Promesanan Ku Bo Por Konfia

MIKEAS, e profeta di Dios, tabata sa ku hopi promesanan ta resultá inkonfiabel. Den su tempu, ni e palabra di kompañeronan di mas íntimo bo no por a konfia tur biaha. P’esei Mikeas a spièrta: “No konfia bisiña; no tene konfiansa den un amigu. Warda e portanan di bo boka for di esun ku ta drumi na bo pechu.”—Mikeas 7:5.

Mikeas a permití e situashon lamentabel aki pon’é duda den tur promesa? Nò! El a ekspresá pleno konfiansa den e promesanan ku su Dios, Yehova, a hasi. Mikeas a skirbi: “Pa loke t’ami, lo mi warda ku speransa riba SEÑOR; lo mi spera riba e Dios di mi salbashon.”—Mikeas 7:7.

Kon bin Mikeas tabatin e konfiansa ei? Pasobra e tabata sa ku Yehova semper ta kumpli ku su palabra. Tur kos ku Yehova a hura na Mikeas su antepasadonan a kumpli sin falta. (Mikeas 7:20) Yehova su fieldat den pasado a duna Mikeas tur motibu pa kere ku lo E kumpli ku su palabra den futuro.

 “Ni Un Palabra . . . No A Faya”

Mikeas tabata sa, por ehèmpel, ku Yehova a libra e israelitanan for di sklabitut na Egipto. (Mikeas 7:15) Josué, kende a eksperensiá e liberashon ei, a animá su kompañeronan israelita pa ehersé fe den tur Dios su promesanan. Riba ki base? Josué a rekordá nan: “Boso sa di henter boso kurason i di henter boso alma ku ni un palabra di tur e bon palabranan ku SEÑOR boso Dios a papia tokante di boso no a faya; tur a keda kumplí pa boso, ni un di nan no a faya.”—Josué 23:14.

E israelitanan tabata bon konsiente ku Yehova a hasi kosnan maravioso pa nan. El a kumpli ku e promesa ku el a hasi na nan antepasado temeroso di Dios, Abraham, esta, ku su desendientenan lo a bira hopi manera strea i ku nan lo tuma posishon di e tera di Kánaan. Tambe Yehova a bisa Abraham ku su desendientenan lo sufri aflikshon pa 400 aña, pero ku despues nan lo a regresá Kánaan “den e di kuater generashon.” Tur e kosnan aki a sosodé.—Génesis 15:5-16; Eksodo 3:6-8.

Den e tempu di Hosé, yu hòmber di Jakòb, e israelitanan a wòrdu bon risibí na Egipto. Despues e egipsionan a someté nan na trabou di esklabo severo. Pero manera Dios a primintí, denter di un periodo di kuater generashon konsekutivo desde e tempu ku nan a yega Egipto, e desendientenan aki di Abraham a ser liberá for di sklabitut na Egipto. *

Atraves di e siguiente 40 añanan e israelitanan a haña mas prueba ku Yehova semper ta kumpli ku su promesanan. Ora e amalekitanan a lansa un atake sin motibu riba e israelitanan, Dios a bringa pa su pueblo i a protehá nan. El a satisfasé tur nan nesesidatnan material durante nan biahe di 40 aña den desierto i ku tempu el a establesé nan den e Tera Primintí. Ora Josué a repasá e historia di Yehova su trato ku e desendientenan aki di Abraham, ku konfiansa e por a bisa: “Ni un di e bon promesanan ku SEÑOR a hasi na e kas di Israel no a faya; tur a keda kumplí.”—Josué 21:45.

Edifiká Konfiansa den e Promesanan di Dios

Kon bo por kultivá fe den e promesanan di Yehova meskos ku Mikeas i Josué a hasi? Wèl, kon bo ta kultivá konfiansa den otro persona? Bo ta buska pa sa mas tantu posibel di e persona. Por ehèmpel, podisé bo ta haña sa kon konfiabel nan ta dor di opservá si nan ta purba fielmente di kumpli ku tur nan promesanan. Mas bo konosé e personanan ei, mas konfiansa bo ta haña den nan. Bo por hasi meskos ora ta trata di kultivá fe den e promesanan di Dios.

Un manera ku bo por hasi esaki ta dor di reflekshoná riba e kreashon i e leinan ku ta gobern’é. Sientífikonan ta pone nan konfiansa den e leinan aki. Algun di e leinan aki ta goberná e manera ku un solo sèl humano ta dividí i multipliká su mes pa produsí míles di miónes sèl pa forma bo kurpa. Sí, e leinan ku ta goberná e proseder di energia i asuntunan supstansial den henter e  universo mester a ser establesé dor di un Trahadó di lei ku ta plenamente konfiabel. Definitivamente, e mesun konfiansa ku bo tin den su leinan di kreashon, bo por tin tambe den su promesanan.—Salmo 139:14-16; Isaias 40:26; Hebreonan 3:4.

