“Kumpli ku Bo Sirbishi Henteramente”

“Kumpli ku bo sirbishi henteramente.”—2 TIMOTEO 4:5, TN.

1, 2. Ounke tur kristian ta un predikadó di Evangelio, kiko Beibel ta rekerí di ansianonan?

BO TA un proklamadó di Reino? Si ta asina, gradisí Yehova Dios pa e privilegio maravioso aki. Bo ta un ansiano den kongregashon? Esei ta un privilegio èkstra di Yehova. Pero nos no mester lubidá nunka ku no ta nos edukashon ni nos abilidat di papia bon ta loke ta hasi nos kompetente pa sirbishi òf pa sirbi komo superintendente den kongregashon. Ta Yehova ta hasi nos kompetente pa sirbishi, i ta pasobra algun hende hòmber entre nos ta kumpli ku rekisitonan bíbliko spesífiko, nan tin e privilegio di sirbi komo superintendente.—2 Korintionan 3:5, 6; 1 Timoteo 3:1-7.

² Tur kristian dediká ta hasi e trabou di prediká e Evangelio, pero spesialmente superintendentenan, òf ansianonan, mester pone un bon ehèmpel den sirbishi. Dios i Kristu, i tambe otro Testigunan di Yehova, ta tuma nota di ansianonan “ku ta traha duru den predikamentu i siñamentu.” (1 Timoteo 5:17; Efesionan 5:23; Hebreonan 6:10-12) Den tur sirkunstansia, e siñansa di un ansiano mester promové e salú spiritual di su oyentenan, pasobra apòstel Pablo a bisa e superintendente Timoteo: “E tempu lo bin ku nan lo no soportá doktrina sano mas; ma al kontrario, pa satisfasé nan mes deseonan, nan lo akumulá pa nan mes siñadónan pa bisa nan loke nan orea ku ta kishikí kier tende, i lo bira nan orea for di e bèrdat, i lo bolbe na fábula. Ma abo, sea sobrio den tur kos, soportá aflikshon, hasi e trabou di un [predikadó di Evangelio], kumpli ku bo ministerio.”—2 Timoteo 4:3-5.

3. Kiko ansianonan mester hasi pa doktrinanan falsu no forma un peliger pa e spiritualidat di e kongregashon?

³ Pa un ansiano hasi sigur ku doktrinanan falsu no ta forma un peliger pa e spiritualidat di e kongregashon, e tin ku kumpli ku e konseho di Pablo: “Sea spièrtá den tur kos, . . . kumpli ku bo sirbishi henteramente.” (2 Timoteo 4:5, TN) Sí, un ansiano tin ku ‘kumpli ku su sirbishi henteramente.’ E tin ku hasié den un manera kompletu i kabal. Un ansiano ku ta efektuá su sirbishi plenamente ta duna e debido atenshon na tur su responsabilidatnan, sin neglishá nada i sin laga nada mitar hasí. Un hòmber asina ta fiel asta den kosnan chikitu.—Lukas 12:48; 16:10.

4. Kiko por yuda nos kumpli ku nos sirbishi henteramente?

⁴ Pa nos kumpli ku nos sirbishi henteramente no ta semper nos tin mester di mas tempu, loke sí nos mester hasi ta usa nos tempu bon. Un ritmo di aktividat balansá i regular por yuda tur kristian logra kosnan den sirbishi. Pa un ansiano por pasa mas tempu den sirbishi di vèlt, su asuntunan personal mester ta bon organisá pa asina e por balansá su programa i sa kiko e mester delegá na otro hende i kon pa hasi esei. (Hebreonan 13:17) Naturalmente, un ansiano respetá tambe ta hasi su parti, meskos ku Nehemias, kende a partisipá personalmente den rekonstrukshon di e murayanan di Yerusalèm. (Nehemias 5:16) I tur sirbidó di Yehova mester partisipá ku regularidat den e trabou di prediká e Reino.—1 Korintionan 9:16-18.

