“Hasi Trabou di un Predikadó di Evangelio”

“Sea spièrtá den tur kos, . . . hasi trabou di un predikadó di Evangelio.” —2 TIMOTEO 4:5, E Testament Nobo.

1. Ki tarea Hesus a duna su siguidónan?

YEHOVA su nòmber i propósito ta ser proklamá rònt mundu. Esei ta asina pasobra Dios su pueblo dediká a tuma na pechu e tarea ku Hesukristu a duna na su siguidónan ora ku el a bisa nan: “Bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.”—Mateo 28:19, 20.

2. Ki instrukshon e superintendente Timoteo a risibí, i kua ta un manera pa superintendentenan kristian kumpli ku nan sirbishi?

² Hesus su disipelnan di promé siglo a tuma e tarea ei na serio. Por ehèmpel, apòstel Pablo a urgi Timoteo, ku tambe tabata un superintendente kristian meskos kuné: “Hasi trabou di un predikadó di Evangelio; kumpli ku bo sirbishi henteramente.” (2 Timoteo 4:5, TN) Un manera ku un superintendente djawe ta kumpli ku su sirbishi ta dor di ta un proklamadó seloso di Reino, unu ku ta partisipá ku regularidat den sirbishi vèlt. Por ehèmpel, e superintendente di Studio di Buki di Kongregashon tin e privilegio rekompensador di hiba delantera den e trabou di prediká i entrená otronan. Pablo a kumpli ku su responsabilidat personal di proklamá e bon nobo, i el a yuda entrená otro hende pa sirbishi.—Echonan 20:20; 1 Korintionan 9:16, 17.

 Predikadónan Seloso di Evangelio den Pasado

3, 4. Ki eksperensianan Felipe tabatin komo un predikadó di Evangelio?

³ E promé kristiannan tabata konosí komo predikadónan seloso di e Evangelio. Tuma por ehèmpel Felipe, un predikadó di Evangelio. E tabata un di e ‘shete hòmbernan di bon reputashon, yen di spiritu santu i di sabiduria’ ku nan a skohe pa kumpli ku e tarea di repartí kuminda tur dia na un manera imparsial entre e biudanan kristian di abla griego i esnan di abla hebreo na Yerusalèm. (Echonan 6:1-6) Despues ku e asignashon spesial ei a kaba i persekushon a plama tur kristian for di einan, ku eksepshon di e apòstelnan, Felipe a bai Samaria. Einan el a prediká e bon nobo i ku poder di spiritu santu e tabata saka demoño i kura hendenan lam i paralisá. Hopi samaritano a aseptá e mensahe di Reino i a batisá. Ora ku e apòstelnan na Yerusalèm a tende esaki, nan a manda Pedro ku Juan na Samaria pa asina e kreyentenan resien batisá por a haña spiritu santu.—Echonan 8:4-17.

⁴ Siguientemente Dios su spiritu a dirigí Felipe pa kontra ku e eunuko di Etiopia riba e kaminda pa Gaza. Despues di Felipe su splikashon kla di e profesia di Isaias, e hòmber aki “un ofisial di korte di Kandase, reina di e etiopionan,” a pone fe den Hesukristu i a wòrdu batisá. (Echonan 8:26-38) Despues di esei Felipe a bai Azoto (Asdod) i kaba Cesarea, anto riba kaminda “pasando dor di tur e statnan, e tabata prediká e evangelio.” (Echonan 8:39, 40) No tin duda ku Felipe a pone un ekselente ehèmpel den hasi e trabou di un predikadó di Evangelio!

5. E kuater yu muhénan di Felipe tabata konosí partikularmente pa kiko?

⁵ Un 20 aña despues, Felipe ainda tabata aktivo den sirbishi na Cesarea. Ora Pablo ku Lukas a keda na su kas, e “tabatin kuater yu muhé bírgen, kendenan tabata profeta.” (Echonan 21:8-10) Evidentemente nan a haña bon instrukshon spiritual, nan tabatin selo pa sirbishi i tabatin asta e privilegio di papia profétikamente. E selo ku mayornan tin pa sirbishi por tin un ekselente efekto riba nan yunan awe, tantu mucha hòmber komo mucha muhé, motivando nan pa hasi e predikashon seloso di e Evangelio nan karera den bida.

