Religion Ta e Rais di e Problemanan di Humanidat?

“ORA no ta instigá religion ta instigá konflikto, e ta fungi komo un droga ku ta dof konsenshi di hende i ta yena mente di hende ku fantasianan ku ta pone nan hui for di realidat. . . . [E] ta pone hende bira intolerante, superstisioso, i yena ku odio i miedu.” E eks-misionero metodista ku a skirbi e komentario ei a sigui bisa: “E akusashonnan ei ta bèrdat. Tin religion bon i malu.”—Start Your Own Religion.

Kisas algun hende ta bisa: ‘Eigenlijk e krítika ei ta inhustu.’ Sin embargo, ken por nenga loke echonan di historia ta indiká? Por lo general, religion—definí komo “e sirbishi i adorashon rindí na Dios òf algu sobrenatural”—tin un historia spantoso. Loke e mester hasi ta iluminá nos i ehersé un bon influensia riba nos. Pero hopi bes loke e ta hasi ta krea konflikto, intoleransia i odio. Dikon e ta krea e problemanan aki?

Un Supuesto “Angel di Lus”

Segun Beibel tin un kontesta masha simpel mes. Presentando “su mes komo un angel di  lus” Satanas e Diabel a gaña miónes di hende pa sigui su siñansanan en bes di esnan di Dios. (2 Korintionan 11:14) Apòstel Juan a mustra ku Satanas su influensia ta asina ekstenso ku “henter mundu ta bou di kontròl di e malbado.” (1 Juan 5:19) Juan tabata sa ku Satanas tabata “gaña henter mundu.”—Revelashon 12:9.

Ki konsekuensianan esaki tabatin? Satanas a introdusí sistemanan religioso ku ta aparentá di ta santu. Nan tin “aparensia di ta religioso,” pero e mal frutanan ku nan ta produsí ta indiká ken nan realmente ta. (2 Timoteo 3:5; Mateo 7:15-20) En bes di yuda solushoná e problemanan di humanidat, religion de echo ta bira parti di e problema.

No pensa mesora ku esei no ta asina òf ku esei ta irasonabel. Kòrda, nos por papia di engaño ora e persona ku ta ser engañá no ta na haltura di esei. Apòstel Pablo a duna un ehèmpel di esaki ora el a skirbi: “E kosnan ku e paganonan ta sakrifiká, nan ta sakrifiká na demoño i no na Dios.” (1 Korintionan 10:20) Probablemente e idea so ku nan tabata adorá demoño lo a shòk e hendenan ei. Nan a kere ku nan tabata adorá un òf otro bon dios òf diosnan. Pero bon mirá nan a wòrdu engañá dor di “forsanan spiritual di maldat den e lugánan selestial” ku ta sostené Satanas den su intento pa gaña humanidat.—Efesionan 6:12.

Laga nos wak por ehèmpel kon Satanas a logra gaña hopi hende ku ta bisa ku nan ta kristian i ku a disidí di ignorá apòstel Juan su spièrtamentu tokante e mal influensia di e demoñonan.—1 Korintionan 10:12.

Loke Hesus A Siña A Bin di Dios

Hesukristu a bisa: “Mi siñansa no ta di mi, ma di esun ku a manda mi.” (Juan 7:16) Sí, loke el a siña a bin di e Dios Todopoderoso. Pues Hesus su siñansanan tabatin un efekto poderoso i iluminador riba esnan ku tabata skuch’é. E siñansanan aki no tabata ‘dof konsenshi di hende òf yena mente di hende ku fantasianan ku ta yuda nan hui for di realidat.’ Al kontrario, Hesus su siñansanan ta libra hende di siñansanan religioso falsu i di filosofianan humano produsí dor di un mundu ku pa motibu di e engaño di Diabel ta “tapá ku skuridat den nan komprondementu.”—Efesionan 4:18; Mateo 15:14; Juan 8:31, 32.

Por a identifiká kristiannan berdadero, no pa e echo ku nan tabata simplemente deklará nan deboshon abiertamente, sino mediante nan fe ku a reflehá e kualidatnan presioso ku e spiritu santu di Dios a produsí den nan. (Galationan 5:22, 23; Santiago 1:22; 2:26) E kualidat mas sobresaliente di nan tur ta e kualidat sublime di amor ku na mes momentu ta loke ta identifiká kristianismo berdadero.—Juan 13:34, 35.

