Dios Ta Interesá den Nos?

BO TA sinti bo kargá emoshonalmente pa motibu di problema ku bo famia, salú, trabou òf pa via di otro responsabilidatnan pisá? Hopi hende ta sinti nan asina. I ken no ta ser afektá awendia dor di inhustisia, krímen i violensia? Sí, ta presis manera Beibel ta bisa: ‘Henter e kreashon ta keha i ta sufri doló, te awor.’ (Romanonan 8:22) Ta di komprondé ku hopi hende ta puntra: ‘Dios no ta interesá? Lo e no yuda nos?’

E rei sabí Salomon a bisa Dios den orashon: “Abo so konosé kurason di e yunan di hende.” Salomon tabatin konfiansa ku Dios no solamente konosé nos sino tambe ta interesá den kada un di nos. E por a pidi Dios pa ‘tende for di shelu’ i kontestá e orashon di kada hende ku ta teme Dios i ta revelá na Dios “su mes aflikshon i su mes doló.”—2 Krónikanan 6:29, 30.

Awendia, ketu bai Yehova Dios ta interesá den nos i ta invitá nos pa akudí na dje den orashon. (Salmo 50:15) E ta primintí di kontestá orashonnan sinsero ku ta na armonia ku su boluntat. (Salmo 55:16, 22; Lukas 11:5-13; 2 Korintionan 4:7) Sí, Yehova ta skucha ‘kualke orashon òf súplika ku un hende òf ku henter su pueblo hasi.’ Pues, si nos pone konfiansa den Dios, pidié pa yudansa den orashon i hala serka dje, nos lo eksperensiá su kuido amoroso i guia. (Proverbionan 3:5, 6) E eskritor di Beibel Santiago ta sigurá nos: “Hala serka Dios i e lo hala serka boso.”—Santiago 4:8.