Resistí e Spiritu di un Mundu Ku Ta Sigui Kambia

“Nos a risibí, no e spiritu di mundu, sino e spiritu ku ta bin di Dios.”—1 KORINTIONAN 2:12.

1. Den ki maneranan Eva a ser gañá?

“E KOLEBRA a gaña mi.” (Génesis 3:13) Ku e poko palabranan ei e promé muhé, Eva, a purba splika dikon el a rebeldiá kontra Yehova Dios. Loke el a bisa tabata bèrdat, ounke esei no a hustifiká su malecho. Apòstel Pablo despues a skirbi bou di inspirashon: “[Eva] a ser kompletamente gañá.” (1 Timoteo 2:14, NW) Eva a kere e mentira ku si e kometé un akto di desobedensia, esta, kome di e fruta prohibí, esei lo a benefisi’é i lag’é bira manera Dios. Tambe el a ser gañá relashoná ku e identidat di esun ku a gañ’é. Eva no tabata sa ku en realidat ta Satanas e Diabel a papia mediante e kolebra.—Génesis 3:1-6.

2. (a) Kon Satanas ta gaña hende awe? (b) Kiko ta “e spiritu di mundu,” i ki preguntanan nos lo bai konsiderá?

² For di e tempu di Adam ku Eva en adelante, Satanas a sigui gaña hende. De echo, e ta “gaña henter mundu.” (Revelashon 12:9) Su táktikanan no a kambia. Ounke e no ta usa un kolebra literal mas, e ta sigui skonde su identidat. Mediante e industria di entretenimentu, medionan di komunikashon i otro maneranan, Satanas ta gaña hende i laga nan kere ku nan no tin mester di Dios su guia amoroso ni tampoko ta benefisiá di dje. Diabel su kampaña di engaño a produsí den hende na tur parti un aktitut òf spiritu di rebelion kontra Beibel su leinan i prinsipionan. Beibel ta yama esaki “e spiritu di mundu.” (1 Korintionan 2:12) E spiritu aki tin un influensia profundo riba kreensia, aktitut i komportashon di esnan ku no konosé Dios. Kon hende ta manifestá e spiritu ei, i kon nos por resistí su influensia perhudisial? Laga nos mira.

Normanan Moral Ta Bai Atras

3. Dikon “e spiritu di mundu” ta manifestá su mes mas i mas den tempu moderno?

³ Den tempu moderno, “e spiritu di mundu” a manifestá su mes mas i mas. (2 Timoteo 3:1-5) Probablemente bo a ripará ku normanan moral ta bayendo atras. E Skritura ta  splika dikon ta asina. Despues ku e Reino di Dios a keda establesí na aña 1914, un guera a kuminsá den shelu. Satanas ku su angelnan demoño a ser derotá i tirá abou den bisindario di tera. Furioso pa esei, Satanas a intensifiká su kampaña mundial di gaña hende. (Revelashon 12:1-9, 12, 17) Tur manera ku e por e ta purba “gaña, si ta posibel, asta e eligínan,” esta esnan skohí. (Mateo 24:24) Komo pueblo di Dios, nos ta su blanko prinsipal. E ta hasi esfuerso pa destruí nos spiritualidat ya asina nos lo pèrdè Yehova su aprobashon i e prospekto di bida eterno.

4. Kon e sirbidónan di Yehova ta mira Beibel, i kon mundu ta mir’é?

⁴ Satanas ta purba desakreditá Beibel, e buki presioso ku ta siña nos tokante nos Kreadó amoroso. Yehova su sirbidónan ta stima Beibel i ta apresi’é masha hopi. Nos sa ku e ta e Palabra inspirá di Dios, no e palabra di hende. (1 Tesalonisensenan 2:13; 2 Timoteo 3:16) Sin embargo, e mundu di Satanas ke pa nos pensa nèt lo kontrario. Por ehèmpel, e introdukshon di un buki ku ta ataká Beibel ta bisa: “No tin nada ‘santu’ na Beibel, tampoko e no ta ‘e palabra di Dios.’ No ta santunan inspirá pa Dios a skirbié, sino mas bien saserdotenan en buska di poder.” Hende ku wòrdu konvensé pa kere e deklarashonnan ei fásilmente por bira víktima di e punto di bista eróneo ku nan ta liber pa adorá Dios kon ku nan ke; òf pa no ador’é mes.—Proverbionan 14:12.