Sin embargo, tuma nota di e siguiente punto importante: Ni Hesus ni su apòstelnan no a spera ku e kongregashon kristian lo keda manera e tabata ora el a wòrdu establesí. Nan tabata sa ku apostasia lo a desaroyá i ku pa un tempu religion berdadero lo no tabata bisto.

Religion Berdadero Skondí pa un Tempu

Den un ilustrashon tokante trigu i yerba shimaron, Hesus a predisí ku pa un tempu religion berdadero lo wòrdu tapá kasi kompletamente. Lesa e relato pa bo mes na Mateo 13:24-30 i 36-43. Hesus a sembra un kunuku ku trigu, e “bon simia,” ku ta representá su disipelnan fiel kende lo forma parti di e kongregashon kristian original. El a spièrta ku “un enemigu,” es desir, Satanas e Diabel, ku  tempu lo bin planta den e kunuku “yerba shimaron,” es desir, hende ku ta bisa ku nan ta siguidó di Hesukristu pero ku eigenlijk ta rechasá su siñansanan.

No muchu tempu despues di e morto di e apòstelnan di Hesus, personanan a aparesé ku a resultá di ta “yerba shimaron,” ku a preferá siñansanan humano trosí en bes di “e palabra di SEÑOR.” (Jeremias 8:8, 9; Echonan 20:29, 30) Komo konsekuensia, un kristianismo korumpí i falsu a aparesé riba esenario di mundu. E tabata dominá pa loke Beibel ta yama “e malbado,” es desir, un klase di klero korupto ku a enbolbé su mes profundamente den “tur e engaño di inikidat.” (2 Tesalonisensenan 2:6-10) Hesus a predisí ku e situashon aki lo kambia na “fin di mundu.” E kristiannan semehante di trigu lo wòrdu rekohé den unidat i e “yerba shimaron” finalmente lo wòrdu destruí.

Ta e kristianismo falsu ei ta karga responsabilidat pa e “siglonan di barbarismo total” i pa e skuridat spiritual ku a plama den kristiandat durante e siglonan ku a sigui. Distinguiendo e asuntu aki di antemano i tur e otro aktonan baho i violento ku a ser kometé desde e tempu ei en adelante den nòmber di religion, apòstel Pedro korektamente a predisí ku ‘pa motibu di nan [esnan ku a yama nan mes kristian] e kaminda di bèrdat lo [a] wòrdu blasfemá.’—2 Pedro 2:1, 2.

“Un Teologia di Rabia i Odio”

No kabe duda ku no ta kristiandat so a duna religion un mal reputashon. Por ehèmpel, pensa un ratu riba e punto di bista fundamentalista di “deboshon agresivo.” Eks-soeur Karen Armstrong a bisa ku esei ta loke “tradishon di tur religion prinsipal” a perkurá p’e. Segun Armstrong, un tèst krusial ku kualke religion mester pasa ta “kompashon den akshon.” Kiko historia di religion fundamentalista ta indiká den e aspekto aki? Armstrong a skirbi: “Religion fundamentalista, sea ku ta hudiu, kristian òf mòslem no ta logra pasa e tèst krusial aki ku éksito si e ta bira un teologia di rabia i odio.” (The Battle for God—Fundamentalism in Judaism, Christianity and Islam) Pero ta solamente religion “fundamentalista” no a logra pasa e tèst aki bon i a bira “un teologia di rabia i odio”? Historia ta indiká lo kontrario.

De echo, Satanas a forma un imperio mundial di religion falsu, identifiká pa rabia, odio i dramamentu di sanger kasi interminabel. Beibel ta yama e imperio aki “Gran Babilonia, [“Babilonia e Grandi,” NW] mama . . . di e abominashonnan di tera,” i e ta ser deskribí komo un prostituta ku ta sintá riba lomba di un sistema polítiko ku karakterístikanan di bestia. Tuma nota ku e ta ser konsiderá responsabel pa “e sanger . . . di tur esnan ku a wòrdu matá riba tera.”—Revelashon 17:4-6; 18:24.

