Pakiko Testigunan di Yehova Ta Yama Kada Bes na Bo Kas?
Pakiko Testigunan di Yehova Ta Yama Kada Bes na Bo Kas?
RÒNT mundu e persistensia di Testigunan di Yehova den nan trabou di kas pa kas ta bon konosí. Algun hende ta puntra nan mes pakiko e Testigunan ta yama kada bes na nan kas, foral si anteriormente nan no a mustra muchu interes den e mensahe di e Testigunan. Dos karta di Rusia ta yuda splika e motibu.
Masha, un mucha muhé di 19 aña na Khabarovsk, a atmití: “Pa ta franko, den pasado mi tabata purba tur manera pa evitá Testigunan di Yehova.” Ma despues ku el a lesa algun di e revistanan ku e Testigunan ta publiká, el a kambia su aktitut. Masha a skirbi: “E revistanan ta masha interesante i informativo, pero mas importante ainda, nan ta laga bo mira mundu for di un otro punto di bista. Pokopoko mi a kuminsá komprondé ku bida tin un propósito.”
For di e stat di Ussuriysk, mas o ménos 80 kilometer nort di Vladivostok, Svetlana a skirbi: “Resientemente, mi a kuminsá lesa E Toren di Vigilansia i Spièrta! Nos tin hopi mester di e revistanan aki den nos tempu. Mi ta gusta tur e artíkulonan. Nan ta masha interesante, informativo i instruktivo. Danki! Masha-masha danki pa boso presensia den e mundu aki i p’e trabou asina bon i asina esensial ku boso ta hasiendo.”
Rònt mundu Testigunan di Yehova ta pensa seriamente riba apòstel Pablo su pregunta: “Kon nan [esta, hende] lo tende sin un predikadó?” (Romanonan 10:14) Pakiko no tuma un par di minüt pa skucha e Testigunan e siguiente biaha ku nan bati na bo porta? Abo tambe lo por benefisiá di e mensahe di konsuelo di Beibel, e Palabra di Dios.