‘Dios No Ta Biba den Tèmpel Trahá ku Man’

SIN duda, apòstel Pablo tabata konosé e tèmpelnan di Atenea, pasobra bo por a haña nan den hopi di e statnan ku el a bishitá durante su biahenan komo misionero. Segun The Encyclopædia Britannica, Atenea no tabata famoso solamente komo e diosa di guera i sabiduria, sino tambe komo e diosa “di arte i aktividatnan di fishi en general.”

E tèmpel di mas famoso di Atenea tabata Partenon, konstruí na Atenas, e stat ku a haña nòmber di e diosa. Partenon ta ser konsiderá komo un di e gran tèmpelnan di e mundu di antigwedat i den dje tabatin un estatua di Atenea trahá di oro i ivor di 12 meter. Ora Pablo a bishitá Atenas, e tèmpel di marmer blanku aki ya tabatin 500 aña komo esun mas prominente den e stat.

Na un distansia ku Pablo por a mira Partenon, el a prediká na un grupo di hende di Atenas tokante e ‘dios ku no ta biba den tèmpel trahá ku man.’ (Echonan 17:23, 24) Podisé pa algun di Pablo su oyentenan, e echo ku e tèmpelnan di Atenea tabata mahestuoso i su ídolonan tabata grandioso a pone ku Atenea a parse mas impreshonante ku un Dios invisibel ku nan no a konosé. Sin embargo, manera Pablo a indiká, hende no mester pensa ku e Kreadó di humanidat “ta manera oro òf plata òf piedra, un imágen formá dor . . . di hende.”—Echonan 17:29.

Dios- i diosanan manera Atenea—kende nan gloria a dependé di tèmpel i estatua—a bini i a bai. E estatua di Atenea a disparsé for di e Partenon den siglo 5 di nos era, i aktualmente ta restu di algun di su tèmpelnan so a keda. Ta ken awe ta buska sabiduria i guia serka Atenea?

Esaki ta hopi distinto den e kaso di Yehova, “e Dios eterno,” kende ningun hende no a yega di mira. (Romanonan 16:26; 1 Juan 4:12) E yunan di Kore a skirbi: “E Dios aki ta nos Dios, pa semper i semper; E lo guia nos.” (Salmo 48:14) Un manera pa nos haña Yehova Dios su guia ta dor di studia su Palabra, Beibel, i apliká su konsehonan den nos bida.