Kon Nos Ta Demostrá Nos Amor pa Dios

KULTIVÁ amor pa Dios no ta simplemente siña tokante Dios. Manera sirbidónan di Dios rònt mundu por testifiká, berdadero amor pa Dios ta krese segun ku bo ta sera konosí ku su personalidat. E amor ei ta bira asta mas fuerte segun ku bo ta familiarisá bo mes ku loke Dios ta stima, loke e ta odia, i loke ta su preferensianan i su rekisitonan.

Amorosamente Yehova a duna nos su Palabra, Beibel, den kua e ta revelá su mes. For di Beibel nos ta siña kon Yehova a trata ku diferente situashon. Meskos ku un karta di un ser kerí ta duna nos hopi plaser, asina tambe Beibel ta deleitá nos segun ku nos ta mira kon e ta revelá aspektonan nobo di Yehova su personalidat.

Sin embargo, manera nos sa ripará den nos sirbishi públiko, no ta tur biaha siña tokante Dios ta pone un hende stim’é. Hesus a bisa sierto hudiunan malagradesí di su tempu: “Boso ta skudriñá e Skrituranan, pasobra boso ta kere ku ta den nan boso tin bida eterno; . . . ma mi konosé boso, ku boso no tin e amor di Dios den boso mes.” (Juan 5:39, 42) Tin hende ta dediká hopi aña na siña tokante Yehova su obranan amoroso i tòg nan tin masha tiki amor pa Yehova. Dikon? Pasobra nan no ta meditá riba e bèrdatnan konektá ku loke nan ta siña. Na kontraste, tin miónes di hende sinsero ku nos ta studia Beibel kuné i ku ta sinti kon nan amor pa Dios ta sigui krese. Dikon? Pasobra, meskos ku nos, nan ta sigui e ehèmpel di Asaf. Den ki manera?

Meditá ku Apresio

Asaf tabata determiná pa kultivá amor pa Yehova den su kurason. El a skirbi: “Mi ta meditá den mi kurason . . . Lo mi kòrda e echonan  di SEÑOR; siguramente lo mi kòrda bo maravianan di promé aya. Lo mi meditá riba tur bo obranan, i keda pensa riba bo echonan.” (Salmo 77:6, 11, 12) Amor pa Dios lo krese den kurason di un persona ku ta meditá riba e kamindanan di Yehova manera e salmista a hasi.

Ademas, kòrdando bèk riba eksperensianan ku nos a disfrutá di dje durante e tempu ku nos ta sirbi Yehova, ta fortalesé nos relashon kuné. Apòstel Pablo a bisa ku nos ta Dios su “kolaboradónan,” i e amistat ku por forma entre personanan ku ta traha huntu ta algu masha spesial. (1 Korintionan 3:9) Yehova ta apresiá ora nos ta ekspresá nos amor p’e i esaki ta hasi su kurason kontentu. (Proverbionan 27:11) Anto, ora nos pidi Yehova su yudansa i e yuda nos resolvé un problema spesífiko, nos sa ku e ta ku nos i nos amor p’e ta bira mas grandi.

Amistat entre dos persona ta desaroyá segun ku nan ta ekspresá nan sintimentunan na otro. Asina tambe, ora nos ta bisa Yehova dikon nos ta fiel na dje, nos amor p’e ta bira mas fuerte. Nos lo bai reflekshoná riba e palabranan di Hesus: “Stima SEÑOR bo Dios ku henter bo kurason, i ku henter bo alma, i ku henter bo mente, i ku tur bo forsa.” (Marko 12:30) Kiko nos por hasi pa ta sigur ku nos lo sigui stima Yehova ku henter nos kurason, henter nos alma, henter nos mente i henter nos forsa?

Stima Yehova ku Henter Nos Kurason

E Skritura ta referí na e kurason figurativo, esta, e persona ku nos ta di paden, nos deseo-, aktitut- i sintimentunan. Pues anto, stima Yehova ku henter nos kurason ta nifiká ku nos ke agradá Dios mas ku tur otro kos. (Salmo 86:11) Nos ta demostrá ku nos tin tal amor dor di hasi nos personalidat aseptabel pa Dios. Nos ta hasi esfuerso pa imitá Dios dor di ‘aboresé loke ta malu i tene firme na loke ta bon.’—Romanonan 12:9.

Nos amor pa Dios ta influensiá loke nos ta opiná di tur kos. Por ehèmpel, podisé nos ta haña nos trabou hopi interesante òf e ta okupá gran parti di nos atenshon, pero ta einan nos kurason ta? Nò. Siendo ku nos ta stima Yehova ku henter nos kurason, nos ta promé ku tur kos un sirbidó di Dios. Asina tambe, nos ke agradá nos mayornan, nos kasá i nos doño di trabou, pero nos ta duna prueba di nos amor di kurason pa Yehova dor di trata mas ku tur kos di agrad’é. Al fin i al kabo, e ta meresé e promé lugá den nos kurason.—Mateo 6:24; 10:37.

