Laga Nos Tur Proklamá e Gloria di Yehova

“Atribuí na SEÑOR gloria i poder. Atribuí na SEÑOR e gloria debí na su nòmber.”—SALMO 96:7, 8.

1, 2. For di ki fuente alabansa ta ser atribuí na Yehova, i ken ta ser animá pa djòin den esei?

DAVID, yu di Isaí, a lanta komo un mucha wardadó di karné den bisindario di Bètlehèm. Hopi bes durante e silensio di anochi lo e tabatin su bista intensamente fihá riba e inmensidat di shelu yen di strea, miéntras ku e tabata kuida e tounan di su tata den e sabananan solitario ei. Sin duda, e imágennan bibu ei a bin na su mente ora ku, inspirá pa Dios su spiritu santu, el a komponé i kanta e bunita palabranan di Salmo 19: “E shelunan ta konta di e gloria di Dios; i e firmamentu ta proklamá e obra di su mannan. Nan liña ta sali bai riba henter tera, i nan palabranan te na e finnan di mundu.”—Salmo 19:1, 4.

² E shelunan impreshonante ku Yehova a kreá ta proklamá su gloria ‘sin papia, sin palabra, sin bos,’ dia tras dia, nochi tras nochi. (Salmo 19:2, 3) Kreashon nunka no ta stòp di proklamá e gloria di Dios. I ora nos kontemplá e testimonio silensioso aki ku ta manifestá su mes na “henter tera” pa tur habitante mira, nos ta realisá kon insignifikante nos ta. Sin embargo, e testimonio silensioso aki di kreashon no ta basta. Hende fiel ta ser animá pa djòin e dunamentu di testimonio ku nan stèm. Un salmista kende su nòmber no ta ser menshoná, a dirigí su mes na adoradónan fiel ku e palabranan inspirá aki: “Atribuí na [Yehova] gloria i poder. Atribuí na [Yehova] e gloria debí na su nòmber.” (Salmo 96:7, 8) Hende ku tin un relashon será ku Yehova ta hopi kontentu ku nan por respondé na e yamada ei. Pero kiko atribuí gloria na Dios ta enserá?

3. Dikon hende ta atribuí gloria na Dios?

³ Glorifiká Dios ta rekerí mas ku simplemente palabra. E israelitanan den tempu di Isaias a glorifiká Dios ku nan lepnan, pero mayoria tabata falta sinseridat. Mediante Isaias, Yehova a bisa: “E hendenan aki ta aserká mi ku nan boka i ta onra mi ku nan lepnan, ma nan kurason ta leu for di mi.” (Isaias 29:13) Alabansa ku personanan asina a ekspresá no tabatin balor. Pa alabansa tin balor, e mester sali for di un kurason yen di amor pa  Yehova i ku sinseramente ta rekonosé Yehova su gloria úniko. Ta Yehova so ta e Kreadó. E ta e Todopoderoso, e persona mas hustu den universo, e personifikashon di amor. E ta e fuente di nos salbashon i e Soberano legítimo na ken tur ku ta biba den shelu i riba tera debe sumishon. (Revelashon 4:11; 19:1) Si di bèrdat nos ta kere e kosnan aki, anto laga nos glorifik’é di henter nos kurason.

4. Ki instrukshon Hesus a duna relashoná ku e manera pa glorifiká Dios, i kon nos por kumpli ku nan?

⁴ Hesukristu a konta nos kon pa glorifiká Dios. El a bisa: “Den esaki mi Tata ta wòrdu glorifiká, ku boso ta karga hopi fruta i asina ta demostrá di ta mi disipelnan.” (Juan 15:8) Kon nos ta karga hopi fruta? Na promé lugá, dor di partisipá di henter alma den e predikashon di e ‘evangelio di e reino’ i di e manera ei nos ta djòin tur kos kreá ku ta “proklamá” Dios su “atributonan invisibel.” (Mateo 24:14; Romanonan 1:20) Ademas, den e manera aki nos tur—direktamente òf indirektamente—ta yuda hasi disipelnan nobo ku ta oumentá e koro di alabansa na Yehova Dios. Na di dos lugá, nos ta kultivá e fruta ku spiritu santu ta produsí den nos i nos ta hasi esfuerso pa imitá Yehova Dios su kualidatnan ekstraordinario. (Galationan 5:22, 23; Efesionan 5:1; Kolosensenan 3:10) Komo resultado, nos kondukta diario ta glorifiká Dios.

“Den Henter e Tera”

5. Splika kon Pablo a enfatisá e responsabilidat ku kristiannan tin di glorifiká Dios dor di kompartí nan fe ku otro hende.