No Ta Tur Hende A Wòrdu Gañá

Sin embargo, historia ta duna prueba ku no ta tur hende a wòrdu gañá. Melvyn Bragg ta remarká ku asta den e tempunan di mas skur den historia, “hopi alma ku meresé elogio a hasi bon maske mayoria hende rònt di nan tabata malbado.” Kristiannan berdadero a sigui “adorá [Dios] den spiritu i bèrdat.” (Juan 4:21-24) Nan a separá nan mes for di un sistema religioso mundial ku na moda di papia a kometé prostitushon dor di a fungi komo “un sostenedó di podernan militar.” Nan a nenga di mete nan den e relashon estrecho entre Religion i Estado, ku historia ta revelá komo “un pakto satániko, for di kua Hesus di Názarèt lo a keda hopi leu.”—Two Thousand Years—The Second Millennium: From Medieval Christendom to Global Christianity.

Den añanan mas resiente, Testigunan di Yehova a bira konosí pa e bon influensia ku nan ta ehersé riba otro hende. Pa nan no wòrdu influensiá dor di religion falsu, nan a basa nan kreensianan i akshonnan solamente riba e Palabra inspirá di Dios, esta, Beibel. (2 Timoteo 3:16, 17) I meskos ku kristiannan di promé siglo, nan a sigui e mandamentu di Hesus pa “no ta di mundu.” (Juan 15:17-19; 17:14-16) Na Alemania nazi, por ehèmpel, nan a nenga di komprometé prinsipionan kristian i p’esei nan no  tabata aseptabel segun ideologia nazi. Hitler tabata odia nan pa motibu di nan posishon. Un buki di skol ta bisa: “Testigunan di Yehova . . . a sigui e siñansa di Beibel pa no karga arma bou di ningun sirkunstansia. Pues nan a nenga di sirbi den ehérsito òf di tin algu di haber ku nazinan. Komo represaya, SS a enkarselá famianan kompletu ku ta Testigu di Yehova.” (Germany—1918-45) Sí, sientos di Testigu di Yehova na Alemania a muri a konsekuensia di persekushon nazi.

Klaru ku individuonan ku kurashi di vários otro religion a sufri pa motibu di nan kreensianan. Pero Testigunan di Yehova a hasi esei komo un grupo religioso uní. No kabe duda ku mayoria Testigu a keda fiel na e prinsipio básiko di e Skritura: “Obedesé Dios mas ku hende.”—Echonan 5:29; Marko 12:17.

E Rais di e Problema

Pues no ta kompletamente bèrdat ku religion ta e rais di tur humanidat su problemanan. Ta religion falsu ta e rais di e problemanan. Sin embargo, ta Dios su intenshon pa muy pronto eliminá tur religion falsu. (Revelashon 17:16, 17; 18:21) Su mandato na ken ku stima rektitut i hustisia ta: “Sali for di dje [Babilonia e Grandi, e imperio mundial di religion falsu], mi pueblo, pa bo no partisipá den su pikánan i pa bo no risibí di su plaganan; pasobra su pikánan a montoná yega te na shelu, i Dios a kòrda su inikidatnan.” (Revelashon 18:4, 5) Sí, Dios ta sintié sumamente ofendí pa motibu di religion ku ta ‘instigá konflikto, ta dof konsenshi di hende, ta yena mente di hende ku fantasianan ku ta pone nan hui for di realidat, i ta pone hende bira intolerante, superstisioso, i yena ku odio i miedu’!

Miéntras tantu, Dios ta reuniendo esnan ku ta stima bèrdat den e religion puru. Esaki ta e religion ku ta pega na prinsipionan i siñansanan di un Kreadó amoroso, hustu i kompasivo. (Mikeas 4:1, 2; Sofonias 3:8, 9; Mateo 13:30) Abo tambe por forma parti di dje. Si bo ta deseá di haña mas informashon tokante kon pa identifiká religion puru, skirbi e editornan di e revista aki libremente òf pidi kualke Testigu di Yehova pa yudansa.

[Plachi na página 7]

Hende di tur tipo di background a haña goso den e religion puru