Ora Dios Su Boluntat Sosodé na Tera

ORA Hesus a siña su disipelnan pidi Dios pa su “boluntat sosodé na tera meskos ku den shelu,” e tabata papia di eksperensia pasobra el a biba ku e Tata. (Mateo 6:10; Juan 1:18; 3:13; 8:42) Promé ku Hesus a bira hende, el a pasa den e tempu den kua tur loke a sosodé tantu den shelu komo riba tera tabata na armonia ku e boluntat di Dios. Eseinan tabata tempunan deleitabel di logro i satisfakshon.—Proverbionan 8:27-31.

E promé kreashonnan di Dios tabata kriaturanan spiritual, “angelnan, poderoso den fortalesa, ku ta ehekutá su palabra.” Nan tabata i te ainda ta su sirbidónan “ku ta hasi su boluntat.” (Salmo 103:20, 21) Kada un di nan tabatin nan mes boluntat? Sí, i ora tera a ser kreá, e “yu hòmbernan di Dios [aki] tabata grita di alegria.” (Jòb 38:7) Nan aplouso a reflehá e goso ku nan a sinti personalmente den loke ta e boluntat di Dios, i nan a adaptá nan boluntat na esun di dje.

Despues ku Dios a funda tera, el a prepar’é pa hende biba ariba i finalmente a krea e promé hòmber i muhé. (Génesis, kapítulo 1) Esaki tambe tabata bal un aplouso? E relato inspirá ta bisa: “Dios a mira tur loke el a traha, i ata, tur kos tabata masha bon,” sí, sin fayo, perfekto.—Génesis 1:31.

Kiko tabata Dios su boluntat pa nos promé mayornan i nan desendientenan? Segun Génesis 1:28, esei tambe tabata hopi bon: “Dios a bendishoná nan, i Dios a bisa nan: ‘Sea fruktífero i multipliká, i yena e tera i hasi esaki someté na bo; i goberná riba e piskánan di laman i riba e paranan di shelu, i riba tur ser bibu ku ta move riba tera.’” Pa kumpli ku e tarea maravioso ei, nos mayornan original lo mester a sigui biba—pa semper—i nan desendientenan tambe. No tabatin niun indikashon ku nan lo a bai haña nan ku kalamidat, inhustisia, angustia òf morto.

Esaki tabata un tempu ku e boluntat di Dios tabata sosodé tantu den shelu komo riba tera. Esnan ku tabata hasi su boluntat lo a haña un gran satisfakshon den esei. Kiko a bai robes?

Diripiente e boluntat di Dios a ser desafiá. No ku Dios no tabatin un kontesta p’e. Pero dor di esaki a kuminsá un periodo largu di doló i tristesa ku lo a trese hopi konfushon tokante e boluntat di Dios pa humanidat. I nos tur a bira víktima di esaki. Kiko e desafio ei tabata?

E Boluntat di Dios den un Tempu di Rebelion

Un di e “yu hòmbernan [spiritual] di Dios” a mira e posibilidat di interferí ku e boluntat ku Dios tabatin pa hende. Su plan tabata p’e saka benefisio personal. Mas e kriatura spiritual aki a pensa riba e posibilidat aki, mas realisabel el a mustra i mas atraktivo el a bira. (Santiago 1:14, 15) Podisé el a rasoná ku si e por a logra pa e promé pareha humano skucha na dje i no na Dios, e ora ei  Dios lo a haña su mes obligá di tolerá un soberania rival. Tal bes el a imaginá su mes ku Dios lo no a mata nan, pasobra esei lo a nifiká ku e propósito di Dios lo a faya. Mas bien, Yehova Dios lo tabatin ku kambia su propósito, i aseptá e posishon di e yu spiritual aki komo esun ku Dios su kreashon humano lo ta obedesiendo awor. E nòmber ku e rebelde ei a haña, esta, Satanas, ku kier men Resistidó, ta klòp kuné.—Jòb 1:6.

Pa kumpli ku su deseo, Satanas a aserká e muhé. El a insistí p’e ignorá e boluntat di Dios i bira moralmente independiente, dor di bis’é: “Boso lo no muri! . . . Boso lo ta manera Dios, konosiendo bon i malu.” (Génesis 3:1-5) Loke Satanas a bisa e muhé aki a zona manera algu ku por a dun’é libertat, i el a asept’é komo loke aparentemente tabata un mihó moda di biba. Despues, el a konvensé su esposo pa djòin e.—Génesis 3:6.

