Keda Moralmente Puru dor di Protehá Bo Kurason

“Warda bo kurason riba tur kos, pasobra e ta e fuente di bida.”—PROVERBIONAN 4:23.

1-3. (a) Kon hende ta mustra hopi bes ku nan no ta balorá nan puresa moral? Ilustrá. (b) Pakiko ta importante pa analisá e balor di puresa moral?

KISAS e kuadro tabata mustra bieu. Podisé e no tabata pas ku sobrá kosnan den e kas. Sea loke sea, aparentemente e doño no tabatin muchu interes den dje. E kuadro a bin resultá na un marshe di pruga p’e preis di 29 dòler. Sin embargo, un par di aña despues, su doño nobo a deskubrí ku e tabata bal kasi un mion dòler! Sí, a resultá ku e kuadro ta un obra maestro ekstraordinario. Imaginá bo kon e doño anterior, ku a balotá e tesoro aki, lo mester a sinti su mes!

² Hopi bes algu similar ta sosodé ku e limpiesa òf puresa moral di un persona. Awendia, masha poko hende ta duna balor na nan puresa moral. Algun ta mir’é komo algu chapo ku no ta pas den e bida moderno aki. Pues, nan ta dispuesto di pèrd’é a kambio di un rekompensa chikitu. Algun ta interkambiá nan puresa moral pa un ratiko di plaser seksual. Otronan ta sakrifik’é ku e speransa di haña un mihó posishon den bista di nan pareunan òf di un persona di e otro sekso.—Proverbionan 13:20.

³ Hopi hende ta deskubrí demasiado lat ki balioso nan puresa moral realmente tabata. Mayoria biaha e konsekuensianan ta masha lamentabel. Manera Beibel ta bisa, e efektonan despues di inmoralidat por ta manera venenu, “marga manera apsintio.” (Proverbionan 5:3, 4) En bista di e ambiente moralmente korumpí awe, kon bo por balorá i mantené bo puresa moral? Nos lo enfoká riba tres paso relashoná ku otro.

Protehá Bo Kurason

4. Kiko ta nos kurason figurativo, i pakiko nos tin ku proteh’é?

⁴ Pa bo keda moralmente puru bo tin ku protehá bo kurason. Beibel ta bisa: “Warda bo kurason riba tur kos, pasobra e ta e fuente di bida.” (Proverbionan 4:23) Ta na kua “kurason” Beibel ta referí akinan? No ta e órgano literal. Ta trata aki di bo kurason figurativo. E ta referí na loke bo ta di paden, inkluso bo pensamentu-, sintimentu- i motivashonnan. Beibel ta bisa: “Stima SEÑOR bo Dios ku henter bo kurason, ku henter bo alma i ku tur bo forsa.” (Deuteronomio 6:5) Hesus a referí n’e mandamentu aki komo esun di mas importante. (Marko 12:29, 30) Ta bisto anto ku nos kurason tin un balor enorme. Ta bale la pena pa nos proteh’é.

5. Kon nos kurason por ta algu balioso, i a la bes peligroso?

⁵ Sin embargo, Beibel ta bisa tambe ku “e kurason ta mas engañoso ku tur kos i ta totalmente korupto.” (Jeremias 17:9) Kon nos kurason por bira engañoso—un peliger pa nos? Wèl, tuma por ehèmpel un outo. E ta un opheto balioso ku asta por yuda bo salba bida di un hende den un kaso di emergensia. Pero si komo konduktor bo no por kontrolá e outo, i  si bo no maneh’é bon, e mesun outo ei por bira fásilmente un arma mortal. Meskos tambe, si bo no protehá bo kurason, lo bo bira esklabo di bo deseo- i impulsonan interno, i e konsekuensianan lo por ta fatal. E Palabra di Dios ta bisa: “Esun ku konfia den su mes kurason ta un bobo, ma esun ku kana ku sabiduria lo wòrdu librá.” (Proverbionan 28:26) En bèrdat, si bo usa e Palabra di Dios p’e guia bo, meskos ku lo bo konsultá un mapa di kaminda promé ku bo kuminsá un biahe, bo por kana ku sabiduria i evitá desaster.—Salmo 119:105.

