Un “Esklabo” Ku Ta Fiel i Tambe Prudente
Un “Esklabo” Ku Ta Fiel i Tambe Prudente
“Ken anto ta e esklabo fiel i prudente ku su shon a laga enkargá ku su kas?” —Mateo 24:45.
1, 2. Dikon awe ta masha importante pa nos risibí un suministro regular di kuminda spiritual?
RIBA djamars atardi 11 di nisan di aña 33 di nos era, Hesus su disipelnan a hasié un pregunta ku tin nifikashon profundo pa nos awe. Nan a puntr’é: “Kiko lo ta e señal di bo binida i di e fin di tempu?” Komo kontesta Hesus a duna un profesia remarkabel. El a papia di un periodo turbulento di guera, hamber, temblor i malesa. I esei simplemente lo tabata manera “e prinsipio di dolónan di parto.” E situashon lo a bira pió. Ki un prospekto spantoso!—Mateo 24:3, 7, 8, 15-22; Lukas 21:10, 11.
2 Desde aña 1914, mayoria aspekto di e profesia di Hesus a kumpli. Humanidat ta sintiendo plenamente e ‘dolónan manera di parto.’ Sin embargo, kristiannan berdadero no tin nodi sinti miedu. Hesus a primintí ku lo e sostené nan ku kuminda spiritual nutritivo. Siendo ku awor Hesus ta den shelu, ki areglo el a hasi pa nos aki riba tera risibí nos suministro di kuminda spiritual?
3. Ki areglo Hesus a hasi pa nos risibí “kuminda na su debido tempu”?
3 Hesus mes a indiká e kontesta riba e pregunta ei. Durante su profesia remarkabel el a puntra: “Ken anto ta e esklabo fiel i prudente ku su shon a laga enkargá ku su kas pa duna nan [“e otro kriánan,” BPK] nan kuminda na su debido tempu?” Anto el a sigui bisa: “Bendishoná ta e esklabo ei, ku su shon ta haña ta hasi asina ora ku e bin. Di bèrdat mi ta bisa boso ku e lo lag’é keda na enkargo di tur su propiedatnan.” (Mateo 24:45-47) Sí, lo tin un “esklabo” ku e Shon a asigná pa perkurá kuminda spiritual, un “esklabo” ku ta fiel i tambe prudente. E esklabo ei tabata un sierto persona, un seri di persona òf algu otro? Ya ku e esklabo fiel ta suministrá e kuminda spiritual tan nesesario, ta kumbiní nos pa haña e kontesta.
Un Persona Individual òf un Grupo?
4. Kon bin nos sa ku “e esklabo fiel i prudente” no por ta un solo persona?
4 “E esklabo fiel i prudente” no por ta un persona. Dikon nò? Pasobra e esklabo a kuminsá sirbi kuminda spiritual for di den promé siglo, i segun Hesus, e esklabo lo ta hasi esei ainda ora ku e Shon yega na 1914. Esei lo a abarká alrededor di 1.900 aña di sirbishi fiel pa un solo persona. Ni sikiera Matusalen no a biba dje largu ei!—Génesis 5:27.
5. Splika dikon e ekspreshon “esklabo fiel i prudente” no ta apliká na kada kristian individual.
5 Wèl, akaso e ekspreshon “esklabo fiel i prudente” ta apliká den un sentido general na kada kristian individual? Ta bèrdat ku tur kristian mester ta fiel i prudente; sin embargo, Hesus klaramente tabatin mas ku esei na mente ora ku el a papia di “e esklabo fiel i prudente.” Kon nos por sa? Pasobra el a bisa ku ‘ora e shon bin’ lo e pone e esklabo “na enkargo di tur su propiedatnan.” Kon lo por ta posibel pa pone kada kristian individual na enkargo di tur kos, riba “tur” e propiedatnan di Señor? Ta imposibel!
6. Kon e nashon di Israel lo mester a funshoná komo Dios su “sirbidó” òf “esklabo”?
6 E úniko konklushon rasonabel ta anto ku Hesus tabata referí na un grupo di kristian komo “e esklabo fiel i prudente.” Ta posibel ku por tin un esklabo kolektivo? Sí. Sheteshen aña promé ku Kristu, Yehova a referí na henter e nashon di Israel komo “mi testigunan” i “mi sirbidó ku mi a skohe.” (Isaias 43:10) Tur miembro di e nashon di Israel for di aña 1513 promé ku nos era—tempu ku e Lei di Moisés a wòrdu duná—te na Pentekòste di aña 33 di nos era, tabata parti di e sirbidó kolektivo aki. Mayoria israelita no a partisipá direktamente den atministrashon di asuntunan di e nashon òf den kordiná su programa di perkurá kuminda spiritual. Yehova a usa rei, hues, profeta, saserdote i levita pa kumpli ku e tareanan ei. Sin embargo, komo nashon, Israel mester a representá Yehova su soberania i proklamá su alabansa entre e nashonnan. Kada israelita mester tabata un testigu di Yehova.—Deuteronomio 26:19; Isaias 43:21; Malakias 2:7; Romanonan 3:1, 2.