Esaki no tabata e boluntat di Dios p’e pareha. Tabata nan mes boluntat. I e konsekuensianan tabata desastroso. Dios a bisa nan kaba ku desobedensia lo a hiba na nan morto. (Génesis 3:3) Nan no a ser kreá pa biba independiente di Dios. (Jeremias 10:23) Ademas, nan lo a bira imperfekto, i awor nan lo a pasa imperfekshon i morto pa nan yunan. (Romanonan 5:12) Satanas no por a deshasí di e efektonan aki.

E desaroyonan aki a kambia pa semper e propósito, òf boluntat, di Dios pa humanidat i pa tera? Nò. (Isaias 55:9-11) Pero nan a lanta kuestionnan ku mester a ser resolvé: Hende por “ta manera Dios, konosiendo bon i malu,” manera Satanas a pretendé? Ku otro palabra, si nos haña sufisiente tempu, nos por determiná pa nos mes kiko ta bon i malu, benefisioso i perhudisial, den tur área di bida? Siendo ku Dios su manera di goberná ta mihó, e meresé obedensia kompletu? Nos tin ku kumpli kabalmente ku su boluntat? Kon lo bo kontestá?

E úniko manera pa resolvé e kuestionnan aki den bista di henter kreashon inteligente tabata pa laga esnan ku ke biba independiente di Dios purba riba nan mes. Yehova lo no a resolvé e kuestionnan ku a lanta dor di djis kaba ku e rebeldenan. E solushon tabata pa laga e rasa humano dal bai riba su mes pa sufisiente tempu i laga e resultadonan papia pa nan mes. Ora Dios a bisa e muhé ku lo e haña yu, el a indiká ku ta di e forma aki lo e atendé e asuntu. Asina un famia humano a kuminsá. Dor di esaki, nos ta na bida awe!—Génesis 3:16, 20.

Pero esaki no a nifiká sí ku Dios lo a permití hende i e kriatura spiritual rebelde hasi i deshasí na nan antoho. Dios no a renunsiá su soberania, ni e no a bandoná su propósito. (Salmo 83:18) El a splika esaki klaramente ora el a profetisá ku despues di tempu lo e aplastá e instigadó di e rebelion i eliminá tur e mal efektonan. (Génesis 3:15) P’esei, for di kuminsamentu, e famia humano a haña e promesa ku lo bini un alivio.

Miéntras tantu, nos promé mayornan a bira lomba p’e gobernashon di Dios. I den esei nan a perhudiká nan futuro yunan tambe. Pa Dios prevení tur e mal konsekuensianan di nan desishon, lo e tabatin ku imponé  su boluntat riba nan pa kada kos ku nan hasi. Pero esei lo a nifiká ku e lo a stroba nan di purba riba nan mes.

Klaru ku esun ku ke por skohe p’e gobernashon di Dios. Lo e por siña kiko ta Dios su boluntat pa hende den e tempu aki i adaptá su mes na dje mas tantu posibel. (Salmo 143:10) No opstante, tanten ku no resolvé e kuestion di humanidat su independensia kompletu, lo e no ta imün pa problema.

Trempan den historia humano, e efektonan di sigui nan mes rumbo a bira bisto. Kain, e promé yu di e famia humano, a mata su ruman Abel “pasobra su obranan tabata malu, i esnan di su ruman tabata hustu.” (1 Juan 3:12) Esaki no tabata e boluntat di Dios, pasobra Dios a spièrta Kain i despues el a kastig’é. (Génesis 4:3-12) Kain a skohe e independensia moral ku Satanas a ofres’é; p’esei e tabata n’e banda “di e malbado.” Otronan a hasi meskos.

Despues ku hende a biba mas ku 1.500 aña kaba, “tera tabata korumpí den bista di Dios i tera tabata yen di violensia.” (Génesis 6:11) Akshon desisivo tabata nesesario pa evitá ku tera lo a wòrdu ruiná. Dios a tuma akshon dor di trese un diluvio mundial i protehá e úniko famia hustu ku ainda tabata na bida—Noe, su esposa, su yunan i nan esposanan. (Génesis 7:1) Nos tur ta desendiente di nan.

