Duna Gloria na Dios No na Hende

DEN e último lunanan, stimadónan di hustisia rònt mundu a siña kon pa duna gloria na Dios segun ku nan a reuní huntu pa selebrá e Kongresonan di Distrito di Testigunan di Yehova “Duna Gloria na Dios.” Laga nos repasá e programa di siñansa ku a ser presentá n’e kongresonan ei.

Pa mayoria persona ku a asistí, e programa basá riba Beibel a dura tres dia siguí. Pa otronan ku por a bai un dje kongresonan internashonal, e programa a dura kuater dia. Na tur, esnan ku a asistí a tende mas ku 30 presentashon basá riba Beibel, manera diskursonan ku a profundisá nan apresio pa kosnan spiritual, eksperensianan ku a fortalesé nan fe, demostrashonnan ku a resaltá kon práktiko prinsipionan di Beibel ta, i un drama den pleno trahe i esenario antiguo ku a presentá e desafionan ku e kristiannan di promé siglo a haña nan konfrontá kuné. Si bo a asistí na un di e kongresonan aki, pakiko no repasá bo notanan segun ku bo ta lesa e artíkulo aki? Esaki sigur lo duna bo grato rekuerdo di un bankete spiritual riku i tambe instruktivo.

Tema dje Promé Dia: ‘Digno Bo Ta Yehova, pa Risibí Gloria’

Despues di e kantika i orashon di apertura, e promé oradó a yama tur presente un bon biní kaluroso ku un diskurso ku a enfoká riba e motibu prinsipal p’e kongreso: “Reuní Huntu pa Duna Gloria na Dios.” Sitando for di Revelashon 4:11, e oradó a enfatisá e tema general di e kongreso. Mesora el a pasa na splika kiko kier men duna gloria na Dios. Usando e buki di Salmo, el a enfatisá ku glorifiká Dios ta enserá “adorá,” ‘gradisí’ i “alabá” Yehova.—Salmo 95:6; 100:4, 5; 111:1, 2.

E siguiente diskurso tabatin e tema “Bendishoná Ta Esnan Ku Ta Duna Gloria na Dios.” E oradó a hasi un remarke interesante. Ya ku tin mas ku 6 mion Testigu di Yehova den 234 pais rònt mundu, nos por bisa ku solo no sa baha pa esnan ku ta duna gloria na Yehova. (Revelashon 7:15) E ouditorio a keda masha enkantá pa tende durante e diskurso aki vários entrevista ku rumannan kristian ku ta den un òf otro forma di sirbishi spesial di tempu kompletu.

Tema di e siguiente diskurso tabata “Kreashon Ta Deklará e Gloria di Dios.” Ounke e kuerponan selestial ta testigunan silensioso, nan ta engrandesé e mahestat di Dios i ta yuda nos bira mas gradisidu pa su kuido amoroso.  Nos a haña un splikashon di esaki ku luho di detaye.—Isaias 40:26.

Persekushon, oposishon, influensia mundano i tendensianan pekaminoso ta desafiá e integridat di kristiannan berdadero. P’esei, e diskurso “Kana den e Kaminda di Integridat” a meresé e sumo atenshon di e ouditorio. Despues a sigui un konsiderashon di versíkulo pa versíkulo di Salmo 26, huntu ku entrevistanan ku un hóben Testigu ku ta bai skol ainda i ku a para firme pa su normanan moral, i un otro ku tabata dediká demasiado tempu na dibertishon kuestionabel pero ku a dal e pasonan pa vense e problema.

E diskurso klave, “Vishonnan Profétiko Glorioso Ta Stimulá Nos!” a finalisá e programa di mainta. E oradó a mustra kon e fe di entre otro profeta Daniel i di apòstel Juan i Pedro a bira mas fuerte ainda ora nan a mira glorioso vishonnan profétiko relashoná ku e establesimentu i funshonamentu di e Reino Mesiániko di Dios. Papiando di esnan ku lo por a pèrdè for di bista e evidensia kla ku en bèrdat nos ta den e tempu di fin, e oradó a bisa: “Nos ta spera sinseramente ku nan lo enfoká atrobe riba e realidat di e presensia di Kristu den gloria di Reino i haña yudansa pa rekuperá nan fortalesa spiritual.”