5. Kon nos mester mira sirbishi?

⁵ Komo proklamadónan di e Reino selestial establesí, nos tin un tarea hopi gososo. Nos sigur tin masha apresio pa e privilegio di por partisipá den predikashon di e bon nobo den henter mundu promé ku e fin yega. (Mateo 24:14) Ounke nos ta imperfekto, nos por kobra ánimo  for di e palabranan di Pablo: “Nos tin e tesoro aki [di sirbishi] den pòchi di klei, pa e ekselensia di e poder por ta di Dios i no di nos mes.” (2 Korintionan 4:7) Sí, nos por rindi sirbishi aseptabel, pero solamente ku e poder i sabiduria ku Dios ta duna.—1 Korintionan 1:26-31.

Reflehá Dios Su Gloria

6. Ki kontraste a desaroyá entre Israel natural i Israel spiritual?

⁶ Refiriendo na kristiannan ungí, Pablo a bisa ku Dios “a hasi nos kompetente pa ta sirbidónan di un aliansa nobo.” E apòstel ta hasi un kontraste entre e aliansa nobo ku Dios a sera ku Israel spiritual mediante Hesukristu, i e aliansa bieu di e Lei ku el a sera ku Israel natural mediante Moisés. Pablo ta agregá ku ora Moisés a baha for di Seru Sinaí ku e tablanan ku tabatin e Dies Mandamentunan, su kara tabata asina briante ku e israelitanan no por a keda wak e stret den su kara. Pero ku tempu, algu hopi mas serio a tuma lugá pasobra “nan fakultat mental a bira stòmpi” i un velo a bin riba nan kurason. Sin embargo, ora un hende bira bèk na Yehova den deboshon sinsero, e velo ei ta ser kitá. Refiriendo na e sirbishi ku Dios a duna esnan den e aliansa nobo, Pablo ta bisa: “Nos tur, . . . ku kara sin velo ta reflehá manera spil e gloria di Yehova.” (2 Korintionan 3:6-8, 14-18, NW; Eksodo 34:29-35) E “otro karnénan” di Hesus djawe tambe tin e privilegio di reflehá e gloria di Yehova.—Juan 10:16.

7. Kon hende por reflehá Dios su gloria?

⁷ Kon hende pekaminoso por reflehá Dios su gloria, siendo ku ningun hende por mira su kara i keda na bida? (Eksodo 33:20) Wèl, fuera di Yehova su gloria personal, e tin tambe su propósito glorioso di vindiká su soberania mediante su Reino. Bèrdatnan relashoná ku e Reino ei ta forma parti di “e kosnan magnífiko di Dios” ku a kuminsá wòrdu proklamá dor di e personanan ku a risibí spiritu santu na Pentekòste di aña 33. (Echonan 2:11, NW) Ku guia di e spiritu, nan por a kumpli henteramente ku e sirbishi konfiá na nan.—Echonan 1:8.

8. Relashoná ku e ministerio, kiko Pablo tabata determiná pa hasi?

⁸ Pablo tabata determiná pa no laga nada strob’é di kumpli ku su ministerio plenamente. El a skirbi: “Komo ku nos tin e ministerio aki, segun e miserikòrdia ku nos a risibí, nos no ta pèrdè ánimo, ma nos a renunsiá e kosnan skondí pa motibu di bèrgwensa i no ta kana ku astusia ni ta usa e palabra di Dios ku engaño, ma pa medio di e manifestashon di bèrdat nos ta rekomendá nos mes na e konsenshi di tur hende den bista di Dios.” (2 Korintionan 4:1, 2) Pa medio di loke Pablo ta yama “e ministerio aki,” òf sirbishi, e bèrdat ta ser manifestá i lus spiritual ta plama tur kaminda.

9, 10. Kon ta posibel pa nos reflehá e gloria di Yehova?

⁹ Pablo a skirbi tokante e Fuente di lus físiko i spiritual: “Dios, kende a bisa: ‘Lus lo resplandesé for di skuridat,’ ta esun ku a resplandesé den nos kurason pa duna e lus di e konosementu di e gloria di Dios den kara di Kristu.” (2 Korintionan 4:6; Génesis 1:2-5) Ya ku nos a risibí e privilegio inkalkulabel di ta sirbidónan di Dios, laga nos mantené nos mes limpi di manera ku meskos ku un spil nos por reflehá Yehova su gloria.

