Warda Bo di Engaño

“Mira pa ni un hende no kohe boso prezu dor di . . . engaño bano.” —KOLOSENSENAN 2:8.

1-3. (a) Ki ehèmpelnan ta mustra ku engaño a alkansá kasi tur aktividat di bida djawe? (b) Pakiko no mester ta un sorpresa pa nos ku tin hopi engaño den mundu?

“KUANTU di boso a yega di haña un kliente ku a gaña boso?” Algun aña pasá, un profèser di derecho a kondusí un enkuesta den kua el a hasi e pregunta ei. Kiko tabata e reakshon? E ta splika: “Di míles di abogado, un so nunka no a yega di hañ’é ku un kliente ku a gañ’é.” E motibu? “E abogado a kaba di kuminsá su praktijk na un ofisina grandi i te ainda e no a papia ku niun kliente.” E eksperensia aki ta ilustrá un bèrdat lamentabel, esta, ku gañamentu ta masha komun den e mundu djawe.

² Tin vários forma di gañamentu i esaki a alkansá kasi tur aktividat di e bida djawe. Medionan di komunikashon ta trese hopi ehèmpel padilanti: polítikonan ku ta gaña tokante nan akshonnan, akountent i abogadonan ku ta eksagerá ganashi di empresa, agensianan di publisidat ku ta engañá konsumidónan, i intermediarionan ku ta buska moda di saka probecho di kompanianan di seguro, djis pa menshoná un par. Tambe tin engaño religioso. Miembronan di klero ta engañá gran kantidat di hende dor di siña nan doktrinanan falsu, manera inmortalidat di alma, fièrnu di kandela i Trinidat.—2 Timoteo 4:3, 4.

³ Tur e engañonan aki mester sorprendé nos? Eigenlijk nò. Relashoná ku “e último dianan,” Beibel ta spièrta nos: “Hendenan malbado i gañadónan lo bai di malu pa pió,  gañando i siendo gañá.” (2 Timoteo 3:1, 13) Komo kristian, nos mester tene kuidou pa ideanan engañoso no desviá nos for di e bèrdat. I esei ta hiba nos na dos pregunta: Pakiko tin tantu engaño awe, i kon nos por protehá nos mes pa nos no wòrdu engañá?

Pakiko Tin Asina Tantu Engaño Awe?

4. Kon Beibel ta splika pakiko tin yen di engaño den e mundu aki?

⁴ Beibel ta splika bon kla pakiko tin asina tantu engaño den e mundu aki. Apòstel Juan a skirbi ku “henter mundu ta bou di kontròl di e malbado.” (1 Juan 5:19) E “malbado” ei ta Satanas e Diabel. Hesus a bisa di dje: “[E] no ta para den e bèrdat, pasobra no tin bèrdat den dje. Ki ora ku e papia un mentira, e ta papia for di su mes naturalesa, pasobra e ta un gañadó i e tata di mentira.” P’esei anto, ta algu straño ku e mundu aki ta reflehá e spiritu, e balornan i e karakterístikanan engañoso di su gobernante?—Juan 8:44; 14:30; Efesionan 2:1-3.

5. Kon Satanas a intensifiká su esfuersonan engañoso den e tempu di fin aki, i ken spesialmente ta su blanko?

⁵ Den e tempu di fin aki, Satanas a intensifiká su esfuersonan. El a ser tirá aki bou na tera. E sa ku su dianan ta kontá i e tin un “gran furia.” E ta desididu den su afan pa destruí mas tantu hende posibel, i p’esei e “ta gaña henter mundu.” (Revelashon 12:9, 12) No ta de bes en kuando so Satanas ta gaña. Al kontrario, e ta hasi tur loke ta na su alkanse pa gaña humanidat. * E ta rekurí na tur tipo di método engañoso—entre otro triki i traishon—pa siega mente di inkrédulo i tene nan leu for di Dios. (2 Korintionan 4:4) E eksperto di engaño aki ta spesialmente determiná pa devorá esnan ku ta adorá Dios “den spiritu i bèrdat.” (Juan 4:24; 1 Pedro 5:8) Nunka lubidá ku eigenlijk Satanas a pretendé: ‘Mi por apartá ken ku mi ke for di Dios.’ (Jòb 1:9-12) Laga nos konsiderá algun di Satanas su “trampanan” i mira kon nos por evitá di kai den nan.—Efesionan 6:11.

