Dunamentu di Testimonio Informal den e Teritorio Ingles na Mexico

TANTEN ku apòstel Pablo tabatin ku warda su kompañeronan di biahe na Atenas, el a probechá di e tempu pa duna testimonio informal. Segun e relato di Beibel: “E tabata rasoná . . . riba plasa tur dia ku esnan ku pa kasualidat tabata presente einan.” (Echonan 17:17) Hesus a duna testimonio informal na un muhé samaritano banda di un pos durante su biahe for di Judea pa Galilea. (Juan 4:3-26) Abo ta probechá di tur oportunidat pa papia tokante e bon nobo di e Reino di Dios?

E teritorio di abla ingles na Mexico ta un tereno fértil pa duna testimonio informal. Turistanan ku ta bishitá resòrt, studiantenan di universidat ku ta bini i bai, i stranheronan penshoná ku ta biba na Mexico, tur ta frekuentá e parke- i restorantnan. Hopi Testigu di Yehova ku sa ingles a bira eksperto den kuminsá kòmbersashonnan ku e personanan aki. De echo, nan ta buska oportunidat pa papia ku ken ku ta parse stranhero òf ku ta papia ingles. Laga nos mira kon nan ta hasié.

Hopi bes e Testigunan aki, prosedente di otro paisnan ku ta sirbiendo den e teritorio ingles, simplemente ta introdusí nan mes na hende ku nan ta rekonosé mesora komo stranhero i ta puntra nan di unda nan ta. Esaki lógikamente ta hiba n’e pregunta ta kiko e Testigunan mes ta hasiendo na Mexico i esaki ta duna nan e oportunidat pa papia tokante kreensianan kristian. Por ehèmpel, Gloria, kende ta sirbiendo kaminda e nesesidat ta grandi den e teritorio ingles di Oaxaca, ta haña ku ta masha fásil pa kuminsá kòmbersashon den e manera ei. Ora e tabata bayendo kas bèk despues ku el a duna testimonio informal riba un plenchi, un pareha di Inglatera a par’é. E señora a bisa asombrá: “Mi no por kere ku mi ta mirando un hende kolo skur ta kana den e kayanan di Oaxaca!” En bes di sinti su mes ofendí, Gloria a hari, i nan a kuminsá kòmbersá tokante kiko e ta hasi na Mexico. E señora a invitá Gloria bin dal un kòpi’ kòfi na su kas. Despues ku nan a traha un sita, Gloria a ofres’é e Toren di Vigilansia i Spièrta!, pero e señora a nenga di tuma nan, bisando ku e ta un ateo. Gloria a kontest’é ku e gusta papia ku ateonan i ku lo e tin gana di tende su opinion riba e artíkulo “Nos Tin Mester di Lugá pa Adorá Dios?” E señora a aseptá i bis’é: “Si bo por konvensé mi, bo a yega hopi leu ku mi.” A sigui vários kòmbersashon interesante. Mas despues e pareha a bai Inglatera bèk, pero e kòmbersashonnan a sigui via e-mail.

 Un otro persona ku Gloria a aserká tabata Saron, un studiante di Washington, D.C., kende a bai Oaxaca pa hasi trabou boluntario ku muhénan nativo pa kompletá su estudio avansá. Despues ku Gloria a elogiá Saron pa su esfuersonan, el a splik’é pakiko e mes tabata na Mexico. Esaki a hiba na un ekselente kòmbersashon tokante Beibel i loke Dios lo hasi, no pa hende pober so, sino pa tur hende. Pa Saron tabata un ironia ku na Merka nunka el a yega di papia ku un Testigu, siendo ku un di e promé hendenan ku el a topa na Mexico tabata un Testigu di Yehova! Saron a aseptá un studio di Beibel i a kuminsá asistí mesora na reunionnan kristian.

Hopi stranhero a muda bai n’e resòrtnan kantu di playa na Mexico, en buska di un ambiente di paraiso. Laurel ta usa e punto aki pa kuminsá kòmbersashon na Acapulco. E ta puntra e hendenan si Acapulco ta parse mas un paraiso ku nan lugá di orígen i kiko nan ta gusta di dje. Despues e ta splika nan ku pronto henter tera lo ta un berdadero paraiso. Ora el a usa e método aki ku un señora kanades ku el a topa den konsultorio di un veterinario, esei a hiba na un studio di Beibel. Un método similar lo ta mes efikas kaminda bo ta biba?

‘Den Kaya i Riba Plenchi Públiko’

Hopi bes e rumannan ta kuminsá un kòmbersashon den kaya i riba plenchi públiko dor di puntra: “Bo ta papia ingles?” Hopi mèksikano ta papia ingles debí na nan profeshon òf pa motibu ku nan a yega di biba na Merka.

