Hasi Esfuerso pa Mustra Bondat den un Mundu Hostil

“Loke ta deseabel den un hende ta su kariño [“bondat amoroso,” NW].”—PROVERBIONAN 19:22.

1. Dikon por ta difísil pa mustra bondat?

ABO ta konsiderá bo mes un persona bondadoso? Si ta asina, anto bida por ta difísil pa bo den e mundu djawe. Ta sierto ku den Beibel bondat ta ser identifiká komo parti di e “fruta di e spiritu,” pero dikon ta asina difísil pa ekspresá bondat asta den paisnan supuestamente kristian? (Galationan 5:22) Manera nos a nota den e artíkulo anterior, nos por haña un parti di e kontesta den loke apòstel Juan a skirbi: henter mundu ta bou di kontròl di Satanas e Diabel, un persona spiritual ku no tin bondat. (1 Juan 5:19) Hesukristu a identifiká Satanas komo gobernante òf “prens di e mundu.” (Juan 14:30) Pues, e mundu aki tin e tendensia di parse su gobernante rebelde, kende su aktitut ta ser karakterisá pa komportashon kruel.—Efesionan 2:2.

2. Ki situashonnan difísil por afektá nos mustramentu di bondat?

² Ora hende trata nos sin bondat esei ta afektá nos bida. E falta di bondat ei kisas ta ser ekspresá dor di bisiñanan renkoroso, dor di hende deskonosí antipátiko, i asta dor di amigu i famia ku tin biaha ta aktua sin konsiderashon. E strès di ta den kontakto ku hende ku tin mal manera i ku ta grita i papia palabra malu ku otro, hopi bes ta kousa gran frustrashon. Tal falta di bondat di parti di otro hende lo por laga nos tambe sinti rabia òf hostilidat, i kisas nos por pensa pa paga malu ku malu. Un  aktitut asina por asta hiba na problema ku nos salú físiko òf spiritual.—Romanonan 12:17.

3. Ki problemanan serio hende ta konfrontá ku ta pone ku ta difísil pa nan mustra bondat?

³ Un otro kos ku por pone ku ta difísil pa nos mustra bondat ta kondishonnan mundial ku ta kousa tenshon. Por ehèmpel, humanidat en general ta bou di tenshon debí na e menasa- i aktonan di terorismo, i tambe debí na e posibel uso di armanan biológiko òf nuklear dor di vários grupo nashonal. Ademas, miónes di hende ta biba den pobresa, i nan tin nèt sufisiente kuminda, dak, paña i kuido médiko pa sobrebibí. Ta un reto pa mustra bondat ora ku un situashon ta parse di no tin speransa di mehorá.—Eklesiastés 7:7.

4. Ki konklushon robes algun hende ta saka ora nan pensa riba mustramentu di bondat na otronan?

⁴ Un persona lo por konkluí fásilmente ku mustramentu di bondat no ta realmente un prioridat i ku esei por ta asta un indikashon di debilidat. Lo e por sinti ku hende ta probechá di dje, foral ora nan no ta tene kuenta ku su sintimentunan. (Salmo 73:2-9) Sin embargo, Beibel ta duna nos e guia korekto ora e ta bisa: “Un kontesta suave ta kita rabia, ma un palabra skèrpi ta lanta rabia.” (Proverbionan 15:1) Suavedat i bondat ta dos aspekto di e fruta di spiritu ku ta estrechamente ligá ku otro i ku ta masha efektivo ora nos ta konfrontá sirkunstansianan difísil.

5. Menshoná algun área di bida kaminda mester desplegá bondat.

⁵ Pero siendo ku pa nos komo kristian ta asina importante pa desplegá e fruta di Dios su spiritu santu, nos mester pensa riba kon nos lo por demostrá e fruta di bondat. Ta posibel pa mustra bondat den un mundu antipátiko òf hostil? Si ta asina, den ki áreanan di bida nos por duna prueba ku nos no ta laga e influensia di Satanas deskurashá nos di mustra bondat, foral den situashonnan yen di tenshon? Laga nos konsiderá maneranan ku nos por mustra bondat den famia, na trabou, na skol, na nos bisiñanan, den nos sirbishi di vèlt i entre nos rumannan den fe.

