Liberia​—⁠Prosperidat Spiritual Apesar di Guera

PA MAS ku un dékada, guera sivil ta asotá Liberia. Meimei di aña 2003, rebeldenan a bringa te drenta Monrovia, e siudat kapital. Hopi Testigu di Yehova a haña nan obligá ta hui for di nan kas, tin biaha na vários okashon. Bes tras bes hende tabata plùnder nan pertinensianan.

Lamentablemente, míles di hende a ser matá durante di e bringamentu den e kapital. Entre nan tabatin dos Testigu di Yehova, un ruman hòmber i un ruman muhé. Kon e otro rumannan a trata ku e situashon difísil aki, i kiko a ser hasí pa yuda nan?

Yudansa pa Esnan den Nesesidat

Durante di henter e periodo di krísis, e sukursal di Testigunan di Yehova na Liberia a organisá yudansa pa esnan den nesesidat. Nan a perkurá kuminda, artíkulonan nesesario di kas i produktonan médiko. Durante e tempu ku e rebeldenan tabatin e haf den nan poder, kuminda a bira skars. Komo ku sukursal a premirá e desaroyo aki, nan tabatin un stòk di artíkulonan básiko pa e dos mil Testigunan ku a hui bai keda na e Salònnan di Reino den tur skina di e stat. E rumannan a parti e kuminda tiki-tiki di manera ku el a dura te ora ku haf a bolbe habri. E sukursalnan di Bèlgika i Sierra Leone a manda produktonan médiko ku avion, i e sukursalnan di Gran Bretaña i Fransia a manda kargamentu di paña.

Apesar di e situashon desesperá, nos rumannan a keda positivo i alegre. E komentario di un di nan ku a hañ’é ta hui tres biaha for di su kas, ta un komentario típiko di hopi ruman. El a bisa: “Esakinan ta e kondishonnan ku nos ta prediká di dje; nos ta bibando den e último dianan.”

Reakshon Riba e Bon Nobo

Apesar ku disturbionan ta tuma lugá den henter e nashon, e Testigunan ta sigui haña resultadonan ekselente den sirbishi di vèlt. Tabatin un máksimo di tur tempu di 3.879 publikadó di Reino na yanüari 2003, i na febrüari nan a kondusí 15.227 studio di Beibel.

Hende ta reakshoná lihé riba e bon nobo. Un ehèmpel di esaki ta na un pueblito den e parti zùitost di e pais. Un kongregashon a plania pa tene e Memorial òf Konmemorashon di e morto di Kristu na Bewahn, un pueblito grandi ku ta keda na un distansia di sinku ora kana for di kaminda nan normalmente ta reuní. Promé ku e rumannan a bai invitá e hendenan di e pueblito pa e Konmemorashon, nan a duna e alkalde di Bewahn un invitashon. Ora el a hañ’é, el a kue su Beibel, bai serka e habitantenan di e pueblito i lesa un teksto ku tabatin riba e invitashon, animando nan pa asistí na e Konmemorashon. Pues ora e publikadónan a yega, nan a haña ku el a hasi nan trabou kaba! E alkalde, huntu ku su yunan i dos kasá, a bin Memorial. Na tur, 27 hende a asistí. Entre  tantu, e alkalde a bandoná Iglesia Metodista, kuminsá studia ku e Testigunan i a ofresé un tereno pa traha un Salòn di Reino.

Un Kambio di Aktitut

E komportashon di nos rumannan tambe a resultá masha efektivo den kambia algun opositor su punto di bista pa ku e bèrdat. Tuma e kaso di un hòmber ku yama Opoku. Un predikadó pionero spesial a top’é den sirbishi di vèlt i a ofres’é un revista Toren di Vigilansia. Opoku tabata interesá den un artíkulo den e revista pero e no tabatin sèn. E pionero a splik’é ku nos no ta kobra pa e revista i a laga e revista kuné i a hasi areglo pa bishit’é atrobe. Ora el a bolbe bishit’é, Opoku a puntra e pionero: “Bo no konosé mi? Mayoria di boso hendenan den e stat di Harper konosé mi. Ántes mi tabata kita tur boso yunan for di skol!” Anto el a splika ku e tabata kabes di un skol sekundario den e stat i ku el a persiguí e yunan di Testigunan di Yehova pasobra nan no ta saludá bandera.

Sin embargo, tres ehèmpel di amor kristian ku Testigunan di Yehova a desplegá a pone Opoku reeksaminá su aktitut. Na promé lugá, el a mira kon e Testigunan a kuida un ruman spiritual ku tabata hopi malu. Asta nan a hasi areglo pa e haña tratamentu den un pais bisiña. Opoku a kere ku e ruman malu tabata un “big shot” den e Testigunan pero despues a haña sa ku e tabata un Testigu komun i koriente. Na di dos lugá, durante dékada di 1990, Opoku tabata un refugiado na Côte d’Ivoire. Un dia ku e tabatin set, el a bai kumpra awa serka un yònkuman. Opoku tabatin solamente sèn pegá, i e yònkuman no tabatin sèn largá, p’esei el a duna Opoku e awa sin kobr’é. Segun ku e yònkuman ta pasa e awa p’e, e yònkuman a puntr’é: “Bo ta kere ku lo yega un dia ku hende manera ami ku bo lo duna otro kos sin kobra otro?” Opoku a rei ku e tabata un Testigu di Yehova, i e yònkuman a konfirmá ku ta asina. E generosidat i bondat di e ruman hòmber aki a impreshon’é. Por último, e echo ku e pionero spesial tabata dispuesto pa lag’é haña un revista pòrnada a konvensé Opoku ku su punto di bista di e Testigunan tabata robes i ku e mester kambia su aktitut. El a hasi progreso spiritual i awor e ta un publikadó no-batisá.

Ounke e rumannan na Liberia ta sigui konfrontá kondishonnan sumamente difísil, nan ta depositá nan konfiansa den Dios i fielmente ta proklamá e bon notisia ku lo bin tempunan mas mihó bou di e gobernashon hustu di e Reino di Dios. Yehova nunka lo lubidá nan trabou duru i e amor ku nan ta mustra pa su nòmber.—Hebreonan 11:6.

[Mapanan na página 30]

(Pa e teksto den su formato kompleto, wak e publikashon)

MONROVIA

[Plachinan na página 31]

Durante tempu di krísis, e pueblo di Yehova ta duna yudansa spiritual i material na esnan den nesesidat