E programa di atardi a kuminsá ku un diskurso ku e tema “Yehova Ta Revelá Su Gloria n’e Humildenan.” E oradó a mustra ku ounke Yehova ta e Persona mas haltu den universo, e ta esun ku ta pone e ehèmpel di humildat. (Salmo 18:35) Yehova ta faboresé personanan ku ta berdaderamente humilde. Esnan ku ta parse humilde solamente ora nan ta trata ku nan pareunan òf nan superiornan, ma ta trata e personanan ku ta kai bou di nan supervishon na un manera severo, sí e ta oponé.—Salmo 138:6.

Despues a bini un simposio di profesia di Beibel ku a resaltá diferente aspekto di e tema sentral: “E Profesia di Amos—Su Mensahe pa Nos Tempu.” Mustrando riba e ehèmpel di Amos, e promé oradó a hala atenshon n’e responsabilidat ku nos tin pa spièrta hende di Yehova su binidero huisio. E tema di su diskurso tabata “Papia e Palabra di Dios ku Kurashi.” E di dos oradó a lansa e pregunta: “Yehova lo pone fin un dia na maldat i sufrimentu riba e tera aki?” Su diskurso, “E Huisio di Dios Kontra e Malbadonan,” a mustra ku semper Dios su huisionan tabata hustifiká, selektivo i sin skapatorio pa e malbadonan. E último oradó den e simposio a duna atenshon n’e tema “Yehova Ta Eksaminá Kurason.” Esnan ku ta anhelá pa agradá Yehova lo hasi kaso di e palabranan na Amos 5:15: “Odia maldat, stima bondat.”

Bebida alkohóliko, manera biña ku ta hasi kurason alegrá, ta algu ku hende por hasi mal uso di dje. Den su diskurso, “Evitá e Trampa di Bebe di Mas,” e oradó a menshoná e peligernan físiko i spiritual di uso inmoderá di alkohòl, asta ora bo no bira burachi. El a duna e siguiente prinsipio komo guia: Ya ku kada ken tin su mes grado di toleransia pa alkohòl, ta e kantidat ku ta stroba abo di mustra “sabiduria sano i diskreshon” ta demasiado pa bo personalmente.—Proverbionan 3:21, 22.

Ya ku nos ta biba den un tempu krítiko, e siguiente tópiko, “Yehova, Nos ‘Fortalesa den Tempu di Angustia,’” a duna nos hopi konsuelo. Orashon, spiritu santu i nos rumannan kristian por yuda nos perseverá.

E diskurso final di e dia, “‘E Tera Bunita’—Un Bista Delantá di Paradeis,” a sera e atardi ku un sorpresa agradabel pa tur presente—un publikashon nobo ku hopi mapa di Beibel! Su título ta Mira e Tera Bunita.

Tema dje di Dos Dia: “Konta di Su Gloria Meimei di e Nashonnan”

Despues di un konsiderashon di e teksto di dia, e di dos simposio di e kongreso a ser presentá, ku e tema “Reflehá Manera Spil e Gloria di Yehova.” E promé parti a elaborá riba e tema “Plamando e Evangelio Tur Kaminda” i a inkluí demostrashon di eksperensianan di sirbishi di vèlt. E di dos diskurso ku e tema “Kitando  e Belo for di Esnan Siegá” a inkluí un demostrashon di un rebishita. Den e último parti, “Hasiendo Esei Mas Plenamente den Nos Ministerio,” tabatin tambe algun entrevista interesante relashoná ku sirbishi di vèlt.

E siguiente parti di e programa tabatin komo tema “Odiá sin Motibu.” Den dje tabatin entrevistanan hopi animante di personanan fiel kendenan, ku e forsa di Dios, a mantené integridat durante oposishon.