Warda Bo di Engaño di Apóstata

6, 7. (a) Kiko apóstatanan por pretendé? (b) Kon e Skritura ta mustra bon kla loke apóstatanan kier logra?

⁶ Satanas tin hopi tempu ta usa apóstatanan den su esfuersonan pa sedusí sirbidónan di Dios. (Mateo 13:36-39) Kisas e apóstatanan ta pretendé ku nan ta adorá Yehova i ku nan ta kere den Beibel, pero nan ta rechasá e parti visibel di su organisashon. Algun di nan asta ta rekurí n’e doktrinanan di ‘Babilonia e Grandi,’ e imperio mundial di religion falsu, ku ta desonrá Dios. (Revelashon 17:5; 2 Pedro 2:19-22) Bou di inspirashon divino, eskritornan di Beibel a usa palabranan fuerte pa eksponé e motivashon- i e métodonan di apóstatanan.

⁷ Kiko e apóstatanan kier logra? Mayoria di nan no ta keda satisfecho ku djis bandoná e fe ku podisé un tempu nan a mira komo esun berdadero. Hopi bes nan kier bai ku otronan tambe. En bes di sali buska nan mes disipelnan, hopi apóstata ta buska moda di “desviá e disipelnan [esta, e disipelnan di Kristu] i hasi nan bai nan tras.” (Echonan 20:29, 30) Relashoná ku maestronan falsu, apòstel Pablo a duna e siguiente spièrtamentu urgente aki: “Mira pa ni un hende no kohe boso prezu.” (Kolosensenan 2:8) Esei no ta deskribí nèt loke hopi apóstata ta purba hasi? Meskos ku un sekuestradó ta ranka un víktima, ku no ta sospechá nada, for di su famia, apóstatanan ta yag riba miembronan di e kongregashon ku tin tendensia di konfia den nan sinseridat. Nan ta buska moda di alehá esakinan for di e tou.

8. Ki métodonan apóstatanan ta usa pa logra nan meta?

⁸ Ki métodonan apóstatanan ta usa pa logra nan meta? Hopi bes nan ta rekurí na kosnan trosí, mitar bèrdat i falsedat abierto. Hesus tabata sa ku su siguidónan lo bira víktima di esnan ku lo “gaña tur klase di maldat riba  [nan].” (Mateo 5:11) E opositornan malisioso ei lo papia mentira ku e intenshon di engañá otro hende. Apòstel Pedro a spièrta tokante apóstatanan ku ta usa “palabranan di engaño,” ku ta plama “engañonan” i ku ta ‘trose e Skritura’ pa logra nan propio finnan. (2 Pedro 2:3, 13; 3:16) Lamentablemente, e apóstatanan ta logra “trastorná fe di algun hende.”—2 Timoteo 2:18.

9, 10. (a) Kon nos por warda nos mes di e engaño di apóstatanan? (b) Pakiko nos no ta sinti nos molestiá si nos tin ku refiná nos komprondementu di e propósito di Dios?

⁹ Kon nos por warda nos mes di e engaño di apóstatanan? Dor di sigui e konseho di e Palabra di Dios, ku ta bisa: “Tene na bista esnan ku ta kousa divishon i strobashon kontrario na e siñansa ku boso a haña, i apartá boso for di nan.” (Romanonan 16:17) Nos ta “apartá [nos] for di nan” dor di rechasá nan ideanan—presentá sea personalmente, riba papel òf riba Internet. Pakiko nos ta tuma e posishon ei? Na promé lugá, pasobra e Palabra di Dios ta manda nos hasi esei, i nos ta konfia ku semper Yehova tin nos mihó interesnan na pechu.—Isaias 48:17, 18.

