Religion​—Un Bon Influensia òf un Mal Influensia?

“MI TA sinti ku mi debe kristianismo, i mi ta kere ku e mesun kos ta konta pa hende ku a biba durante e último 2000 aña.”—Prólogo, Two Thousand Years—The First Millennium: The Birth of Christianity to the Crusades.

E deklarashon públiko ei di aprobashon dirigí na “kristianismo” ta bin di Melvyn Bragg, un lokutor i eskritor ingles. Su palabranan ta reflehá e pensamentu di miónes di otro hende riba tera ku ta sinti e mesun tipo di gratitut profundo i lealtat pa ku un òf otro religion. Nan ta konvensí ku religion tabatin un ekselente influensia den nan bida. Por ehèmpel, un eskritor a bisa ku islam “a motivá un gran sivilisashon . . . [ku a] enrikesé henter mundu.”

Papel di Religion—Bon òf Malu?

Pero e siguiente palabranan di Bragg ta lanta un pregunta serio, esta si en bèrdat religion en general a ehersé un bon influensia. El a añadí: “Kristianismo tambe debe mi un splikashon.” Ta pa kiko asina e ke haña un splikashon? “Pa e intoleransia, maldat, krueldat i ignoransia intenshonal ku tambe a karakterisá gran parti di su ‘historia,’” e ta bisa.

Hopi hende lo bisa ku atraves di historia, intoleransia, maldat, krueldat i ignoransia intenshonal a duna mayoria religion na mundu mala fama. Nan ta opiná ku religion simplemente ta aparentá di ta un bendishon pa humanidat, pero ku tras di e supuesto birtut i santidat en realidat tin yen di hipokresia i engaño. (Mateo 23:27, 28) A Rationalist Encyclopædia ta bisa: “Den nos literatura e pensamentu ku ta wòrdu ripití mas tantu bes ta ku religion tin un balor spesial pa loke ta trata sivilisashon, pero echonan di historia ta desakredit’é masalmente.”

Den kualke korant ku bo lesa awe lo bo haña masha hopi ehèmpel di lidernan religioso ku ta papia tokante amor, pas i kompashon pero ku ta instigá odio i ta usa e nòmber di Dios pa hustifiká nan konfliktonan kruel. No ta nada straño anto ku hopi hende ta sinti ku hopi bes religion tin un influensia destruktivo den bida.

Sin Religion Ta Mihó?

Algun hende a asta yega na e mesun konklushon ku Bertrand Russell, un filósofo ingles, ku lo ta bon si algun dia “tur tipo di kreensia  religioso [lo] no eksistí mas.” Segun nan opinion, e úniko solushon duradero pa tur e problemanan di humanidat ta, si eliminá religion. Sin embargo, podisé nan ta lubidá ku esnan ku ta rechasá religion por instigá mes tantu odio i intoleransia ku esnan ku ta sosten’é lealmente. Karen Armstrong, un outor riba tópikonan di religion, ta rekordá nos: “A lo ménos, e Holokousto a mustra ku un ideologia mundano [por] ta mes peligroso ku kualke krusada religioso.”—The Battle for God—Fundamentalism in Judaism, Christianity and Islam.

Pues religion tin un bon influensia, òf e ta realmente e rais di tur e problemanan di humanidat? E solushon pa tur e problemanan ei ta pa deshasí di tur religion? Ban wak kiko Beibel tin di bisa tokante esaki den e siguiente artíkulo. Kisas e kontesta lo sorprendé bo.