Berdadero Kristianismo Ta Floresiendo

HESUKRISTU su ministerio a kousa un impakto den e mundu di promé siglo. Su mensahe refreskante, revelador i stimulante a asombrá e hendenan. Hopi di esnan ku a tend’é papia pa promé bes a keda profundamente impreshoná ku su palabranan.—Mateo 7:28, 29.

Sin miedu Hesus a nenga di enbolbé su mes ku e sistemanan polítiko i religioso opresivo di su tempu; pero el a hasi su mes un persona aserkabel p’e hende komun. (Mateo 11:25-30) El a rekonosé abiertamente ku riba tera a reina un influensia di mal spiritu i a demostrá ku Dios a dun’é poder riba nan. (Mateo 4:2-11, 24; Juan 14:30, Beibel na papiamentu koriente) Ábilmente Hesus a mustra bon kla kiko ta e konekshon fundamental entre sufrimentu i piká, i amorosamente el a splika ku ta e Reino di Dios lo trese alivio duradero. (Marko 2:1-12; Lukas 11:2, 17-23) Di unabes pa semper, el a kita e velo di skuridat ku pa hopi tempu a tapa e berdadero personalidat di su Tata. Ku esei, el a hasi Dios su nòmber konosí na tur hende ku tabata interesá den un relashon personal ku Dios.—Juan 17:6, 26.

P’esei, no ta un sorpresa ku apesar di e persekushon religioso i polítiko intenso, e disipelnan di Hesus a plama su mensahe dinámiko rápidamente. Den apénas un 30 aña asina, kongregashonnan kristian aktivo a wòrdu formá na Afrika, Asia i Europa. (Kolosensenan 1:23) E bèrdatnan simpel ku Hesus a siña a alkansá kurason di hende humilde i onesto den henter e Imperio Romano.—Efesionan 1:17, 18.

Pero kon tur e disipelnan nobo aki di vários background ekonómiko, kultural, lingwístiko i religioso lo por a bini huntu den “ún [solo] fe” berdaderamente uní manera apòstel Pablo a yam’é? (Efesionan 4:5) Kiko lo a yuda nan “papia e mesun kos” i no drif bai for di otro? (1 Korintionan 1:10) En bista di e desunion serio ku tin awe entre e personanan ku ta bisa ku nan ta kristian, ta bon pa nos analisá loke Hesus mes a siña.

E Base pa Unidat Kristian

Ora Hesus tabata den un huisio dilanti Ponsio Pilato, el a deklará kiko ta e base pa unidat kristian. El a bisa: “Pa esaki mi a nase i pa esaki mi a bin den mundu, pa duna testimonio di e bèrdat. Tur esnan ku ta di e bèrdat ta tende mi bos.” (Juan 18:37) P’esei, e siñansanan di Hesus huntu ku e restu di e Palabra inspirá di Dios, Beibel, tin un influensia unifikador  poderoso riba Kristu su berdadero disipelnan.—1 Korintionan 4:6; 2 Timoteo 3:16, 17.

Klaru ku lo tabatin momentunan ku Hesus su disipelnan lo a haña nan ku preguntanan sinsero òf asta desakuerdonan entre nan ku nan. Kiko lo a yuda nan? Hesus a splika: “Ora ku [esun ei], e spiritu di bèrdat, bin, e lo guia boso den tur bèrdat; pasobra e lo no papia di su mes, ma tur loke e tende, e lo papia; i loke tin di bin, e lo revelá na boso.” (Juan 16:12, 13) Pues, spiritu santu di Dios lo a permití Hesus su berdadero disipelnan komprondé e bèrdat segun ku Dios a revel’é progresivamente. Ademas, e spiritu ei lo a produsí fruta, manera amor, goso i pas, ku na su turno lo a promové unidat entre e disipelnan.—Echonan 15:28; Galationan 5:22, 23.

Hesus no a laga espasio pa desakuerdo òf desunion den su disipelnan; ni e no a outorisá nan pa re-interpretá e bèrdatnan di Dios pa akomodá e tradishonnan kultural òf religioso di e hendenan ku nan lo a topa. Mas bien, riba e último anochi ku e tabata huntu ku nan, el a pidi su Tata den un orashon ferviente: “Mi no ta pidi pa esakinan so, ma tambe pa esnan ku ta kere den mi pa medio di nan palabra, pa nan tur por ta ún, meskos ku abo, o Tata, ta den [union ku] mi i ami den [union ku] bo, pa nan tambe por ta den [union ku] nos; pa mundu kere ku ta abo a manda mi.” (Juan 17:20, 21) P’esei anto, berdadero unidat den spiritu i bèrdat mester ta un marka ku lo a distinguí Kristu su disipelnan for di kuminsamentu di kristianismo te den nos tempu. (Juan 4:23, 24) No opstante, e iglesianan djawe no ta uní, sino dividí. Kiko ta e motibu?