⁵ Pablo, den su karta na e romanonan, a enfatisá e responsabilidat ku kristiannan tin di glorifiká Dios dor di kompartí nan fe ku otro hende. Un mensahe prinsipal di e buki di Romanonan ta, ku ta solamente esnan ku ehersé fe den Hesukristu por haña salbashon. Den kapítulo 10 di su karta, Pablo a mustra ku e hudiunan di su tempu ainda tabata purba haña un posishon hustu dor di sigui e Lei di Moisés, ounke ku “Kristu [tabata] fin di lei.” P’esei Pablo a bisa: “Si bo konfesá ku bo boka [“deklará públikamente,” NW] Hesus komo Señor, i kere den bo kurason ku Dios a lant’é for di e mortonan, lo bo ta salbá.” For di e tempu ei padilanti, “no [tabatin] distinshon entre hudiu i griego; pasobra e mes Señor ta Señor di tur, ku rikesa abundante pa tur ku ta invok’é; pasobra: ‘Ken ku invoká e nòmber di [Yehova] lo ta salbá.’”—Romanonan 10:4, 9-13.

6. Kon Pablo a apliká Salmo 19:4?

⁶ Anto Pablo a puntra lógikamente: “Kon anto nan lo invoká esun, den kende nan no a kere? I kon nan lo kere den esun, di kende nan no a tende? I kon nan lo tende sin un predikadó?” (Romanonan 10:14) Pablo a bisa di Israel: “No ta tur a obedesé e evangelio.” Dikon Israel no a obedesé? Debí na falta di fe, no debí na falta di oportunidat. Pablo a mustra esaki dor di sita Salmo 19:4 i a aplik’é na e trabou kristian di prediká en bes di na e testimonio silensioso di kreashon. El a bisa: “Nan bos a sali bai den henter e tera, i nan palabranan te na e finnan di mundu.” (Romanonan 10:16, 18) Sí, meskos ku e kreashon sin bida ta glorifiká Yehova, kristiannan di promé siglo a prediká e bon nobo di salbashon tur kaminda i di e manera ei a alabá Dios den “henter e tera.” Den su karta na e kolosensenan, Pablo a deskribí tambe te kon leu e bon nobo a yega. El a bisa ku e bon nobo a ser proklamá “den henter kreashon bou di shelu.”—Kolosensenan 1:23.

Testigunan Seloso

7. Segun Hesus, ki responsabilidat kristiannan tin?

⁷ Pablo probablemente a skirbi su karta na e  kolosensenan rònt di 27 aña despues di e morto di Hesukristu. Kon bini e trabou di prediká por a yega te na Kolosas den un tempu relativamente kòrtiku asina? Esei a sosodé pasobra e kristiannan di promé siglo tabata seloso, i Yehova a bendishoná nan selo. Hesus a profetisá ku su siguidónan lo ta predikadónan aktivo ora el a bisa: “E evangelio mester wòrdu prediká promé na tur nashon.” (Marko 13:10) Ta na e profesia ei Hesus a agregá e mandamentu ku ta pará skirbí den e último versíkulonan di e Evangelio di Mateo: “P’esei, bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.” (Mateo 28:19, 20) Djis despues ku Hesus a subi na shelu, su siguidónan a kuminsá kumpli ku e palabranan ei.

8, 9. Segun e buki di Echonan, kon kristiannan a reakshoná riba loke Hesus a ordená?

⁸ Despues ku spiritu santu a wòrdu dramá riba e siguidónan fiel di Hesus na Pentekòste di aña 33, e promé kos ku nan a hasi ta di sali pafó i prediká, kontando e multitutnan di hende na Yerusalèm “di e echonan poderoso di Dios.” Nan predikashon tabata sumamente efektivo, i “mas o ménos tres mil alma” a ser batisá. E disipelnan a sigui alabá Dios públikamente i selosamente, anto ku bon resultado.—Echonan 2:4, 11, 41, 46, 47.

⁹ No a tarda hopi ku e aktividatnan di e kristiannan ei a kapta atenshon di e lidernan religioso. Molestiá pa e manera franko i ku konfiansa ku Pedro i Juan tabata papia, nan a ordená e dos apòstelnan pa stòp di prediká. E apòstelnan a respondé: “Nos no por laga di papia loke nos a mira i tende.” Despues di a wòrdu menasá i librá, Pedro ku Juan a bai bèk serka nan rumannan, i nan tur huntu a hasi orashon na Yehova. Ku kurashi nan a pidi Yehova: “Laga bo sirbidónan papia bo palabra ku tur konfiansa.”—Echonan 4:13, 20, 29.