¹⁰ Na di dos lugá, nos ta stima e organisashon ku a siña nos e bèrdatnan presioso ku ta separá nos na un manera asina kla for di Babilonia e Grandi. Na mes momentu nos ta rekonosé ku nos konosementu di e propósito di Dios no ta perfekto; atraves di añanan nos mester a hasi diferente ahuste den nos manera di komprondé kosnan. I komo kristiannan leal, nos ta spera trankil riba Yehova p’e sigui refiná nos. (Proverbionan 4:18) Miéntras tantu, nos lo no bandoná e organisashon ku Dios tin e plaser di usa, pasobra nos ta mira klaramente ku su bendishon ta riba dje.—Echonan 6:7; 1 Korintionan 3:6.

Tene Kuidou pa Bo No Gaña Bo Mes

11. Kon bin hende imperfekto tin un tendensia di gaña nan mes?

¹¹ Hende imperfekto tin un tendensia ku Satanas ta kla pa probechá di dje. Esei ta e tendensia di gaña bo mes. Jeremias 17:9 ta bisa: “E kurason ta mas engañoso ku tur kos i ta totalmente korupto.” I Santiago a skirbi: “Kada [hende] ta wòrdu tentá ora ku e wòrdu atraí i sedusí dor di su mes pashon.” (Santiago 1:14) Si nos kurason wòrdu tentá, e por lanta den nos un deseo pa kometé un piká ku por parse atraktivo i inofensivo. Un punto di bista asina ta engañoso, i si nos sede na piká, e konsekuensianan lo por ta desastroso.—Romanonan 8:6.

12. Den ki maneranan nos por kai den e trampa di gaña nos mes?

 ¹² Nos por kai fásilmente den e trampa di gaña nos mes. Nos kurason engañoso por haña un hustifikashon pa un debilidat serio den nos personalidat òf buska èksküs pa un piká grave. (1 Samuel 15:13-15, 20, 21) Tambe nos kurason engañoso lo por kuminsá buska maneranan pa hustifiká un kondukta kuestionabel. Tuma, por ehèmpel, e asuntu di entretenimentu. Algun entretenimentu ta saludabel i agradabel. Sin embargo, hopi di loke e mundu aki ta ofresé—den pelíkula i programa di televishon i tambe riba Internet—ta opseno i inmoral. Ta fásil pa konvensé nos mes ku nos por mira entretenimentu insaludabel sin keda perhudiká. Algun persona ta asta rasoná, “E no ta molestiá mi konsenshi, pues ta kiko ta e problema?” Pero e personanan ei ta ‘gañando nan mes ku rasonamentu falsu.’—Santiago 1:22, NW.

13, 14. (a) Ki ehèmpel di Beibel ta mustra ku nos konsenshi no ta semper un guia sigur? (b) Kon nos por evitá di gaña nos mes?

¹³ Kon nos por evitá di gaña nos mes? Pa kuminsá, nos tin ku kòrda ku e konsenshi humano  no ta semper konfiabel. Konsiderá e kaso di apòstel Pablo. Promé ku el a bira kristian, e tabata persiguí e siguidónan di Kristu. (Echonan 9:1, 2) Kisas su konsenshi no a molesti’é e tempu ei. Pero ta opvio ku su konsenshi no tabatin e guia korekto. Pablo a bisa: “E tempu ei [mi] no tabata un kreyente, [mi] no tabata sa kiko mi tabata hasi.” (1 Timoteo 1:13, BPK) Pues e simpel echo ku sierto entretenimentu no ta molestiá nos konsenshi, riba su mes, no ta un garantia ku nos ta hasiendo bon. Ta un konsenshi sano so, eduká adekuadamente den e Palabra di Dios, por ta un guia sigur.

¹⁴ Si nos kier evitá di gaña nos mes, tin algun sugerensia útil ku nos mester tene na mente. Analisá bo mes huntu ku orashon. (Salmo 26:2; 2 Korintionan 13:5) Un outo-análisis lo por laga bo mira unda bo tin ku hasi algun kambio den bo punto di bista òf manera di hasi kosnan. Skucha otro. (Santiago 1:19) Ya ku ora bo ta analisá bo mes bo tin e tendensia di ta suphetivo, esta, di bai tras di bo mes ideanan, ta sabí pa bo skucha e komentarionan ophetivo di rumannan kristian maduro. Si na opinion di un ruman balansá, unu ku tin hopi eksperensia, bo ta tuma desishon òf aktua na un manera kuestionabel, bo por puntra bo mes: ‘Tin posibilidat ku ta mi konsenshi no ta bon entrená òf ta mi kurason ta gañando mi?’ Lesa i studia Beibel i publikashonnan basá riba Beibel regularmente. (Salmo 1:2) Esei lo yuda bo mantené bo pensamentu-, aktitut- i sintimentunan na armonia ku prinsipionan di Dios.

