“Lucha e Bon Lucha di Fe”

BO POR imaginá bo ku un sòldá den tempu di guera ta keda malkontentu pasobra nan a mand’é bai kas p’e pasa un tempu ku su kasá i yunan?

Un sòldá den e tempu di Rei David di Israel a risibí un instrukshon asina. Tabata Urias e heteo kende a haña e òrdu ei di rei ku a anim’é pa bai kas. Pero Urias a nenga di bai kas. Ora a puntr’é pakiko e ta aktua straño asina, el a kontestá ku e arka di pakto, ku ta representá e presensia di Dios, i e ehérsito israelita tabata riba kampo di bataya. Anto el a puntra: “Ami mester bai mi kas pa kome i bebe, i pa drumi ku mi esposa?” Pa Urias, esaki tabata impensabel na un momentu asina krítiko.—2 Samuel 11:8-11.

E reakshon di Urias ta lanta preguntanan importante, pasobra nos tambe ta biba den tempu di guera. Aktualmente tin un guera hopi diferente for di tur e gueranan ku e nashonnan a yega di bringa. E dos gueranan mundial ta nada na komparashon, i abo tambe ta enbolbí den e guera aki. E riesgonan ta grandi, i e enemigu ta spantoso. Den e guera aki no tin usamentu di skopèt ni tiramentu di bòm. Loke sí ta nesesario ta táktika di guera.

Promé ku bo bringa den e guera aki, bo mester sa kiko bo ta  bringa p’e i tambe si e guera ta moralmente hustu. E bataya ta bal e sakrifisio? Den un karta ku apòstel Pablo a skirbi Timoteo, el a mustra kiko ta e propósito di e lucha úniko aki: “Lucha e bon lucha di fe.” Sí, den e guera aki bo tin ku defendé, no un fòrti, sino e “fe,” esta, henter e bèrdat kristian manera Beibel ta revel’é. Klaramente, bo tin ku kere tur loke e “fe” aki ta enserá pa bo por lucha p’e i gana.—1 Timoteo 6:12.

Un guerero prudente ta hasi esfuerso pa sa ken ta su enemigu. Den e lucha aki, e enemigu tin hopi aña di eksperensia den strategia di guera, i e ta disponé di hopi rekurso i arma di guera. Tambe e ta sobrehumano. E ta malisioso, violento i sin eskrúpulo; ta trata aki di Satanas. (1 Pedro 5:8) Armanan literal i tambe astusia i triki humano ta inútil kontra e atversario aki. (2 Korintionan 10:4) Kiko bo por usa pa bringa e guera aki?

Nos arma prinsipal ta “e spada di e spiritu, kual ta e Palabra di Dios.” (Efesionan 6:17) Apòstel Pablo ta mustra kon efikas e ta: “E palabra di Dios ta bibu i aktivo i mas skèrpi ku kualke spada di dos filo, i ta penetrá te na e divishon di alma i spiritu, i di skarnir i tuti, i ta kapas pa husga e pensamentunan i intenshonnan di kurason.” (Hebreonan 4:12) Un arma asina skèrpi, asina eksakto, ku por penetrá te den e pensamentu- i motivashonnan interno di un persona sigur meresé pa nos us’é bon i ku hopi kuidou.

Probablemente bo sa ku un ehérsito por tin e armanan di mas sofistiká, pero si e sòldánan no sa kon pa usa nan bon, ta tantu bal. Abo tambe tin mester di instrukshon pa sa kon pa usa bo spada na un manera efikas. Afortunadamente, e sòldánan di mas versá por train bo. Hesus a yama e grupo di sòldá-maestro aki un “esklabo fiel i prudente,” enkargá ku e responsabilidat di perkurá alimento spiritual, òf instrukshon, na su debido tempu pa su siguidónan. (Mateo 24:45) Bo por rekonosé e esklabo aki dor di analisá e siñansanan i spièrtamentunan oportuno ku e ta duna ku hopi empeño tokante táktikanan enemigu. Echonan ta mustra ku e klase di esklabo aki ta konsistí di miembronan ungí ku spiritu di e kongregashon kristian di Testigunan di Yehova.—Revelashon 14:1.

No ta instrukshon so e esklabo kolektivo aki ta duna. El a demostrá e spiritu di apòstel Pablo, kende a skirbi n’e kongregashon na Tesalónika: “Nos tabata kariñoso meimei di boso, manera un menchi ta kuida su mes yunan ku ternura. Teniendo pues un amor grandi pa boso, a agradá nos pa no solamente kompartí e evangelio di Dios ku boso, ma tambe nos mes bida, pasobra boso a bira masha stimá pa nos.” (1 Tesalonisensenan 2:7, 8) Ta keda na kada sòldá kristian pa hasi bon uso di e entrenamentu amoroso ku nan ta risibí.