6, 7. (a) Kiko ta santidat, i pakiko e ta importante pa Yehova su sirbidónan? (b) Kon nos por sa ku hende imperfekto por reflehá e santidat di Yehova?

⁶ Di naturalesa nos kurason no ta inkliná na puresa moral. Ta nos tin ku gui’é den e direkshon ei. Un manera pa hasi esei ta dor di meditá riba e berdadero balor di puresa moral. E kualidat aki ta estrechamente ligá ku santidat, ku ta nifiká limpiesa, separashon for di loke ta pekaminoso. Santidat ta un kualidat presioso ku ta un karakterístika fundamental di Yehova Dios. Sentenáres di pasashi di Beibel ta asosiá e kualidat ei ku Yehova. De echo, Beibel ta bisa ku “santidat ta pertenesé na Yehova.” (Eksodo 28:36, NW) Pero kiko e kualidat supremo ei tin di haber ku hende imperfekto manera nos?

⁷ Yehova ta bisa nos den su Palabra: “Boso lo ta santu, pasobra ami ta santu.” (1 Pedro 1:16) Sí, nos por imitá e santidat di Yehova; nos por ta limpi den su bista i keda moralmente puru. Pues ora nos keda leu for di aktonan impuru i sushi, nos ta hasiendo esfuerso pa alkansá un privilegio haltu i emoshonante—e privilegio di reflehá un bunita karakterístika di e Dios Haltísimo! (Efesionan 5:1) Nos no mester asumí ku esei ta fuera di nos alkanse, pasobra Yehova ta un Doño sabí i rasonabel ku nunka ta eksigí mas di nos di loke nos por hasi. (Salmo 103:13, 14; Santiago 3:17) Ta bèrdat ku nos tin ku hasi esfuerso pa keda spiritualmente i moralmente puru. Pero apòstel Pablo a papia di e “deboshon sinsero i puru pa ku Kristu.” (2 Korintionan 11:3, Beibel na papiamentu koriente) Kristu i su Tata no meresé pa nos hasi tur esfuerso pa keda moralmente puru? Al fin i al kabo, nan a mustra asina tantu amor na nos ku nos no por ni kuminsá paga bèk. (Juan 3:16; 15:13) Nos tin e privilegio di por ekspresá nos gratitut dor di hiba un bida moralmente limpi. Dor di pensa riba nos puresa moral di e forma aki, nos lo balor’é i protehá nos kurason.

8. (a) Kon nos por nutri nos kurason figurativo? (b) Kiko nos kòmbersashon por revelá tokante nos?

⁸ Tambe nos ta protehá nos kurason dor di e manera ku nos ta alimentá nos mes. Nos tin ku nutri nos mente i kurason regularmente ku bon alimento spiritual, manteniendo nos enfoke riba e bon nobo di e Reino di Dios. (Kolosensenan 3:2) Asta nos kòmbersashon mester reflehá un enfoke asina. Si nos tin e fama di ta gusta papia di kosnan karnal i inmoral, nos ta revelando algu tokante e kondishon di nos kurason. (Lukas 6:45) Mas bien, laga nos tin e fama di ta papia tokante kosnan spiritual i edifikante. (Efesionan 5:3) Pa protehá nos kurason, tin peligernan serio ku  nos tin ku evitá. Laga nos analisá dos di esakinan.

Hui di Inmoralidat

9-11. (a) Pakiko esnan ku ta ignorá e konseho di 1 Korintionan 6:18 tin mas chèns di haña nan metí den inmoralidat serio? Ilustrá. (b) Si nos ta huyendo di inmoralidat, kiko nos ta evitá? (c) Ki ehèmpel sobresaliente fiel Jòb a pone pa nos?