Warda Bo di Mentira di Satanas

15, 16. (a) Den su esfuersonan pa engañá nos, ki mentiranan Satanas ta usa? (b) Kon nos por evitá ku e mentiranan ei ta engañá nos?

¹⁵ Satanas ta usa un variedat di mentira den su esfuersonan pa engañá nos. E ta purba konvensé nos ku rikesa material ta trese felisidat i satisfakshon, pero hopi bes esei ta nèt kontrali. (Eklesiastés 5:10-12) E kier laga nos kere ku e mundu malbado aki lo dura pa semper, ounke tur kos ta mustra ku nos ta bibando den “e último dianan.” (2 Timoteo 3:1-5) Satanas ta promové e idea ku no tin nada malu den hiba un bida inmoral, maske e personanan ku ta loko tras di plaser hopi bes ta kosechá konsekuensianan amargo. (Galationan 6:7) Kon nos por evitá di laga e mentiranan ei engañá nos?

¹⁶ Benefisiá di ehèmpelnan di Beibel. Beibel ta kontené vários ehèmpel di personanan ku a ser engañá p’e mentiranan di Satanas, i nan ta sirbi komo spièrtamentu pa nos. Nan a stima kos material, nan a pèrdè for di bista e tempunan den kua nan tabata biba, òf nan a hiba un bida inmoral—tur ku mal resultado. (Mateo 19:16-22; 24:36-42; Lukas 16:14; 1 Korintionan 10:8-11) Siña for di ehèmpelnan djawe. Lamentablemente, de bes en kuando algun kristian ta pèrdè nan sentido di urgensia i ta kuminsá kere ku nan sirbishi na Dios ta stroba nan di logra algu bon. Kisas nan ta legumai e bèrdat pa hiba un supuesto bida di plaser. Sin embargo, e personanan ei ta riba “lugánan ku ta slep,” i tardi òf trempan nan lo kosechá e konsekuensianan di nan mal kondukta. (Salmo 73:18, 19) Ta sabí di nos parti pa siña for di e fayonan di otro hende.—Proverbionan 22:3.

17. Pakiko Satanas ta promové e mentira ku Yehova no ta stima nos ni balorá nos?

¹⁷ Tin un otro mentira ku Satanas a usa ku hopi efikasia: e mentira ku Yehova no ta stima nos ni balorá nos. Satanas tin míles di aña kaba ta studia hende imperfekto. E ta bon na haltura ku desanimashon por debilitá nos. (Proverbionan 24:10) P’esei, e ta promové e mentira ku nos no tin balor den bista di Dios. Si nos wòrdu “tumbá abou” i haña e sintimentu fuerte ku Yehova no ta interesá den nos, nos por ser tentá pa entregá. (2 Korintionan 4:9) Esaki ta nèt loke e gran Gañadó ke! Kiko nos por hasi anto p’e mentira satániko aki no engañá nos?

18. Kon Beibel ta garantisá nos di Yehova su amor?

¹⁸ Meditá personalmente riba loke Beibel ta bisa tokante e amor di Dios pa nos. E Palabra di  Dios ta usa algun ilustrashon bibu pa garantisá nos ku Yehova ta tuma nota di nos i ku e ta stima nos komo persona. E ta pone nos lágrimanan den su “butishi.” Esei ta nifiká ku e ta mira i kòrda e lágrimanan ku bo a drama den bo lucha pa keda fiel. (Salmo 56:8) E sa ki ora bo tin un “kurason kibrá” i ta “serka” di bo na momentunan asina. (Salmo 34:18) E sa tur kos di bo, asta e kantidat di “drachinan di kabei riba [bo] kabes.” (Mateo 10:29-31) I riba tur kos, Dios “a duna su Yu unigénito” pa bo. (Juan 3:16; Galationan 2:20) Tin biaha, kisas ta difísil pa kere ku e tekstonan ei ta apliká na abo personalmente. Pero nos tin ku kere e palabra di Yehova. E ke pa nos kere ku e ta stima nos no solamente komo grupo sino tambe komo persona.

