Bo Interes den Kosnan Spiritual i Bo Bienestar

PROBABLEMENTE bo ta dediká hopi tempu pa kuida bo salú. Kisas, tur dia bo ta pasa ocho ora na soño, vários ora pa kushiná i pa kome, i ocho ora òf mas pa traha pa bo tin un dak riba bo kabes i kuminda pa kome. Si bo bira malu, probablemente bo ta saka tempu i plaka pa bai un dòkter òf pa traha un remedi di kas. Tambe bo ta limpia kas, baña i podisé asta hasi ehersisio regularmente, tur esei pa bo tin un bon salú.

Pero pa bo tin un bon salú, bo tin ku bai mas leu ku djis perkurá pa bo nesesidatnan físiko. Tin algu mas ku ta masha vital pa bo bienestar. Estudionan médiko a saka na kla ku bo salú físiko ta estrechamente ligá ku bo salú òf kondishon spiritual, esta, bo interes òf falta di interes den kosnan spiritual.

Un Konekshon Positivo

Profèser Hedley G. Peach di e Universidat di Melbourne, Oustralia, a bisa: “Mayoria artíkulo original di investigashon riba e tópiko aki a saka na kla ku mas interes un hende tin den kosnan spiritual [òf, mas e ta buska Dios], mihó salú lo e tin.” Komentando riba e resultadonan aki, The Medical Journal of Australia a deklará: “Tambe nos a mira ku un hende religioso . . . su preshon di sanger ta mas abou, su kolesteròl ta mas abou . . . i asta e ta kore ménos riesgo di haña kanser na tripa grandi.”

 Meskos tambe, na Merka un estudio ku Universidat di California, situá na Berkeley, a kondusí na aña 2002 bou di 6.545 hende, a mustra ku “hende ku ta bai misa un biaha pa siman ta biba remarkablemente mas largu ku esnan ku ta bai masha poko òf ku no sa bai mes.” Doug Oman, outor prinsipal di e estudio i profèser dje Fakultat di Salú Públiko n’e universidat aki, a bisa: “Nos a haña e diferensia aki asta despues ku nos a tene kuenta ku faktornan manera lasonan sosial i sierto kustumbernan ku tin influensia riba salú, manera humamentu i ehersisio.”

Segun The Medical Journal of Australia, hende ku ta mira bida for di un punto di bista spiritual ta haña mas benefisio. El a bisa: “Estudionan oustraliano a haña ku bou di hende religioso tin mas stabilidat matrimonial, ménos uso di alkohòl i droga, un índise mas abou di suisidio i ménos pensamentu den e direkshon ei, ménos ansiedat i depreshon i mas amor inegoista.” Ademas, e revista BMJ (ántes konosí komo The British Medical Journal) a bisa: “Aparentemente, hende ku ta kere mas firme ainda den Dios ta pasa over di nan tristesa mas lihé i mas kompletamente despues di e morto di un ser kerí, ku otro hende ku no tin e mesun konvikshon ei.”

Tin vários pensamentu tokante kiko realmente kier men ser un persona spiritual. Ma un kos ta sigur: bo kondishon spiritual tin hopi di haber ku bo salú físiko i mental. E evidensia aki ta na armonia ku un deklarashon ku Hesukristu a hasi kasi 2.000 aña pasá. El a bisa: “Felis [ta] esnan ku ta rekonosé ku nan tin mester di Dios.” (Mateo 5:3, Beibel na papiamentu koriente) Ya ku bo salú i bo felisidat tin hopi di haber ku bo kondishon spiritual, lo bo ta puntrando bo mes: ‘Unda mi por haña guia spiritual konfiabel? I kiko ta nifiká ser un persona spiritual?’