Pregunta di Lektor

Kon bin 1 Korintionan 10:8 ta bisa ku 23.000 israelita a pèrdè nan bida riba un solo dia pa motibu di a kometé fornikashon, miéntras ku Numbernan 25:9 ta papia di 24.000?

Tin vários faktor ku por splika e diferensia entre e sifranan di e dos versíkulonan aki. Esun di mas simpel lo por ta ku e kantidat real ta entre 23.000 pa 24.000, i dor di esei por ‘rond e af’ den ámbos direkshon.

Pensa riba e otro posibilidat aki. Apòstel Pablo a sita e relato di e israelitanan na Sitim komo un spièrtamentu p’e kristiannan den Korinto di antigwedat, un stat notorio pa su bida inmoral. El a skirbi: “No laga nos kometé inmoralidat seksual, manera algun di nan a hasi, i bintitres mil a kai riba un solo dia.” Papiando únikamente di esnan ku Yehova a mata pa motibu ku nan a kometé inmoralidat, Pablo a menshoná un kantidat di 23.000.—1 Korintionan 10:8.

Pero Numbernan kapítulo 25 ta bisa nos ku “Israel a uni [su] mes ku Baal di Peor, i SEÑOR tabata rabiá ku Israel.” E ora ei, Yehova a manda Moisés ehekutá “tur e kabesantenan di e pueblo.” Moisés, na su turno a manda e huesnan kumpli ku e òrdu ei. Finalmente, ora Finees a aktua mesora matando e israelita ku a trese un muhé madianita den e kampamentu, ‘e plaga a para.’ E relato ta kaba ku e deklarashon: “Esnan ku a muri di e plaga tabata binti kuater mil.”—Numbernan 25:1-9.

Ta opvio anto ku e kantidat menshoná den Numbernan a inkluí “e kabesantenan di e pueblo” ku e huesnan a ehekutá, i esnan matá direktamente dor di Yehova. Por ta masha bon ku tabatin mil di e kabesantenan ei ku a muri na man di e huesnan, poniendo e total yega na 24.000. Sea e kabesantenan aki a kometé fornikashon, a partisipá den fiestanan òf a konsentí ku esnan ku tabata hasi e kosnan aki, nan tabata kulpabel di a “uni nan mes ku Baal di Peor.”

Enkuanto e palabra “uni,” un buki ku ta duna komentario riba Beibel ta splika ku e por kier men “pega bo mes na un persona.” E israelitanan tabata un pueblo dediká na Yehova, pero ora nan a “uni nan mes ku Baal di Peor,” nan a kibra nan relashon di dedikashon na Dios. Rònt di 700 aña despues, pa medio di profeta Oseas, Yehova a bisa di israelitanan: “Nan a bin na Baal-peor i a dediká nan mes na e ídolo bergonsoso ei, i nan a bira mes abominabel ku loke nan tabata stima.” (Oseas 9:10) Tur esnan ku a hasi esei a meresé un huisio desfaborabel di Dios. P’esei, Moisés a rekordá e yunan di Israel: “Boso wowonan a mira loke SEÑOR a hasi den e kaso di Baal-peor, pasobra tur hòmber ku tabata sigui Baal-peor, SEÑOR bo Dios a destruí nan for di meimei di boso.”—Deuteronomio 4:3.