Un pareha Testigu a aserká un señora di edat kende tabata den un ròlstul pushá dor di un verplegster. Nan a puntra e señora si e ta papia ingles. E señora a kontestá ku sí pasobra el a biba hopi aña na Merka. El a aseptá E Toren di Vigilansia i Spièrta! Promé ku esei, nunka el a yega di lesa e revistanan aki. El a duna e Testigunan su nòmber, Consuelo, i su adrès. Ora e Testigunan a bai yama na e adrès kuater dia despues, nan a bin haña nan ku un kas di kuido dirigí dor di sùrnan katóliko. Na promé instante tabata difísil pa haña kontakto ku Consuelo pasobra e sùrnan tabata deskonfiá, i nan a bisa ku Consuelo no por a risibí nan. E pareha a insistí p’e sùrnan laga Consuelo sa ku nan tabat’ei i ku nan kier a kumind’é. Mesora Consuelo a laga e pareha drenta. Di e dia ei padilanti, e señora aki di 86 aña di edat ta hañando un studio regular di Beibel, apesar di e komentarionan negativo di e sùrnan. El a asistí na algun reunion kristian tambe.

Proverbionan 1:20 ta bisa: “Sabiduria ta sklama den kaya, e ta halsa su bos riba plenchi.” Ripará kon esei a tuma lugá riba e plenchi di San Miguel de Allende. Un mainta trempan, Ralph a aserká un hòmber sintá riba un banki. E hòmber ta den su 50 i piku aña. El a keda masha sorprendí ku a ofres’é E Toren di Vigilansia i Spièrta! i el a konta Ralph su historia.

E ta un veterano di e guera di Vietnam. E strès emoshonal ku el a haña despues di a mira asina tantu morto a kous’é un atake di nèrvio durante su servisio militar. Nan a sak’é  for di e gruponan den bataya i a mand’é na un base militar. Ei el a haña e tarea di baña kadaver di sòldá i prepará nan pa manda nan Merka bèk. Awor, 30 aña despues, ainda konstantemente e ta sufri di pesadia i miedu. E mainta ei, sintá riba e plenchi, hasiendo orashon den su mes e tabata pidi Dios pa yud’é.

E eks-militar aki a aseptá e literatura i tambe un invitashon pa bai e Salòn di Reino. Despues ku el a asistí n’e reunion, el a bisa ku durante e dos oranan ei na Salòn di Reino, pa promé bes den 30 aña el a sinti un pas. E hòmber aki tabata na San Miguel de Allende pa solamente un par di siman, pero el a risibí vários estudio di Beibel i a asistí na tur e reunionnan te dia el a regresá su lugá. E rumannan a hasi areglo p’e sigui ku su studio.

Testimonio Informal na Trabou i na Skol

Abo ta duna di konosé na bo trabou ku bo ta un Testigu di Yehova? Adrián, kende ta bende ‘time-share’ na Cape San Lucas, sí ta hasi esei. Komo resultado, Judy, su kolega di trabou ta konta: “Si ta tres aña pasá bo a bisa mi pa mi bira Testigu di Yehova, lo mi a bisa bo, ‘Nunka di mi bida!’ Pero mi a disidí ku mi kier a lesa Beibel. Mi a pensa, ‘Siendo ku mi ta gusta lesa, esei lo no ta masha difísil, tòg?’ Wèl, mi no ta kere ku mi a pasa mas ku seis página promé ku mi a realisá ku mi tabatin mester di yudansa. E úniko persona ku mi por a kai ariba tabata un kolega di trabou ku yama Adrián. Mi tabata gusta papia kuné pasobra e tabata e úniko persona realmente desente einan.” Mesora Adrián a ofresé Judy pa, huntu ku su namorada Katie, bin yud’é i kontestá tur su preguntanan. Katie a kuminsá studia Beibel kuné, i poko tempu despues, Judy a batisá komo Testigu di Yehova.

Kon bo por duna testimonio informal na skol? Dos testigu tabata haña lès di spañó na un universidat pero tabata ousente un dia pa asistí na un asamblea kristian. Ora nan a regresá n’e lès, e maestra a pidi nan pa konta na spañó kiko nan a bai hasi. Nan a probechá di e oportunidat pa duna un testimonio mas mihó posibel na spañó. E maestra, Silvia, tabatin hopi interes den profesia di Beibel. El a aseptá un studio di Beibel na ingles i awor e ta un publikadó di e bon nobo. Vários miembro di su famia tambe ta studiando. Silvia ta bisa: “Mi a haña loke mi tabata buska henter mi bida.” Sí, testimonio informal por duna bon resultado.