Un karakterístika di kongresonan pa kua semper tin gran ekspektativa ta e diskurso di boutismo siguí pa e boutismo mes di tur e kandidatonan ku ta kumpli ku e rekisitonan. Boutismo bou di awa ta simbolisá un persona su dedikashon total na Yehova. P’esei, e tema tabata masha al kaso: “Kumpli ku Nos Dedikashon Ta Glorifiká Dios.”

 E programa di atardi a kuminsá ku un diskurso ku a animá tur presente pa saminá nan mes. Su tema tabata “Kultivá Kristu Su Punto di Bista di Grandesa.” E oradó a menshoná e punto interesante aki: Grandesa ta e resultado di imitá e humildat di Kristu. Pues, un kristian no mester buska pa haña un responsabilidat djis pa satisfasé un ambishon personal. E mester puntra su mes: ‘Mi ta dispuesto pa kumpli ku tareanan útil ku otro hende lo no tuma nota di dje fásilmente?’

Bo sa sinti bo kansá? Esei kasi no ta kos di puntra mes. Tur presente a gusta e diskurso “Kansá, Pero Nos No Ta Entregá.” E entrevistanan ku algun Testigu di hopi aña a mustra ku Yehova por ‘fortalesé nos pa medio di su spiritu.’—Efesionan 3:16.

Generosidat no ta un kualidat ku nos a nase kuné, sino unu ku nos tin ku siña. Esei ta e punto klave ku e diskurso “Sea ‘Generoso i Dispuesto pa Kompartí’” a trese dilanti. I e oradó a laga nos tur pensa seriamente riba e siguiente pregunta: “Nos ta dispuesto pa kompartí algun minüt di nos dia ku nos rumannan di edat, esnan malu, deprimí òf ku esnan ku ta sinti nan so?”

E tema “Tene Kuidou ku ‘Bos di Hende Straño’” a kapta atenshon di e ouditorio. E diskurso aki a kompará siguidónan di Hesus ku karné ku ta skucha solamente su bos komo “e bon wardadó” i no “bos di hende straño” atraves di e hopi fuentenan humano bou di influensia di Diabel.—Juan 10:5, 14, 27.

Un kor mester kanta na armonia p’e palabranan sali komprendibel. Pa glorifiká Dios, adoradónan berdadero rònt mundu mester ta uní. P’esei, e tema “Glorifiká Dios ‘den Un Solo Bos’” a duna instrukshon benefisioso riba kon nos tur por papia e úniko “idioma puru” i sirbi Yehova “skouder ku skouder.”—Zakarias 3:9, NW.

Mayornan, foral esnan ku tin yu chikitu, a keda masha enkantá ku e último diskurso p’e dia ei, “Nos Yunan—Un Herensia Presioso.” Komo un sorpresa masha agradabel p’e ouditorio, a presentá un publikashon nobo di 256 página. Siña for di e Gran Maestro ta un buki ku lo yuda mayornan dediká tempu spiritualmente benefisioso na nan yunan, ya ku yu ta un regalo di Dios.

Tema dje di Tres Dia: ‘Hasi Tur Kos pa e Gloria di Dios’

E rekordatorionan di e teksto di dia a kuminsá e último dia di kongreso ku pensamentunan spiritual. E promé seshon di e programa pa e dia aki a duna èkstra atenshon n’e areglo di famia. E promé diskurso, “Mayornan, Fortalesé Boso Famia,” a prepará e ouditorio. Despues ku e oradó a repasá e responsabilidat ku mayornan tin pa perkurá den sentido material pa nan famia, el a splika ku e responsabilidat  primario di mayornan ta pa perkurá p’e nesesidatnan spiritual di nan yunan.

E siguiente oradó a dirigí su mes n’e muchanan i a analisá e tópiko “Kon Hóbennan Ta Alabando Yehova.” El a bisa ku hóbennan ta manera “serena” den sentido ku nan ta hopi na kantidat i tambe pa motibu ku nan selo hubenil ta refreskante. Hende grandi ta kontentu pa traha huntu ku nan den e sirbishi di Yehova. (Salmo 110:3) E parti aki a inkluí entrevistanan masha agradabel ku hóbennan ehemplar.

