Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kiko ta indiká ku Hesus tabatin mas ruman hòmber i ruman muhé?

Beibel ta bisa esei na Mateo 13:55 i 56 i na Marko 6:3. E palabra griego (adelphos) ku nos ta haña einan ta sirbi pa indiká “un tipo di relashon karnal òf legal, [i] e ta nifiká solamente un ruman di e mesun tata i mama òf un mitar ruman.” (The Catholic Biblical Quarterly di yanüari 1992)—15/12, página 3.

• Ki diferensia kla tin entre e gueranan djawe i esnan di ántes, i hopi bes kiko tabata e kousanan básiko?

Den añanan resien e gueranan ku a tormentá humanidat tabata prinsipalmente gueranan sivil, esta, gueranan entre gruponan di siudadano di e mesun pais. Loke a kontribuí na esakinan ta odio étniko i odio entre tribu ku tribu, diferensianan religioso, inhustisia i disturbio polítiko. Un otro faktor ta golosidat pa poder i pa plaka.—1/1, página 3 i 4.

• Kon nos por sa ku e intenshon di Hesus no tabata pa kristiannan ripití e palabranan di e orashon modelo for di kabes?

Hesus a duna e modelo aki di orashon den su Sermon Riba Seru. Rònt di 18 luna despues, el a ripití e esensia di su instrukshon anterior tokante orashon. (Mateo 6:9-13; Lukas 11:1-4) Ta bon pa nota ku ni e mes no a ripitié palabra pa palabra. Esei ta indiká ku e orashon ku Hesus a duna komo modelo no tabata un rito pa sita for di kabes.—1/2, página 8.

• Despues di e Diluvio, unda e palomba a haña e taki di oleifi ku el a trese n’e arka?

Nos no sa ki nivel di salu òf temperatura e awanan di e Diluvio tabatin. Pero loke sí nos sa ta ku palu di oleifi ta sprùit asta despues ku e wòrdu di kap kompletamente. Pues algun palu di oleifi lo por a sobrebibí e awanan di e Diluvio i saka blachi despues.—15/2, página 31.

• Ku e blokeo di Biafra durante e guera sivil di Nigeria, kon Testigunan di Yehova den e área ei a risibí alimento spiritual?

Gobièrnu a pone un ámtenar na un puesto na Europa i un otro tabata traha n’e pista di aterisahe na Biafra. Tur dos tabata Testigu. Nan a aseptá e tarea peligroso di introdusí alimento spiritual na Biafra. Esei a benefisiá hopi ruman te dia e guera a kaba na 1970.—1/3, página 27.

• Kiko a ser lográ ku e Tratado di Pas di Westfalia, i kon religion tabata metí den dje?

E Reformashon a dividí e Imperio Romano Santu den tres religion: katóliko, luterano i kalvinista. E Union Protestant i e Liga Katóliko a ser formá na kuminsamentu di siglo 17. Despues, un konflikto religioso a kuminsá na Bohemia i a eskalá den un lucha internashonal pa poder. Gobernantenan katóliko i protestant a usa intriga pa haña supremasia polítiko i ganashi komersial. Finalmente, kòmbersashonnan di pas a tuma lugá den e provinsia aleman di Westfalia. Despues di kasi sinku aña, nan a firma e Tratado di Westfalia na 1648, poniendo fin n’e Guera di Trinta Aña i marka e nasementu di un Europa moderno komo un kontinente di estadonan soberano.—15/3, página 20-3.

• Kiko ta e nifikashon di e marka, òf nòmber, di “e bestia salbahe”—e number 666?

E marka aki ta ser menshoná na Revelashon 13:16-18. E bestia ta referí na gobernashon humano, i e echo ku e bestia tin “number di un hende” ta indiká ku gobièrnunan ta reflehá e kondishon humano imperfekto. Tres biaha seis ta mustra ku e ta kompletamente defisiente den bista di Dios. Esnan ku tin e marka aki ta duna adorashon i onor na Estado polítiko, òf nan ta akudí na dje pa salbashon.—1/4, página 4-7.