E Sena di Señor​—⁠Kon E Ta Wòrdu Selebrá?

APÒSTEL Pablo a duna un splikashon detayá di e Sena di Señor, ora el a skirbi: “Mi a risibí di Señor loke mi a entregá na boso tambe, ku Señor Hesus, riba e anochi ku el a wòrdu traishoná, a kohe pan; i ora ku el a kaba di duna gradisimentu, el a kibr’é, i a bisa: ‘Esaki ta mi kurpa ku ta wòrdu kibrá pa boso; hasi esaki na mi rekuerdo.’ Di e mesun manera el a kohe e kopa tambe, despues di a kaba di sena, bisando: ‘E kopa aki ta e aliansa nobo den mi sanger; hasi esaki, kada bes ku boso beb’é, na mi rekuerdo.’ Pasobra kada bes ku boso kome e pan aki i bebe e kopa aki, boso ta proklamá e morto di Señor te ora ku e bin.”—1 Korintionan 11:23-26.

Manera Pablo a bisa, Hesus a instituí e Sena di Señor “riba e anochi ku el a wòrdu traishoná” pa Hudas Iskariote i entregá n’e lidernan religioso hudiu. Esakinan a pone preshon riba e romanonan pa klaba Kristu na staka. E sena ei a tuma lugá djaweps anochi lat, 31 di mart di aña 33 di nos era. Hesus a muri riba un staka di tormento riba djabièrnè traimèrdia, 1 di aprel. Pa motibu ku un dia riba e kalènder hudiu tabata kuminsá ora anochi sera i dura te su siguiente dia ora anochi sera atrobe, tantu e Sena di Señor komo e morto di Hesukristu a tuma lugá riba e mesun dia: 14 di nisan di aña 33 di nos era.

E personanan ku ta tuma di e pan i e biña mester a “[“sigui,” NW] hasi esaki” na rekuerdo di Hesus. Segun un otro tradukshon, Hesus a bisa: “Hasi esaki na memoria di mi.” (1 Korintionan 11:24, The Jerusalem Bible) P’esei, e Sena di Señor ta ser yamá tambe e Memorial di e morto di Kristu.

Pakiko Konmemorá e Morto di Hesus?

Pa kontestá e pregunta ei bo tin ku komprondé kiko e morto ei ta nifiká. Hesus a muri komo e defensor prinsipal di e soberania di Yehova. Den e manera ei el a duna prueba ku ta un mentira Satanas a saka ora el a akusá hende ku nan ta sirbi Dios puramente pa motibunan egoista. (Jòb 2:1-5; Proverbionan 27:11) Tambe, dor di muri komo un hende perfekto, Hesus a “duna su bida komo preis di reskate pa hopi.” (Mateo 20:28) Ora Adam a peka kontra Dios, el a pèrdè bida humano perfekto i e posibilidat di biba pa semper. Pero “Dios a stima mundu [di humanidat] asina  tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) Sí, “e pago di piká ta morto, ma e don di grasia di Dios ta bida eterno den Kristu Hesus, nos Señor.”—Romanonan 6:23.

Pues, e morto di Hesukristu ta ligá ku e dos mayor ekspreshonnan di amor: e gran amor ku Yehova a demostrá pa humanidat ora el a duna su Yu i e amor sakrifisial ku Hesus a demostrá pa humanidat dor di entregá su bida humano boluntariamente. E Memorial di e morto di Hesus ta engrandesé e dos ekspreshonnan di amor aki. Unabes ku nos a risibí e amor aki, nos no mester mustra ku nos ta gradisidu p’e? Un manera pa demostrá esei ta dor di ta presente n’e selebrashon di e Sena di Señor.

Nifikashon di e Pan i e Biña

Ora Hesus a instituí e Sena di Señor, el a usa pan i un kopa di biña kòrá komo emblema, òf símbolo. Hesus a tuma un pan, i “ora ku el a kaba di duna gradisimentu, el a kibr’é, i a bisa: ‘[E pan aki] ta mi kurpa ku ta wòrdu kibrá pa boso.’” (1 Korintionan 11:24) Pa por a repartí e pan i laga e apòstelnan kome for di dje, mester a kibr’é pasobra e tabata un pan relativamente bròs trahá di hariña i awa sin zürdeg òf ist. Den e Skritura, zürdeg ta simbolisá piká. (Mateo 16:11, 12; 1 Korintionan 5:6, 7) Hesus no tabatin piká. P’esei su kurpa humano perfekto a sirbi apropiadamente komo un sakrifisio di reskate pa humanidat. (1 Juan 2:1, 2) Ta na su lugá anto ku e pan ku ta ser usá pa representá e kurpa sin piká di Kristu, ta un pan sin zürdeg!

