Historia di Bida

Sakrifisionan Chikí A Duna Nos Bendishonnan Grandi

SEGUN E RELATO DI GEORGE I ANN ALJIAN

Ami ku mi kasá nunka a imaginá ku un dia nos lo a bruha entre e palabra “maestro” ku “raton.” Nunka nos a pensa ku ora nos tin 60 i piku aña nos lo ta kibra kabes riba lèternan straño den un intento pa komuniká ku hende for di Lehano Oriente. Sin embargo, ta esei ta loke ami ku Ann a hasi na final di dékada di 1980. Laga nos konta bo kon e sakrifisionan chikí ku nos a hasi atraves di añanan a hiba na hopi bendishon.

MI FAMIA su antepasadonan tabata di Armenia i nos tabata pertenesé na Iglesia di Armenia. Ann tabata katóliko. Nos tur dos a hasi ahuste den nos kreensianan religioso ora nos a kasa na 1950. Ami tabatin 27 aña, i Ann tabatin 24. Nos a bai biba den un apartamento riba mi negoshi di dry-cleaning na Jersey City (New Jersey, Merka). Ora ku mi a kasa mi tabatin e negoshi aki pa kuater aña kaba.

Na 1955 nos a kumpra un bunita kas di tres kamber na Middletown, New Jersey. E kas ei tabata keda un 60 kilometer for di mi negoshi di dry-cleaning, kaminda mi tabata traha seis dia pa siman. Tur anochi mi tabata yega kas lat. E úniko kontakto ku mi tabatin ku Testigunan di Yehova tabata ora ku tempu-tempu nan tabata pasa na mi negoshi i laga literatura bíbliko ku mi. Mi tabata lesa e literatura ku gran interes. Ounke mi negoshi tabata tuma e mayor parti di mi tempu i atenshon, mi a kultivá un rèspèt profundo pa Beibel.

Poko despues mi a haña sa ku e radio emisora di Watchtower, WBBR, tabata transmití  charlanan bíbliko durante e ora ku mi tabata den outo ta bai òf bini di mi negoshi. Mi a skucha e charlanan ei bon, i mi interes a krese te ku mi a pidi e Testigunan pa nan bishitá mi. Na novèmber 1957, George Blanton a bishitá mi na mi kas i a kuminsá studia Beibel ku mi.

Nos Famia Ta Bira Uní den Adorashon Puru

Kiko Ann a pensa di tur esaki? Laga e mes konta bo.

“Na kuminsamentu mi tabata masha kontra mes. Mi tabata interumpí George su studio di Beibel asina hopi ku el a disidí di bai studia na un otro sitio, i el a hasi esei pa ocho luna. Durante e tempu ei, George a kuminsá asistí na reunion na Salòn di Reino riba djadumingu. Mi a realisá e ora ei ku e tabata serio tokante su studio di Beibel pasobra esaki tabata su úniko dia liber. Sin embargo, el a keda un bon kasá i tata—i asta a bira mas mihó—i mi aktitut a kuminsá kambia. De echo, tabatin biaha ku ora mi ta limpia e mesa di den sala i no tin niun hende ta wak, mi tabata kohe e revista Spièrta! ku semper George tabata laga einan, i les’é. Na otro okashonnan, George tabata lesa artíkulonan di Spièrta! pa mi ku no tabata trata direktamente ku doktrina pero ku semper tabata hala atenshon na e Kreadó.

Un anochi ku George a sali pa bai haña su studio serka Ruman Blanton, mi a kohe un publikashon ku nos yu hòmber George di dos aña a pone riba e mesita kantu di mi kama. E tabata trata tokante e speransa pa e mortonan. Ounke mi tabata kansá, mi a kuminsá les’é pasobra mi wela a kaba di muri i mi tabata hopi deprimí. Mesora mi a mira i komprondé e bèrdat bíbliko ku hende morto no ta sufriendo un kaminda i ku nan lo bolbe na bida den un resurekshon den futuro. No a tarda hopi ku mi a lanta sinta stret riba kama, lesando ku smak i halando strepi bou di puntonan ku mi kier a mustra George ora e yega kas for di su studio.

Mi kasá kasi no por a kere ku mi tabata e mesun persona. Ora el a sali kas, mi tabata masha kontra, i awor mi tabata tur emoshoná ku e bèrdatnan maravioso di Beibel ku mi a siña! Nos a keda lantá te den mardugá, papiando tokante Beibel. George a splika mi kiko ta Dios su propósito pa e tera. E anochi ei mes mi a pidié pa e tene su studio na kas ya asina mi tambe por a partisipá den dje.