Bondat den Famia

6. Dikon bondat den famia ta asina importante, i kon nos por manifest’é?

⁶ Fruta di spiritu ta masha importante pa nos por risibí Yehova su bendishon i guia, i p’esei nos mester kultivá nan plenamente. (Efesionan 4:32) Laga nos konsentrá un ratu riba e echo ku foral miembronan di famia mester ekspresá bondat na otro. Un esposo i esposa mester manifestá un spiritu bondadoso i atento den nan trato diario ku otro i ku nan yunan. (Efesionan 5:28-33; 6:1, 2) E tipo di bondat ei mester ta bisto na e manera ku miembronan di famia ta papia ku otro; yunan ta onra i respetá nan mayornan i mayornan ta trata nan yunan den e manera korekto. Sea kla pa elogiá, i no lihé pa kondená.

7, 8. (a) Ki tipo di komportashon nos tin ku evitá pa nos por mustra berdadero bondat den famia? (b) Den ki manera bon komunikashon ta kontribuí na un famia hopi uní? (c) Kon abo por desplegá bondat den bo famia?

 ⁷ Ser bondadoso ku esnan den nos famia ta enserá sigui e konseho aki di apòstel Pablo: “Mester pone tur esakinan un banda: rabia, furia, malisia, kalumnia i palabra sushi for di boso boka.” Famianan kristian mester komuniká tur dia ku otro ku rèspèt. Dikon? Pasobra bon komunikashon ta un ingrediente esensial den famianan fuerte i sano. Ora surgi desakuerdo, purba solushoná e problema en bes di gana e pleitu, i asina suavisá e konflikto. Miembronan di un famia felis ta hasi esfuerso sinsero pa mustra bondat na otro i tene konsiderashon ku otro.—Kolosensenan 3:8, 12-14.

⁸ Bondat ta un kos positivo i ta krea den nos e gana di hasi bon pa otro hende. Pues, nos ta buska pa sa kon den un manera agradabel nos por yuda i mustra konsiderashon na otro miembronan di famia. Pa por demostrá e tipo di bondat ku ta duna un famia un bon reputashon, ta rekerí esfuerso individual i kolektivo. Komo resultado, e famia ei no solamente lo tin Dios su bendishon sino tambe ku den kongregashon i den komunidat, nan lo onra e Dios di bondat, Yehova.—1 Pedro 2:12.

Bondat na Trabou

9, 10. Deskribí algun problema ku por surgi na trabou, i menshoná kon por trata ku nan ku bondat.

⁹ Pa un kristian, e rutina diario di trabou por presentá e reto di mustra bondat na su koleganan. Kompetensia entre trahadónan por pone ku un kristian su empleo ta kore peliger. Kisas dor di un kolega ku ta gaña òf aktua tramposo, i ku asina ta daña reputashon di e kristian serka su doño di trabou. (Eklesiastés 4:4) No ta fásil pa mustra bondat den situashonnan asina. No opstante, dor di kòrda ku ser bondadoso por lo general ta e manera korekto pa aktua, un sirbidó di Yehova mester hasi esfuerso te kaminda ta posibel pa gana esnan ku no ta fásil pa anda kuné. Un kos ku por yuda nos hasi esaki ta di mustra interes personal. Podisé bo por mustra interes si un kolega ta malu òf tin famia ku ta malu. Djis puntra e kolega konta kuné òf ku su famia, por tin un efekto positivo riba dje. Sí, kristiannan mester buska manera pa promové armonia i pas te asina leu ku ta dependé di nan. Tin biaha un palabra bondadoso ku ta mustra interes i preokupashon lo yuda e situashon.

¹⁰ Den otro kasonan, un doño di trabou kisas ta obligá su trahadónan pa aseptá su opinion i kisas e ke pa tur hende tuma parti den un òf otro evenemento nashonalista òf den un selebrashon ku ta kontra prinsipionan bíbliko. Ora un kristian su konsenshi no ta permitié partisipá den e kosnan ei, esaki lo por hiba na un konfrontashon ku su doño di trabou. Na e  momentu ei kisas no ta sabí pa bai detayá kon malu ta pa kumpli ku e deseonan di e doño di trabou. Al fin i al kabo, pa esnan ku no ta kompartí e kreensianan kristian, partisipashon den e evenemento òf selebrashon por parse e kos korekto pa hasi. (1 Pedro 2:21-23) Podisé lo bo por splika na un manera bondadoso ta pa ki motibu abo personalmente no ta partisipá. No kontestá komentarionan skèrpi ku palabranan skèrpi òf sarkástiko. Ta bon pa un kristian sigui e ekselente konseho di Romanonan 12:18: “Si ta posibel, asina leu ku ta dependé di boso, sea na pas ku tur hende.”

