‘Bo Ta Mas Mahestuoso ku e Serunan’
E Splendor di Yehova Su Kreashon
‘Bo Ta Mas Mahestuoso ku e Serunan’
E BISTA di salimentu di solo for di riba tòp di Seru Fuji ta un eksperensia inolvidabel. Un solo oraño ta manda su rayonan riba horizonte, iluminando e sneu blanku i barankanan di lava shinishi. Segun ku un dia nobo ta kuminsá, e sombra kla di e seru ta plama rápidamente kilometernan leu riba seritunan i vayenan.
Meskos ku Seru Fuji—skirbí un tempu ku signonan ku ta nifiká “sin igual”—serunan mahestuoso semper a fasiná nos. Nan tamaño enorme por asta duna nos e sintimentu ku nos ta insignifikante! E serunan aki ta asina mahestuoso ku un tempu hopi hende tabata kere ku riba e tòpnan di mas haltu—hopi bes tapá pa nubia i neblina—tin diosnan ta biba.
Pero e úniko Dios ku serunan haltu ta alabá realmente ta nan Kreadó magistral, Yehova. E ta ‘Esun ku a forma serunan,’ su so. (Amos 4:13) Kasi un kuart parti di tera ta konsistí di seru, i ora Dios a krea nos planeta, el a establesé e forsanan ku finalmente a produsí karedanan di seru espektakular (kordiyeranan) ku nan tòpnan na haltu. (Salmo 95:4) Por ehèmpel, tin hende ta pensa ku ta un kombinashon di forsanan enorme den profundidat di tera ku ta pusha bini ariba, huntu ku movementu di sekshonnan di e kapa di tera, a forma e kordiyeranan di Himalaya i Andes.
Komo hende nos no por kaba di komprondé kon ni pakiko e serunan a wòrdu kreá. En bèrdat, nos no por kontestá e preguntanan aki ku Dios a hasi hustu Jòb: “Na unda bo tabata tempu ku mi [Yehova] a pone fundeshi di mundu? . . . Riba kiko su fundeshinan a wòrdu wantá?”—Jòb 38:4-6.
Loke sí nos sa ta ku nos bida ta dependé di e serunan. Nan a yega di ser yamá e torennan di awa den naturalesa, ya ku tur riu prinsipal ta haña nan awa for di fuentenan den seru, i mitar di e kantidat di hende ku tin riba tera ta dependé di seru pa haña awa. (Salmo 104:13) Segun e revista New Scientist, “seis di e 20 matanan prinsipal di kuminda ta originá den seru.” Ora e kondishonnan ekológiko ta den balansa atrobe den e mundu nobo ku Dios a primintí, “lo tin abundansia di maishi den e tera, riba kabes di e serunan.”—Salmo 72:16; 2 Pedro 3:13.
Ora ta papia di seru, hopi hende ta pensa riba e kordiyera di Alpen di Europa. E serunan aki, entre kua Seru Civetta ku bo por mira aki banda, ta duna testimonio maravioso di nan Kreadó. (Salmo 98:8) Nan ta alabá Yehova, esun ku “ta establesé e serunan pa medio di su forsa.”—Salmo 65:6. *
E splendor di e serunan di Alpen en bèrdat ta algu asombroso. I esei ta debí na su tòpnan kubrí ku eis, barika di seru tur na sneu, nan vayenan i lagonan, i nan sabananan i moerasnan. Rei David a identifiká Yehova komo esun “kende ta hasi yerba krese riba e serunan.”—Salmo 147:8.
Kisas serunan ménos haltu—manera esnan aki na Guilin, China—por parse ménos espektakular ku e serunan di Alpen, pero nan tin un bunitesa Salmo 104:10.
úniko. A lo largu di Riu Li, e hopi karedanan di seru di kalki ku nan kabesnan ku ta punta na haltu ta impreshoná bishitantenan ku nan bunitesa. Ora bo wak awa kristalino pasa dor di e serunan yen di neblina aki, esei por pone bo kòrda e palabranan di e salmista: “E [Yehova] ta manda fuentenan den e vayenan; nan ta kore meimei di e serunan.”—Serunan mester impreshoná nos bèrdè pasobra nos ta rekonosé nan komo un parti mahestuoso di e Kreadó su provishon amoroso p’e bienestar i disfrute di humanidat. Pero pa asombroso ku serunan por ta, nan no ta nada na komparashon ku e mahestat di Yehova. E ta sin duda “mas mahestuoso ku e serunan.”—Salmo 76:4.
[Nota]
^ par. 8 Wak e Kalènder 2004 di Testigunan di Yehova, mart/aprel.
[Kuadro/Plachi na página 9]
Dies porshento di e poblashon di mundu ta biba den áreanan di seru. Pero esei no ta un opstákulo insuperabel pa esnan ku ta deklará e bon nobo di e Reino di Dios. E sirbidónan kristian aki ta bastante okupá den hopi regionnan haltu. I “ki bunita riba e serunan ta e pianan di esun ku ta trese bon nobo, ku ta anunsiá pas i ta trese bon nobo di felisidat, ku ta anunsiá salbashon!”—Isaias 52:7.
E salmista a kanta: “E serunan haltu ta pa kabritu di mondi [“seru,” NW].” (Salmo 104:18) Kabritu di seru, manera e ibex di Nubia ku su bunita kachunan, ta un di e mihó habitantenan di seru. E ta riska kana na rant di baranka asina smal ku bo no ta kere ku e lo por pasa. E ibex ta bon ekipá pa biba den lugánan inaksesibel. Esaki ta debí parsialmente n’e forma di su patanan. E peso di e kabritu por pone e splet meimei di su patanan span, loke ta duna e animal un gara firme ora e ta pará òf ora e ta kana riba e parti smal di un baranka. Berdaderamente, e ibex ta un obra maestro di diseño!
[Plachi na página 9]
Seru Fuji, Honshu, Hapon