Mediante profeta Isaias, un kontemporáneo di Mikeas, Yehova a usa e regularidat di e temporadanan di aña i e siklo asombroso di awa pa mustra kon konfiabel su palabra ta. Tur aña awa ta yobe. E ta muha suela i ta hasi posibel pa hende sembra simia i haña kosecha. Relashoná ku esaki Yehova a bisa: “Pasobra manera áwaseru i sneu ta kai for di shelu, i no ta bolbe ayanan sin muha tera, i ta hasi tera produsí i sprùit, i ta duna simia na e sembradó i pan na esun ku ta kome, asina mi palabra ku ta sali for di mi boka lo ta; e lo no bolbe bashí serka mi, sin kumpli ku loke mi ta deseá, i sin alkansá e propósito ku kual mi a mand’é.”—Isaias 55:10, 11.

Promesanan Sigur di Paradeis

Análisis di kreashon por edifiká konfiansa den e Kreadó, pero bo mester di algu mas si bo kier siña tokante e promesanan ku ta forma parti di e ‘palabranan ku ta sali for di su boka.’ Pa siña di e promesanan aki pa asina bo por pone bo konfiansa den nan, bo tin ku analisá e registro bíbliko inspirá di e propósito di Dios i su trato ku humanidat.—2 Timoteo 3:14-17.

Profeta Mikeas tabatin konfiansa den e promesanan di Yehova. Kompará ku Mikeas, abo tin asta mas tantu di Dios su registro inspirá na bo disposishon. Segun ku bo ta lesa Beibel i ta meditá riba dje, bo tambe bor kultivá fe den kumplimentu di e promesanan di Dios. E promesanan aki no ta enbolbé e desendientenan karnal so di Abraham, sino henter humanidat. Yehova a primintí e patriarka temeroso di Dios aki: “Den bo desendientenan tur e nashonnan di e tera lo ta bendishoná, pasobra bo a obedesé mi bos.” (Génesis 22:18) E parti prinsipal di e “simia” òf e desendientenan di Abraham ta e Mesias, Hesukristu.—Galationan 3:16.

Mediante Hesukristu, Yehova lo hasi sigur ku e bendishonnan ta basha riba humanidat. I kiko Yehova a primintí di hasi den nos tempu? Mikeas 4:1 i 2 ta kontestá ku e palabranan profétiko aki: “Lo sosodé den e último dianan ku e seru di e kas di SEÑOR lo wòrdu establesí komo hefe di e serunan. E lo wòrdu halsá mas haltu ku e seritunan, i e pueblonan lo basha bai na dje. I hopi nashon lo bin bisa: ‘Ban laga nos subi bai na e seru di SEÑOR i na e kas di e Dios di Jakòb, pa e siña nos di su kamindanan i pa nos kana den su bereanan.’”

Esnan ku ta siña di Yehova su kamindanan ‘ta bati nan spadanan traha plug ku nan, i nan lansanan traha skèr-pa-snui ku nan.’ Tur tendensia pa guera lo disparsé. Pronto e tera lo ta yen di hende rekto i niun hende lo no pone nan tembla di miedu. (Mikeas 4:3, 4) Sí, e Palabra di Dios ta primintí ku bou di mandato di e Reino di Dios den man di Hesukristu, Yehova lo limpia e tera i kita tur opositor.—Isaias 11:6-9; Daniel 2:44; Revelashon 11:18.

Asta esnan ku a sufri i muri komo resultado di hende su rebelion kontra Dios lo haña resurekshon ku e prospekto di biba pa semper riba tera. (Juan 5:28, 29) Satanas i su demoñonan, esnan ku ta fomentá maldat, lo  no t’ei mas i e efektonan di e piká di Adam lo ser eliminá dor di Hesus su sakrifisio di reskate. (Mateo 20:28; Romanonan 3:23, 24; 5:12; 6:23; Revelashon 20:1-3) I den ki situashon humanidat obediente lo ta? Sin duda, nan lo ser bendishoná ku bida eterno i salú perfekto den paradeis riba tera!—Salmo 37:10, 11; Lukas 23:43; Revelashon 21:3-5.

E promesanan aki sí ta maravioso! Pero bo por kere nan? Klaru ku sí. Nan no ta promesa di hende ku podisé tin bon intenshon pero ku no tin poder pa kumpli nan. Nan ta promesa di Dios Todopoderoso, kende no por gaña i ku “no ta tarda ku su promesa.” (2 Pedro 3:9; Hebreonan 6:13-18) Bo por tin pleno konfiansa den tur e promesanan ku bo ta haña den Beibel, pasobra nan Fuente ta Yehova e “Dios di fieldat” òf dje bèrdat.—Salmo 31:5.

[Nota]

[Komentario na página 6]

“Ni un palabra di tur e bon palabranan ku SEÑOR boso Dios a papia tokante di boso no a faya.”—JOSUÉ 23:14

[Plachinan na página 4, 5]

Yehova a kumpli ku su promesanan ku el a hasi n’e nashon di Israel, na Laman Kòrá i den e desierto

[Plachinan na página 7]

Yehova a kumpli ku su promesa na Abraham. Su Simia Hesukristu, lo trese bendishon pa humanidat