Historia di Bida

Rekompensá Abundantemente dor di A Mantené e Spiritu di Misionero

SEGUN E RELATO DI TOM COOKE

E zonidu di arma di kandela diripiente a interumpí e trankilidat di atardi. Bala tabata skeiru dor di e palunan di nos hardin. Kiko tabata pasando? Un poko despues nos a haña sa ku un gòlpi di estado a tuma lugá i ku Uganda awor tabata bou di mando di General Idi Amin. E kosnan aki a tuma lugá na 1971.

KON bin ami ku mi kasá Ann, a muda for di Inglatera ku ta un lugá relativamente pasífiko, pa bai biba na e parti di Afrika aki ku ta instabil i kisas peligroso? Mi ta pensa ku di naturalesa mi ta un tiki aventurero, pero prinsipalmente ta e selo ku mi mayornan a desplegá den sirbishi di Reino ta loke a planta den mi e spiritu di misionero.

Mi ta kòrda ku e promé bes ku mi mayornan a papia ku Testigunan di Yehova tabata na ougùstùs 1946, un dia ku a hasi hopi kalor. Nan a para papia na porta ku dos bishitante i a parse mi ku esei a dura oranan largu. E dos bishitantenan aki, Fraser Bradbury i Mamie Shreve, a bin bèk basta biaha, i durante e lunanan ku a sigui, e bida di nos famia a kambia drástikamente.

E Ehèmpel di Kurashi di Mi Mayornan

Mi mayornan tabata enbolbí den diferente aktividat di komunidat. Por ehèmpel, poko promé ku nan a kuminsá studia Beibel, tabatin poster grandi di Winston Churchill tur kaminda den nos kas. Durante e elekshonnan nashonal despues di guera, nos kas tabata ser usá komo sentro lokal di e Komité di Partido Konservativo.  Tambe nos famia tabatin hopi konosí prominente tantu den iglesia komo den komunidat. Maske e tempu ei mi tabatin nuebe aña so, mi a sinti kon sorprendí nos famianan a keda ora nan a realisá ku nos lo bira Testigu di Yehova.

E entusiasmo di kurason i e kurashi di e Testigunan ku nos tabata asosiá kuné a motivá mi mayornan pa bira aktivo den e trabou di prediká. No muchu tempu despues mi tata tabata duna diskurso na aire liber ku yudansa di un amplifier den e area prinsipal pa hasi kompra den e pueblo di Spondon, kaminda nos tabata biba. Anto ami ku mi otro rumannan tabata para na lugánan stratégiko ku E Toren di Vigilansia i Spièrta! tené pa hende mira. Mi tin ku atmití sí ku ora muchanan ku mi tabata bai skol kuné a aserká mi, mi a deseá pa tera habri i guli mi.

E ehèmpel di mi mayornan a animá mi ruman muhé mayó, Daphne, pa kuminsá traha pionero. Na 1955, el a asistí na e Skol Bíbliko di Galaad di Watchtower i a wòrdu asigná pa traha komo misionero na Hapon. * Pero Zoe, mi ruman muhé mas chikitu a stòp di sirbi Yehova.

Entretantu mi a kaba mi estudio di arte gráfiko. Un tópiko importante ku e studiantenan di e tempu ei tabata papia riba dje, tabata sirbishi militar obligatorio. Ora mi a bisa nan ku esei ta kontra mi prinsipionan i ku lo mi no partisipá, nan a kere ku ta wega mi ta hasi. E tópiko aki a duna mi hopi oportunidat pa papia tokante Beibel ku algun di e studiantenan. Un poko tempu despues, mi a wòrdu sentensiá na 12 luna di prizon dor ku mi no kier a bai den dienst. Un di e studiantenan na e akademia di arte ku a mustra interes den e mensahe di Beibel a bira mi esposa despues. Pero lo mi laga Ann mes konta kon el a konosé e bèrdat.