Tambe Hesus a duna gradisimentu p’e kopa di biña kòrá puru i a bisa: “E kopa aki ta e aliansa nobo den mi sanger.” (1 Korintionan 11:25) E biña kòrá den e kopa ta representá e sanger di Hesus. Meskos ku pa medio di e sanger di toro i kabritu sakrifiká e aliansa òf pakto di Lei entre Dios i e nashon di Israel a drenta na vigor na 1513 promé ku nos era, asina, pa medio di Hesus su sanger dramá den morto, e aliansa nobo a drenta na vigor.

Ken Tin Ku Tuma di e Emblemanan?

Pa haña sa ken tin mag di tuma di e emblemanan di e Konmemorashon, nos tin ku komprondé kiko e aliansa nobo ta enserá i ken ta esnan ku ta partisipá den dje. Beibel ta bisa: “‘Ata, e dianan ta bin,’ SEÑOR ta deklará, ‘ku lo mi sera un aliansa nobo ku e kas di Israel i ku e kas di Huda . . . Lo mi pone mi lei den nan i lo mi skirbié riba nan kurason; i ami lo ta nan Dios i nan lo ta mi pueblo. . . . Lo mi pordoná nan inikidat, i nan piká lo mi no kòrda mas.’”—Jeremias 31:31-34.

E aliansa nobo ta permití hende drenta den un relashon spesial ku Yehova Dios. Pa medio di e aliansa aki, un sierto grupo di persona ta bira su pueblo i é ta bira nan Dios. E lei di Yehova ta skirbí den nan, den nan kurason, i asta esnan ku no ta hudiu sirkunsidá por drenta den un relashon ku Dios basá riba e aliansa nobo aki. (Romanonan 2:29) Lukas, eskritor di Beibel, ta skirbi di e propósito di Dios pa “bishitá e paganonan, pa tuma for di nan un pueblo pa su nòmber.” (Echonan 15:14) Segun 1 Pedro 2:10, ‘un tempu nan no tabata un pueblo, ma awor nan ta e pueblo di Dios.’ E Skritura ta referí na nan komo “e Israel di Dios,” esta, Israel spiritual. (Galationan 6:16; 2 Korintionan 1:21) Pues anto, e aliansa nobo ta un aliansa entre Yehova Dios i Israel spiritual.

 Riba e último anochi ku Hesus a pasa ku su disipelnan, e mes tambe a sera un otro aliansa ku nan. El a bisa nan: “Mi ta sera un pakto ku boso, meskos ku mi Tata a sera un pakto ku mi, pa un reino.” (Lukas 22:29, NW) Esaki ta e pakto, òf aliansa, di Reino. E kantidat di hende imperfekto ku ta wòrdu introdusí den e aliansa di e Reino ta 144.000. Despues ku nan ser resusitá pa bai shelu, nan lo goberná ku Kristu komo rei i saserdote. (Revelashon 5:9, 10; 14:1-4) Pues, esnan ku ta den e aliansa nobo ku Yehova Dios ta den e aliansa di Reino huntu ku Hesukristu tambe. Nan ta e únikonan ku tin derecho di tuma di e emblemanan di e Sena di Señor.

Kon esnan ku tin derecho di tuma di e emblemanan di e Konmemorashon por sa ku nan tin un relashon úniko ku Dios i ku nan ta ko-heredero ku Kristu? Pablo ta splika: “E spiritu [santu] mes ta duna testimonio huntu ku nos spiritu [nos disposishon mental] ku nos ta yu di Dios, i si nos ta yu, nos ta heredero tambe, heredero di Dios i ko-heredero ku Kristu, si di bèrdat nos ta sufri huntu kuné, pa nos wòrdu glorifiká tambe huntu kuné.”—Romanonan 8:16, 17.

Pa medio di su spiritu santu, òf forsa aktivo, Dios ta ungi e ko-herederonan ku Kristu. Esaki ta duna nan e siguransa ku nan ta heredero di Reino. E ta krea den kristiannan ungí un speransa selestial. Nan ta mira tur loke Beibel ta bisa tokante bida selestial komo dirigí na nan personalmente. Ademas, nan ta dispuesto pa sakrifiká tur loke tin di haber ku e mundu aki, inkluso bida riba tera i tur relashon humano. Ounke kristiannan ungí ku spiritu ta realisá ku bida den e Paradeis aki riba tera lo ta algu maravioso, nan no ta karga e speransa pa biba den dje. (Lukas 23:43, NW) Nan tin un speransa selestial inkambiabel, no pa motibu di un siñansa religioso inkorekto, sino pa motibu ku e spiritu di Dios a aktua riba nan, i p’esei nan tin derecho di tuma di e emblemanan di Konmemorashon.

Suponé ku un persona no ta kompletamente sigur ku e ta den e aliansa nobo i e aliansa di Reino. Kiko lo para di dje si e no tin ni e testimonio di e spiritu di Dios ku e ta un ko-heredero ku Kristu? E ora ei lo ta inkorekto p’e tuma di e emblemanan di Konmemorashon. Sí, Dios lo no keda kontentu ku un persona ku sa muchu bon ku e no tin un yamada selestial, anto tòg kier laga parse ku el a wòrdu yamá pa ta un rei i saserdote selestial.—Romanonan 9:16; Revelashon 22:5.

