E Boluntat di Dios Ta Sosodiendo Aktualmente?

“Ku bo boluntat sosodé na tera meskos ku den shelu.”—Mateo 6:10.

KU GRAN konsternashon Julio i Christina a mira kuater di nan yunan muri kimá. Un shofùr burachi a bin dal den nan outo stashoná i a pone esaki eksplotá i pega kandela. Un di sinku yu, Marcos, di nuebe aña di edat, a ser reskatá for di e kandela feros, pero e vlamnan a kim’é rònt su kurpa i a desfigur’é permanentemente. E tata a keda ku kurason kibrá. El a purba konsolá su mes i tambe su famia ku e palabranan: “Ta boluntat di Dios esaki ta. Sea bon òf malu, òf kualke otro kos, nos tin ku komprondé esei.”

Ora un suseso trágiko asina tuma lugá, hopi hende ta reakshoná meskos. Nan ta rasoná: ‘Si Dios ta todopoderoso i ta interesá den nos, loke a sosodé, den un manera òf otro mester ta pa nos mes bon, pa difísil ku esei por ta pa komprondé.’ Abo ta eens ku esei?

E punto di bista ku kiko ku sosodé, sea bon òf malu, ta un ekspreshon di e boluntat di Dios, hopi bes ta basá riba e palabranan di Hesus den loke ta konosí komo e Orashon di Nos Tata, sitá anteriormente. E boluntat di Dios ta sosodiendo den shelu, no ta bèrdat? Dor di resa pidi, “Ku bo boluntat sosodé na tera,” nos no ta aseptando ku loke ta sosodé riba tera ta e boluntat di Dios?

Hopi hende no ta sinti nan kómodo ku e punto di bista aki. E idea ku esaki ta duna nan ta ku Dios no ta tene kuenta ku sintimentu di su kreashon humano. ‘Kon un Dios amoroso por deseá loke ta teribel pa hende inosente?’ nan ta puntra. ‘Si ta un lès Dios ke pa nos siña, ta kiko e lès ei por ta anto?’ Podisé bo tambe ta pensa asina.

En konekshon ku esaki, disipel Santiago, mitar ruman di Hesus, a skirbi: “No laga ningun hende bisa ora ku e wòrdu tentá: ‘Mi ta wòrdu tentá dor di Dios’; pasobra Dios no por wòrdu tentá dor di maldat, i e mes no ta tenta ningun hende.” (Santiago 1:13) Dios no ta e fuente di loke ta malu. Ta bon kla anto ku no ta tur loke ta sosodé riba tera awe ta e boluntat di Dios. Beibel ta papia tambe di boluntat di hende, boluntat di e nashonnan i asta boluntat di Diabel. (Juan 1:13; 2 Timoteo 2:26; 1 Pedro 4:3) Bo no ta di akuerdo ku loke a sosodé ku e famia di Julio i Christina no por tabata e boluntat di un Tata selestial amoroso?

Pues, kiko sí Hesus tabata ke men anto ora el a siña su disipelnan resa pidi: “Ku bo boluntat sosodé”? Tabata djis un petishon pa Dios intervení den sierto kasonan, òf Hesus tabata siñando nos pa resa pidi pa algu mas importante i mas mihó, un kambio ku tur hende por spera ariba? Laga nos analisá mas aleu kiko Beibel ta bisa.

[Rekonosementu pa Potrèt na página 3]

Outo: Dominique Faget-STF/AFP/Getty Images; mucha: FAO photo/B. Imevbore