 ¹⁰ Personanan den skuridat spiritual no por mira e gloria di Yehova ni su reflekshon for di Hesukristu, e Moisés Mayor. Pero komo sirbidónan di Yehova, nos ta risibí e lus glorioso for di e Skritura i ta refleh’é na otro hende. Pa e hendenan ku awor ta den skuridat por skapa destrukshon, nan tin mester di lus for di Dios. P’esei ku gran goso i selo, nos ta obedesé e mandamentu divino pa laga nos lus bria meimei di e skuridat ku ta reina, i esei pa e gloria di Yehova.

Laga Bo Lus Bria na Studionan di Beibel na Kas

11. Kiko Hesus a bisa tokante laga nos lus bria, i kua ta un manera pa hasi esaki den nos sirbishi?

¹¹ Hesus a bisa su siguidónan: “Boso ta e lus di mundu. Un stat situá riba un seru no por keda skondí. Tampoko hende no ta sende lampi pon’é bou di un kaha di midi trigu, ma riba un kandelá, i e ta lusa pa tur ku ta den kas. Laga boso lus bria dilanti di hende di tal manera ku nan por mira boso bon obranan i glorifiká boso Tata ku ta den shelu.” (Mateo 5:14-16) Nos bon kondukta por pone otro hende duna gloria na Dios. (1 Pedro 2:12) I e vários rasgonan di nos trabou di prediká e Evangelio ta duna nos hopi oportunidat pa laga nos lus bria. Un di nos metanan prinsipal ta pa reflehá lus spiritual for di e Palabra di Dios dor di kondusí studionan di Beibel efektivo ku hende. Esaki ta un manera hopi importante pa kumpli ku nos sirbishi henteramente. Kua ta algun sugerensia ku por yuda nos kondusí studionan di Beibel ku ta motivá kurason di e hendenan ku ta en buska di e bèrdat?

12. Kon orashon ta ligá ku e trabou di kondusí studio di Beibel ku hende?

¹² Ora nos ta hasi orashon na Yehova relashoná ku esaki nos ta demostrá ku nos tin e deseo intenso di kondusí studionan di Beibel. Tambe esei ta mustra ku nos ta mira e importansia di yuda otro hende gana e konosementu di Dios. (Ezekiel 33:7-9) Yehova siguramente lo kontestá nos orashon i bendishoná nos esfuersonan sinsero den sirbishi. (1 Juan 5:14, 15) Pero nos no ta hasi orashon solamente pa haña un hende pa studia Beibel kuné. Unabes nos tin e studio, nos lo por kondusí kada seshon di e studio den un manera efektivo dor di hasi orashon i meditá riba e nesesidatnan spesífiko di e studiante di Beibel.—Romanonan 12:12.

13. Kiko lo por yuda nos kondusí studio di Beibel efektivo ku hende?

¹³ Pa nos por kondusí studionan di Beibel efektivo, nos tin ku prepará bon pa kada seshon di studio. Si nos ta sinti nos mes un poko inkompetente, lo ta bon pa nos opservá e manera ku e superintendente di Studio di Buki di Kongregashon ta kubri e lès di tur siman. De bes en kuando nos lo por kompañá publikadónan di Reino ku tabatin bon resultado den kondusí studio di Beibel ku hende. Klaru ku nos mester konsiderá spesialmente e aktitut di Hesukristu i e métodonan ku el a usa pa siña hende.

14. Kon nos por yega na kurason di un studiante di Beibel?

¹⁴ Hesus tabatin delisia den hasi e boluntat di su Tata selestial i den papia ku otro hende tokante Dios. (Salmo 40:8) Tambe Hesus tabata di genio suave i a logra yega na kurason di esnan ku a skuch’é. (Mateo 11:28-30) P’esei laga nos hasi esfuerso pa yega na kurason di nos studiantenan di Beibel. Pa nos logra esei, nos tin ku prepará pa kada studio teniendo na mente e sirkunstansianan en partikular di e studiante. Por ehèmpel, si e persona ta bin di un kultura ku no ta familiarisá ku Beibel, podisé nos tin ku konvens’é ku Beibel ta e bèrdat. Den tal kaso, ta bisto ku nos lo tin ku lesa hopi teksto bíbliko i splika nan.

Yuda Studiantenan Komprondé Ilustrashonnan

15, 16. (a) Kon nos lo por yuda un studiante ku no ta komprondé un ilustrashon ku Beibel ta usa? (b) Kiko nos por hasi si un di nos publikashonnan ta usa un ilustrashon ku ta difísil pa un sierto studiante di Beibel komprondé?