For di e tempu ei padilanti durante historia humano, Dios a duna guia pa esnan ku ta deseá sinseramente di konosé su boluntat. El a inspirá hòmbernan leal pa skirbi su mensahenan pa ken ku a akudí na dje pa guia. E mensahenan aki ta skirbí den Beibel. (2 Timoteo 3:16) Den su gran amor el a permití hende fiel drenta den un relashon kuné, i asta bira su amigu. (Isaias 41:8) I el a duna nan e fortalesa ku nan tabatin mester pa wanta e pruebanan difísil ku humanidat a pasa aden durante míles di aña di independensia. (Salmo 46:1; Filipensenan 4:13, NW) Nos por ta hopi gradisidu pa tur esaki!

‘Bo Boluntat Lo Sosodé na Tera’—Kompletamente

Loke Dios a hasi te asina leu no ta tur loke ta su boluntat pa humanidat. Apòstel Pedro a skirbi: “Segun su promesa nos ta sperando shelunan nobo i un tera nobo, den kua ta biba hustisia.” (2 Pedro 3:13) E idioma simbóliko aki ta referí na un gobièrnu nobo riba humanidat i un sosiedat humano nobo bou di e gobièrnu ei.

Profeta Daniel a bai mas den detaye ora el a skirbi: “Den e dianan di e reinan ei e Dios di shelu lo lanta un reino ku nunka lo no wòrdu destruí. . . . E lo garna i pone un fin na tur e reinonan aki, ma e mes lo dura pa semper.” (Daniel 2:44) Segun e profesia aki lo bini un fin n’e sistema di kosnan bruhá aki i e Reino, òf gobièrnu di Dios, lo remplasá e gobièrnunan aktual. Esaki sí ta bon notisia! Lo yega e dia ora ku e konfliktonan i e egoismo ku ta yena e mundu djawe ku violensia i ku atrobe ta menasá di ruiná tera, lo pasa pa olvido.

Na ki tempu e kosnan aki lo sosodé? Hesus su disipelnan a puntr’é: “Ki tempu e kosnan aki lo sosodé, i kiko lo ta e señal di bo binida i di e fin di tempu?” Hesus a kontestá nan, bisando entre otro: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.”—Mateo 24:3, 14.

Ta un echo konosí ku aktualmente e trabou di prediká aki ta ser efektuá rònt mundu. Probablemente bo a mir’é den bo mes bisindario. Profèser Charles S. Braden a skirbi den su buki These Also Believe (Esakinan Tambe Ta Kere): “Testigunan di Yehova a kubri tera literalmente ku nan trabou di duna testimonio. . . . Niun grupo religioso na mundu a desplegá un selo i persistensia mas grandi den nan esfuerso pa plama e bon di  Reino ku Testigunan di Yehova.” E Testigunan ta proklamando e bon nobo aki aktivamente den mas ku 230 pais i den kasi 400 idioma. E obra profetisá aki nunka promé a ser efektuá riba un eskala mundial. E ta un di e hopi evidensianan ku e tempu p’e Reino ei remplasá gobièrnunan humano ta hopi serka.

E Reino ku Hesus a bisa ku lo ser prediká ta e mesun Reino ku el a siña nos pidi p’e den su orashon modelo: “Ku bo reino bin. Ku bo boluntat sosodé na tera meskos ku den shelu.” (Mateo 6:10) Sí, e Reino ei ta e medio ku Dios lo usa pa kumpli ku su propósito, su boluntat pa humanidat i pa tera.

Kiko esei ke men? Laga Revelashon 21:3 i 4 kontestá: “Mi a tende un bos duru for di e trono, bisando: ‘Mira, e tabernakel di Dios ta meimei di hende, i e lo biba meimei di nan, i nan lo ta su pueblo, i Dios mes lo ta meimei di nan, i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.’” E ora ei en bèrdat e boluntat di Dios lo ser hasí tantu riba tera komo den shelu—kompletamente. * Abo lo no ke ta parti di esei?

[Nota]

[Plachi na página 5]

Independensia for di e boluntat di Dios a trese kalamidat