Fe Por Kura Hende Enfermo?

ORA nos ta malu, nos ta buska kura. Probablemente, bo sa ku Beibel ta bisa ku na vários okashon Hesukristu a kura tur sorto di enfermedat i a trese alivio pa hopi hende ku tabata sufri. Kon el a efektuá e kurashonnan ei? Beibel ta bisa ku esei tabata ‘ku poder di Dios.’ (Lukas 9:42, 43, NW; Echonan 19:11, 12) Ku otro palabra, ta e spiritu santu di Dios a kousa e kurashonnan; no djis e fe di e personanan en kuestion. (Echonan 28:7-9) P’e motibu ei Hesus no a eksigí pa hende enfermo ekspresá nan fe den dje pa nan a kura.

Kisas bo ta puntra: ‘No tin kurashon milagroso mas? Òf e tipo di kurashonnan ku Hesus a efektuá lo tuma lugá un dia atrobe? Ki speransa tin pa esnan ku ta sufriendo di un enfermedat doloroso òf inkurabel?’

Beibel ta splika ku den Dios su mundu nobo di hustisia, e poder di Dios lo bolbe kousa e tipo di kurashonnan milagroso ku Hesus a efektuá tempu ku e tabata riba tera. Gustosamente, Testigunan di Yehova den bo bisindario lo mustra bo kon i na ki tempu Dios lo realisá loke ningun sanadó di fe hamas lo por hasi, esta, eliminá tur malesa i tambe morto. Sí, Dios “lo traga morto pa semper.”—Isaias 25:8.