Un Konsenshi Onrado

KORIENDO un dia riba kaminda di trabou pa kas, Charles, un empleado di un universidat na Kenia, a pèrdè su telefon selular. Na Kenia, ainda esaki ta un aparato kostoso i di luho.

Charles di: “Mi no a spera di hañ’é bèk.” Sin embargo, un par di dia despues, un yamada di telefon for di e sukursal di Testigunan di Yehova na Kenia a koh’é di sorpresa. Kasi e no por a kere loke e tabata tende ora nan a bis’é p’e pasa tuma su telefon selular! A resultá ku un Testigu di Yehova ku ta traha tempu kompletu den sirbishi a kore den e mesun vehíkulo ku Charles i a haña e telefon. Den su afan pa haña e doño, e Testigu a hiba e telefon n’e sukursal. Anto a base di e number ku ta aparesé riba e telefon, e trahadónan boluntario einan a buska pa sa ken ta su doño te ku nan a logra lokalis’é.

Charles a skirbi den un karta ku el a manda p’e sukursal: “Mi ta apresiá mashá e esfuersonan ku boso a hasi pa tuma kontakto ku mi, apesar ku esei no tabata fásil. Mi gradisimentu sinsero ta bai n’e miembronan di boso organisashon ku a haña e telefon, buska pa sa ta di ken e ta, i sòru pa mi hañ’é. No ta fásil pa haña hende onrado awe, pero ta algu hopi positivo ku nos tin algun hende ku ta resaltá komo berdadero Testigunan di Yehova Dios.”

Tur kaminda Testigunan di Yehova ta konosí pa nan onrades. Nan ta imitá apòstel Pablo, kende a bisa: “Nos ta sigur ku nos tin un bon konsenshi, ku deseo pa komportá nos mes den tur kos na un manera onorabel [“onrado,” NW].” (Hebreonan 13:18; 1 Korintionan 11:1) Nan ta komprondé ku e kondukta ei ta duna gloria na Yehova Dios, ya ku Hesus a bisa: “Laga boso lus bria dilanti di hende di tal manera ku nan por mira boso bon obranan i glorifiká boso Tata ku ta den shelu.”—Mateo 5:16.