⁹ Yehova a inspirá apòstel Pablo pa skirbi algun konseho ku a yuda hopi persona protehá nan kurason i mantené nan puresa moral. Pablo a bisa: “Hui for di inmoralidat.” (1 Korintionan 6:18) Ripará ku el a bai mas leu ku djis bisa “evitá inmoralidat.” Kristiannan mester hasi mas. Nan mester hui for di aktonan inmoral, meskos ku nan lo hui for di un situashon ku ta pone nan bida na peliger. Si nos ignorá e konseho ei, nos tin mas chèns di kai den inmoralidat serio i pèrdè e aprobashon di Dios.

¹⁰ Laga nos ilustrá esaki: Un mama ta baña su yu hòmber chikitu i bistié pa un okashon importante. E mucha ta puntr’é si e por hunga pafó promé ku e famia sali, i e mama ta permitié bou di e kondishon ku e no ta bai hunga banda di un plas di awa ku lodo ku tin pafó. E ta bis’é: “Si bo susha bo paña na lodo, bo ta haña straf.” Pero, un par di minüt despues e ta mira e mucha tambaliando riba su tench’i pia nèt na rant di e plas di awa. Ainda e no a susha na lodo. Tòg, e ta ignorando e mama su spièrtamentu pa no bai banda di e plas di awa, i e por konta ku su mama ta skual e. (Proverbionan 22:15) Hopi hóben i adulto ku mester sa mihó ta kometé e mesun fout. Kon asina?

¹¹ Den e tempu aki ku asina tantu hende a entregá nan “na pashonnan bergonsoso,” a lanta henter un industria pa bende informashon riba tereno di relashon seksual ilísito. (Romanonan 1:26, 27) E plaga di pornografia a plama den revista, buki, vidio i riba Internet. E personanan ku ta skohe pa graba e imágennan ei den nan mente sigur no ta huyendo di inmoralidat. Nan ta hungando kuné, na moda di papia tambaliando na rant di dje, desobedesiendo e spièrtamentu di Beibel. En bes di protehá nan kurason, nan ta venenand’e ku imágennan bibu ku lo por tuma hopi aña pa disparsé for di nan memoria. (Proverbionan 6:27) Laga nos siña for di fiel Jòb, kende a sera un pakto—un kombenio formal—ku su wowonan, pa no eksponé nan na loke solamente por a pon’é kai den tentashon pa hasi malu. (Jòb 31:1) Esei sigur ta un ehèmpel ku nos por sigui!

12. Kon parehanan kristian por “hui for di inmoralidat” durante namorashon?

¹² Ta masha importante pa “hui for di inmoralidat”  durante namorashon. E periodo ei mester ta un tempu di goso, yen di speransa i antisipashon, pero algun pareha hóben ta dañ’é dor di hunga ku inmoralidat. Dor di esei nan ta priva otro di e mihó fundeshi pa un bon matrimonio, esta, un relashon basá riba amor inegoista, dominio propio i obedensia na Yehova Dios. Un pareha kristian a haña nan enbolbí den kondukta inmoral durante nan namorashon. Despues ku nan a kasa, e esposa a atmití ku su konsenshi a torment’é i a asta ruiná su goso di e dia di boda. El a konfesá: “Mi a pidi Yehova pordon hopi biaha, pero ounke shete aña a pasa kaba, ainda mi konsenshi ta molestiá mi.” Ta importante pa esnan ku kometé e tipo di pikánan ei buska yudansa di ansianonan kristian. (Santiago 5:14, 15) Sin embargo, hopi pareha kristian ta aktua sabí i ta evitá e peligernan aki durante namorashon. (Proverbionan 22:3) Nan ta limitá nan ekspreshonnan di kariño. Nan ta sali ku shaperon i ta tene masha kuidou pa nan no ta nan so na lugánan isolá.