Predikadónan Seloso di Evangelio Awe

6. Ki éksito e predikadónan di Evangelio di promé siglo tabatin?

⁶ Den Hesukristu su profesia remarkabel ku ta señalá na nos tempu i na e tempu di fin, el a deklará: “E evangelio mester wòrdu prediká promé na tur nashon.” (Marko 13:10) E fin lo bin despues ku a prediká e bon nobo “den henter mundu.” (Mateo 24:14) Segun ku Pablo i otro predikadónan di promé siglo a proklamá e bon nobo, hopi hende a bira kreyente, i nan tabata forma kongregashonnan den un lugá tras di otro den henter e Imperio Romano. Ansianonan nombrá pa sirbi den e kongregashonnan aki a partisipá huntu ku nan rumannan den e trabou di prediká e Evangelio i a ekstendé e aktividat ei den tur skina. E Palabra di Dios a sigui krese i prevalesé den e dianan ei, meskos ku ta sosodé awe debí ku miónes di Testigu di Yehova ta hasiendo e trabou di prediká e Evangelio. (Echonan 19:20) Abo ta un di e alabadónan felis aki di Yehova?

7. Kiko proklamadónan di Reino ta hasiendo awe?

⁷ Hopi proklamadó di Reino di tempu aktual ta probechá di oportunidatnan pa oumentá nan partisipashon den e trabou di prediká e Evangelio. Míles di nan a drenta den e kampo di misionero, i sientos di míles ta partisipá fultaim den e aktividat di prediká komo pionero regular i ousiliar. I esnan ku ta sirbi komo publikadónan seloso di Reino—tantu hòmber, muhé komo mucha—tambe ta hasi trabou ku ta digno di elogio. De echo, henter Yehova su pueblo ta disfrutando di su bendishon riku segun ku unidamente nan ta sirbié komo predikadónan kristian di e Evangelio.—Sofonias 3:9.

8. Ki trabou di markamentu ta ser hasí awor, i dor di ken?

⁸ Dios a duna Hesus su siguidónan ungí e responsabilidat di proklamá e bon nobo den  henter mundu. Un kantidat kresiente di e “otro karnénan” di Kristu ta duna nan un man den e trabou aki di prediká e Evangelio. (Juan 10:16) Profétikamente, e trabou aki ku ta salba bida ta ser kompará ku ponementu di un señal òf marka riba frenta di e hendenan ku ta suspirá i keha pa motibu di tur e kosnan abominabel ku ta tumando lugá awendia. Pronto, e malbadonan lo ser destruí. Miéntras tantu, ta ki un gran privilegio di por hiba bèrdatnan ku ta salba bida pa e habitantenan di e tera!—Ezekiel 9:4-6, 11.

9. Kon nos por yuda publikadónan nobo den sirbishi?

⁹ Si nos tin basta tempu ta partisipá den e trabou di prediká, muy probablemente nos por hasi algu pa yuda esnan nobo den kongregashon. De bes en kuando, nos lo por laga nan kompañá nos den sirbishi. Esnan ku ta sirbi komo ansiano lo ke hasi tur loke nan por pa yuda rumannan den fe krese spiritualmente. E bon esfuerso di superintendentenan humilde por kontribuí hopi na yuda otro rumannan pa ta predikadónan seloso i produktivo di e Evangelio.—2 Pedro 1:5-8.