Un “Sirbidó” Ta Wòrdu Despedí
7. Dikon e nashon di Israel di antigwedat a ser deskualifiká komo Dios su “sirbidó”?
7 Siendo ku siglonan pasá Israel tabata Dios su “sirbidó,” ta e mes tambe ta e esklabo ku Hesus a papia di dje? Nò, pasobra lamentablemente Israel di antigwedat no a resultá di ta fiel ni prudente. Pablo a resumí e situashon ora el a sita Yehova su palabranan dirigí na e nashon: “E nòmber di Dios ta wòrdu blasfemá meimei di e paganonan pa boso motibu.” (Romanonan 2:24) En bèrdat, Israel a kulminá un historia largu di rebelion dor di rechasá Hesus, i na e punto ei Yehova a rechasá nan.—Mateo 21:42, 43.
8. Na ki tempu a nombra un “sirbidó” pa remplasá Israel, i bou di ki sirkunstansia?
8 E infieldat aki di parti di e “sirbidó,” Israel, no a nifiká ku nunka mas adoradónan fiel lo risibí kuminda spiritual. Na Pentekòste di aña 33, 50 dia despues di Hesus su resurekshon, spiritu santu a wòrdu dramá riba mas o ménos 120 di su disipelnan den un sala ariba den Yerusalèm. Na e momentu ei, un nashon nobo a nase. Apropiadamente, su nasementu a keda anunsiá públikamente ora ku su miembronan ku kurashi a kuminsá konta e habitantenan di Yerusalèm tokante “e echonan poderoso di Dios.” (Echonan 2:11) Pues, e nashon nobo ei, un nashon spiritual, a bira e “sirbidó” ku lo a proklamá Yehova su gloria na e nashonnan i perkurá kuminda na e debido tempu. (1 Pedro 2:9) Ta na su lugá ku despues el a wòrdu yamá “e Israel di Dios.”—Galationan 6:16.
9. (a) Ken ta forma “e esklabo fiel i prudente”? (b) Ken ta e “otro kriánan” di e kas?
9 Tur miembro di “e Israel di Dios” ta un kristian dediká i batisá, ungí ku spiritu santu i ku un speransa selestial. P’esei, meskos ku tur israelita na bida na kualke momentu durante e periodo di 1513 promé ku nos era te ku Pentekòste 33 di nos era tabata parti di e sirbidó kolektivo prekristian, asina tambe e ekspreshon “esklabo fiel i prudente” ta referí na tur miembro di e nashon spiritual ungí ei komo grupo riba tera na kualke momentu en partikular for di aña 33 te ku awor. Pero ken ta e “otro kriánan” di e kas ku ta risibí nutrishon spiritual for di e esklabo? Den e promé siglo di nos era, tur kristian tabatin e speransa selestial. Konsekuentemente, e otro kriánan tambe tabata kristiannan ungí, pero mirá no komo un grupo, sino komo personanan individual. Nan tur, inkluso esnan ku puesto di responsabilidat den e kongregashon, tabatin mester di kuminda spiritual for di e esklabo.—1 Korintionan 12:12, 19-27; Hebreonan 5:11-13; 2 Pedro 3:15, 16.
“Kada Un Su Tarea”
10, 11. Kon bin nos sa ku no ta tur miembro di e grupo di esklabo tin e mesun asignashon di trabou?
10 Ounke “e Israel di Dios” ta e grupo di esklabo fiel i prudente ku tin un asignashon di trabou, kada miembro tambe tin responsabilidatnan personal. E palabranan di Hesus ku ta pará skirbi na Marko 13:34 ta mustra esaki bon kla. El a bisa: “Ta manera un hende ku a bai hasi un biahe, kende a laga su kas i a pon’é na enkargo di su esklabonan, a duna kada un su tarea i tambe a ordená e wardadó di porta pa keda alerta.” Pues kada miembro di e grupo di esklabo a risibí un asignashon: oumentá Kristu su propiedatnan riba tera. Kada miembro ta kumpli ku su tarea segun su kapasidat i oportunidat.—Mateo 25:14, 15.
11 Ademas, apòstel Pedro a bisa kristiannan ungí di su tempu: “Komo ku kada un a risibí un don spesial, us’é pa sirbi otro komo bon mayordomonan di e grasia multiforme di Dios.” (1 Pedro 4:10) Pues anto, e ungínan ei tin e responsabilidat di sirbi otro usando e donnan ku Dios a duna nan. Mas aleu, Pedro su palabranan ta indiká ku no ta tur kristian lo tabatin e mesun kapasidat, responsabilidat òf privilegio. Sin embargo, kada miembro di e grupo di esklabo lo por a kontribuí den un manera òf otro na e kresementu di e nashon spiritual. Kon asina?