10. Ki oposishon a presentá, i kon kristiannan berdadero a reakshoná?

¹⁰ Manera a bira bisto un poko despues, e orashon ei tabata na armonia ku e boluntat di Yehova. E apòstelnan a ser arestá, anto un angel a libra nan milagrosamente. E angel a bisa nan: “Boso bai para den tèmpel i papia ku e pueblo tur e palabranan di e bida aki.” (Echonan 5:18-20) Komo ku e apòstelnan a obedesé, Yehova a sigui bendishoná nan. P’esei, “tur dia, den tèmpel i di kas pa kas, nan tabata sigui siña hende i prediká Hesus komo e Kristu.” (Echonan 5:42) Klaramente, oposishon severo no por a stòp e siguidónan di Hesus di atribuí gloria na Dios públikamente.

11. Kiko tabata e aktitut di e promé kristiannan pa ku e trabou di prediká?

 ¹¹ Poko despues nan a arestá Esteban i a piedr’é mata. Su asesinato a start un persekushon feros den Yerusalèm, i tur e disipelnan a haña nan fòrsá ta sali for di Yerusalèm, ku eksepshon di e apòstelnan. E persekushon a desanimá e disipelnan? Di ningun manera. Nos ta lesa: “Esnan anto ku a wòrdu plamá a bai tur kaminda, predikando e palabra.” (Echonan 8:1, 4) Anto bes tras bes nos por a mira nan selo pa proklamá e gloria di Dios. Den Echonan kapítulo 9, nos ta lesa ku e fariseo Saul di Tarso, bayendo rumbo pa Damasko pa kuminsá persiguí e disipelnan di Hesus einan, a mira un vishon di Hesus i bira siegu. Na Damasko, Ananias a kura Saul su bista milagrosamente. Kiko tabata e promé kos ku Saul—konosí despues komo apòstel Pablo—a hasi? Beibel ta bisa: “Mesora el a kuminsá proklamá Hesus den e snoanan, bisando: ‘E ta e Yu di Dios.’”—Echonan 9:20.

Tur Hende A Partisipá den e Predikashon

12, 13. (a) Segun historiadónan, kiko tabata remarkabel di e kongregashon kristian di promé? (b) Kon e buki di Echonan i e palabranan di Pablo ta kuadra ku e deklarashon di historiadónan?

¹² En general ta ser rekonosé ku tur hende den e kongregashon kristian di promé a partisipá den e trabou di prediká. Philip Schaff a skirbi di e kristiannan di e tempu ei: “Tur kongregashon tabata un sosiedat di misionero, i tur kreyente kristian tabata un misionero.” (History of the Christian Church [Historia di e Iglesia Kristian]) W. S. Williams a deklará: “E testimonio general ta ku tur kristian den e Iglesia di promé, spesialmente esnan ku tabatin e donnan karismátiko [donnan di spiritu], a prediká e evangelio.” (The Glorious Ministry of the Laity [E Sirbishi Glorioso di Laiko]) Tambe el a bisa ku konvikshon: “Nunka no tabata Hesukristu su intenshon pa e predikashon ta un privilegio eksklusivo di sierto rangonan di e ministerio.” Asta Celso, un enemigu di kristianismo di antigwedat, a skirbi: “Obreronan di lana, sapaténan, kurtidónan di kueru, e hendenan mas komun i sin edukashon, tabata predikadó seloso di e evangelio.”

¹³ E registro históriko di Echonan ta konfirmá e eksaktitut di e deklarashonnan ei. Na Pentekòste di aña 33, despues ku spiritu santu a wòrdu dramá, tur disipel, hòmber i muhé, a proklamá e echonan poderoso di Dios públikamente. Despues di e persekushon ku a lanta ora nan a asesiná Esteban, tur kristian ku a haña nan fòrsá ta hui pa eksterior, a plama e bon nobo tur kaminda. Un 28 aña despues, Pablo a skirbi un karta ku tabata dirigí na tur kristian hebreo, no simplemente na un grupo chikí di klero, ora el a bisa: “Dor di dje anto, laga nos ofresé kontinuamente un sakrifisio di alabansa na Dios, esta, e fruta di lepnan ku ta duna gradisimentu [òf, “hasi deklarashon públiko,” NW] na su nòmber.” (Hebreonan 13:15) Deskribiendo su propio punto di bista di e trabou di prediká, Pablo a bisa: “Pasobra si mi ta prediká evangelio, mi no tin nada pa gaba di dje, pasobra ta mi obligashon; pasobra ai di mi si mi no prediká evangelio!” (1 Korintionan 9:16) Ta bisto ku den promé siglo tur kristian fiel a pensa meskos.