Dunando Testimonio di Kas pa Kas

10. Ki ehèmpel Kristu i su promé siguidónan a pone den sirbishi?

¹⁰ Hesukristu a pone un ekselente ehèmpel komo predikadó di Evangelio pa su siguidónan. Relashoná ku e sirbishi di Kristu i su apòstelnan, e Palabra di Dios ta deklará: “El a kuminsá bai di un stat i di un pueblito pa otro, proklamando i predikando e reino di Dios; i e diesdosnan tabata huntu kuné.” (Lukas 8:1) Ke tal di e apòstelnan mes? Despues ku Dios a drama spiritu santu riba nan na Pentekòste di aña 33 di nos era, “tur dia, den tèmpel i di kas pa kas, nan tabata sigui siña hende i prediká Hesus komo e Kristu.”—Echonan 5:42.

11. Segun Echonan 20:20 i 21, kiko Pablo a hasi den su sirbishi?

¹¹ Debí na apòstel Pablo su trabou seloso di prediká e Evangelio, e por a bisa ansianonan kristian di Efeso: “Mi no a laga di deklará nada ku tabata di probecho pa boso i tabata siña boso públikamente i di kas pa kas.” Ora Pablo tabata ‘siña di kas pa kas,’ ta kas di su kompañeronan ku tabata adorá Yehova e tabata bishitá, hasiendo bishita di pastoreo serka kreyentenan? Nò, pasobra el a sigui splika ku e tabata “dunando testimonio, tantu na hudiu komo na griego, di repentimentu pa ku Dios i di fe den nos Señor Hesukristu.” (Echonan 20:20, 21) Por lo general hende dediká kaba na Yehova lo no tabatin mester di instrukshon tokante “repentimentu pa ku Dios i di fe den nos Señor Hesukristu.” Pablo a entrená e ansianonan kristian di Efeso den sirbishi di kas pa kas miéntras nan tabata kuné ora ku e tabata siña hende inkrédulo tokante repentimentu i fe. Dor di hasi esaki, Pablo a imitá e método ku Hesus a establesé.

12, 13. Na armonia ku Filipensenan 1:7, kiko e pueblo di Yehova a hasi tokante nan derecho di prediká?

¹² Sirbishi di kas pa kas por ta un reto. Por ehèmpel, tin hende ta rabia ora nos yega na nan porta ku e mensahe di Beibel. No ta nos intenshon pa pone hende rabia. Sin embargo, sirbishi di kas pa kas ta na armonia ku e Skritura, i amor pa Dios i pa próhimo ta motivá nos pa duna testimonio den e manera aki. (Marko 12:28-31) Pa ‘defendé i establesé legalmente’ nos derecho di prediká di kas pa kas, nos a entamá kasonan den korte, inkluso e Korte Supremo di Merka. (Filipensenan 1:7, NW) Kasi semper e korte ei a disidí na nos fabor. E siguiente veredikto ta un ehèmpel típiko di esaki:

¹³ “E entrega personal di tratadonan religioso ta un forma masha antiguo mes ku misioneronan a usa pa evangelisá; e ta mes bieu ku e historia di imprenta. Atraves di añanan esaki tabata un forsa poderoso den vários movementu religioso. Awendia tin vários sekta ku na gran eskala ta usa e forma di evangelisá aki, i nan repartidónan ta hiba e Evangelio na míles i míles di hogar i mediante bishitanan personal nan ta purba gana miembro pa nan fe. . . . Bou di e Promé Enmienda [di e Konstitushon Merikano] e tipo di aktividat religioso aki ta  okupá e mesun posishon importante ku rindi adorashon den misa i prediká via prekstul.”—Murdock v. Pennsylvania, 1943.

Dikon Sigui Prediká?

14. Ki efekto progresivo nos sirbishi por tin?

¹⁴ Tin hopi motibu pa duna testimonio di kas pa kas. Kada biaha ku nos bishitá un doño di kas, nos ta purba planta un simia di bèrdat bíbliko. Dor di hasi rebishita, nos ta purba muha e simia ei. I progresivamente e efekto riba e doño di kas por bira mas fuerte, pasobra Pablo a skirbi: “Ami a planta, Apolos a muha, ma ta Dios a duna kresementu.” (1 Korintionan 3:6) P’esei laga nos sigui ‘planta i muha,’ ku e konfiansa ku Yehova lo “duna kresementu.”