Ann Ta Haña e Bèrdat

“Mi famia no tabata religioso, i mi no a batisá nunka. Pero mi tabata interesá den e tópiko di religion i tabata kompañá mi amigunan ora nan tabata bai nan misa. Mi interes den Beibel a lanta ora mi a tende un kòmbersashon hopi animá ku Tom i un otro Testigu tabatin ku otro studiantenan di universidat. Ora Tom i e otro Testigu a bai prizon pa motibu ku nan a nenga di bai dienst, mi a keda sorprendí.

Mi a sigui skirbi Tom tempu e tabata den prizon, i mi a bira mas interesá den Beibel. Tempu mi a muda bai Lònden pa sigui ku mi estudionan, mi a aseptá pa Muriel Albrecht studia Beibel ku mi. Muriel tabata un misionero na Estonia, i tantu e komo su mama tabata un fuente di gran animashon pa mi. Despues di un par di siman, ya mi tabata asistí na reunion i tabata para pafó di e stashon di trein Victoria pa ofresé E Toren di Vigilansia i Spièrta!

Mi tabata asistí na e Kongregashon Southwark ku ta keda den parti sùit di Lònden. E kongregashon tabata konsistí di rumannan di diferente nashonalidat i hopi di nan tabatin masha poko kos material. Maske mi tabata un stranhero, nan a trata mi manera famia. Tabata e amor den e kongregashon ei ku a konvensé mi ku esaki ta e bèrdat, i na 1960 mi a batisá.”

Mesun Metanan—Diferente Sirkunstansia

Mas despues na 1960 ami ku Ann a kasa, i nos tabatin meta pa traha komo misionero. Pero sirkunstansia a kambia ora nos a haña sa ku nos ta bai haña un yu. Tempu ku nos yu  muhé Sara a nase, ainda ami ku Ann tabatin e deseo pa sirbi den un pais kaminda e nesesidat pa publikadó di Reino ta mas grandi. Mi a solisitá pa trabou den vários pais, i finalmente, na mei di aña 1966, un karta a yega for di Ministerio di Edukashon di Uganda pa konfirmá ku mi a haña un trabou. Sin embargo, pa e tempu ei Ann tabata na estado di nos di dos yu. Algun hende tabata puntra nan mes si ta sabí pa sikiera konsiderá pa bai un lugá asina leu. Nos a konsultá nos dòkter, kende a bisa: “Si boso kier bai, boso mester bula promé ku Ann hasi shete luna na estado.” Pues nos a bai Uganda sin tarda. Debí na esei nos mayornan a mira nos di dos yu muhé Rachel te ora e tabatin dos aña. Awor ku nos mes ta welo, nos ta komprondé e sakrifisio propio ku nos mayornan stimá a hasi i ta apresiá esei masha hopi.

Ora nos a yega Uganda na 1966 nos a sinti nos emoshoná pero tambe un poko preokupá. Ora nos a baha for di avion, mesora e kolónan a impreshoná nos. Nan tabata asina bibu. Nos promé kas tabata serka di e pueblo chikitu di Iganga, ku ta keda 50 kilometer for di Jinja, e pueblo kaminda Riu Nilo ta kuminsá. E Testigunan ku tabata biba mas serka di nos pueblo tabata pertenesé na un grupo isolá na Jinja. E misioneronan Gilbert i Joan Walters i Stephen i Barbara Hardy tabata sòru pa e grupo. Mi a hasi petishon na trabou pa nan trasladá mi pa Jinja pa nos por a yuda e grupo aki. Un poko despues di Rachel su nasementu, nos a muda bai Jinja. Einan, nos tabatin e goso di sirbi huntu ku e grupo chikitu di Testigunan fiel segun ku el a krese i bira e di dos kongregashon na Uganda.

Sirbiendo Komo Famia den un Teritorio Stranhero

Ami ku Ann ta pensa ku nos no por a skohe un mihó ambiente pa lanta nos famia. Nos tabatin e goso di traha huntu ku misioneronan di diferente pais i di yuda e kongregashon nobo krese. Nos a gusta e kompania di nos rumannan di Uganda, ku hopi bes tabata bishitá nos na kas. Stanley i Esinala Makumba a animá nos masha hopi mes.