Bondat na Skol

11. Ki reto hóbennan ta konfrontá pa por mustra bondat na kompañeronan di skol?

¹¹ Pa hóbennan, e por ta un reto grandi pa mustra bondat na otro alumnonan. Hóbennan hopi bes ta anhelá pa nan kompañeronan di skol aseptá nan. Tin mucha hòmber ta hasi kos di machismo pa asina otro alumnonan atmirá nan. I tin biaha nan ta bai asina leu di intimidá òf maltratá otro alumnonan na skol. (Mateo 20:25) Otro hóbennan gusta ‘show off’ ora nan ta bon den sierto vaknan na skol, òf den deporte òf den otro aktividatnan. Ora nan ta kana broma ku nan abilidat, hopi bes nan ta trata nan kompañeronan di klas i otro alumnonan na un manera antipátiko, pensando ekibokadamente ku e echo ku nan tin sierto talento ta hasi nan superior. Un hóben kristian tin ku tene kuidou pa e no imitá e muchanan ei. (Mateo 20:26, 27) Apòstel Pablo a bisa ku “amor tin pasenshi, amor ta kariñoso” i ku amor “no ta gaba, i no ta arogante.” Pues, un kristian tin e obligashon di no sigui e mal ehèmpel di esnan ku ta aktua antipátiko, sino pa pega na konseho bíbliko den su trato ku kompañeronan di skol.—1 Korintionan 13:4.

12. (a) Dikon por ta un reto pa hóbennan mustra bondat na nan maestronan? (b) Na ken hóbennan por akudí pa yudansa ora nan ta ser preshoná pa no mustra bondat?

¹² Tambe hóbennan tin ku trata nan maestronan di skol ku bondat. Hopi alumno ta gusta iritá nan maestronan. E hóbennan ei ta kere ku ta masha sabí nan ta ora nan ta falta rèspèt pa nan maestronan dor di hasi kosnan ku ta violá reglanan di skol. Dor di intimidá otro muchanan, nan ta fòrsa nan pa djòin nan den tal komportashon. Ora un hóben kristian nenga di tuma parti den esei, nan por kuminsá atak’é ku palabra òf di otro manera. Si un kristian  tin ku soportá esei durante henter un aña eskolar, esei por ta un tèst pa su determinashon pa mustra bondat. Pero kòrda ku ta masha importante pa bo ta un sirbidó leal di Yehova. Bo por tin sigur ku lo e sostené bo pa medio di su spiritu durante e momentunan difísil ei den bida.—Salmo 37:28.

Bondat na Bisiña

13-15. Kiko por stroba nos di mustra bondat na nos bisiñanan, i kon nos por enfrentá e retonan aki?

¹³ Sea ku bo ta biba den un kas, un apartamento òf otro kaminda, bo por pensa riba maneranan pa mustra bondat i ekspresá interes den e bienestar di bo bisiñanan. Un biaha mas, esaki no ta semper fásil pa hasi.

¹⁴ Kiko si bo bisiñanan pegá ku bo tin prehuisio kontra bo debí na bo rasa, nashonalidat òf religion? Kiko si tin biaha nan ta trata bo ku mal manera òf ta ignorá bo kompletamente? Komo un sirbidó di Yehova, lo ta bon pa bo ekspresá bondat te kaminda ta posibel. Esei lo laga bo destaká komo un persona diferente i refreskante, i esei lo ta un berdadero alabansa pa Yehova, kende ta e ehèmpel supremo di bondat. Bo no sa nunka ki dia e aktitut di bo bisiña por kambia debí na bo bondat. Lo e por asta bira un alabadó di Yehova.—1 Pedro 2:12.

¹⁵ Kon lo bo por mustra bondat na bo bisiñanan? Pa kuminsá, pa medio di e bon komportashon di bo famia segun ku tur miembro di famia ta desplegá e fruta di spiritu. Bisiñanan ta ripará esaki. De bes en kuando bo por hasi bo bisiña un fabor. Kòrda ku bondat ta nifiká mustra un interes aktivo den e bienestar di otro hende.—1 Pedro 3:8-12.

Bondat den Sirbishi

16, 17. (a) Dikon bondat ta importante den nos sirbishi públiko? (b) Kon nos por manifestá bondat den vários rasgo di sirbishi di vèlt?

