesus su morto su rumannan a kuminsá ehersé fe den dje.  Probablemente ta p’esei nan no tabata presente ora Hesus a muri n’e staka di tormento, i ku e mester a enkargá apòstel Juan pa kuida su mama. Hesus su famianan a mustra ku nan no tabatin rèspèt p’e, i na un okashon nan a asta bisa ku Hesus “su kabes no ta bon.” (Marko 3:21) Ya ku Hesus tabatin miembronan di famia ku no tabata kreyente, rumannan awe ku tin famianan di kas ku no ta kreyente por tin konfiansa ku Hesus ta komprondé kon nan ta sinti ora nan miembronan di famia ta tene mofa di nan pa motibu di nan fe.

Sin embargo, ta parse ku Hesus su rumannan a kuminsá ehersé fe den dje despues di su resurekshon. Nan tabata entre e grupo ku a reuní na Yerusalèm promé ku Pentekòste di aña 33 di nos era i a hasi orashon ferviente huntu ku e apòstelnan. (Echonan 1:14) Ta opvio ku e resurekshon di nan mitar ruman a motivá nan pa kambia nan kurason te na e punto ku nan a bira su disipel. Nunka nos mester pèrdè speransa relashoná ku nos famianan ku no tin e mesun religion ku nos.

E Skritura ta mustra ku Santiago, Hesus su mitar ruman, na ken El aparesé personalmente, a hunga un papel sobresaliente den e kongregashon kristian. El a skirbi un karta inspirá dor di Dios na su kompañeronan kristian, enkurashando nan pa mantené nan fe. (Echonan 15:6-29; 1 Korintionan 15:7; Galationan 1:18, 19; 2:9; Santiago 1:1) Hudas, un otro mitar ruman di Hesus, a skirbi un karta inspirá pa animá kompañeronan kreyente pa hiba un lucha fuerte pa e fe. (Hudas 1) Ta bon pa remarká ku den nan kartanan, ni Santiago ni Hudas no a usa e laso familiar ku nan tabatin ku Hesus pa konvensé nan kompañeronan kristian. Esta un maravioso lès di modestia nos por siña for di nan!

Pues, kiko ta algun dje kosnan ku nos por siña for di Hesus su famia? Siguramente nos por siña lèsnan relashoná ku deboshon ku por ser manifestá den e siguiente maneranan: (1) Someté bo mes fielmente na e boluntat ekspresá di Dios i enfrentá tur prueba ku esaki ta trese kuné. (2) Pone kosnan spiritual na promé lugá asta si esaki ta nifiká ku nos mester hasi sakrifisio. (3) Kria bo yunan na armonia ku e Skritura. (4) No pèrdè speransa relashoná ku miembronan di famia ku no tin e mesun religion ku bo. (5) No broma pasobra bo tin famia ku ta prominente den e kongregashon kristian. Sí, siña di Hesus su famia riba tera, ta hala nos mas serka dje, i oumentá nos apresio p’e echo ku Yehova a skohe un famia komun i koriente pa kria Hesus durante su hubentut.

[Plachinan na página 4, 5]

Hosé a tuma Maria komo su esposa i a bira parti di e kumplimentu di e profesianan Mesiániko

[Plachinan na página 6]

Hosé i Maria a siña nan yunan balornan spiritual i e importansia di trabou

[Plachinan na página 7]

Ounke Hesus su rumannan a lanta den un famia spiritual, ta despues di su morto nan a pone fe den dje

[Plachinan na página 8]

Hesus su mitar rumannan, Santiago i Hudas a animá nan kompañeronan kristian