Pero no ta e rumannan so tabata bishitá nos, ya ku nos tabata rondoná pa un variedat impreshonante di animalnan den naturalesa. Anochi, Hipopótamo tabata sali for di Riu Nilo i tabata pasa masha serka di nos kas. Te ainda mi ta kòrda bon-bon kon un dia nos a haña un piton di 6 meter den nos hòfi. Tin biaha nos tabata bai den parkenan di bestia kaminda tin leon i otro bestianan salbahe ta kana rònt libremente.

Den sirbishi, e hendenan lokal tabata keda wak nos straño; nunka nan no a yega di mira un stroller di yu. Ora nos tabata bai di kas pa kas, hopi bes bòshi di mucha tabata sigui nos. Hende tabata keda wak nos respetuosamente i  kaba tabata mishi ku e beibi blanku. Tabata un goso pa prediká pasobra e hendenan tabata masha amabel. Nos tabata pensa ku tur hende lo bin den e bèrdat dor ku tabata asina fásil pa kuminsá studio di Beibel. Sin embargo, hopi studiante tabata haña ku ta masha difísil pa bandoná tradishonnan antibíbliko. Pero tòg, hopi di nan a skohe pa biba na armonia ku e normanan moral haltu di Beibel, i e kongregashon a krese. Nos promé asamblea di sirkuito na Jinja na 1968 tabata un momentu importante den historia di e kongregashon ei. I nos tin grato rekuerdo di e momentu ku algun di nos studiantenan di Beibel a batisá den Riu Nilo. Pero pronto nos lo no tabatin pas mas.

E Prohibishon—Un Tèst di Fe i Kreatividat

Na 1971, General Idi Amin a tuma poder. Tabatin konfushon pisá na Jinja, i miéntras nos tabata disfrutá di un kòpi di te den nos hòfi, e esena deskribí na prinsipio di e artíkulo aki a tuma lugá. Durante e siguiente dos añanan, nan a saka un gran kantidat di asiátiko for di e pais. Mayoria stranhero a disidí di bai, i skolnan i hospitalnan a sufri severamente. Despues di esei nan a laga hasi e anunsio severo i bon kla ku e trabou di Testigunan di Yehova ta prohibí. Debí ku e Departamentu di Edukashon tabata preokupá pa nos siguridat nan a evakuá nos i hiba nos na e kapital, Kampala. E evakuashon aki tabata benefisioso den dos sentido. Debí ku nos tabata deskonosí na Kampala tabata mas fásil pa nos kana libremente. Ademas tabatin hopi trabou den e kongregashon i den sirbishi di vèlt.

Brian ku Marion Wallace i nan dos yunan tabata den un situashon similar ku nos, i nan tambe a disidí di keda Uganda. Nos a disfrutá masha hopi mes di nan kompania segun ku nos tabata sirbi huntu ku nan den e Kongregashon di Kampala durante e tempu difikultoso ei. N’e momentu ei, e relatonan ku nos a lesa tokante nos rumannan den paisnan kaminda e trabou di prediká ta prohibí, a bira un fuente di animashon spesial pa nos. Nos tabata reuní den grupo chikitu, i un bes pa luna, nos tabata tene un reunion grandi na e Botanical Gardens di Entebbe. Nos tabata hasi komo si fuera ta un get-together. Nos yu muhénan a haña ku esaki tabata un tremendo idea.

Nos mester a tene masha kuidou kon nos ta anda den e trabou di prediká. Lo tabata un kos masha riparabel si hende blanku ta bishita kasnan na Uganda. P’e motibu ei tokonan, flètnan i algun kèmpus a bira nos teritorio. Un método ku mi a usa den toko tabata di puntra pa un  produkto ku no tabata disponibel mas, manera suku òf aros. Si e bendedó tabata keha pa motibu di e situashon, mi tabata introdusí e mensahe di Reino. E método aki a funshoná bon. Tin bes mi tabata sali for di e toko no solamente ku un posibel rebishita sino tambe ku un suministro chikí di un produkto skars.

