Un Selebrashon Ku Tin di Haber ku Bo
Un Selebrashon Ku Tin di Haber ku Bo
TEMPU ku Hesukristu tabata riba tera, el a instituí un selebrashon na onor di Dios. Tabata e úniko seremonia religioso ku el a manda direktamente pa su siguidónan selebrá. Esaki ta e Sena di Señor, konosí tambe komo e Último Sena.
Imaginá bo ku bo tabata un testigu di e susesonan ku a hiba n’e okashon ei. Ningun hende no a mira bo, pero abo sí a mira Hesus i su apòstelnan bini huntu den un sala na segundo piso den Yerusalèm pa selebrá e Pasku Hudiu. Nan a kaba di kome e sena akustumbrá di Pasku ku a konsistí di lamchi di roster, yerba marga, pan sin zürdeg i biña kòrá. Hesus a manda e apòstel desleal Hudas Iskariote bai, i un ratu despues e lo a traishoná su Señor. (Mateo 26:17-25; Juan 13:21, 26-30) Hesus tabata su so ku su 11 fiel apòstelnan. Mateo tabata un di nan.
Segun e relato di e testigu Mateo, Hesus a instituí e Sena di Señor den e siguiente forma: “Hesus a kohe pan [sin zürdeg], i despues di a bendishon’é, el a kibr’é i a duna su disipelnan i a bisa: ‘Tuma, kome; esaki ta mi kurpa.’ I despues ku el a kohe un kopa [di biña] i a duna gradisimentu, el a duna nan esei, bisando: ‘Boso tur bebe for di dje; pasobra esaki ta mi sanger di e aliansa, ku ta wòrdu dramá pa hopi pa pordon di piká.’”—Mateo 26:26-28.
Pakiko Hesus a instituí e Sena di Señor? Ora el a hasi esei, pakiko el a usa pan sin zürdeg i biña kòrá? Ta tur siguidó di Kristu mester a tuma for di e emblemanan aki, esta, e pan i e biña? Ku ki frekuensia nan mester a selebrá e sena aki? I e ta nifiká algu pa bo realmente?