“Un di e Mayor Obranan di Konstrukshon”

TEMPU nan a traha e tèmpel di Yehova den Yerusalèm durante e reinado di Salomon rònt di 3.000 aña pasá, nan a traha un bunita tank’i awa di koper pafó di e entrada di e tèmpel. E tabata pisa mas ku 30 tòn i por a kontené mas o ménos 40.000 liter di awa. Nan a yama e tanki grandísimo aki “laman di metal bashá.” (1 Reinan 7:23-26) Albert Zuidhof, eks-funshonario tékniko n’e Konseho Nashonal di Investigashon di Canada a bisa den e revista Biblical Archeologist: “Esaki sigur tabata un di e mayor obranan di konstrukshon ku a yega di wòrdu realisá den e nashon hebreo.”

Kon nan a konstruí e laman di metal bashá aki? Beibel ta bisa: “Rei tabata laga basha [artefaktonan di koper] den malchi di klei den region di Yordan entre Sukot i Saretan.” (1 Reinan 7:45, 46, Beibel na papiamentu koriente) “Den e proseso di basha metal nan lo a usa e mesun método ku hende ta usa te ainda pa traha bèl grandi di bròns,” segun Zuidhof. E ta splika ku básikamente esaki lo a enserá pone un malchi di e tanki trahá di klei boka abou den un di dos malchi di klei (un tiki mas grandi ku esun promé). Meimei di e dos malchinan aki nan lo a basha e bròns na líkido i lag’é seka. Despues nan lo a kibra e dos malchinan di klei.

Pa e hendenan por a traha un tanki di metal bashá dje grandi ei i dje pisá ei nan mester tabatin hopi saber di konstrukshon. E struktura parti paden i e malchi parti pafó mester a soportá e preshon di 30 tòn di koper dirtí, i mester a basha e koper den un solo bashá pa evitá sker òf áreanan débil. Ku tur probabilidat, ora di basha e metal dirtí lo mester tabatin un kareda di fòrnu konektá na otro. Un trabou tremendo!

Den su orashon di inougurashon di e tèmpel, Rei Salomon a duna Yehova Dios e mérito pa tur e trabou di e tèmpel, bisando: “Bo a papia ku bo boka i a kumpli ku esaki ku bo man.”—1 Reinan 8:24.