Sirbidónan di Dios Ta Manera Palu​—Kon Asina?

E SALMISTA, papiando di un persona ku tin delisia den prinsipionan bíbliko i ku ta apliká nan den su bida, a remarká: “E lo ta manera un palu, plantá kantu di koridanan di awa, ku ta duna su fruta na su tempu, i su blachi no ta marchitá; i tur loke ku e hasi ta prosperá.” (Salmo 1:1-3) Dikon esaki ta un bon komparashon?

Palu por biba masha largu mes. Por ehèmpel, tin algun palu di oleifi den region di Mediteráneo ku hende ta kere ta un mil pa dos mil aña bieu. Asina tambe e palunan di baobab di Afrika sentral ta bira hopi bieu, i tin un palu di pino aristata na California ku nan ta kere tin rònt di 4.600 aña. Den un selva, palunan madurá hopi bes ta probechoso pa nan medio ambiente. Por ehèmpel, palunan haltu ta perkurá un sombra protektivo pa matanan yòn, i e blachinan ku ta kai for di e palunan ta gòrda e tera.

Normalmente bo ta haña ku e palunan mas haltu na mundu ta krese huntu na bòshi den selva, kaminda palunan individual ta sostené otro. Komo ku nan rais kisas ta mará den otro, vários palu huntu tin mas chèns di resistí un tormentá ku un palu solitario meimei di un sabana. Tambe ora un palu tin hopi rais ku ta plama bai leu, esei ta yud’é saka sufisiente awa i nutrishon for di suela. Den algun kaso e raisnan kisas ta penetrá bai mas hundu den tera ku e haltura di e palu, òf e raisnan kisas ta plama horizontalmente i ta bai mas leu ku kaminda e brasanan di e palu ta yega.

Apòstel Pablo kisas tabata referí indirektamente na un palu ora el a splika ku kristiannan mester sigui ‘kana den Kristu, siendo firmemente araigá [òf, ankrá ku rais] i edifiká den dje i establesí den e fe.’ (Kolosensenan 2:6, 7) Sí, kristiannan por keda firme den nan fe solamente si nan tene firmemente na Kristu meskos ku un palu ta tene firmemente na tera ku su raisnan fuerte.—1 Pedro 2:21.

Den ki maneranan mas por kompará e sirbidónan di Dios ku palu? Wèl, meskos ku palunan den un mondi ta haña sosten di otro palunan den bisindario, asina tur esnan ku keda serka di e kongregashon kristian ta haña sosten di rumannan den fe. (Galationan 6:2) Kristiannan fiel i madurá, ku na moda di papia tin raisnan spiritual hundu, ta yuda kreyentenan mas nobo pa keda firme den fe, asta ora esakinan ta konfrontá oposishon fuerte manera tormenta. (Romanonan 1:11, 12) Kristiannan mas nobo por bona den e “sombra” protektivo di e sirbidónan di Dios mas eksperensiá. (Romanonan 15:1) I tur miembro di e kongregashon kristian mundial ta benefisiá di e nutrishon spiritual fortifikante ku e restu ungí—e palunan grandi òf “eiknan di hustisia”—ta perkurá.—Isaias 61:3.

Ta masha eksitante ku tur sirbidó di Dios tin e prospekto di eksperensiá kumplimentu di e promesa ku nos ta haña na Isaias 65:22, ku ta bisa: “Manera e dianan di un palu, asina e dianan di mi pueblo lo ta.”

[Rekonosementu pa Potrèt na página 28]

Godo-Foto