¹⁵ Un studiante di Beibel kisas no ta  familiarisá ku un sierto ilustrashon ku ta ser usá den e Skritura. Por ehèmpel, kisas e no ta komprondé kiko Hesus tabata ke men ora el a papia tokante pone un lampi riba un kandelá. (Marko 4:21, 22) Hesus tabata referí na un lampi di zeta di antiguo ku ta usa mecha. Hende tabata pone un lampi asina riba un stènt spesial i di e manera ei el a lusa henter un área di un kas. Podisé pa bo por klarifiká e ilustrashon di Hesus lo bo tin ku hasi investigashon riba e tema “Lampi” i “Kandelá” (na spañó, “lámpara” i “candelabro”) den un publikashon manera Perspikasia pa Komprondé e Skritura. * Anto lo bo sinti un gran satisfakshon si bo por bai e studio di Beibel ku un splikashon ku e studiante ta komprondé i apresiá.

¹⁶ Un buki pa yuda hende studia Beibel kisas ta usa un ilustrashon ku ta difísil pa un sierto studiante komprondé. Tuma bo tempu pa splik’é, òf usa un otro ilustrashon ku ta presentá e mesun punto. Podisé un publikashon ta enfatisá e punto ku den un matrimonio ta importante pa bo tin un bon partner i pa boso koperá ku otro. Pa ilustrá esaki, kisas e publikashon ta referí na un hòmber ku ta zuai den laira na un trapesio den sirko, i ku ora e laga lòs, e ta dependé di un otro akrobat pa gar’é. Un otro opshon ta di kompará e nesesidat di un bon partner i e koperashon ku mester tin entre nan, ku e manera ku trahadónan ta koperá pa pasa kaha di un man pa otro ora nan ta deskargá un barku.

17. Kiko nos por siña for di Hesus tokante ilustrashon?

¹⁷ Pa bo por usa un otro ilustrashon bo mester a prepará di antemano. Sin embargo, esei ta un manera pa demostrá nos interes personal den un studiante di Beibel. Hesus a usa ilustrashonnan simpel pa klarifiká tópikonan difísil. Den su Sermon Riba Seru nos ta haña algun ehèmpel di esaki, i Beibel ta mustra ku su siñansa tabatin un bon efekto riba su oyentenan. (Mateo 5:1–7:29) Hesus a splika hende ku pasenshi pasobra e tabata profundamente interesá den nan.—Mateo 16:5-12.

18. Kiko ta rekomendabel pa hasi ora ku den nos publikashonnan tin tekstonan bíbliko ku ta ser menshoná pero no sitá?

¹⁸ Nos interes den otro hende lo motivá nos pa “rasoná ku nan for di e Skrituranan.” (Echonan 17:2, 3) Pa esaki ta posibel nos mester hasi uso sabí di e publikashonnan ku ‘e mayordomo fiel’ ta perkurá, i studia nan ku sinseridat i ku orashon. (Lukas 12:42-44) Por ehèmpel, e buki Conocimentu cu Ta Hiba na Bida Eterno ta sita hopi teksto bíbliko. * Pero debí na e espasio limitá, algun di e tekstonan simplemente ta ser menshoná pero no sitá. Durante un studio di Beibel, ta importante pa nos lesa i splika por lo ménos algun di e tekstonan menshoná aki ku no ta sitá. Al fin i al kabo, nos siñansa ta basá riba e Palabra di Dios, i e ta poderoso. (Hebreo 4:12) Durante kada studio, referí ku frekuensia na e Beibel i usa e tekstonan ku tin den e paragrafnan. Yuda e studiante mira kiko Beibel ta bisa di un sierto tópiko òf proseder. Hasi esfuerso pa mustr’é kon lo e benefisiá si e obedesé Dios.—Isaias 48:17, 18.

 Hasi Preguntanan Ku Ta Stimulá Pensamentu

19, 20. (a) Dikon nos mester usa preguntanan di punto di bista ora nos ta kondusí un studio di Beibel ku un hende? (b) Kiko nos por hasi si nos mester konsiderá un sierto tópiko mas a fondo?