5. (a) Kiko un outor a bisa tokante religionnan konektá ku Beibel? (b) Kon algun idea komun di mundu ta kompará ku loke Beibel ta bisa? (Inkluí e kuadro na e siguiente página.)

⁵ Den algun pais, atakenan direkto i indirekto kontra Beibel, huntu ku e hipokresia religioso di hende ku ta pretendé di ta apoyá Beibel, a pone ku mas i mas hende ta kondená religion, inkluso religion ku nan ta konektá ku Beibel. Den medionan di komunikashon i sírkulonan akadémiko, religion ta bou di atake. Un outor a remarká relashoná ku e situashon den hopi pais: “Públiko en general tin un punto di bista negativo pa ku hudaismo i kristianismo. E opinionnan di mas faborabel ta konsiderá nan komo ouderwets pero agradabel; e opinionnan di mas negativo, [ta konsiderá nan ideanan] komo antikuá ku ta stroba madures intelektual i ta opstakulisá progreso sientífiko. Den añanan resien e sintimentu di despresio aki a eskalá den hasimentu di bofon i hostilidat abierto.” E hostilidat aki hopi bes ta originá serka hende ku ta nenga ku Dios ta eksistí i ku a bira bano òf “inútil den nan spekulashonnan.”—Romanonan 1:20-22.

6. Kiko mundu ta pensa di práktikanan seksual ku Dios ta kondená?

⁶ P’esei no ta un sorpresa ku hende ta dual bai mas i mas leu for di Dios su normanan di komportashon. Por ehèmpel, Beibel ta deskribí relashonnan homoseksual komo “aktonan indesente.” (Romanonan 1:26, 27) Tambe Beibel ta deklará ku esnan ku ta praktiká fornikashon i adulterio lo no heredá e Reino di Dios. (1 Korintionan 6:9) Sin embargo, den hopi  pais nan ta konsiderá e práktikanan seksual ei komo aseptabel i den buki, revista, kantika, pelíkula i programa di televishon nan ta asta presentá nan komo komportashon fasinante. I mundu ta konsiderá hende ku bisa ku nan ta desaprobá e práktikanan ei komo hende mente chikí, kla pa husga, i ku no a keda al dia ku pensamentu moderno mas iluminá. En bes di mira e normanan di Dios komo un manifestashon di su interes amoroso, mundu ta mira nan komo kos ku ta stroba hende su libertat i satisfakshon personal.—Proverbionan 17:15; Hudas 4.

7. Ki preguntanan nos mester hasi nos mes?

⁷ Meimei di un mundu ku ta tuma un posishon kada bes mas fuerte kontra Dios, lo ta sabí pa nos wak nos propio aktitut i normanan. Periódikamente, huntu ku orashon nos tin ku analisá nos mes onestamente pa hasi sigur ku nos no ta bezig ta drif bai pokopoko for di Yehova su manera di pensa i su normanan. Por ehèmpel, nos lo por puntra nos mes: ‘Mi ta entretené mi mes ku tópikonan ku algun aña pasá lo mi a keda leu for di dje? Mi a bira mas tolerante pa ku práktikanan ku Dios ta kondená? Mi ta inkliná na tuma asuntunan spiritual ménos na serio kompará ku ántes? E manera ku mi ta hiba mi bida ta mustra ku mi ta pone interesnan di Reino na promé lugá den mi bida?’ (Mateo 6:33) Meditando riba e preguntanan ei lo yuda nos resistí e spiritu di mundu.

“Nunka Drif Bai”

8. Kon un persona lo por drif bai for di Yehova?

⁸ Apòstel Pablo a skirbi na su kompañeronan kristian: “Ta nesesario pa nos presta mas ku e atenshon akustumbrá n’e kosnan ku nos a tende, pa nos nunka drif bai.” (Hebreonan 2:1, NW) Un barku ku ta drif bai for di su rumbo no ta yega su destino. Si un kapitan no presta atenshon na bientu i koriente di awa, su barku fásilmente lo por drif pasa un haf forbei ku ta safe i bai pega den baranka. Asina tambe, si nos no presta atenshon na e bèrdatnan presioso di e Palabra di Dios, fásilmente nos lo por drif bai for di Yehova i noufragá spiritualmente. No nesesariamente nos tin ku rechasá e bèrdat totalmente pa esei pasa ku nos. De echo, hopi persona no ta rechasá Yehova diripiente i deliberadamente. Mayoria biaha, nan ta bira enbolbí pokopoko den algu ku ta stroba nan di presta atenshon na e Palabra di Dios. Kasi sin ku nan ripará, nan ta drif bai den piká. Meskos ku un kapitan ku ta na soño, e personanan ei no ta lanta for di soño si no te ora ku ta muchu lat.