12. Kon kada miembro di e grupo di esklabo, sea hòmber òf muhé, a kontribuí na e kresementu di e esklabo?
12 Na promé lugá, kada un tabatin e responsabilidat di ta un testigu di Yehova, dor di prediká e bon nobo di e Reino. (Isaias 43:10-12; Mateo 24:14) Djis promé ku Hesus a subi na shelu el a ordená tur su disipelnan fiel, tantu hòmber komo muhé, pa nan ta maestro. El a bisa: “Bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso; i mira, mi ta ku boso semper, te na fin di mundu.”—Mateo 28:19, 20.
13. Ki privilegio tur ungí tabatin?
13 Ora nan a haña disipelnan nobo, mester a siña nan kuidadosamente pa kumpli ku tur loke Kristu a manda su disipelnan hasi. Ku tempu, personanan ku a reakshoná faborabel a bira kualifiká pa siña otro hende. Kuminda spiritual nutritivo a wòrdu perkurá pa prospektivo miembronan di e grupo di esklabo den hopi nashon. Tur kristian ungí, hòmber i muhé, a kumpli ku e tarea di hasi disipel. (Echonan 2:17, 18) E trabou aki lo mester a sigui for di tempu ku e esklabo a kuminsá nobo-nobo ku su trabou te na fin di e sistema di kosnan aki.
14. E privilegio di siña hende den kongregashon tabata limitá na ken, i kiko fiel muhénan ungí a pensa di esei?
14 Ungínan resien batisá a bira parti di e esklabo, i sin importá ken a siña nan inisialmente, nan tambe a risibí instrukshon for di miembronan di e kongregashon ku tabatin e kualifikashonnan bíbliko pa sirbi komo ansiano. (1 Timoteo 3:1-7; Tito 1:6-9) Pues, e hòmbernan nombrá aki tabatin e privilegio di kontribuí na e kresementu di e nashon den un manera spesial. Fiel muhénan kristian ungí no tabata rabia pasobra ta solamente hende hòmber kristian a wòrdu asigná pa siña den e kongregashon. (1 Korintionan 14:34, 35) Al kontrario, nan tabata kontentu di por benefisiá di e trabou duru di e miembronan maskulino di e kongregashon i tabata gradisidu pa e privilegionan ku tabatin disponibel pa hende muhé, entre otro e privilegio di hiba bon notisia na otro hende. Awe rumannan muhé ungí yen di selo ta desplegá e mesun aktitut humilde, sea ku e ansianonan nombrá ta ungí òf nò.
15. Kiko tabata un di e fuentenan prinsipal di kuminda spiritual den promé siglo, i ken a hiba delantera den partié?
15 E kuminda spiritual básiko duná den promé siglo a bini direktamente for di pèn di e apòstelnan i otro disipelnan ku tabata hiba delantera. E kartanan ku nan a skirbi—spesialmente esnan ku nos ta haña entre e 27 bukinan inspirá ku ta forma e Skritura Griego Kristian—tabata sirkulá entre e kongregashonnan i sin duda a forma e base di loke e ansianonan lokal tabata siña e kongregashon. Den e manera aki representantenan di e esklabo fielmente a distribuí kuminda spiritual nutritivo pa kristiannan sinsero. E grupo di esklabo di promé siglo a kumpli fielmente ku su tarea.
E “Esklabo” 19 Siglo Despues
16, 17. Kon e grupo di esklabo a duna prueba di ta fiel den kumpli ku su asignashon durante e añanan promé ku 1914?
16 Ke tal djawe? Ora Hesus su presensia a kuminsá na aña 1914, el a haña un grupo di kristiannan ungí ku fielmente tabata parti kuminda na e debido tempu? Sigur ku sí. E grupo aki por a wòrdu identifiká klaramente debí na e bon fruta ku e tabata produsí. (Mateo 7:20) Entre tantu, historia a proba ku e identifikashon aki tabata korekto.
17 Tempu ku Hesus a yega, tabatin rònt di 5.000 kriá ku tabata okupá plamando bèrdatnan bíbliko. E trahadónan tabata poko, pero e esklabo a usa vários método ingenioso pa plama e bon nobo. (Mateo 9:38) Por ehèmpel, nan a hasi areglo pa publiká sermonnan riba temanan bíbliko den mas ku 2.000 korant. Di e manera aki, e bèrdat di e Palabra di Dios a alkansá míles di lektor den un solo biaha. Ademas, nan a prepará un programa di ocho ora ku a kombiná “slides” di koló ku pelíkula. Grásias na e presentashon inovativo aki, nan por a transmití e mensahe di Beibel—for di prinsipio di Kreashon te na fin di e Reinado di Mil Aña di Kristu—na ouditorionan ku a suma en total mas ku nuebe mion hende riba tres kontinente. Literatura imprimí tabata un otro medio ku e esklabo a usa. Por ehèmpel, na 1914 nan a publiká rònt di 50.000 ehemplar di e revista aki, E Toren di Vigilansia.
