Fin di Guera

‘Nos tin 12 aña so. Nos no por influensiá polítika ni guera, pero nos ke biba! Nos ta warda riba pas. Lo e bin ora nos ta na bida ainda?’—Muchanan di un vijfde klas

‘Nos tin gana di bai skol i bishitá nos amigunan i famianan sin temor di wòrdu sekuestrá. Mi ta spera ku gobièrnu lo hasi kaso. Nos ke tin un mihó bida. Nos ke pas.’—Alhaji, di 14 aña

E PALABRANAN konmovedor aki ta transmití e deseo di kurason di hóbennan ku a sufri pa añanan largu pa motibu di kombatenan sivil. Nan úniko deseo ta pa hiba un bida normal. Pero no ta nada fásil pa kombertí un speransa den realidat. Nos lo biba pa mira un mundu sin guera?

Den añanan resiente, esfuerso internashonal a wòrdu hasí pa resolvé algun guera sivil dor di preshoná gruponan ku ta kontra otro pa firma akuerdo di pas. Pa efektuá tal tratado algun pais a manda trupanan militar ku mester mantené òrdu i pas. Pero masha poko nashon tin e plaka òf e deseo pa monitor e paisnan leu ei. Den e paisnan ei kualke tratado entre gruponan ku ta den guera kontra otro, ta masha frágil debí na deskonfiansa i odio ku ta profundamente ankrá. Frekuentemente, un par di siman òf luna despues ku nan a kaba di firma un tregua òf sese di fuego, e chispa di e konflikto ta sende atrobe. Manera e Instituto pa Investigashon pa Pas Internashonal di Stockholm ta indiká: “Ta masha difísil pa logra pas ora esnan ku ta den kombate tin e deseo i e kapasidat pa sigui bringa.”

Na mes momentu, e konfliktonan aki ku ta hopi difísil pa solushoná i ku ta plaga asina hopi parti di mundu ta pone kristiannan kòrda riba un profesia di Beibel. E buki di Revelashon ta papia di un periodo krítiko den historia durante kua un ginete simbóliko lo “kita pas for di riba tera.” (Revelashon 6:4) E kuadro aki di guera kontinuo ta parti di un señal komponí ku ta indiká ku nos ta bibando awor den un tempu deskribí den Beibel komo “e último dianan.” * (2 Timoteo 3:1) Sin embargo, e Palabra di Dios ta sigurá nos ku e último dianan aki ta loke lo hiba na pas.

Beibel ta splika na Salmo 46:9 ku pa por tin berdadero pas ta nesesario pa pone un fin na guera, no djis den un parti di e tera so, sino rònt mundu. Ademas, e mesun salmo aki ta papia spesífikamente tokante e destrukshon di armanan di tempunan bíbliko: e bog i e lansa. Di igual manera e kantidat kresiente di armanan djawe mester wòrdu destruí pa un dia humanidat por yega di tin pas.

Pero al fin i al kabo ta odio i golosidat ta loke ta basha gasolin riba e kandela, esta stimulá guera, i no bala ku rifel. Kudishi òf golosidat, ta un kousa fundamental di guera, i  odio hopi bes ta hiba na violensia. Pa eliminá e sintimentunan destruktivo aki, hende mester kambia nan manera di pensa. Nan mester wòrdu eduká pa hiba un bida pasífiko. Pues, e profeta Isaias di antigwedat a deklará realístikamente ku guera lo stòp solamente ora hende ‘lo no train pa guera mas.’—Isaias 2:4.

Sin embargo, aktualmente nos ta biba den un mundu ku ta siña tantu hende grandi komo mucha, no e balor di pas sino e gloria di guera. Ta tristu ku asta mucha ta wòrdu entrená pa mata.

Nan A Siña Mata

Tempu Alhaji tabatin 14 aña, e no tabata un sòldá den sirbishi militar mas. E tabatin solamente dies aña ora trupanan rebelde a kaptur’é i a train e pa bringa ku rifel outomátiko AK-47. Despues ku el a wòrdu fòrsá pa bira sòldá, e tabata atraká lugánan p’e haña kuminda i kima kasnan. Tambe e tabata mata i mutilá hende. Awor, Alhaji ta haña ku ta masha difísil p’e lubidá guera i adaptá na bida sivil. Abraham, un otro mucha ku ta sòldá, tambe a siña mata i no kier a entregá su arma. El a bisa: “Si nan bisa mi bai sin mi arma, mi no sa kiko mi tin ku hasi pa mi haña mi kuminda.”

Mas ku 300.000 mucha ku ta sòldá, tantu mucha muhé komo mucha hòmber, ainda ta bringa i ta pèrdè nan bida den konfliktonan sivil interminabel ku ta plaga nos planeta. Un lider rebelde a splika: “Nan ta sigui òrdu; nan no tin e preokupashon di bai bèk serka nan kasá òf famia i nan no tin miedu.” Sin embargo, e muchanan aki ta deseá i ta meresé un mihó bida.

Den paisnan desaroyá, e imágen repugnante di un mucha ku ta sòldá ta difísil pa imaginá. Pero tòg, hopi mucha ku ta biba den paisnan desaroyá a siña kon pa bringa guera na nan propio kas. Kon asina?