9. Kon Yehova a bendishoná Salomon?

⁹ Konsiderá e bida di Salomon. Yehova a konfi’é ku e reinado di Israel. Dios a permití Salomon traha un tèmpel i a dirigié pa skirbi partinan di Beibel. Na dos okashon Yehova a papia kuné, i Yehova a dun’é rikesa, fama i un reinado pasífiko. Mas ku tur kos, Yehova a bendishoná Salomon ku gran sabiduria. Beibel ta deklará: “Dios a duna Salomon sabiduria i disernimentu grandi i grandesa di kurason, manera e santu ku tin kantu di laman.  I e sabiduria di Salomon tabata surpasá e sabiduria di tur e hòmbernan di oriente i tur e sabiduria di Egipto.” (1 Reinan 4:21, 29, 30; 11:9) Un hende lo por a pensa ku si tin un hende ku probablemente lo keda fiel na Dios, esei lo ta Salomon. Sin embargo, Salomon a drif bai den apostasia. Kon esei a sosodé?

10. Ki instrukshon Salomon a keda sin obedesé, i ku ki resultado?

¹⁰ Salomon tabata konosé e Lei di Dios i a komprond’é kabalmente. Kasi sigur e tabata interesá spesialmente den e instrukshonnan stipulá den e Lei pa esnan ku bira rei den Israel. Entre e instrukshonnan ei tabatin unu ku ta bisa: “[E rei] no mester tuma hopi esposa pa su mes, pa su kurason no desviá.” (Deuteronomio 17:14, 17) Apesar di e instrukshon masha kla ei, Salomon a tuma sheteshen esposa i treshen konkubina. Hopi di e muhénan aki tabata adorá diosnan stranhero. Nos no sa dikon Salomon a tuma asina tantu esposa, ni nos no sa kon el a hustifiká esei. Loke sí nos sa ta ku el a desobedesé un instrukshon masha kla di Dios. E resultado tabata presis manera Yehova a spièrta ku lo pasa. Nos ta lesa: “[Salomon] su esposanan a hasi su kurason desviá pa sigui tras di otro diosnan.” (1 Reinan 11:3, 4) Pokopoko pero sigur, su sabiduria divino a disparsé. Salomon a drif bai. Ku tempu, Salomon su deseo pa agradá su esposanan pagano a tuma e lugá di su deseo di obedesé i agradá Dios. Esei tabata sumamente lamentabel, pasobra mas promé ta Salomon mes a skirbi e palabranan: “Sea sabí, mi yu, i hasi mi kurason kontentu, pa mi por kontestá esun ku reprochá mi”!—Proverbionan 27:11.

E Spiritu di Mundu Ta Poderoso

11. Kon loke nos ta hinka den nos mente ta afektá nos manera di pensa?

¹¹ E ehèmpel di Salomon ta siña nos ku ta peligroso pa rasoná ku pasobra nos konosé e bèrdat, influensianan mundano lo no afektá nos manera di pensa. Meskos ku kuminda físiko tin efekto riba nos kurpa, kuminda mental tin efekto riba nos mente. Loke nos ta alimentá nos mente kuné ta forma nos pensamentu i aktitut. Kompanianan ta rekonosé ku esaki ta bèrdat, i ta p’esei nan ta gasta míles di miónes di florin pa aña na propaganda pa nan produkto. Propagandanan ku tin éksito ta usa palabra- i plachinan tentador ku ta stimulá e anhelo i deseo di e konsumidó. Hasidónan di propaganda sa tambe ku si hende mira un propaganda un òf dos biaha, esei por lo general no ta pone nan kore bai kumpra e produkto. Sin embargo, si den transkurso di tempu nan wak e propaganda bes tras bes, esei hopi biaha ta pone konsumidónan mira un produkto ku aprobashon. Propaganda ta duna resultado; si no tabata asina ningun hende lo ta invertí den dje. E ta ehersé un influensia profundo riba e aktitut i manera di pensa di e públiko.