Ku ki Frekuensia Mester Selebr’é?

Mester konmemorá e morto di Hesus tur siman òf asta tur dia mes? Wèl, Kristu a instituí e Sena di Señor i a ser matá inhustamente riba e dia di Pasku Hudiu. Ta un biaha pa aña so, riba 14 di nisan, dia di Pasku Hudiu, e israelitanan tabata konmemorá e liberashon di nan nashon for di sklabitut na Egipto. (Eksodo 12:6, 14; Levítiko 23:5) Pues, ta un biaha pa aña so mester konmemorá e morto di “Kristu, nos pasku,” i no tur siman òf tur dia. (1 Korintionan 5:7) I ora kristiannan ta selebrá e Sena di Señor, nan ta sigui e mesun prosedura ku Hesus a sigui ora el a instituí esaki.

Pero kiko Pablo tabata kier men ora el a bisa: “Pasobra kada bes ku boso kome e pan aki i bebe e kopa aki, boso ta proklamá e morto di Señor te ora ku e bin”? (1 Korintionan 11:26) Den e teksto aki Pablo a usa un palabra ku ta nifiká “tur biaha ku,” òf “ki ora ku.”  Pues, Pablo tabata kier men ku ki ora ku kristiannan ungí tuma di e emblemanan, nan ta proklamá nan fe den Hesus su sakrifisio di reskate.

Kristiannan ungí lo konmemorá e morto di Kristu “te ora ku e bin.” E selebrashon aki lo sigui te ora Hesus bini pa risibí su siguidónan ungí den shelu pa medio di un resurekshon pa bida spiritual durante su “binida,” òf presensia. (1 Tesalonisensenan 4:14-17) Esaki ta na armonia ku loke Kristu a bisa e 11 apòstelnan leal: “Ora mi bai i prepará un lugá pa boso, lo mi bin atrobe i risibí boso serka mi, pa kaminda ami ta, boso tambe por ta.”—Juan 14:3.

Kiko E Ta Nifiká pa Bo?

Nos mester tuma di e emblemanan di Konmemorashon pa nos por benefisiá di Hesus su sakrifisio i haña bida eterno riba tera? Nò. Beibel no ta duna ningun indikashon ku un dia personanan temeroso di Dios manera Noe, Abraham, Sara, Isaak, Rebeka, Hosé, Moisés i David lo bai tuma di e emblemanan despues ku nan resusitá riba tera. Pero, tantu nan komo tur otro hende ku ta deseá di haña bida eterno riba tera lo tin ku ehersé fe den Dios i Kristu i den e sakrifisio di reskate ku Yehova a perkurá pa medio di Hesus. (Juan 3:36; 14:1) Pa bo haña bida eterno, bo tambe tin ku ehersé e fe ei. Bo presensia n’e selebrashon anual di e morto di Kristu lo rekordá bo di e gran sakrifisio ei i mester profundisá bo gratitut p’e.

Apòstel Juan a enfatisá e importansia di Hesus su sakrifisio ora el a bisa: “Mi ta skirbi boso [rumannan ungí] e kosnan aki pa boso no hasi piká. I si un hende hasi piká, nos tin un abogado serka e Tata, Hesukristu, e hustu; i e mes ta e propisiashon pa nos pikánan, i no pa di nos so, ma tambe pa esnan di henter mundu.” (1 Juan 2:1, 2) E ungínan por bisa ku e sakrifisio di Hesus ta un propisiashon, esta un sakrifisio di pordon, pa nan pikánan. Pero e ta un sakrifisio p’e pikánan di henter mundu tambe, i esei ta habri e kaminda di bida eterno pa humanidat obediente!

Lo bo ta presente dia 4 di aprel 2004 pa konmemorá Hesus su morto? Rònt mundu, Testigunan di Yehova lo tene e selebrashon aki na nan lugánan di reunion. Si bo asistí, lo bo benefisiá di un diskurso bíbliko hopi importante. E informashon lo rekordá bo riba kuantu kos Yehova Dios i Hesukristu a hasi pa nos. Ademas, e reunion aki huntu ku otro personanan ku tin un rèspèt profundo pa Dios i Kristu i pa Hesus su sakrifisio di reskate lo stimulá nos spiritualmente. Sin duda e okashon lo fortalesé bo deseo pa bo tambe risibí e bondat inmeresí di Dios, loke ta hiba na bida eterno. No laga nada stroba bo. Wak pa bo no pèrdè e selebrashon konmovedor aki na onor di nos Tata selestial, Yehova Dios.

[Plachi na página 5]

E morto di Hesus ta ligá ku e dos mayor ekspreshonnan di amor

[Plachi na página 6]

E pan sin zürdeg i e biña ta símbolonan apropiá di Hesus su kurpa sin piká i su sanger dramá