E Armadura Kompletu

Un armadura simbóliko kompletu ta disponibel pa bo protekshon. Bo por haña un idea di kiko e armadura aki ta konsistí na Efesionan 6:13-18. Un sòldá kouteloso lo no riska bai guera si e falta un parti di su armadura spiritual òf si e ta kibrá.

Un kristian tin mester di henter su armadura di protekshon, pero e eskudo grandi di fe ta partikularmente balioso. P’esei Pablo a skirbi: “Riba tur kos, [tuma] e eskudo di fe, ku kua boso lo por paga tur e flechanan sendí di e malbado.”—Efesionan 6:16.

E eskudo grandi, ku por kubri henter e kurpa, ta representá e kualidat di fe. Bo mester tin fe fuerte den e guia di Yehova i aseptá sin e menor duda ku tur su promesanan lo ser realisá. Bo mester sinti komo si fuera e  promesanan ei a kumpli kaba. No duda niun momentu so ku henter e sistema mundial di Satanas lo wòrdu destruí pronto, ku tera lo ser transformá den un paradeis, i ku hende leal na Dios lo bira perfekto atrobe.—Isaias 33:24; 35:1, 2; Revelashon 19:17-21.

Sin embargo, den e lucha ekstraordinario di aktualidat, bo mester di algu mas: un amigu. Den tempu di guera, lasonan estrecho di amistat ta forma segun ku e sòldánan ta duna otro animashon i protekshon, tin biaha asta salbando otro for di morto. Ounke nos ta balorá nos kompañeronan hopi, pa sobrebibí den e lucha aki, nos mester di e amistat di Yehova mes. P’esei Pablo a konkluí su lista di loke ta forma e armadura ku e palabranan: “Ku tur orashon i súplika pidi tur ora bai den spiritu.”—Efesionan 6:18.

Nos ta gusta mashá pa ta huntu ku un bon amigu. Nos ta buska su kompania. Meskos tambe, dor di papia regularmente ku Yehova den orashon, e ta bira real pa nos, un amigu di konfiansa. Disipel Santiago ta animá nos: “Hala serka Dios i e lo hala serka boso.”—Santiago 4:8.

Táktikanan Enemigu

Tin biaha bo lucha den e mundu aki ta manera ora bo ta kana riba un tereno yen di mina. Un atake por bin for di kualke direkshon, i e enemigu ta purba gara bo kompletamente for di base. Pero bo por ta sigur ku Yehova a suministrá tur e protekshon ku bo tin mester.—1 Korintionan 10:13.

Kisas e enemigu por konsentrá tur su esfuersonan pa ataká bèrdatnan di Beibel ku ta fundamental pa bo fe. Apóstatanan por labia bo, usa palabra dushi i rasonamentu trosí pa purba derotá bo. Pero e apóstata no tin bo bienestar na pechu. Proverbionan 11:9 ta bisa: “Un hipókrita [“apóstata,” NW] ta destruí su próhimo ku su boka, ma pa medio di sabiduria e hustu lo wòrdu librá.”

Lo ta un ekibokashon pa pensa ku bo tin ku skucha apóstatanan òf lesa loke nan ta skirbi pa refutá nan argumentunan. Nan rasonamentu trosí i venenoso por perhudiká bo spiritualmente i kontaminá bo fe meskos ku gangrena ku ta plama rápidamente. (2 Timoteo 2:16, 17) Mas bien, imitá Dios su reakshon n’e apóstatanan. Jòb a bisa di Yehova: “Un hende sin Dios [òf, un apóstata] no mag bin den su presensia.”—Jòb 13:16.

Kisas e enemigu ta purba un otro táktika, unu ku e tabatin sierto éksito kuné. Ora sòldánan ku ta den estado di alerta ser tentá pa sali for di nan formashon militar pa bai buska plaser inmoral, esaki por hiba na káos.

E enemigu ta lòk hende ku entretenimentu mundano, manera pelíkula i programanan inmoral na televishon, i músika fo’i sla. Algun hende ta pretendé ku nan por wak esenanan inmoral òf lesa literatura inmoral sin wòrdu afektá. Pero un persona ku tabata wak pelíkula ku kontenido seksual fuerte a atmití frankamente: “Hamas bo ta lubidá e esenanan ei. I mas bo pensa riba nan, mas gana bo  ta haña di hasi loke bo a mira . . . E pelíkula ta pone bo pensa ku bo a pèrdè algu.” Ta bale la pena kore e riesgo di wòrdu heridá dor di e atake sutil aki?