Ruman Blanton a rekomendá nos pa laga e muchanan tambe sinta durante nos studio. Nos a pensa ku nan tabata muchu yòn, ya ku un tabatin dos aña i e otro solamente kuater aña. Sin embargo, Ruman Blanton a mustra nos Deuteronomio 31:12, ku ta bisa: “Reuní e pueblo, hòmber, muhé i mucha, . . . pa nan tende i siña.” Nos a apresiá e sugerensia ei i asta a hasi areglo pa e muchanan komentá durante e studio di Beibel. Nos tabata prepará nos  komentarionan huntu, pero nunka nos no a bisa nan kiko nan mester bisa. Nos ta sinti ku ta esaki a yuda dirigí nos yunan pa hasi e bèrdat di nan mes. Semper nos lo ta gradisidu pa e guia ku Ruman Blanton a duna nos pa yuda nos famia krese spiritualmente.”

Desafionan Ku Ta Rekerí Sakrifisio

Awor ku nos tabata studia Beibel komo famia, tabatin desafionan nobo ku nos mester a konfrontá. Siendo ku mi negoshi tabata keda asina leu, normalmente mi no tabata yega kas promé ku 9 or djanochi. Debí na esaki, mi no por a asistí na e reunionnan den siman, ounke sí mi tabata bai djadumingu. Ann sí tabata asistí na tur reunion i tabata progresá lihé. Mi tambe kier a asistí na tur reunion i kondusí un studio di famia produktivo. Mi a realisá ku mi mester hasi algun sakrifisio. P’esei mi a disidí di sera mi negoshi mas trempan, ounke mi a kore e riesgo di pèrdè algun kliente.

Esaki a resultá di ta un bon desishon. Nos a konsiderá e studio di famia mesun serio ku e otro sinku reunionnan semanal na Salòn di Reino. Nos tabata yam’é nos di seis reunion. Esei a nifiká ku nos tabatin un dia i ora fiho p’e: tur djarason 8 or djanochi. Tabatin biaha despues di kome anochi, ora ku nos kaba di laba tayó un di nos ta bisa: “Ta kasi ora pa nos ‘reunion’!” Si mi ta lat, Ann tabata kuminsá ku e studio, i mi ta sigui kuné asina ku mi yega.

Un otro kos ku a mantené nos fuerte i uní komo famia tabata ku nos a lesa e teksto di dia huntu mainta. Sin embargo, tabata un problema pa por hasié. Tur hende tabata lanta na un otro ora. Nos a papia riba esaki i a disidí ku nos tur ta lanta na e mesun ora, desayuná mitar di shete di mainta, anto konsiderá e teksto di dia huntu. Esaki a resultá masha bon pa nos. Ora nos yunan a bira grandi, nan a skohe pa bai sirbi na Bètel. Nos ta kere ku ta e konsiderashonnan diario aki a kontribuí na nan spiritualidat.

Privilegionan Despues di Boutismo Ta Rekerí Sakrifisio Mas Grandi

Mi a batisá na 1962, i despues di tabatin mi negoshi pa 21 aña, mi a bend’é i buska un trabou kaminda mi ta biba pa mi por ta mas serka di mi famia ya nos por a sirbi Yehova huntu. Esaki a habri kaminda pa hopi bendishon. Nos a pone e meta pa nos tur drenta den sirbishi di tempu kompletu. I nos a kuminsá alkansá e meta ei na prinsipio di dékada di 1970 ora ku nos yu hòmber mayó, Edward, a bira un predikadó di tempu kompletu, òf pionero regular, asina ku el a kaba skol sekundario. Un poko despues, nos yu hòmber George a kuminsá traha pionero, i djis despues Ann tambe a kuminsá. Nan tur tres a animá mi masha hopi, pasobra nan tabata konta mi e eksperensianan ku nan tabatin den sirbishi di vèlt. Nos a konsiderá komo famia kon nos lo por a simplifiká nos bida di manera ku nos tur por ta den sirbishi di tempu kompletu. Nos a disidí di bende e kas. Nos a biba den e kas ei pa 18 aña, i a lanta nos famia den dje. Nos tabata ègt stima nos kas masha hopi, pero Yehova a bendishoná nos desishon pa bend’é.

Na 1972, Edward a haña invitashon pa sirbi na Bètel, i George na 1974. Ounke ami ku Ann a sinti nan falta, nos no a keda pensa riba kon dushi lo tabata si nan a keda biba den nos bario, kasa i haña yu. Mas bien, nos tabata kontentu ku nos yunan tabata sirbi Yehova na Bètel. * Nos ta eens ku Proverbionan 23:15, ku ta bisa: “Mi yu, si bo kurason ta sabí, e ora ei mi kurason tambe lo keda kontentu.”

 Nos Ta Drenta Sirbishi di Pionero Spesial

Ora nos dos yunan a bai Bètel, nos a sigui traha pionero. Anto un dia na 1975, nos a risibí un karta ku e invitashon pa bai traha komo pionero spesial den teritorio no-asigná na Clinton County, Illinois. Esei sí tabata un sorpresa! Esaki a nifiká ku nos mester a bandoná New Jersey, kaminda nos tabata serka di nos yunan na New York i kaminda nos tabatin nos amigu- i famianan. Sin embargo, nos a konsiderá ku e asignashon aki a bini di Yehova i nos a hasi e sakrifisio, i esei a hiba na bendishonnan nobo.

