Pregunta di Lektor
Pregunta di Lektor
Siendo ku e levitanan no tabatin herensia den Israel antiguo, kon bin e levita Hanamel por a bende un tereno ku su primu levita Jeremias, manera Jeremias 32:7 ta trese dilanti?
En konekshon ku e levitanan, Yehova a bisa Aaron: “Lo bo no tin herensia den nan tera, ni poseé ningun porshon meimei di nan [Israel].” (Numbernan 18:20) No opstante, e levitanan a haña 48 stat huntu ku nan terenonan di yerba, plamá na tur parti di e Tera Primintí. Un di e statnan asigná na “e yu hòmbernan di saserdote Aaron” tabata Anatot, stat natal di Jeremias.—Josué 21:13-19; Numbernan 35:1-8; 1 Krónikanan 6:54, 60.
Na Levítiko 25:32-34, nos ta lesa di instrukshonnan spesífiko ku Yehova a duna relashoná ku e “derecho permanente di redenshon” di tereno (esta, e derecho di kumpra tereno bèk) ku e levitanan a poseé. Aparentemente, kada famia levita tabatin derecho di herensia pa poseé, usa i negoshá sierto terenonan asigná na nan. Di mes esei lo a enserá ku nan por a bende i kumpra bèk sierto tereno. * Den hopi sentido, e levitanan a poseé i usa nan propiedatnan meskos ku e israelitanan di otro tribu.
Probablemente, e terenonan levita a pasa den man di mayor pa yu pa medio di herensia di famia. Sin embargo, pa loke ta e derecho di kumpra tereno bèk, ta levita ku levita so por a hasi transakshon di benta i kompra. Ademas, ta parse ku bendementu i kumpramentu bèk di tereno a konta solamente pa terenonan den e stat, ya ku e levitanan no tabatin mag di bende “lugánan di yerba bèrdè di nan statnan” pasobra esakinan tabata “nan propiedat perpetuo.”—Levítiko 25:32, 34.
Pues, aparentemente e tereno ku Jeremias a kumpra bèk for di Hanamel tabata e tipo di tereno ku por a pasa den man di otro hende pa medio di e areglo di kumpra bèk. Ku tur probabilidat e tabata situá paden di e fronteranan di e stat. Yehova mes a konfirmá ku “e kunuku” en kuestion tabata pertenesé na Hanamel i ku Jeremias tabatin “e derecho di redenshon pa kumpr’é.” (Jeremias 32:6, 7) Yehova a usa e transakshon aki simbólikamente pa reforsá su promesa ku e israelitanan lo a bini bèk pa reklamá nan herensia di tera despues di a pasa un periodo di eksilio na Babilonia.—Jeremias 32:13-15.
No tin niun indikashon ku Hanamel a bira doño di e tereno na Anatot na un manera ilegal. Tampoko no tin niun indikashon ku el a kibra ku e lei di Yehova ora el a invitá Jeremias pa kumpra e tereno aki na Anatot, ni ku Jeremias a ehersé su derecho di kumpra bèk na un manera inkorekto ora el a kumpra e kunuku.—Jeremias 32:8-15.
[Nota]
^ par. 4 Den e promé siglo di nos era, e levita Barnabas a bende un tereno ku e tabatin i a hasi donashon di e fondonan pa yuda e disipelnan pober di Kristu ku tabata biba na Yerusalèm. Kisas tabata trata aki di un tereno sea na Palestina òf na Chipre. Òf posiblemente e tabata simplemente un tereno den e área di Yerusalèm ku Barnabas a haña pa dera hende ariba.—Echonan 4:34-37.