14. Kiko ta e relashon entre fe i predikashon?

¹⁴ Sí, un kristian berdadero tin ku partisipá den e trabou di prediká pasobra esei ta inseparablemente ligá ku fe. Pablo a bisa: “Ku kurason hende ta kere pa haña hustisia, i ku boka e ta konfesá [“hasi deklarashon públiko,” NW] pa haña salbashon.” (Romanonan 10:10) Ta solamente un grupo chikí den e kongregashon—manera un grupo di klero—ta ehersé fe i p’esei tin e responsabilidat di prediká? *  Klaru ku nò! Tur kristian berdadero ta kultivá un fe bibu den e Señor Hesukristu i ta ser motivá pa hasi deklarashon públiko di e fe ei na otro hende. Di otro manera, nan fe ta morto. (Santiago 2:26) Komo ku tur kristian fiel den e promé siglo di nos era a demostrá nan fe di e manera aki, un gran gritu di alabansa na e nòmber di Yehova a ser tendí.

15, 16. Duna ehèmpelnan ku ta mustra ku e trabou di prediká a bai dilanti apesar di problema.

¹⁵ Den promé siglo, Yehova a bendishoná su pueblo ku oumento apesar di problemanan paden i pafó di e kongregashon. Por ehèmpel, Echonan kapítulo 6 ta konta di un desakuerdo ku tabatin entre e disipelnan di abla hebreo i esnan di abla griego. E apòstelnan a resolvé e problema. Nos ta lesa loke tabata e resultado: “E palabra di Dios a sigui plama; i e kantidat di disipel a sigui oumentá masha hopi mes na Yerusalèm, i un kantidat grandi di e saserdotenan tabata bira obedesidu na e fe.”—Echonan 6:7.

¹⁶ Despues, tenshon polítiko a lanta entre Rei Herodes Agripa di Judea i e pueblo di Tiro i Sidon. E habitantenan di e statnan ei a labia e rei ku súplikanan pa pas, i Herodes a reakshoná ku un diskurso. E multitut kongregá a kuminsá grita: “Ta bos di un dios i no di un hende!” Mesora, un angel di Yehova a dal Herodes Agripa, i el a muri “pasobra e no a duna Dios e gloria.” (Echonan 12:20-23) Ki un shòk pa esnan ku a pone nan speransa den gobernantenan humano! (Salmo 146:3, 4) Sin embargo, e kristiannan a sigui glorifiká Yehova. Konsekuentemente, “e palabra di Dios a sigui krese i a multipliká” apesar di tal instabilidat polítiko.—Echonan 12:24.

Ántes i Awor

17. Den promé siglo, den ki obra un kresiente kantidat di hende a djòin?

¹⁷ Sí, e kongregashon kristian mundial den promé siglo a konsistí di alabadónan di Yehova Dios ku tabata seloso i aktivo. Tur kristian fiel a partisipá den e trabou di plama e bon nobo. Algun kristian a topa hende ku a reakshoná faborabel, i manera Hesus a bisa, nan a siña e hendenan ei obedesé tur loke el a ordená. (Mateo 28:19, 20) Komo resultado e kongregashon a krese, i mas i mas hende a djòin Rei David di antigwedat den atribuí alabansa na Yehova. Nan tur a ripití e palabranan inspirá: “Lo mi alabá bo, o Señor mi Dios, ku henter mi kurason, i lo mi glorifiká bo nòmber pa semper. Pasobra bo miserikòrdia pa ku mi ta grandi.”—Salmo 86:12, 13.

18. (a) Ki diferensia hende a nota entre e kongregashon kristian di promé siglo i kristiandat djawe? (b) Kiko nos lo konsiderá den e siguiente artíkulo?

¹⁸ En bista di esaki, e palabranan di e profèser di teologia Allison A. Trites ta pone nos pensa. Komparando kristiandat djawe ku kristianismo di promé siglo, el a bisa: “Iglesianan djawe ta oumentá generalmente dor di kresementu biológiko (ora ku yunan den un famia di e iglesia lokal personalmente ta deklará nan fe) òf dor di kresementu di transferensia (ora ku un hende ta muda bini di un otro iglesia lokal). Sin embargo, den Echonan e kresementu tabata dor di kombertimentu, pasobra nèt e iglesia a kuminsá ku su trabou.” Esaki ta nifiká ku kristianismo berdadero no ta kresiendo mas den e manera ku Hesus a bisa ku lo e krese? Klaru ku nò. Kristiannan berdadero djawe ta mesun seloso ku kristiannan di promé siglo den atribuí alabansa na Dios públikamente. Nos lo mira esaki den e siguiente artíkulo.

[Nota]

Bo Por Splika?

• Den ki maneranan nos ta glorifiká Dios?

• Kon Pablo a apliká Salmo 19:4?

• Kiko ta e relashon entre fe i predikashon?

• Kiko tabata remarkabel di e kongregashon kristian di promé siglo?

[Preguntanan di Estudio]

[Plachi na página 8, 9]

Shelu konstantemente ta duna testimonio di e gloria di Yehova

[Rekonosementu]

Kortesia di Anglo-Australian Observatory, potrèt saká pa David Malin

[Plachi na página 10]

E trabou di prediká i orashon ta estrechamente ligá