12. (a) Kon Satanas ta influensiá hende su manera di pensa? (b) Kiko ta mustra ku kristiannan por ser influensiá?

¹² Meskos ku un hasidó di propaganda, Satanas ta promové su ideanan dor di presentá nan den maneranan atraktivo, sabiendo ku despues  di tempu e por konvensé hende pa pensa meskos kuné. Via entretenimentu i otro medionan, Satanas ta gaña hende i laga nan kere ku bon ta malu i malu ta bon. (Isaias 5:20) Asta algun kristian berdadero a bira víktima di Satanas su kampaña di plama informashon falsu. Beibel ta spièrta: “E spiritu ta bisa klaramente ku den e último tempunan algun lo kai for di fe, dor di paga atenshon na spiritunan engañoso i doktrinanan di demoñonan, pa medio di e hipokresia di gañadónan, kende nan mes konsenshi a wòrdu kimá komo si fuera ta ku heru kayente esaki a wòrdu hasí.”—1 Timoteo 4:1, 2; Jeremias 6:15.

13. Kiko ta kai bou di mal kompania, i kon e hendenan ku nos ta anda kuné ta influensiá nos?

¹³ E spiritu di mundu por afektá nos tur. E bientu- i korientenan di Satanas su sistema ta poderoso. Sabiamente Beibel ta spièrta nos: “No laga hende gaña boso: ‘Mal kompania ta daña bon kustumber.’” (1 Korintionan 15:33) Mal kompania por ta kualke kos òf kualke persona—asta den kongregashon—ku ta reflehá e spiritu di mundu. Si nos ta rasoná ku mal kompania no por hasi nos daño, anto nos lo tin ku konkluí tambe ku bon kompania tampoko no por yuda nos. Ki un ekibokashon esei lo ta! Beibel ta splika e asuntu bon kla ora e ta bisa: “Esun ku anda ku hende sabí lo ta sabí, ma un kompañero di hende bobo lo sufri daño.”—Proverbionan 13:20.

14. Den ki maneranan nos por resistí e spiritu di mundu?

¹⁴ Pa resistí e spiritu di mundu, nos tin ku anda ku hende sabí, esnan ku ta sirbi Yehova. Nos tin ku yena nos mente ku kosnan ku ta edifiká nos fe. Apòstel Pablo a skirbi: “Tur loke ta berdadero, tur loke ta onorabel, tur loke ta hustu, tur loke ta puru, tur loke ta bunita, tur loke ta di bon fama, si tin algun birtut i si tin algu digno di alabansa, laga esakinan okupá boso mente.” (Filipensenan 4:8) Komo hende ku tin boluntat liber, nos por skohe ki asuntunan nos ta okupá nos mente kuné. Laga nos semper skohe pa pensa riba kosnan ku lo hala nos mas serka di Yehova.

E Spiritu di Dios Ta Mas Poderoso

15. Kon kristiannan den antiguo Korinto tabata distinto for di e otro habitantenan di e stat ei?

¹⁵ Distinto for di e hendenan ku ta ser gañá dor di e spiritu di mundu, kristiannan ta ser guiá dor di Dios su spiritu santu. Tabata na e kongregashon di Korinto ku Pablo a skirbi: “Nos a risibí, no e spiritu di mundu, sino e spiritu ku ta bin di Dios, pa nos konosé e kosnan ku Dios a duna nos gratuitamente.” (1 Korintionan 2:12) Antiguo Korinto tabata un stat kompletamente enbolbí den e spiritu di mundu. Mayoria di su habitantenan tabata asina inmoral ku e ekspreshon “korintianisá” a haña e nifikashon “praktiká inmoralidat.” Satanas a siega mente di e hendenan. Konsekuentemente, nan a komprondé masha tiki òf nada tokante e Dios berdadero. (2 Korintionan 4:4) Sin embargo, Yehova pa medio di su spiritu santu a habri wowo di algun di e korintionan, i a hasi posibel pa nan haña konosementu di e bèrdat. Dios su spiritu a motivá nan i guia nan pa hasi kambionan grandi den nan bida di manera ku nan por a risibí su aprobashon i bendishon. (1 Korintionan 6:9-11) Ounke e spiritu di mundu tabata fuerte, e spiritu di Yehova tabata mas fuerte.