Ban wak e ehèmpel di José di zùitost Spaña. E tabata un tiner ku ta gusta train arte marsial. Su spada samurai ku su tata a regal’é pa Pasku tabata su poseshon mas balioso. I e tabata gusta weganan di vidio, spesialmente esnan violento. Dia 1 di aprel di aña 2000, el a imitá su héroe di weganan di vidio ku ta hopi violento. Den un eksploshon deskontrolá di violensia, el a mata su tata, su mama i su ruman muhé ku e mesun spada ku su tata a regal’é. El a splika polis: “Mi tabata ke ta mi so den mundu; Mi no tabata ke pa mi mayornan buska mi.”

Komentando riba e efekto di entretenimentu violento, outor i ofisial di ehérsito Dave Grossman a remarká: “Nos ta yegando un etapa ku nos a bira asina sin heful, ku doló i sufrimentu di otro hende a bira un fuente di entretenimentu; i en bes di haña asko pa e kosnan aki, nos ta gosa mas ainda ora nos imaginá ku nos mes ta den e esena. Nos ta siña mata, i ta siña disfrutá di dje.”

Tantu Alhaji komo José a siña mata. Ningun di nan dos tabatin intenshon di bira matadó, pero un òf otro tipo di entrenamentu a trose nan pensamentu. Tal training—sea pa mucha òf hende grandi—ta planta e simianan di violensia i guera.

Siña Biba na Pas en bes di Train pa Guera

Tanten ku hende ta siña mata, pas duradero no por wòrdu lográ. Hopi siglo pasá, profeta Isaias a skirbi: “Mara bo a pone atenshon na mi mandamentunan! E ora ei bo pas lo tabata manera un riu.” (Isaias 48:17, 18) Ora hende haña konosementu eksakto di e Palabra di Dios i siña stima e lei di Dios, nan ta haña un asko pa guera i violensia. Asta for di awor, ta bon pa mayornan hasi sigur ku e weganan ku nan yunan ta hunga no ta promové violensia. Hende grandi tambe por siña vense odio i golosidat. Bes tras bes Testigunan di Yehova a deskubrí ku e Palabra di Dios tin poder pa kambia personalidat di hende.—Hebreonan 4:12.

 Konsiderá e ehèmpel di Hortêncio. E tabata un yònkuman ora el a wòrdu reklutá pa bira un sòldá kontra su boluntat. E ta splika ku training militar tabata diseñá pa: “Inkulká den nos e deseo pa mata otro hende i pa no tene niun tiki miedu di mata.” El a bringa den un guera sivil na Afrika ku ya tabata andando pa hopi tempu kaba. E ta atmití: “Guera a afektá mi personalidat. Te awe ainda mi ta kòrda tur kos ku mi a hasi, i mi ta sinti mi hopi malu tokante loke nan a forsa mi pa hasi.”

Ora un di e otro sòldánan a papia ku Hortêncio tokante Beibel, e palabra a touch su kurason. E promesa di Dios na Salmo 46:9 pa pone un fin na tur forma di guera a impreshon’é. Mas el a studia Beibel, ménos gana e tabatin pa bringa den guera. No a dura hopi ku tantu e komo dos otro kompañero di dje a wòrdu saká for di ehérsito, i nan a dediká nan bida na Yehova Dios. Hortêncio ta splika: “Bèrdat di Beibel a yuda mi haña amor pa mi enemigu. Mi a realisá ku dor di bringa den guera, eigenlijk mi tabata peka kontra Yehova, pasobra Dios ta bisa ku nos no mester mata nos enemigu. Pa desplegá e amor aki, mi mester a kambia mi manera di pensa i no konsiderá hende komo mi enemigu.”

E eksperensianan ei ta mustra ku edukashon bíbliko sin duda ta promové pas. Esaki no ta nada straño. Profeta Isaias a deklará ku tin un relashon direkto entre edukashon divino i pas. El a predisí: “Tur bo yunan lo ta personanan siñá pa Yehova, i e pas di bo yunan lo ta abundante.” (Isaias 54:13, NW) E mesun profeta a premirá un tempu ora hende di tur nashon lo basha bai na adorashon puru di Yehova Dios pa siña di su kamindanan. Ku ki resultado? “Nan lo bati nan spadanan traha plug ku nan, i nan lo bati nan lansanan traha skèr-pa-snui ku nan. Nashon lo no lanta spada kontra nashon, i nunka mas nan lo train pa guera.”—Isaias 2:2-4.

Na armonia ku e profesia ei, Testigunan di Yehova ta partisipando den un obra di edukashon mundial ku ya kaba a yuda miónes di hende pa vense odio ku ta e rais di guera.

Un Garantia pa Pas Mundial

Ademas di perkurá pa edukashon, Dios a establesé un gobièrnu, òf “reino,” ku por sigurá pas mundial. Interesantemente, Beibel ta deskribí e Gobernante ku Dios a skohe, esta, Hesukristu komo e “Prens di Pas.” Tambe Beibel ta sigurá nos ku “lo no tin fin na e oumento di su gobernashon i di pas.”—Isaias 9:6, 7.

Ki garantia nos tin ku Kristu su gobernashon lo eliminá tur tipo di guera ku éksito? Profeta Isaias ta agregá: “E selo di e SEÑOR di ehérsitonan lo hasi esaki.” (Isaias 9:7) Dios tin e deseo i e abilidat pa preservá pas duradero. Hesus tin pleno konfiansa den e promesa aki. Ta p’esei el a siña su siguidónan pa pidi den orashon pa e Reino di Dios bini i pa Dios su boluntat sosodé na tera. (Mateo 6:9, 10) Ora e petishon sinsero ei finalmente haña kontesta, nunka mas guera lo asotá e superfisie di tera.

[Nota]

[Plachi na página 7]

Edukashon bíbliko ta promové berdadero pas