Pregunta di Lektor

Despues di Diluvio, Noe a laga un palomba sali for di e arka. E palomba a bolbe bèk ku “un blachi di oleifi.” Na unda e palomba a haña e blachi aki?

Beibel ta konta nos ku “e awa tabata oumentá mas i mas riba tera, asina ku tur e serunan haltu tur kaminda bou di e shelunan a keda tapá.” (Génesis 7:19) Segun ku e awa a baha òf mengua, un bes pa siman Noe tabata laga un palomba bula bai. El a hasi esaki na tres okashon. E di dos bes, e palomba a bolbe ku ‘un blachi di oleifi kitá fresku asina den su pik. Asina Noe a haña sa ku e awa a mengua for di riba tera.’—Génesis 8:8-11.

Ta klaru ku awor no tin ningun manera pa haña sa pa kuantu tempu un sierto parti di tera a keda bou di awa, pasobra no tin duda ku e Diluvio a kambia e struktura di tera. Pero probablemente e awa a tapa mayoria area pa un periodo sufisientemente largu ku hopi palu por a muri. Sin embargo, ta parse ku algun palu a retené nan vitalidat, anto esaki a yuda nan saka sprùit ora e awa a baha.

The New Bible Dictionary ta bisa tokante e palu di oleifi: “Ora ku kòrt’é te na tronkon, planchi nobo ta sali for di e rais, anto e por saka te ku sinku planchi nobo. Palu di oleifi muribundo [kasi morto] hopi bes ta saka sprùit di e manera aki tambe.” The New Schaff-Herzog Encyclopedia of Religious Knowledge ta bisa ku ta “komo si fuera ku e vitalidat di e palu di oleifi ta indestruktibel.” Ningun hende awe ta na haltura di e detayenan, manera por ehèmpel kuantu e konsentrashon di salu òf temperatura di e awa di e Diluvio tabata. Pues, nos no tin sigur ta ki efekto e awa tabatin riba e palunan di oleifi ni riba otro vegetashon.

Sin embargo, palu di oleifi di mondi no por biba den frialdat ku bo ta haña den e montañanan mas haltu. Generalmente e ta krese den áreanan ku ta keda bou di 1.000 meter, kaminda e temperatura ta mas o ménos 10 grado Celsius. E buki The Flood Reconsidered (Rekonsiderashon di e Diluvio), ta bisa: “Pues, Noe por a dedusí for di e blachi fresku ku e awa den e vayenan mas abou tabata sekando.” Ora Noe a laga e palomba bula bai un siman despues, e no a bolbe bèk, indikando ku e mester a haña mas vegetashon i un posibel lugá pa deskansá.—Génesis 8:12.