15, 16. Dikon nos ta pasa bes tras bes na kas di hende?

¹⁵ Nos ta hasi e trabou di predikadó di Evangelio pasobra bida ta den wega. Dor di prediká nos por salba nos mes i esnan ku skucha nos. (1 Timoteo 4:16) Si nos sa ku un hende su bida ta na peliger, nos lo a hasi djis un intento suak pa yud’é? Klaru ku nò! Siendo ku esaki ta enbolbé salbashon di hende, nos ta sigui pasa bes tras bes na e kasnan di hende. Sirkunstansianan ta sigui kambia. Un hende ku ta muchu okupá pa skucha na un sierto okashon kisas ta dispuesto pa tende e mensahe di Beibel na un otro ora. Podisé un otro miembro di famia ta habri porta, i esei lo por hiba na un kòmbersashon bíbliko.

¹⁶ No ta solamente e sirkunstansia sino tambe e aktitut di e doñonan di kas por kambia. Por ehèmpel, e doló ku morto di un ser kerí ta kousa kisas ta motivá un persona pa skucha e mensahe di Reino. Nos ta spera di por konsolá e persona, hasié konsiente di su nesesidat spiritual i mustr’é kon e por satisfasé esei.—Mateo 5:3, 4, NW.

17. Kua ta e motibu prinsipal pa nos aktividat di prediká?

¹⁷ E motibu prinsipal pakiko nos ta duna testimonio di kas pa kas òf ta partisipá den otro formanan di sirbishi kristian, ta e deseo di por yuda hasi e nòmber di Yehova konosí. (Eksodo 9:16; Salmo 83:18, NW) Nos ta sinti un gran satisfakshon ora ku nos trabou di prediká e Evangelio ta yuda amantenan di e bèrdat i hustisia bira alabadónan di Yehova. E salmista a kanta: “Tantu yònkuman komo bírgen; ansiano i mucha. Laga tur alabá e nòmber di [“Yehova,” NW], pasobra ta su nòmber so ta halsá; su gloria ta mas haltu ku tera i shelu.”—Salmo 148:12, 13.

Prediká e Evangelio Ta Benefisiá Nos Personalmente

18. Kon nos ta benefisiá dor di prediká e Evangelio?

¹⁸ Nos ta benefisiá personalmente den vários manera dor di ta hasi e trabou di un predikadó di Evangelio. Bayendo di kas pa kas ku e bon nobo ta yuda nos kultivá humildat, foral ora hende no ta risibí nos na un manera amabel. Pa nos por ta predikadónan efektivo, nos mester ta manera Pablo, kende ‘a bira tur kos pa tur tipo di hende, pa asina lo e por salba algun.’ (1 Korintionan 9:19-23) Eksperensia den sirbishi ta yuda nos desplegá takto. Dor di dependé riba Yehova i skohe nos palabranan bon, nos por apliká Pablo su konseho: “Laga boso palabranan ta semper ku grasia, sasoná ku salu, pa boso por sa kon boso mester kontestá kada persona.”—Kolosensenan 4:6.

19. Kon spiritu santu ta yuda predikadónan di e Evangelio?

¹⁹ E trabou di prediká e Evangelio tambe ta motivá nos pa dependé riba Dios su spiritu santu. (Zakarias 4:6) Na su turno, e fruta di spiritu santu—“amor, goso, pas, pasenshi, kariño, bondat, fieldat, mansedumbre, dominio propio” ta bira bisto den nos sirbishi. (Galationan 5:22, 23) E ta influensiá nos trato ku hende, pasobra dor di someté nos mes na e guia di e spiritu nos por mustra amor, ser gososo i pasífiko, tene pasenshi i mustra kariño, desplegá bondat i fieldat, i manifestá mansedumbre i dominio propio ora nos ta proklamá e bon nobo.

20, 21. Menshoná algun bendishon i benefisio di keda okupá komo predikadónan di Evangelio.