Stima Yehova ku Henter Nos Alma

Den e Skritura e palabra “alma” ta referí básikamente na henter nos persona i tambe na e bida ku nos tin. Pues anto, stima  Yehova ku henter nos alma ta nifiká ku nos ta usa nos bida pa alab’é i pa demostrá nos amor p’e.

Ta klaru ku nos lo por tin otro interesnan den bida, manera siña un fishi, manehá un negoshi òf lanta un famia. Pero na mesun tempu, nos ta duna prueba di nos amor di henter alma pa Yehova dor di hasi kosnan na su manera i dor di tene otro kos na nan debido lugá den nos bida, i asina nos ta “buska promé e reino di Dios i su hustisia.” (Mateo 6:33) Rindi adorashon di henter alma ta nifiká tambe hasi kos ku selo òf entusiasmo. Nos ta mustra Yehova ku nos stim’é dor di prediká e mensahe di Reino selosamente, dor di duna komentarionan edifikante na reunion òf dor di yuda nos rumannan kristian. Den tur kos, nos ta sigui ‘hasi e boluntat di Dios di henter alma.’—Efesionan 6:6, NW.

Hesus a demostrá amor di henter alma pa Dios dor di nenga su mes. El a pone Dios su boluntat na promé lugá i su nesesidatnan personal na di dos lugá. Hesus a invitá nos pa sigui su ehèmpel. El a bisa: “Si un hende kier bin mi tras, lag’é nenga su mes, . . . i sigui mi.” (Mateo 16:24, 25) Nenga nos mes ta nifiká hasi un dedikashon. E ta nifiká ku nos ta stima Dios asina tantu ku nos ta entregá nos mes den Dios su man i ta laga é bira nos doño; manera ora un israelita den tempu bíbliko a stima su doño asina tantu ku el a mara su mes na dje permanentemente komo un esklabo. (Deuteronomio 15:16, 17) Dor di dediká nos bida na Yehova, nos ta duna prueba konvinsente ku nos ta stim’é.

Stima Yehova ku Henter Nos Mente

Stima Yehova ku henter nos mente ta nifiká ku nos ta hasi tur esfuerso nesesario pa komprondé Yehova su personalidat, propósitonan i rekisitonan. (Juan 17:3; Echonan 17:11) Nos ta ekspresá nos amor na Yehova dor di usa tur nos fakultatnan mental pa yuda otro hende tambe stima Yehova i dor di mehorá nos arte di siña. Apòstel Pedro a urgi pa “faha e hepnan di boso mente,” es desir, fortifiká nos mente pa aktividat. (1 Pedro 1:13) Tambe nos ta hasi esfuerso pa mustra interes den otro hende, foral den otro sirbidónan di Dios. Nos ta pendiente di nan sirkunstansianan i ta wak ki ora ta na su lugá pa duna nan elogio i ki ora nan tin mester di konsuelo.

Nos ta mustra Yehova ku nos ta stim’é ku henter nos mente dor di someté nos mes mentalmente na dje. Nos ta purba mira kosnan na su manera, i ta tene kuenta kuné ora nos ta tuma desishon i ta konfia ku su manera ta esun mihó. (Proverbionan 3:5, 6; Isaias 55:9; Filipensenan 2:3-7) Pero segun ku nos ta sigui demostrá nos amor pa Dios, kon nos por usa nos forsa?

Stima Yehova ku Henter Nos Forsa

Hopi hóben den e kongregashon kristian ta usa nan forsa pa alabá Yehova. (Proverbionan 20:29; Eklesiastés 12:1) Un manera ku kantidat di hóbennan kristian ta demostrá ku nan ta stima Yehova ku henter nan forsa ta dor di partisipá den sirbishi di tempu kompletu komo pionero. Hopi mama ta partisipá den e sirbishi aki miéntras ku nan yunan ta na skol. Ansianonan fiel ku ta perkurá pa e bienestar di nan propio famia i tambe ta hasi bishitanan di pastoreo, ta demostrá ku nan ta stima Yehova ku henter nan forsa. (2 Korintionan 12:15) Yehova ta duna poder na esnan ku ta pone nan speransa den dje, di manera ku nan por demostrá nan amor dor di alab’é, usando e energia ku nan tin, sea e ta hopi òf tiki.—Isaias 40:29; Hebreonan 6:11, 12.

Amor lo krese si kultiv’é na e manera korekto. P’esei, nos tin ku sigui tuma tempu pa meditá. Nos ta kòrda riba loke Yehova a hasi pa nos i dikon e ta meresé nos deboshon. Komo desendiente imperfekto di Adam, nunka nos por ta digno di “loke Dios a prepará pa esnan ku ta stim’é,” pero loke sí nos por hasi ta demostrá ku nos ta stima Yehova ku henter nos ser. Laga nos sigui hasi esei!—1 Korintionan 2:9.

[Plachi na página 20]

Nos ta ekspresá amor pa Dios mediante nos akshonnan