E Palabra di Dios Ta Fortalesé Bo?

ORA bo haña bo ku problema, kon bo ta trata ku nan? Ora Hesus a hañ’é konfrontá ku e desafionan di Satanas, el a kòrda un pasashi bíbliko apropiá i esei a yud’é. (Mateo 4:1-11) Meskos tambe, ora Rei David a haña su mes ku pruebanan personal, e Palabra di Dios a fortales’é. El a bisa: “Den e multitut di mi preokupashonnan den mi, bo konsuelonan ta alegrá mi alma.”—Salmo 94:19.

Den nos kaso tambe, ora nos ta kòrda un teksto faborito, e por konsolá nos òf duna nos e forsa pa nos enfrentá un problema. Por ehèmpel, Rex, kende aworakí tin 89 aña, ta trahando komo predikadó di tempu kompletu desde 1931. Pero e ta bisa: “Hopi bes ku mi a haña un asignashon spesial den e trabou di prediká, mi a sinti mi inkapas.” Kon el a trata e situashon? “Mi tabata kòrda mi teksto faborito, Proverbionan 3:5, ku ta bisa: ‘Konfia den SEÑOR ku henter bo kurason, i no dependé riba bo mes komprondementu.’ Dor di kòrda i apliká e teksto aki, mi por a kumpli ku mi asignashon eksitosamente.”

Asta hóbennan ta saka benefisio di un teksto faborito. Jack, kende tin seis aña, ta bisa ku su teksto faborito ta Mateo 24:14. E teksto aki ta motiv’é pa bai prediká huntu ku su mayornan. E ta bisa: “Mi ta gusta bai prediká tur djasabra huntu ku mi mama, tata i mi ruman muhé.”

Bo sa haña bo ku pruebanan direkto di bo fe meskos ku Hesus? E ora ei Filipensenan 4:13, NW, lo por bira un di bo tekstonan faborito. Bo tambe tin bo “preokupashonnan” meskos ku Rei David? Anto kòrda riba Filipensenan 4:6 i 7; lo e por yuda bo. Bo ta pensa tin biaha ku bo sirbishi na Dios no ta bal nada? E ora ei kòrda 1 Korintionan 15:58; lo e fortalesé bo.

Dor di kòrda tekstonan apropiá for di kabes, nos ta laga e Palabra di Dios ehersé poder den nos bida. (Hebreonan 4:12) E tekstonan faborito ei por duna nos forsa i tambe konsuelo.—Romanonan 15:4.