Konsuelo pa Hende Afligí

ORA hòmber- i muhénan fiel di pasado tabata pasa den nan aflikshonnan, nan tabata hasi orashon intenso pa Dios guia nan. Pero tambe nan a dal e pasonan nesesario pa aliviá nan aflikshon, entre otro, dor di usa maneranan ingenioso pa skapa di nan opresornan. Por ehèmpel, konfiansa den Yehova kombiná ku esfuerso personal a permití David wanta su difikultatnan. Kiko di nos awe?

Ora bo ta pasando den un aflikshon, probablemente bo ta dal sierto paso pa resolvé bo problema. Por ehèmpel, si bo pèrdè trabou, lo bo no hasi esfuerso pa bo haña un trabou adekuá ku por sostené abo i bo famia? (1 Timoteo 5:8) Òf si bo ta sufri di un enfermedat, lo bo no buska un bon dòkter? Ta interesante pa nota ku Hesus mes, kende tabatin e poder di Dios pa kura tur sorto di enfermedat, a rekonosé ku ‘esnan ku ta malu tin mester di dòkter.’ (Mateo 9:12) Pero kisas no ta semper bo ta logra sali for di sirkunstansianan desfaborabel; podisé, te na sierto grado, lo bo tin ku keda soportá nan.

Pakiko no menshoná e asuntu den orashon na Yehova Dios? Por ehèmpel, ora bo ta buska trabou, konfiansa den Dios huntu ku orashon lo yuda nos resistí kualke tentashon pa aseptá un trabou ku ta na konflikto ku prinsipionan di Beibel. Tambe nos lo evitá di laga golosidat òf amor pa plaka “desviá [nos] for di e fe.” (1 Timoteo 6:10) En bèrdat, ora nos tin ku tuma desishonnan importante relashoná ku trabou, famia òf problema di salú, nos por sigui e animashon di David: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.”—Salmo 55:22.

Ademas, orashon sinsero lo yuda nos mantené nos ekilibrio mental; e ora ei nos aflikshon lo no kaba ku nos. Komo un kristian berdadero, apòstel Pablo a skirbi: “Den tur kos, pa medio di orashon i súplika ku gradisimentu, laga boso petishonnan ta konosí dilanti di Dios.” Den ki manera orashon sinsero por konsolá nos? “E pas di Dios, ku ta surpasá tur komprondementu, lo warda boso  kurason i boso mente den Kristu Hesus.” (Filipensenan 4:6, 7) E pas di Dios “ta surpasá tur komprondementu.” P’esei, e por stabilisá nos ora nos ta sinti nos angustiá. Lo e ‘warda nos kurason i nos mente,’ yudando nos asina pa evitá di reakshoná na un manera deskabeyá i imprudente, nèt loke por hasi nos aflikshon pió.

Orashon por asta hasi un diferensia den kon un situashon ta desaroyá. Ora apòstel Pablo a kai prezu na Roma, humildemente el a pidi su rumannan kristian hasi orashon p’e. Pakiko Pablo a hasi e petishon aki? El a skirbi nan: “Mi ta roga boso mas ainda pa hasi esaki, pa mi por wòrdu debolbé na boso mas lihé.” (Hebreonan 13:19) Ku otro palabra, Pablo tabata sa ku e echo ku Yehova lo a tende e orashonnan persistente di su rumannan den fe lo por a hasi un diferensia pa loke ta e tempu di su liberashon.—Filemon 22.

Orashon por kambia e rumbo di nos aflikshon? Sí, pero tòg nos mester realisá ku kisas Yehova Dios no ta kontestá nos orashonnan den e manera ku nos lo a preferá. Pablo a hasi orashon vários biaha tokante su “sumpiña den karni,” tal bes un problema físiko. Pero en bes di kita e aflikshon, Dios a bisa Pablo: “Mi grasia ta basta pa bo, pasobra mi poder ta wòrdu hasí perfekto den debilidat.”—2 Korintionan 12:7-9.

Pues, anto, kisas un situashon ku ta kousa nos ferdrit no ta kita mesora. Sin embargo, nos lo haña e oportunidat pa demostrá nos konfiansa den nos Tata selestial. (Santiago 1:2-4) I nos por ta sigur ku ni maske Yehova Dios no eliminá e aflikshon, e por ‘proveé salida pa nos por soportá.’ (1 Korintionan 10:13) Ta bon pa remarká ku Yehova ta ser yamá e “Dios di tur konsuelo, kende ta konsolá nos den tur nos aflikshon.” (2 Korintionan 1:3, 4) Dios por duna nos loke nos mester pa nos por wanta, i nos tin e speransa di bida eterno.

Beibel, e Palabra di Dios, ta primintí ku Yehova “lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.” (Revelashon 21:3, 4) Un mundu sin aflikshon ta zona kasi inkreibel pa bo? Kisas sí, foral si bo a kustumbrá biba ku situashonnan desfaborabel. Tòg, libertat for di miedu i kalamidat ta nèt loke Dios a primintí, i su propósito lo kumpli sin falta.—Isaias 55:10, 11.

[Plachinan na página 9]

Di desesperashon pa alivio