Informe di Proklamadónan di Reino

Hañando Hende na Nan Trabou

KIKO e apòstelnan Mateo, Pedro, Andres, Santiago i Juan tabatin en komun? Nan tur tabata na nan trabou ora Hesus a yama nan. Pedro, Andres, Santiago i Juan tabata sea piskando òf preparando pa bai piska ora Hesus a invitá nan, bisando: “Sigui mi!” Mateo tabata den ofisina di belasting ora Hesus a invit’é pa bira su disipel.—Mateo 4:18-21; 9:9.

Dunamentu di testimonio na hende na nan trabou por duna bon resultado. Testigunan di Yehova na Hapon a ripará esaki i p’esei resientemente nan a hasi un esfuerso spesial pa partisipá den e aspekto aki di sirbishi. Kiko tabata e resultadonan? Den un par di luna, nan a hasi míles di rebishita, i a kuminsá rònt di 250 studio di Beibel. Lesa e siguiente eksperensianan.

Un predikadó di tempu kompletu na Tokio a topa manager di un restorant ku a yega di papia ku un Testigu mas o ménos 30 aña pasá na skol. Ounke e manager no a komprondé muchu bon loke nan a bis’é e tempu ei, el a interesá den Beibel. Awor ku el a bolbe haña interes, mesora el a aseptá un studio di Beibel den e buki Conocimentu cu Ta Hiba na Bida Eterno. * Ademas, el a kuminsá un programa personal di lesa Beibel tur anochi promé ku e bai drumi.

Un predikadó ku ta sirbi komo pionero spesial a bishitá un ofisina i a pidi pa e manager. Ounke e manager no tabata disponibel, e señora hóben ku a kontestá e telefon di e manager a puntr’é: “Bo kier papia ku mi?” Despues di un kòmbersashon kòrtiku na telefon, e señora a sali bini pafó i a bisa ku e ta interesá pa lesa Beibel. E pionero spesial a hasi areglo pa bolbe bèk ku un Beibel i a kuminsá un studio di Beibel ku e señora. Nan tabata tene e studio den un parke den bisindario, mainta trempan promé ku e señora bai trabou.

Na un otro ofisina, un hòmber a mira kon un kolega di trabou a tuma e revistanan Toren di Vigilansia i Spièrta!, i tira nan afó asina ku e Testigu a bai. Ora e hòmber a yega kas, el a konta su esposa, kende tambe ta un Testigu, di e insidente i a bisa ku si ta serka dje e Testigu a bini, por lo ménos lo el a skucha un ratu. Yu muhé di e hòmber ku a tende loke su tata a bisa, a bai konta un Testigu ku ta traha teritorio di negoshi. Mesora e Testigu a bishitá e esposo na su ofisina i a kuminsá un studio di Beibel kuné. No a tarda muchu ku e hòmber a kuminsá asistí n’e reunionnan di djadumingu regularmente.

Dunamentu di testimonio kaminda e hendenan ta traha a trese mas benefisio. Hopi publikadó na Hapon a bira hopi kapas den hasimentu di rebishita den sentronan komersial, fábrikanan i ofisinanan. Ademas, pa via di e medio aki di duna testimonio, a haña kontakto ku hopi persona ku den transkurso di añanan a bira inaktivo, i por a kuminsá studia ku nan. E resultadonan tabata eksepshonal. Resientemente, un kongregashon den sentro di Tokio a informá 108 studio di Beibel, mas ku dòbel e kantidat ku nan a informá aña pasá.

[Nota]