16. Kon nos por risibí Dios su spiritu i keda kuné?

¹⁶ Meskos ta e kaso awe. Yehova su spiritu santu ta e forsa mas poderoso den universo, i e ta dun’é libremente i generosamente na tur ku pidi p’e ku fe. (Lukas 11:13) Sin embargo, pa nos por tin Dios su spiritu, nos mester hasi  mas ku djis resistí e spiritu di mundu. Tambe nos tin ku studia e Palabra di Dios regularmente i aplik’é den nos bida di manera ku nos spiritu—nos aktitut mental—ta armonisá ku Dios su manera di pensa. Si nos hasi esei, Yehova lo fortifiká nos pa resistí kualke táktika ku Satanas por usa pa destruí nos spiritualidat.

17. Den ki maneranan e eksperensia di Lòt por ta un konsuelo pa nos?

¹⁷ Ounke kristiannan no ta parti di mundu, nan ta den mundu. (Juan 17:11, 16) Ningun di nos por evitá e spiritu di mundu totalmente, pasobra kisas nos ta traha òf asta biba ku hende ku no ta stima Dios ni su kamindanan. Nos ta sinti meskos ku Lòt, kende tabata sintié masha “oprimí,” asta tormentá, dor di e obranan malbado di e hendenan di Sodoma, meimei di ken e tabata biba? (2 Pedro 2:7, 8) Si ta asina, nos por kobra ánimo. Yehova a protehá i libra Lòt, i e por hasi meskos pa nos. Nos Tata amoroso ta mira i sa den ki sirkunstansia nos ta, i e por duna nos e yudansa i fortalesa ku nos mester pa por mantené nos spiritualidat. (Salmo 33:18, 19) Si nos dependé riba Yehova, konfia den dje i invok’é, lo e yuda nos resistí e spiritu di mundu, sin importá kon difísil nos situashon por ta.—Isaias 41:10.

18. Dikon nos mester warda nos relashon ku Yehova manera un tesoro?

¹⁸ Den un mundu alehá for di Dios i gañá pa Satanas, nos komo e pueblo di Yehova ta bendishoná ku konosementu di e bèrdat. Pues nos ta eksperensiá un goso i pas ku mundu no tin. (Isaias 57:20; Galationan 5:22) Nos ta apresiá e speransa maravioso di bida eterno den Paradeis, kaminda e spiritu di e mundu muribundo aki lo no t’ei mas. P’esei laga nos warda nos relashon presioso ku Dios manera un tesoro, i sea alerta pa korigí kualke tendensia pa drif bai spiritualmente. Laga nos hala mas i mas serka di Yehova, i lo e yuda nos resistí e spiritu di mundu.—Santiago 4:7, 8.

Bo Por Splika?

• Den ki maneranan Satanas a gaña hende?

• Kon nos por evitá ku nos ta drif bai for di Yehova?

• Kiko ta mustra ku e spiritu di mundu ta poderoso?

• Kon nos por risibí e spiritu ku ta bin di Dios i keda kuné?

[Preguntanan di Estudio]

[Tabèl na página 11]

SABIDURIA DI MUNDU VERSUS SABIDURIA DI DIOS

Bèrdat no ta apsoluto; hende ta traha nan mes bèrdat.

“[Dios su] palabra ta bèrdat.”—Juan 17:17.

Pa distinguí bon for di malu, konfia bo sintimentunan.

“E kurason ta mas engañoso ku tur kos i ta totalmente korupto.”—Jeremias 17:9.

Hasi manera bo ke.

“No ta keda na hende pa dirigí su pasonan.”—Jeremias 10:23.

Rikesa ta e yabi pa felisidat.

“Amor pa plaka ta rais di tur sorto di maldat.”—1 Timoteo 6:10.

[Plachi na página 10]

Salomon a drif bai for di adorashon berdadero i a akudí na diosnan falsu

[Plachi na página 12]

Meskos ku un hasidó di propaganda, Satanas ta promové e spiritu di mundu. Abo ta resistié?