Entretantu, tabatin violensia tur kaminda rònt di nos. Dor ku e relashon entre Uganda i Gran Bretaña a sigui bai atras, e outoridatnan no a renobá mi kontrakt. P’esei na 1974, despues di ocho aña na Uganda, tabata nos turno pa yama nos rumannan ayó. Sin embargo, nos spiritu di misionero sí nos no a pèrdè.

Rumbo pa Nueva Guinea

Na yanüari 1975, nos a probechá di un oportunidat pa bai traha na Papua Nueva Guinea. Ta asina’kí ocho aña di sirbishi gososo den e region aki di Pasífiko a kuminsá. Nos bida huntu ku e rumannan i den e sirbishi tabata enrikesedor i rekompensador.

Nos famia ta kòrda e tempu ku nos tabata na Papua Nueva Guinea komo un tempu di drama, un tempu ku nos tabata hunga den dramanan bíbliko. Tur aña nos tabata enbolbí den preparashon di drama pa e kongreso di distrito i nos tabata pasa masha dushi mes! Nos a disfrutá di e kompania di hopi famianan ku ta spiritualmente fuerte, i nan a ègt kousa un impakto riba nos yu muhénan. Nos yu muhé mayó, Sara, a kasa ku un pionero spesial ku yama Ray Smith, anto huntu nan a traha pionero spesial serka di e frontera di Irian Jaya (awor Papua, un provinsia indones). Nan tabata biba den un hùt di pal’i maishi den e pueblo lokal, i Sara ta bisa ku durante e temporada ku e tabata den e asignashon ei el a siña masha hopi kos.

Adaptando na Sirkunstansia Ku Ta Kambia

P’e tempu ei mi mayornan tabatin mester di èkstra kuido. Pero nos no tabatin ku bai Inglatera bèk ya ku mi mayornan a bai di akuerdo pa bin biba huntu ku nos, anto na 1983 nos tur huntu a bai biba na Oustralia. Tambe nan a keda un temporada serka mi ruman muhé Daphne, ku tabata na Hapon ainda. Despues ku mi mayornan a fayesé, ami ku Ann a disidí di bira pionero regular, i esaki a habri kaminda pa un privilegio ku mi no a haña dje fásil ei.

Nos a kaba di kuminsá traha pionero ora nos a haña invitashon pa bai traha den sirkuito. For di tempu ku mi tabata mucha, mi a konsiderá e bishita di e superintendente di sirkuito komo un okashon spesial. Awor ami tabata e superintendente di sirkuito. El a resultá di ta e asignashon di mas difísil ku nos a disfrutá di dje te na e momentu ei den nos bida, pero bes tras bes Yehova a yuda nos den maneranan ku nos no a yega di eksperensiá.

Na 1990 durante un bishita di zona di Ruman Theodore Jaracz na Oustralia, nos a puntr’é si e ta kere ku nos ta muchu grandi kaba pa traha den sirbishi di tempu kompletu na un otro pais. El a bisa: “Ke tal di Islanan Salomon?” Pues porfin, ora tantu ami komo Ann tabatin 50 i piku aña, ata nos awor rumbo pa loke lo a bira nos promé asignashon di misionero ofisial.

Sirbiendo na e “Islanan Felis”

Islanan Salomon ta konosí komo e Islanan Felis, i nos sirbishi akinan durante e último dékada  sin duda tabata un temporada felis. Ami ku Ann a konosé e ekselente generosidat di e rumannan na e Islanan Salomon kaminda mi a traha komo superintendente di distrito. E hospitalidat ku nan a brinda nos a hasi un impakto profundo riba nos kurason, i tur hende a mustra hopi konsiderashon pa e esfuerso ku mi tabata hasi pa splika kosnan den loke mi a kere tabata basta bon pidgin di Islanan Salomon—un di e idiomanan na mundu ku un vokabulario di masha poko palabra.