¹⁶ Bondat mester ta un karakterístika di nos  sirbishi kristian segun ku nos ta hasi esfuerso determiná i organisá pa alkansá hende na nan kas, na nan trabou i na lugánan públiko. Nos mester kòrda ku nos ta representá Yehova, kende semper ta bondadoso.—Eksodo 34:6.

¹⁷ Kiko bo esfuerso pa mustra bondat den sirbishi ta enserá? Por ehèmpel, ora bo ta prediká riba kaya, bo por mustra bondat dor di ta breve i tene konsiderashon ku e hendenan ku bo abordá. Por lo general sa tin hopi hende ta kana riba asera, p’esei sòru pa bo no blòkia asera. Tambe, ora bo ta prediká den teritorio di negoshi, mustra bo bondat dor di ta breve, kòrdando ku trahadónan den negoshi tin ku atendé kliente.

18. Kon disernimentu por yuda nos mustra bondat den sirbishi di vèlt?

¹⁸ Den sirbishi di kas pa kas, usa diskreshon. No keda muchu largu den un kas, foral si tin mal wer. Abo por ripará ora un persona kuminsá pèrdè pasenshi òf asta bira iritá dor di bo presensia? Podisé kaminda bo ta biba Testigunan di Yehova ta pasa ku frekuensia. Si esei ta e kaso, mustra konsiderashon spesial, dor di ta semper bondadoso i amikal. (Proverbionan 17:14) Purba aseptá e motibu pakiko e doño di kas no por skucha e dia ei komo un motibu válido. No lubidá ku un di bo rumannan kristian muy probablemente lo bolbe yama na e kas ei den futuro serkano. Si bo topa un hende ku tin mal manera, hasi èkstra esfuerso pa mustra bondat. No hisa bo bos ni sera bo kara, mas bien papia na un manera trankil. Un kristian bondadoso no ke para pusta boka ku un doño di kas. (Mateo 10:11-14) Podisé riba un dia e persona ei lo skucha e bon nobo.

Bondat na Reunionnan di Kongregashon

19, 20. Dikon bondat ta nesesario den kongregashon, i kon nos por mustr’é?

¹⁹ Ta importante tambe pa mustra bondat na rumannan den fe. (Hebreonan 13:1) Siendo ku nos ta parti di un hermandat mundial, bondat ta esensial den nos trato ku otro.

²⁰ Si un kongregashon ta kompartí un Salòn di Reino ku un, dos òf mas kongregashon, ta importante pa trata e rumannan den e otro kongregashonnan ku bondat i tambe ku dignidat. Un spiritu di kompetensia ta difikultá koperashon ora tin ku hasi areglo pa orario di reunion i kosnan nesesario manera limpiesa òf renobashon. Sea bondadoso i mustra konsiderashon asta ora por tin algun diferensia di opinion. Den e manera aki bondat lo triunfá, i Yehova realmente lo bendishoná e interes ku boso ta mustra den bienestar di otro hende.

Sigui Mustra Bondat

21, 22. Na armonia ku Kolosensenan 3:12, kiko mester ta nos determinashon?

²¹ Bondat ta un kualidat asina ekstenso ku e ta influensiá tur aspekto di nos bida. P’esei nos tin ku hasié un parti integral di nos personalidat kristian. Mustra bondat na otro hende mester bira un kustumber.

²² Laga nos tur ta bondadoso ku otro hende tur dia i di e manera ei nos ta apliká individualmente e palabranan di apòstel Pablo: “Manera esnan ku a wòrdu skohí di Dios, santu i stimá, bisti un kurason di kompashon, kariño [bondat], humildat, mansedumbre i pasenshi.”—Kolosensenan 3:12.

Bo Ta Kòrda?

• Kiko ta pone ku ta difísil pa un kristian mustra bondat?

• Dikon ta importante pa desplegá bondat den bo famia?

• Kua ta algun kos ku ta pone ku ta difísil pa mustra bondat na skol, na trabou òf na bisiña?

• Splika kon kristiannan por desplegá bondat den nan sirbishi públiko.

[Preguntanan di Estudio]

[Plachi na página 18]

E bondat ku tur miembro di famia ta desplegá ta promové union i koperashon

[Plachi na página 19]

Bo por mustra bondat ora un kolega di trabou òf su famia ta sufri di malesa

[Plachi na página 20]

Yehova ta sostené esnan ku lealmente ta mustra bondat apesar ku otronan ta hasi bofon di nan

[Plachi na página 21]

Duna un man na un bisiña den nesesidat, ta un akto di bondat