Dramanan den pleno trahe i esenario antiguo semper tabata un karakterístika emoshonante di kongresonan di distrito, i e kongreso aki no tabata un eksepshon. E drama “Nan A Duna Testimonio ku Kurashi Apesar di Oposishon” a bai over di e disipelnan di Hesus di promé siglo. E no tabata djis un entretenimentu, sino algu hopi mas importante: instrukshon. E diskurso ku a sigui despues di e drama, “Deklará e Bon Nobo sin Stòp,” a resaltá e puntonan importante di e drama.

A reina gran ekspektativa p’e parti kulminante di e programa di djadumingu atardi, e diskurso públiko, “Ken Awe Ta Duna Gloria na Dios?” E oradó a bini ku vários punto pa mustra ku por lo general e komunidatnan sientífiko i religioso no a glorifiká Dios. Ta únikamente e pueblo ku ta karga su nòmber, esnan ku ta prediká i siña e bèrdat tokante Yehova, ta esnan ku sin duda ta glorifikando su nòmber awe.

Despues di e diskurso públiko a sigui un resúmen di e lès di e revista Toren di Vigilansia p’e siman ei. Despues a bini e diskurso final, “Sigui ‘Duna Hopi Fruta’ pa e Gloria di Yehova.” E oradó a presentá un resolushon di dies punto pa tur persona den ouditorio adoptá. El a enfoká riba vários manera ku hende por duna gloria na e Kreadó, Yehova. Un “Sí” unánime a resoná den tur e kongresonan for di tur skina di e planeta aki.

Asina e kongreso a kaba ku e tema “Duna Gloria na Dios” zonando den orea di kada persona ku a asistí. I ku yudansa di Yehova su spiritu i e parti visibel di su organisashon, laga nos semper hasi esfuerso pa duna gloria na Dios i no na hende.

[Kuadro/Plachinan na página 23]

Kongresonan Internashonal

Tabatin kongresonan internashonal di kuater dia na Afrika, Asia, Europa, Nort i Sur Amérika i Oustralia. Testigunan di rònt mundu a ser invitá pa asistí komo delegadonan n’e reunionnan aki. Dje manera aki tantu e bishitantenan komo nan huéspetnan por a “enkurashá” otro. (Romanonan 1:12) Amigunan di hopi aña por a topa otro atrobe i sigui amplia nan sírkulo di amistat. Un rasgo spesial di e kongresonan internashonal tabata e parti di e programa titulá “Informe di Otro Paisnan.”

[Kuadro/Plachinan na página 25]

Publikashonnan Nobo Ku Ta Duna Gloria na Dios

N’e Kongresonan di Distrito “Duna Gloria na Dios” a presentá dos publikashon nobo. E promé ta e atlas di Beibel Mira e Tera Bunita ku su kaft duradero i 36 página tur na mapa i potrèt di sitionan di Beibel. Kada página ta na koló i tin mapanan di e imperionan di Asiria, Babilonia, Medo-Persia, Gresia i Roma. Tambe tin mapa ku ta kubri e ministerio di Hesus i e ekspanshon di kristianismo.

E di dos, Siña for di e Gran Maestro, ta un buki di 256 página ku rònt di 230 plachi. Bo por pasa hopi ratu agradabel ku bo yunan simplemente dor di wak e plachinan i kontestá e preguntanan ku ta stimulá nan mente. E publikashon nobo aki ta diseñá pa kontrarestá e atakenan ku Satanas ta lansa kontra nos hobensitunan ku e meta di korumpí nan den sentido moral.

[Plachi na página 23]

Misioneronan a fortalesé fe di e presentenan ku nan eksperensianan

[Plachinan na página 24]

Boutismo tabata un rasgo importante di e kongresonan “Duna Gloria na Dios”

[Plachinan na página 24]

Grandi i chikí ta disfrutá di drama bíbliko