13. Pakiko un kristian no mester namorá un persona ku no ta sirbi Yehova?

¹³ Un kristian ku ta kuminsá namorá un persona ku no ta sirbi Yehova tin hopi chèns di haña su mes ku problemanan serio. Por ehèmpel, kon bo por drenta ku un persona ku no ta stima Yehova Dios? Ta vital pa kristiannan uni nan mes solamente ku esnan ku ta stima Yehova i ku ta respetá su normanan di puresa moral. E Palabra di Dios ta bisa nos: “No uni boso mes den yugo desigual ku inkrédulonan, pasobra ki kompañerismo hustisia tin ku inhustisia, i ki komunion lus tin ku skuridat?”—2 Korintionan 6:14.

14, 15. (a) Ki punto di bista robes algun hende tin relashoná ku e nifikashon di “inmoralidat”? (b) Ki tipo di aktonan ta kai bou di “inmoralidat,” i kon kristiannan por “hui for di inmoralidat”?

¹⁴ Konosementu tambe ta esensial. Nos no por ègt hui for di inmoralidat si nos no sa realmente kiko e ta. Algun hende den e mundu djawe a adoptá un idea inkorekto enkuanto e nifikashon di “inmoralidat.” Nan ta imaginá nan ku nan por satisfasé nan impulsonan seksual sin kasa basta nan no tene relashon seksual. Asta algun instituto respetá di salubridat ku ta boga pa redusí e kantidat di embaraso hubenil indeseá a animá hóbennan pa praktiká aktonan seksual ku ta desviá for di loke ta normal pa nan no sali na estado. Lamentablemente e konsehonan ei ta basá riba un guia robes. Evitá embaraso pafó di matrimonio no ta meskos ku mantené puresa moral, i e berdadero definishon di “inmoralidat” no ta asina limitá.

¹⁵ E palabra griego por·néi·a, tradusí komo fornikashon òf “inmoralidat,” tin un nifikashon hopi amplio. E tin di haber ku relashon seksual entre personanan ku no ta kasá di otro i ta enfoká riba e uso inkorekto di e órganonan seksual. Por·néi·a ta enserá aktonan manera sèks oral, sèks anal i masturbashon di un otro persona—kosnan ku por lo general sa tuma lugá den un kas di prostitushon. Hende ku ta kere ku e aktonan ei no ta kai bou di “inmoralidat” ta gañando nan mes i a bira víktima di un di e trampanan di Satanas. (2 Timoteo  2:26) Ademas, mantené puresa moral ta nifiká mas ku simplemente apstené di kualke akto inmoral. Pa “hui for di inmoralidat,” nos tin ku evitá tur forma di impuresa seksual i libertinahe ku lo por pone nos kai den e piká serio di por·néi·a. (Efesionan 4:19) Den e manera ei nos ta keda moralmente puru.

Evitá e Peligernan di Flirtmentu

16. Den ki sirkunstansia ta apropiá pa mustra amor romántiko, i kua ehèmpel bíbliko ta ilustrá esaki?

¹⁶ Si nos kier keda moralmente puru, un otro peliger ku nos tin ku tene kuidou kuné ta flirtmentu. Kisas algun hende ta insistí ku flirtmentu ta algu inosente, dibertishon inofensivo entre miembronan di e sekso opuesto. Klaru ku no tin nada malu pa un dado momentu mustra amor romántiko. Por ehèmpel, nan a mira Isaak “karisiá” Rebeka, i tabata bisto pa esnan ku a wak ku nan no tabata ruman di otro. (Génesis 26:7-9) Sin embargo, nan tabata kasá di otro. P’esei, ekspreshon di kariño entre nan dos tabata na su lugá. Flirtmentu ta un otro asuntu.

17. Kiko ta flirtmentu, i kon e problema aki por ser kontrolá?

¹⁷ Nos por definí flirtmentu komo lo siguiente: duna impreshon di tin interes romántiko den un persona sin berdadero intenshon di kasa kuné. Hende ta un kriatura kompliká, pues sin duda tin hopi manera ku e por flirt. Algun di nan ta masha sutil. (Proverbionan 30:18, 19) Pues, reglanan rígido realmente no ta e solushon. Mas bien, algu mas importante ku regla ta nesesario: un outo-análisis onesto i aplikashon konsiensudo di prinsipionan bíbliko.