Despues ku nos tabatin vários luna ta prediká den e teritorio no-asigná, nos a kuminsá tene reunion den un sentro di bario na Carlyle, Illinois. Pero nos tabata ke un lugá permanente pa reuní. Un ruman hòmber lokal huntu ku su kasá a haña un tereno ku un kasita ku nos por a hür. Nos a limpi’é kompletu—inkluso e w.c. pafó—i a kombertié den un lugá masha chikí di tene reunion. Nos tin grato rekuerdo di un kabai ku tabata kurioso pa sa ta kiko nos ta hasi. Hopi bes e tabata hinka su kabes den bentana pa wak ta kiko tabata pasando na e reunion!

Ku tempu, Kongregashon Carlyle a keda formá, i nos tabata felis di por tabatin un parti den esaki. Tabatin un pareha pionero yòn ku a yuda nos, Steve ku Karil Thompson, kendenan tambe a bin pa traha den teritorio no-asigná. E pareha Thompson a keda einan pa vários aña i despues nan a asistí na e Skol Bíbliko di Galaad di Watchtower i a wòrdu asigná na Ost Afrika pa traha komo misionero, kaminda nan ta sirbi awor den e trabou biahero.

No a tarda hopi ku nos lugá chikí di tene reunion a bira muchu pèrtá, i nos tabatin mester di un salòn mas grandi. E mesun ruman lokal ku su kasá a bolbe resolvé e problema, i nan a kumpra un propiedat ku tabata mas apropiá pa un Salòn di Reino. Nos a keda masha felis ora ku un par di aña despues, nos a haña invitashon pa e dedikashon di un Salòn di Reino nobo-nobo na Carlyle! Mi tabatin e onor di duna e diskurso di dedikashon. Nos asignashon einan tabata un eksperensia maravioso pa nos, un bendishon di Yehova.

Un Teritorio Nobo Ta Habri pa Nos

Na 1979 nos a haña un asignashon nobo, na Harrison, New Jersey. Nos a sirbi einan pa mas o ménos 12 aña. Durante e tempu ei nos a kuminsá un studio di Beibel ku un señora chines, i esaki a hiba na hopi studio mas ku personanan chines. Miéntras tantu, nos a haña sa ku tabatin míles di famia i tambe studiante chines ku ta bai universidat, ta biba den nos área. Debí na esaki nos a ser animá pa siña e idioma chines. Ounke esaki a nifiká ku nos mester a  dediká tempu tur dia na siña e idioma, el a resultá den hopi studio di Beibel ku personanan chines den nos área; studionan ku a duna nos goso.

Durante e añanan ei, nos a eksperensiá hopi situashon prèt, spesialmente ora nos tabata purba papia chines. Un dia Ann a introdusí su mes komo un “raton” di Beibel en bes di un “maestro” di Beibel. E dos palabranan ei ta kasi meskos. E doño di kas a smail i a bisa: “Por fabor drenta. Nunka mi no a yega di papia ku un raton di Beibel.” Te ainda nos ta lucha ku e idioma.

Despues nos a wòrdu asigná na un otro lugá na New Jersey kaminda nos por a sigui traha den teritorio chines. Mas despues nos a haña invitashon pa muda pa Boston, Massachusetts, kaminda ya pa tres aña tabatin un grupo chines ta desaroyá. Nos tabatin e privilegio di apoyá e grupo aki durante e último shete añanan i tambe e goso di mir’é bira un kongregashon dia promé di yanüari 2003.

E Bendishonnan di un Bida di Sakrifisio Propio

Na Malakias 3:10, nos ta lesa kaminda Yehova ta invitá su pueblo pa trese nan ofrenda i sakrifisio pa asina e por basha su bendishon te ora ku no tin mas nesesidat. Nos a renunsiá un negoshi ku mi tabata hopi interesá den dje. Nos a bende nos kas, ku nos tabata stima masha hopi. I nos a sakrifiká otro kosnan mas. Sin embargo, kompará ku e bendishonnan ku nos a haña, e sakrifisionan tabata chikí.

Yehova en bèrdat a basha bendishonnan grandi riba nos! Nos tabatin e satisfakshon di mira nos yunan reakshoná positivo riba e bèrdat, nos tabatin e goso di partisipá tempu kompletu den un sirbishi ku ta salbabida, i nos a mira kon Yehova a perkurá pa nos nesesidatnan. En bèrdat, nos sakrifisionan chikí a duna nos bendishonnan grandi!

[Nota]

[Plachi na página 25]

Louise ku George Blanton huntu ku Ann, 1991

[Plachi na página 26]

E Salòn di Reino na Carlyle, dediká dia 4 di yüni 1983

[Plachi na página 27]

Nos huntu ku e Kongregashon Boston Chines resien formá

[Plachi na página 28]

Nos huntu ku Edward, Connie, George i Grace