Un otro misil den e arsenal di arma di e enemigu ta e trampa di materialismo. E peliger por ta difísil pa diserní pasobra nos tur tin nesesidat material. Nos mester di kuminda, paña i un dak riba nos kabes; i no tin nada malu tampoko den e echo ku nos tin algu bunita. E peliger ta sinta den kon nos ta mira kosnan. Plaka por bira mas importante ku kos spiritual. Nos por bira amante di plaka. Ta bon pa kòrda ku rikesa material tin su límitenan. E ta pasahero; en kambio, rikesa spiritual ta dura pa semper.—Mateo 6:19, 20.

Si e moral di un ehérsito ta abou, e chènsnan di viktoria ta mengua. “Si bo desmayá den e dia di angustia, bo forsa ta keda limitá.” (Proverbionan 24:10) Desanimashon ta un arma ku Satanas a usa den un forma hopi efikas. Ora bo tin “komo hèlm e speransa di salbashon” bistí, esei lo yuda bo kombatí desanimashon. (1 Tesalonisensenan 5:8) Purba tene bo speransa mes fuerte ku esun di Abraham. Ora Dios a pidié ofresé su úniko yu, Isaak, komo sakrifisio, Abraham no a duda. E tabata konvensí ku Dios lo a kumpli ku Su promesa di bendishoná tur nashon pa medio di su desendensia i ku, si tabata nesesario, Dios por a lanta Isaak for di morto pa kumpli ku e promesa ei.—Hebreonan 11:17-19.

No Entregá den e Lucha

Algun persona ku a lucha balentemente pa hopi tempu lo por ta kansando i p’esei no ta luchando ku e mesun koutela. E ehèmpel di Urias, menshoná den e introdukshon di e artíkulo aki, por yuda tur kristian ku ta enbolbí den e lucha pa mantené e perspektiva korekto. Hopi di nos kompañeronan di lucha ta biba sin sierto nesesidatnan básiko di bida, ta ser eksponé na peliger, òf ta sufri di hamber i friu. Meskos ku Urias, nos no kier pensa mes riba tur e komodidatnan ku nos lo por disfrutá di dje awor òf sede n’e deseo pa hiba un bida fásil. Nos kier keda huntu ku Yehova su ehérsito global di luchadónan leal i sigui lucha te ora nos por disfrutá di e bendishonnan maravioso ku ta warda nos.—Hebreonan 10:32-34.

Lo ta peligroso pa floha nos vigilansia, podisé pensando ku e atake final ta leu den futuro ainda. E ehèmpel di Rei David ta resaltá e peliger. Pa un motibu òf otro e no tabata ku su trupanan den bataya. Komo resultado, David a kometé piká serio ku a kous’é angustia i sufrimentu p’e restu di su bida.—2 Samuel 12:10-14.

 Ta bale la pena hiba e lucha aki, enfrentá e kontratempunan di bataya, wanta mofa i keda leu for di e plasernan kuestionabel di e mundu aki? Esnan ku ta hibando e lucha ku éksito ta di akuerdo ku loke e mundu tin di ofresé por parse atraktivo, manera gleter lombrante, pero ku mirá mas djaserka tin masha poko balor. (Filipensenan 3:8) Ademas, hopi bes e plasernan ei ta resultá den doló i desepshon.

E kristian den e lucha spiritual aki ta disfrutá di un kompañerismo estrecho ku berdadero amigu, un konsenshi limpi i un speransa maravioso. Kristiannan ungí ku spiritu tin e speransa di haña bida inmortal den shelu huntu ku Kristu Hesus. (1 Korintionan 15:54) Mayoria luchadó kristian ta spera di haña bida humano perfekto den un paradeis aki riba tera. E premionan ei sigur ta bal kualke sakrifisio. I distinto di gueranan mundial, tanten ku nos keda fiel, e resultado pa nos den e bataya aki ta garantisá. (Hebreonan 11:1) Ma e resultado pa e sistema aki bou di kontròl di Satanas sí ta destrukshon total.—2 Pedro 3:10.

Segun ku bo ta hiba e lucha aki, kòrda e palabranan di Hesus: “Tene kurashi, mi a vense mundu.” (Juan 16:33) El a vense dor di keda vigilá i warda su integridat bou di prueba. Nos tambe por.

[Komentario na página 27]

No tin usamentu di skopèt ni tiramentu di bòm. Loke sí ta nesesario ta táktika di guera

[Komentario na página 30]

Tanten ku nos keda fiel, e resultado pa nos den e bataya aki ta garantisá

[Plachi na página 26]

E hèlm di salbashon lo yuda nos kombatí desanimashon

[Plachi na página 26]

Usa e eskudo grandi di fe pa desviá e “flechanan sendí” di Satanas

[Plachi na página 28]

“Hala serka Dios i e lo hala serka boso”

[Plachi na página 29]

Nos mester tin fe ku e promesanan di Dios lo kumpli