18. Kiko ta impulsá algun hende pa flirt, i pakiko flirtmentu ta perhudisial?

¹⁸ Si nos ta onesto ku nos mes, probablemente mayoria di nos lo tin ku atmití ku ora nos sinti ku un persona di e otro sekso tin un interes romántiko den nos, nos ta sinti nos gosá. Esei ta natural. Pero nos ta flirt pa lanta e interes ei—djis pa lanta nos ego òf pa kousa un reakshon asina den un otro persona? Si ta asina, nos a pensa riba e doló ku nos por ta kousando un otro hende? Por ehèmpel, Proverbionan 13:12 ta bisa: “Speransa posponé ta hasi e kurason sinti malu.” Si nos ta flirt deliberadamente ku un persona, probablemente nos no sa mes kon esei ta afektá e persona ei. Kisas e ta krea speransa di kuminsá un namorashon i asta kasa despues. E desepshon ku e persona ei ta haña despues por ta devastador. (Proverbionan 18:14) Hunga ku sintimentu di otro hende intenshonalmente ta kruel.

19. Kon flirtmentu por pone matrimonionan kristian na peliger?

¹⁹ Ta partikularmente importante pa tene kuidou ku flirtmentu ora ta trata di hende kasá. Ta masha malu pa mustra interes romántiko den un persona kasá, òf pa un persona kasá mustra e interes ei den un persona ku no ta su kasá. Ta tristu pa bisa, pero algun kristian tabatin e pensamentu ekiboká ku no tin nada malu pa un ruman kristian krea sintimentu romántiko pa un persona di e otro sekso ku no ta su kasá. Algun ta revelá nan preokupashonnan di mas íntimo na un “amigu” asina, asta konfiand’e kosnan privá ku nan no ta papia ni ku nan kasá. Dor di esei e sintimentunan romántiko entre e dos personanan aki ta bira mas fuerte, i esun ta bai pega emoshonalmente na e otro, lokual por debilitá i asta kaba ku un matrimonio. Kristiannan kasá ta hasi bon di kòrda Hesus su spièrtamentu sabí tokante adulterio: tur kos ta kuminsá den nos kurason. (Mateo 5:28) P’esei, laga nos  protehá nos kurason i evitá situashonnan ku por hiba na resultadonan desastroso asina.

20. Kon nos mester ta determiná pa mira nos puresa moral?

²⁰ Ta bèrdat ku no ta fásil pa keda desente den e mundu inmoral djawe. Pero kòrda ku ta muchu mas fásil pa bo keda ku bo puresa moral ku pa bo hañ’é bèk unabes bo a pèrd’é. Klaru ku Yehova por “pordoná abundantemente” i ta kapas pa purifiká esnan ku ta berdaderamente arepentí di nan pikánan. (Isaias 55:7) Sin embargo, Yehova no ta protehá esnan ku ta kometé inmoralidat di e konsekuensianan di nan akshonnan. E efektonan ku ta bini despues por dura pa hopi aña, asta p’e restu di nan bida. (2 Samuel 12:9-12) Hasi tur bo posibel pa bo keda moralmente puru dor di protehá bo kurason. Mira bo posishon limpi i puru dilanti Yehova Dios komo un tesoro presioso—i no pèrd’é nunka!

Kon Lo Bo Kontestá?

• Kiko ta puresa moral, i pakiko e ta asina importante?

• Kon nos por protehá nos kurason?

• Kiko hui for di inmoralidat ta enserá?

• Dikon nos mester evitá flirtmentu?

[Preguntanan di Estudio]

[Plachi na página 11]

Un outo ku no ta ser bon manehá por bira peligroso

[Plachinan na página 12]

Kiko por sosodé si nos ignorá spièrtamentu?

[Plachi na página 13]

Un namorashon limpi ta algu gososo i ta onra Dios