²⁰ Un bendishon mas ku nos ta haña komo predikadónan di e Evangelio ta ku nos  ta bira mas komprensivo. Ora hende konta nos nan problemanan—malesa, desempleo, difikultatnan doméstiko—nos no ta aktua komo konsehero, sino mas bien ta kompartí tekstonan bíbliko ku ta animá nan i konsolá nan. Nos ta interesá den hende ku a ser siegá spiritualmente pero ku aparentemente tin un amor pa hustisia. (2 Korintionan 4:4) I ta ki un gran bendishon di por duna yudansa spiritual na e hendenan ei di kurason rekto.

²¹ Partisipashon regular den e trabou di prediká e Evangelio ta yuda nos mantené nos bista fihá riba kosnan spiritual. (Lukas 11:34) Esaki sigur ta un benefisio, ya ku di otro manera kisas nos lo por entregá na e tentashonnan materialista ku ta asina komun den e mundu aki. Apòstel Juan a urgi kristiannan: “No stima mundu, ni e kosnan ku tin den mundu. Si un hende ta stima mundu, e amor di e Tata no ta den dje. Pasobra tur loke ku tin den mundu, e deseo di karni i e deseo di wowo i e orguyo di bida, no ta bin di e Tata, sino di e mundu. I e mundu ta pasa bai i su deseonan tambe, ma esun ku hasi e boluntat di Dios ta permanesé pa semper.” (1 Juan 2:15-17) Un kos ku lo yuda nos pa nos no stima mundu ta di keda okupá komo predikadónan di Evangelio ku tin hopi di hasi den e trabou di Señor.—1 Korintionan 15:58.

Montoná Tesoro den Shelu

22, 23. (a) Ki tipo di tesoro predikadónan kristian di e Evangelio ta montoná? (b) Kon e siguiente artíkulo lo yuda nos?

²² E aktividat seloso di prediká e Reino ta trese benefisionan duradero. Hesus a mustra esaki ora el a bisa: “No montoná tesoro pa boso mes riba tera, kaminda mòt i frustu ta destruí nan, i kaminda ladron ta kibra drenta i hòrta; ma montoná tesoro pa boso mes den shelu, kaminda ni mòt ni frustu no ta destruí nan, i kaminda ladron no ta kibra drenta ni hòrta; pasobra kaminda boso tesoro ta, einan boso kurason lo ta tambe.”—Mateo 6:19-21.

²³ Laga nos sigui montoná tesoro den shelu, sabiendo ku nos lo no por tin un privilegio mas grandi ku esun di representá e Señor Soberano Yehova komo su Testigunan. (Isaias 43:10-12) Segun ku nos ta kumpli ku nos tarea komo sirbidónan di Dios, probablemente nos lo sinti meskos ku un ruman muhé kristian di 90 i piku aña ku a bisa tokante su bida largu den sirbishi di Dios: “Despues di tur loke mi a eksperensiá mi ta gradisí Yehova ku el a soportá mi tur e añanan aki, i mi ta pidi fervientemente den orashon pa e por keda mi Tata amoroso pa semper.” Si nos tambe tin tal apresio pa nos relashon ku Dios, nos siguramente lo ke hasi e trabou di prediká e Evangelio den un manera kabal. E siguiente artíkulo lo yuda nos mira kon nos por kumpli ku nos sirbishi henteramente.

Kon Lo Bo Kontestá?

• Dikon nos tin ku hasi e trabou di un predikadó di Evangelio?

• Kiko bo por bisa di e trabou di predikadónan di Evangelio den pasado i presente?

• Dikon nos ta duna testimonio di kas pa kas?

• Kon abo personalmente ta benefisiá di hasi e trabou di un predikadó di Evangelio?

[Preguntanan di Estudio]

[Plachinan na página 10]

Den nos tempu tambe tin predikadónan gososo meskos ku Felipe i su yu muhénan

[Plachi na página 14]

Kon abo personalmente ta benefisiá segun ku bo ta kompartí e bon nobo ku otro hende?