19, 20. (a) Pakiko ta importante pa rekonosé i rechasá e mentira satániko ku Yehova no stima bo? (b) Kon un superintendente biahero a yuda personanan desanimá?

¹⁹ Rekonosé i rechasá mentira. Si bo sa ku un hende ta gaña, bo por protehá bo mes kontra su mentiranan. Pues, meskos tambe, e solo echo ku bo sa ku Satanas kier gaña bo ku Yehova no ta stima bo, riba su mes kaba, por ta un hopi bon yudansa. Komo reakshon riba un artíkulo di un Toren di Vigilansia ku a spièrta tokante e táktikanan di Satanas, un kristian a bisa: “Nunka mi a realisá ku Satanas ta purba usa mi propio sintimentunan pa desanimá mi. Sabiendo esaki ta duna mi e motivashon pa lucha kontra e sintimentunan aki.”

²⁰ Konsiderá e eksperensia di un superintendente biahero den un pais suramerikano. Ora e ta hasi bishita di pastoreo serka rumannan ku ta desanimá, hopi bes e ta puntra nan: ‘Bo ta kere den Trinidat?’ Por lo general, e ruman desanimá ta kontestá, ‘Klaru ku nò,’ pasobra e sa ku esaki ta un di e mentiranan di Satanas. E ora ei e ansiano ta puntr’é, ‘Bo ta kere den fièrnu?’ Atrobe e mesun kontesta, ‘Klaru ku nò!’ Despues e ansiano ta bisa nan ku Satanas tin un otro mentira ku hende no sa rekonosé komo tal. E ta dirigí nan atenshon na página 249, paragraf 21, di e buki Hala Serka Yehova, * ku ta mustra ku ta un mentira pa bisa ku Yehova no stima nos komo persona. E superintendente biahero aki a haña resultadonan positivo dor di yuda personanan desanimá rekonosé i rechasá e mentira satániko aki.

Warda Bo di Engaño

21, 22. Pakiko nos no ta den ignoransia relashoná ku e táktikanan engañoso di Satanas, i kiko mester ta nos determinashon?

²¹ Durante e parti final aki di e último dianan, nos por ferwagt ku Satanas lo sigui lansa un avalancha di mentira i engaño. Afortunadamente, Yehova no a laga nos den ignoransia pa loke ta e táktikanan engañoso di Satanas. Beibel mes i publikashonnan basá riba Beibel di “e esklabo fiel i prudente” ta eksponé klaramente e métodonan malbado di Diabel. (Mateo 24:45) Dor ku nos ta konsiente di esakinan, nos ta warda nos kurpa!—2 Korintionan 2:11.

²² P’esei anto, laga nos warda nos di e ideanan di apóstatanan. Laga nos ta determiná pa evitá e trampa sutil di gaña nos mes. I laga nos rekonosé i rechasá tur mentira di Satanas. Dor di hasi esei, nos lo protehá nos relashon ku ‘e Dios di bèrdat,’ kende ta odia engaño.—Salmo 31:5, BPK; Proverbionan 3:32.

[Nota]

Bo Ta Kòrda?

• Pakiko tin asina tantu engaño den e mundu djawe?

• Kon nos por warda nos di e engaño di apóstatanan?

• Kon nos por warda nos di kualke tendensia di gaña nos mes?

• Kon nos por evitá ku mentira satániko ta engañá nos?

[Preguntanan di Estudio]

[Plachi na página 17]

No gaña bo mes relashoná ku entretenimentu

[Plachinan na página 18]

Den bo esfuersonan pa warda bo mes di engaño, analisá bo mes huntu ku orashon, skucha otronan i lesa i studia e Palabra di Dios regularmente