18. Na ki tempu Hesus a nombra e esklabo riba tur su propiedatnan, i dikon?
18 Sí, ora e Shon a yega, el a haña su esklabo fiel ta alimentá e otro kriánan di kas diligentemente i tambe ta prediká e bon nobo. Awor responsabilidatnan mas grandi tabata spera e esklabo ei. Hesus a bisa: “Di bèrdat mi ta bisa boso ku e lo lag’é keda na enkargo di tur su propiedatnan.” (Mateo 24:47) Hesus a hasi esaki na 1919, despues ku e esklabo a pasa dor di un periodo di tèst. Pero dikon “e esklabo fiel i prudente” a risibí responsabilidatnan mas grandi? Pasobra e propiedatnan di e Shon a oumentá. Hesus a risibí e puesto di rei na 1914.
19. Splika kon e nesesidatnan spiritual di e “multitut grandi” a wòrdu satisfasé.
19 Kiko ta e propiedatnan ku e Shon resien koroná a enkargá na su esklabo fiel? Tur e kosnan spiritual ku ta pertenesé na e Shon riba tera. Por ehèmpel, dos dékada despues di Hesus su entronisashon na 1914, “un multitut grandi” di ‘otro karné’ a keda identifiká. (Revelashon 7:9; Juan 10:16) Esakinan no tabata miembronan ungí di “e Israel di Dios,” sino hende hòmber i muhé sinsero ku tabatin e speransa di biba riba tera, kendenan a stima Yehova i kier a sirbié meskos ku e ungínan. De echo, nan a bisa “e esklabo fiel i prudente”: “Laga nos bai ku boso, pasobra nos a tende ku Dios ta ku boso.” (Zakarias 8:23) E kristiannan resien batisá aki a kome di e mesun kuminda spiritual nutritivo ku e kriánan ungí, i e dos gruponan aki di e tempu ei padilanti a sigui kome na e mesun mesa spiritual. Esaki tabata un bendishon grandi pa miembronan di e “multitut grandi”!
20. Ki papel e “multitut grandi” a hunga den oumentá e propiedatnan di Señor?
20 E miembronan di e “multitut grandi” gustosamente a djòin e grupo di esklabo ungí komo predikadónan di e bon nobo. Segun ku nan a prediká, e Shon su propiedatnan riba tera a oumentá, i esei a pone ku “e esklabo fiel i prudente” a haña mas responsabilidat. Komo ku e kantidat di hende ku tabata ke siña e bèrdat a oumentá, a bira nesesario pa ekspandé e fasilidatnan di imprenta pa por satisfasé e demanda pa literatura bíbliko. Sukursalnan di Testigunan di Yehova a keda establesé den un pais tras di otro. Nan a manda misionero “te na e parti mas alehá di mundu.” (Echonan 1:8) Di aproksimadamente sinku mil kristian ungí na 1914, e fila di alabadónan di Dios a oumentá na mas ku seis mion awe, i mayoria ta di e “multitut grandi.” Sí, e propiedatnan di e Rei a oumentá masha hopi mes desde su koronashon na 1914!
21. Kua ta e dos parábolanan ku nos lo konsiderá den nos siguiente studio?
21 Tur esaki ta mustra ku e esklabo tabata “fiel i prudente.” Djis despues ku Hesus a papia di “e esklabo fiel i prudente,” el a duna dos komparashon òf parábola ku a resaltá e kualidatnan ei: e parábola di e bírgennan sabí (òf, prudente) i esnan bobo i e parábola di e talentonan. (Mateo 25:1-30) Esei ta interesante! Ki nifikashon e parábolanan ei tin pa nos awe? Nos lo konsiderá e pregunta aki den e siguiente artíkulo.
Kiko Bo Ta Pensa?
• Ken ta forma “e esklabo fiel i prudente”?
• Ken ta e “otro kriánan” di e kas?
• Na ki tempu e esklabo fiel a keda enkargá ku tur e propiedatnan di Señor, i dikon ta na e tempu ei?
• Ken a yuda oumentá e propiedatnan di Señor den dékadanan resien, i den ki manera?
[Preguntanan di Estudio]
[Plachinan na página 10]
E grupo di esklabo di promé siglo a kumpli fielmente ku su tarea