¹⁹ Hesus su uso ábil di pregunta a yuda hende rasoná. (Mateo 17:24-27) Si nos ta hasi preguntanan di punto di bista ku no ta brongosá un studiante di Beibel, su kontesta lo por revelá kiko e ta pensa tokante un sierto tópiko. Kisas nos ta deskubrí ku ainda e tin puntonan di bista ku no ta kuadra ku Beibel. Por ehèmpel, podisé e ta kere den Trinidat. E buki Conocimentu, den kapítulo 3, ta indiká ku e palabra “Trinidat” no ta aparesé den Beibel. E buki ta sita i menshoná tekstonan bíbliko ku ta mustra ku Yehova ta un persona separá di Hesus i ku spiritu santu ta Dios su forsa aktivo, i no un persona. Kisas ta sufisiente si nos lesa i trata e tekstonan di Beibel aki. Pero kiko si mas splikashon ta nesesario? Podisé despues di e siguiente seshon di studio, nos lo por dediká poko tempu na un konsiderashon probechoso di e tópiko aki manera e ta ser tratá den un otro publikashon di Testigunan di Yehova, manera por ehèmpel den e foyeto Bo Mester Kere den Trinidad? Despues di esei nos por reanudá e studio usando e buki Conocimentu.

²⁰ Pero suponé ku e kontesta di e studiante riba un pregunta di punto di bista ta sorprendé nos òf asta desepshoná nos. Si ta trata di humamentu, òf kualke otro tema delikado, nos lo por sugerí pa sigui ku e studio i papia di e asuntu un otro dia. Pero awor ku nos sa ku e studiante ta huma ainda, nos tin chèns di buska informashon publiká ku lo por yud’é hasi progreso spiritual. Segun ku nos ta hasi esfuerso pa yega na kurason di e studiante, nos por pidi Yehova den orashon pa yud’é krese spiritualmente.

21. Kiko lo por sosodé si nos adaptá nos métodonan di siña hende na e nesesidatnan spesífiko di un studiante di Beibel?

²¹ Ku bon preparashon i ku e yudansa di Yehova, sin duda nos lo por adaptá nos métodonan di siña hende pa kuadra ku e nesesidatnan spesífiko di e studiante. Segun ku tempu ta pasa, nos lo por yud’é desaroyá un amor profundo pa Dios. Tambe nos lo por logra kultivá rèspèt i apresio pa Yehova su organisashon. I nos lo sinti un gran satisfakshon ora ku studiantenan di Beibel rekonosé ku ‘sigur-sigur Dios ta meimei di nos.’ (1 Korintionan 14:24, 25) P’esei laga nos tur kondusí studionan di Beibel efektivo i hasi tur loke nos por pa yuda otro hende bira disipel di Hesus.

Un Tesoro Ku Nos Mester Apresiá

22, 23. Kiko nos mester pa nos por kumpli ku nos sirbishi henteramente?

²² Pa kumpli ku nos sirbishi henteramente, nos tin ku dependé riba e fortalesa ku Dios ta duna. Papiando di e ministerio òf sirbishi, Pablo a skirbi su rumannan kristian ungí: “Nos tin e tesoro aki den pòchi di klei, pa e ekselensia di e poder por ta di Dios i no di nos mes.”—2 Korintionan 4:7.

²³ Sea ku nos ta un ungí òf di e “otro karnénan,” nos ta manera pòchi di klei delikado. (Juan 10:16) Sin embargo, Yehova por duna nos e fortalesa nesesario pa kumpli ku nos asignashonnan sin importá e preshonnan ku ta bin riba nos. (Juan 16:13; Filipensenan 4:13, NW) P’esei laga nos konfia totalmente den Yehova, apresiá nos tesoro di sirbishi i kumpli ku nos ministerio henteramente.

[Nota]

Kon Lo Bo Kontestá?

• Kiko ansianonan por hasi pa kumpli ku nan sirbishi henteramente?

• Kon nos por hasi nos studionan di Beibel ku hende mas efektivo?

• Kiko lo bo hasi si un studiante di Beibel no a komprondé un ilustrashon òf tin mester di mas informashon riba un sierto tópiko?

[Preguntanan di Estudio]

[Plachi na página 16]

Ansianonan kristian ta siña hende den e kongregashon i ta yuda entrená nan rumannan den sirbishi

[Plachi na página 18]

Un manera pa laga nos lus bria ta dor di kondusí studionan di Beibel efektivo ku hende