Probechando di Otro Oportunidatnan

Muestra di hospitalidat por habri kaminda pa duna testimonio. Jim i Gail, ku ta sirbiendo na San Carlos, Sonora, a realisá esei. Un señora ku tabata kana ku su kachónan 6 or di mainta a para un ratu pa atmirá nan hardin. Jim i Gail a invit’é p’e drenta i dal un kòpi’ kòfi. Pa promé biaha den 60 aña el a tende  tokante Yehova i e speransa di bida eterno. Nan a kuminsá un studio di Beibel.

Adrienne tambe ta trata stranhero ku bondat. E tabata komiendo den un restorant na Cancún ora un mucha hòmber a aserk’é i puntr’é si e ta di Canada. Ora el a kontestá ku sí, e hobensitu a splik’é ku e ku su mama tabata purba yuda su ruman muhé ku un relato di skol ku e mester a traha tokante kanadesnan. E mama, kende ta papia ingles, tambe a yega serka. Despues ku Adrienne a kontestá ku pasenshi su preguntanan tokante e kanadesnan, Adrienne a bisa: “Pero tin un motibu realmente importante pakiko mi a bini aki for di Canada: pa yuda hende siña tokante Beibel. Mi shon ta interesá den esei?” E señora a kontestá ku sí. El a bandoná su iglesia dies aña promé i el a purba studia Beibel riba su mes. El a duna Adrienne su adrès i number di telefon, i nan a kuminsá un dushi studio di Beibel.

‘Tira Bo Pan Riba Awa’

Ora bo ta papia tokante e bèrdat di Beibel na tur okashon, hopi bes bo ta haña chèns di duna testimonio na hende ku sea no tin òf ku tin masha poko oportunidat pa tende e mensahe di Reino. Den un kafetaria drùk den e stat portuario di Zihuatanejo, un Testigu a invitá dos stranhero pa sinta kuné na su mesa, ya ku e kafetaria tabata yenyen. Pa shete aña kaba e pareha aki a nabegá di un lugá pa otro. Nan no a papia muchu bon di Testigunan di Yehova. Despues di e enkuentro den e kafetaria, e Testigu a bishitá e pareha riba nan boto i a invitá nan na su kas. Nan a aseptá mas ku 20 revista i 5 buki i a primintí di tuma kontakto ku e Testigunan ora nan yega n’e siguiente haf.

Jeff i Deb a mira un famia ku un beibi masha lif na un sitio yen di restorant den un sentro komersial na Cancún. Ora nan a komentá algu tokante e beibi, e mayornan dje kriatura a invitá nan pa kome un pizza huntu ku nan. A resultá ku e famia aki tabata di India. Nunka nan a yega di tende di Testigunan di Yehova, ni mira nos literatura. Nan a keda ku algun di nos publikashonnan.

Algu similar a sosodé riba un isla pafó di e kosta di Yucatán. Un pareha chines resien kasá a pidi Jeff saka nan potrèt, loke Jeff a hasi gustosamente. Despues Jeff a haña sa ku ounke e pareha aki a biba e último 12 añanan na Merka, nunka nan a yega di mira òf tende di Testigunan di Yehova! A sigui un kòmbersashon agradabel. Jeff a animá nan pa tuma kontakto ku e Testigunan ora nan regresá kas.

Kisas tin un evenemento spesial den bo área ku lo por duna bo un bon oportunidat pa duna testimonio informal. Ora e presidente di Merka a bin bishitá e presidente di Mexico na su rancho banda di Guanajuato, reporteronan di tur parti di mundu a bin kubri e evenemento. Un famia Testigu a disidí di probechá di e oportunidat aki pa prediká na ingles. E reakshon tabata faborabel. Por ehèmpel, un reportero a kubri vários guera, manera esnan na Kosovo i Kuwait. Un kolega di dje a muri den su brasanan na man di frankotiradó. Ora e reportero a tende tokante e resurekshon, ku awa na wowo el a gradisí Dios pa a lag’é sa ku bida tin un propósito. El a bisa ku ounke lo e no mira e pareha Testigu mas, lo e warda e bon notisia bíbliko aki den su kurason.

Manera e eksperensianan anterior ta mustra, hopi bes nos no sa kiko lo ta resultado di e testimonionan aki. Sin embargo, e sabí Rei Salomon a bisa: “Tira bo pan riba superfisie di e awanan, pasobra lo bo hañ’é despues di hopi dia.” Tambe el a bisa: “Sembra bo simia mainta, i no keda sin hasi nada atardi; pasobra bo no sa si sembramentu di mainta òf di atardi lo tin éksito, òf si nan tur dos lo ta bon.” (Eklesiastés 11:1, 6) Sí, “tira bo pan” selosamente riba hopi awa i “sembra bo simia” generosamente, meskos ku Pablo i Hesus i e Testigunan di tempu moderno ta hasiendo den e teritorio ingles na Mexico.