Pronto despues di nos yegada na Islanan Salomon, opositornan a purba stroba nos di usa nos Salòn di Asamblea. E iglesia anglikano a lanta un akusashon kontra Testigunan di Yehova; nan akusashon tabata ku nos Salòn di Asamblea nobo na Honiara tabata parsialmente riba nan tereno. Gobièrnu a apoyá nan, pues nos a apelá na Korte Supremo. E resultado di e kaso lo a determiná si nos tabatin ku desmantelá nos Salòn di Asamblea nobo ku tabatin un kapasidat di 1.200 persona.

E kaso a dura henter un siman den korte. Ku un aire di arogansia e abogado a presentá e kaso ku masha konfiansa kontra nos. Despues di esei nos abogado, Ruman Warren Cathcart di Nueva Zelandia, ku argumentunan sumamente konvinsente a eksponé i desbaratá kada akusashon. Pa djabièrnè, e notisia tokante e evento interesante a plama kaba, i e sala di korte tabata kankan di dignatarionan di iglesia, ofisialnan di gobièrnu i nos rumannan kristian. Mi ta kòrda e fout ku tabatin riba e programa ofisial di korte. Tabatin skirbí: “Gobièrnu di Islanan Salomon i e Iglesia di Melanesia versus Yehova.” Nos a gana e kaso.

Sin embargo, e trankilidat relativo di e Islanan Felis no a dura hopi tempu. Atrobe ami ku Ann a haña nos rondoná pa káos i violensia pa motibu di un gòlpi di estado. Enemistat étniko a hiba na guera sivil. Dia 5 di yüni di aña 2000, militarnan a logra tumba gobièrnu i e kapital a bin kai bou di nan mando. Pa algun siman nos Salòn di Asamblea a bira un sentro di alohamentu pa esnan ku a pèrdè kas. Outoridatnan tabata sorprendí ku nos rumannan kristian ku ta pertenesé na gruponan étniko ku ta kontra otro, tabata biba huntu manera un famia pasífiko bou di e dak di e Salòn di Asamblea. Esaki tabata un tremendo testimonio!

Asta e militarnan tabata respetá e neutralidat di Testigunan di Yehova. Esaki a duna nos e oportunidat pa konvensé un di e komandantenan pa laga un trùk hiba literatura i otro suministronan pa un grupo chikí di rumannan ku tabata den un area kontrolá pa e ehérsito opositor. Ora nos a logra haña e famianan ku no tabatin kontakto ku nos pa algun luna, nos tur tabata ku awa na wowo.

Hopi Motibu pa Ta Gradisidu

Pensando bèk riba nos bida den e sirbishi di Yehova, nos tin hopi motibu pa ta gradisidu. Komo mayornan, nos tabatin e goso di mira nos dos yu muhénan i nan kasánan, Ray i John, sigui sirbi Yehova fielmente. Nan a ègt sostené nos den nos trabou di misionero.

Durante e último 12 añanan, ami ku Ann tabatin e privilegio di sirbi na e ofisina di sukursal di Islanan Salomon, i durante e tempu ei, nos a mira e kantidat di proklamadónan di Reino bira dòbel i alkansá mas ku 1.800 publikadó. Resientemente, mi a haña e privilegio adishonal pa asistí na e Skol pa Miembronan di Komité di Sukursal na Patterson, New York. Sin duda nos a disfrutá di un bida produktivo ku hopi rekompensa dor di a mantené e spiritu di misionero.

[Nota]

[Plachi na página 23]

E dia ku nos a kasa, 1960

[Plachi na página 24]

Na Uganda, Stanley i Esinala Makumba tabata un fuente di animashon pa nos famia

[Plachi na página 24]

Sara drentando hùt di un bisiña

[Plachi na página 25]

Mi tabata pinta dibuho pa mi siña e nativonan di Islanan Salomon

[Plachi na página 25]

Reuniendo ku un kongregashon isolá na Islanan Salomon

[Plachi na página 26]

Nos famia awe