Dikon e Iglesianan Ta Dividí

E splikashon franko p’e variedat inmenso di kreensia i práktikanan di hende ku awe ta bisa ku nan ta kristian ta ku nan no a pega n’e siñansanan di Hesus. Un eskritor a remarká: “Meskos ku den pasado, e kristiannan nobo di awendia tin e tendensia di aseptá for di Beibel loke ta kuadra ku nan nesesidatnan—i ignorá loke no ta kuadra ku nan propio tradishonnan religioso nativo. Esei ta eksaktamente loke Hesus i su apòstelnan a predisí ku lo a tuma lugá.

Por ehèmpel, bou di inspirashon apòstel Pablo a skirbi Timoteo, su kompañero superintendente: “E tempu lo bin ku nan lo no soportá doktrina sano mas; ma al kontrario, pa satisfasé nan mes deseonan, nan lo akumulá pa nan mes siñadónan pa bisa nan loke nan orea ku ta kishikí kier tende, i lo bira nan orea for di e bèrdat, i lo bolbe na fábula.” Tur kristian lo a ser engañá? Nò, pasobra Pablo a sigui bisa: “Ma abo, sea sobrio den tur kos, soportá aflikshon, hasi e trabou di un [“evangelisadó,” NW], kumpli ku bo ministerio.” (2 Timoteo 4:3-5; Lukas 21:8; Echonan 20:29, 30; 2 Pedro 2:1-3) Timoteo i otro fiel kristiannan a sigui e konseho inspirá ei.

Ainda Kristiannan Berdadero Ta Uní

Meskos ku Timoteo, awe tambe kristiannan berdadero ta sobrio, òf huisioso, pasobra nan ta rechasá rasonamentu humano i nan ta aseptá solamente e outoridat di e Skritura pa nan kreensianan. (Kolosensenan 2:8; 1 Juan 4:1, BPK) Testigunan di Yehova ta imitá e kristiannan di promé siglo dor di kumpli ku nan ministerio den mas ku 230 pais, hibando Hesus su mensahe original, e bon notisia tokante e Reino, pa hende na tur parti di mundu. Ban wak kuater manera importante den kua nan ta imitá Hesus i praktiká berdadero kristianismo na un manera uní, sin importá unda nan ta biba.

Nan kreensianan ta basá riba e Palabra di Dios. (Juan 17:17) Un pastor di parokia na Bèlgika a skirbi tokante nan: “Un kos ku nos por siña di nan [Testigunan di Yehova] ta ku nan ta dispuesto pa skucha e Palabra di Dios i duna testimonio ku kurashi tokante dje.”

Nan ta spera riba e Reino di Dios pa trese alivio for di problemanan di mundu. (Lukas  8:1) Na Baranquilla, Colombia, un Testigu a papia ku Antonio, un fuerte apoyadó di un movementu polítiko. E Testigu no a tuma parti p’e, ni e no a boga pa un òf otro ideologia polítiko. Mas bien, el a ofresé pa studia Beibel grátis ku Antonio i su ruman muhénan. No a dura muchu ku Antonio a realisá ku e Reino di Dios realmente ta e úniko speransa pa hende pober na Colombia i e restu di mundu.

Nan ta onra e nòmber di Dios. (Mateo 6:9) Ora Testigunan di Yehova a topa Maria, un katóliko sinsero ku ta biba na Oustralia, pa promé bes, el a permití e Testigunan mustr’é e nòmber di Dios den Beibel. Kon Maria a reakshoná? “E promé bes ku mi a mira e nòmber di Dios den Beibel, mi a yora. Loke a konmové mi hopi ta ku mi por a ègt konosé Dios i usa su nòmber personal.” Maria a sigui studia Beibel, i pa promé bes den su bida, e por a konosé Yehova komo persona i kultivá un relashon duradero kuné.

Nan ta uní den amor. (Juan 13:34, 35) Un editorial den e korant Ladysmith-Chemainus Chronicle di Canada, a komentá: “Sea bo tin òf laga di tin un kreensia religioso, bo tin ku duna mérito n’e 4.500 Testigunan di Yehova ku a traha dia i anochi e último siman i mei pa konstruí un Salòn di Asamblea di 2.300 meter kuadrá na Cassidy [Canada] . . . Pa hasi esaki ku goso, sin diskutí, pleita òf buska gloria personal ta un marka di berdadero kristianismo.”

Pues, konsiderá e evidensia. Miéntras ku kristiandat su teólogonan, misioneronan i baidónan di misa ta konfrontando un krísis serio den nan iglesianan, berdadero kristianismo ta floresiendo rònt mundu. Sí, kristiannan berdadero ta kumpliendo ku nan ministerio asigná di prediká i siña hende e Palabra di Dios. (Mateo 24:14; 28:19, 20) Si bo ta entre e hendenan ku ta “suspirá i keha” pa motibu di e kosnan repugnante ku ta tumando lugá awor i bo ta molestiá p’e desunion ku tin entre e religionnan di kristiandat, nos ta invitá bo pa djòin Testigunan di Yehova den adorashon kristian uní di e úniko Dios berdadero, Yehova.—Ezekiel 9:4; Isaias 2:2-4.