Hóbennan, Boso Ta Trahando pa Futuro?

“Mi sa e plannan ku mi tin pa boso, . . . plannan pa pas i no pa kalamidat, pa duna boso un futuro i un speransa.”—JEREMIAS 29:11.

1, 2. Den ki diferente manera nos por wak e añanan di hubentut?

MAYORIA hende adulto ta konsiderá hubentut komo un periodo fantástiko di bida. Nan ta kòrda e energia i entusiasmo ku nan tabatin tempu ku nan tabata yòn. Nan tin grato rekuerdo di e tempu ku nan tabatin hopi ménos responsabilidat, un tempu ku nan a pasa hopi prèt i ku nan tabatin henter un bida nan dilanti, yen di oportunidat.

² Boso ku ta hóben probablemente tin un otro punto di bista di e asuntu. Kisas boso tin problema pa hèndel e kambionan emoshonal i físiko di hubentut. Na skol kisas boso ta konfrontá preshon fuerte di otro hóbennan. Podisé boso tin ku hasi un esfuerso desididu pa resistí droga, alkohòl i inmoralidat. Hopi di boso ta konfrontá tambe e asuntu di neutralidat òf otro kuestionnan relashoná ku boso fe. Sí, hubentut por ta un tempu difísil. Pero tòg, e ta tambe un tempu di oportunidat. E pregunta ta: Kon boso lo usa e oportunidatnan ei?

Gosa di Boso Hubentut

3. Ki konseho i spièrtamentu Salomon a duna hóbennan?

³ Hende mas grandi lo bisa boso ku hubentut no ta dura largu, i nan tin rason. Den un par di aña, boso hubentut ta tras di lomba. Pues gosa di dje tanten ku boso tiné! Esei tabata e konseho di Rei Salomon, kende a skirbi: “Regosihá, hóben, durante di bo hubentut, i laga bo kurason tin plaser durante di e dianan di bo adolesensia. I sigui e kamindanan di bo kurason i e deseonan di bo wowo.” Sin embargo, Salomon a spièrta hóbennan: “Kita tristesa for di bo kurason, i tene maldat for di bo kurpa.” Anto el a sigui bisa: “Adolesensia i hubentut ta banidat.”—Eklesiastés 11:9, 10.

4, 5. Dikon ta sabí pa hóbennan prepará pa futuro? Ilustrá esei.

⁴ Boso ta komprondé kiko Salomon tabata ke men? Pa yuda boso komprondé, pensa riba un hóben ku ta haña un regalo di hopi balor, podisé un herensia di plaka. Kiko lo e hasi kuné? E por gasta henter e plaka na fiesta i dibertishon, meskos ku e yu pèrdí den Hesus su komparashon. (Lukas 15:11-23) Pero kiko lo sosodé ora ku e plaka kaba? Sigur-sigur lo e lamentá ku e tabata asina iresponsabel! Di otro banda, suponé ku e usa e regalo pa prepará pa futuro, podisé dor di invertí mayoria di e plaka na un manera sabí. Ku tempu, ora ku e ta sakando benefisio di su invershon, boso ta kere ku lo e lamentá ku den su hubentut e no a gasta tur su plaka na fiesta i dibertishon? Klaru ku nò!

⁵ Awor pensa riba boso añanan di hubentut komo un regalo di Dios; lokual de echo nan ta. Kon boso lo usa nan? Boso por malgastá tur boso energia i entusiasmo na satisfasé boso mes, pasando di un dibertishon pa otro sin pensa mes riba futuro. Pero si boso hasi esei, boso “adolesensia i hubentut,” boso flor di bida, en bèrdat lo resultá di ta “banidat.” Ta muchu mas mihó pa probechá di boso hubentut pa prepará pa futuro!

6. (a) Ki konseho di Salomon ta perkurá un guia pa hóbennan? (b) Kiko Yehova lo ke hasi pa hóbennan, i kon un hóben por benefisiá di esaki?

⁶ Salomon a deklará un prinsipio ku por yuda boso usa boso añanan di hubentut di e  mihó manera. El a bisa: “Kòrda tambe riba bo Kreadó den e dianan di bo hubentut.” (Eklesiastés 12:1) Esei ta e yabi pa éksito: skucha Yehova i hasi su boluntat. Yehova a bisa e israelitanan di antigwedat kiko e tabata ke hasi pa nan: “Mi sa e plannan ku mi tin pa boso, . . . plannan pa pas i no pa kalamidat, pa duna boso un futuro i un speransa.” (Jeremias 29:11) Yehova lo ke duna boso tambe “un futuro i un speransa.” Si boso kòrda riba Yehova den loke boso ta hasi i pensa i tambe ora boso ta tuma desishon, e futuro i e speransa ei lo ser realisá.—Revelashon 7:16, 17; 21:3, 4.

“Hala Serka Dios”

7, 8. Kon un hóben por hala serka Dios?

⁷ Santiago a animá nos pa kòrda riba Yehova ora el a urgi nos: “Hala serka Dios i e lo hala serka boso.” (Santiago 4:8) Yehova ta e Kreadó, e Soberano selestial, digno di tur adorashon i alabansa. (Revelashon 4:11) Sin embargo, si nos hala serka dje, e lo hala serka nos. Tal interes amoroso no ta yena boso kurason ku kariño p’e?—Mateo 22:37.

⁸ Nos por hala serka Yehova den vários manera. Por ehèmpel, apòstel Pablo a bisa: “Dediká boso mes na orashon, keda alerta den dje ku un aktitut di gradisimentu.” (Kolosensenan 4:2) Ku otro palabra, kultivá e kustumber di hasi orashon. No keda satisfecho pa djis bisa amèn despues ku boso tata òf un otro ruman kristian den kongregashon representá boso den orashon. Boso a yega di deshogá boso kurason na Yehova i bis’é kiko boso ta pensa, kiko boso tin miedu di dje, ki problemanan boso ta konfrontá? Boso a yega di kont’é kosnan ku boso lo tin bèrgwensa di papia di dje ku kualke otro hende? Orashonnan onesto i di kurason ta duna un sintimentu di pas. (Filipensenan 4:6, 7) Nan ta yuda nos hala serka Yehova i sinti ku e tambe ta hala serka nos.

9. Kon un hóben por skucha Yehova?

⁹ Un manera mas pa hala serka Yehova nos ta haña den e siguiente palabranan inspirá: “Skucha konseho i aseptá disiplina, pa bo por ta sabí pa restu di bo bida.” (Proverbionan 19:20) En bèrdat, si boso skucha Yehova i obedes’é, boso ta trahando pa futuro. Kon boso por demostrá ku boso realmente ta skucha Yehova? Kasi sigur boso ta asistí ku regularidat na reunionnan kristian i ta skucha e partinan riba programa. Tambe boso ta ‘onra boso tata i boso mama’ dor di ta presente na e studio di Beibel di famia. (Efesionan 6:1, 2; Hebreonan 10:24, 25) Esei ta hopi bon. Pero fuera di e kosnan ei, boso ta ‘hasi bon uso di boso tempu’ pa prepará pa e reunionnan, pa lesa Beibel ku regularidat i pa hasi investigashon? Boso ta purba apliká loke boso ta lesa, pa asina boso por kana manera “hende sabí”? (Efesionan 5:15-17; Salmo 1:1-3) Si boso ta hasi e kosnan ei, boso ta halando serka Yehova.

10, 11. Ki benefisionan grandi hóbennan ta risibí ora nan ta skucha Yehova?

¹⁰ Den e palabranan di introdukshon di e buki di Proverbionan, e eskritor inspirá a splika e propósito di e buki bíbliko ei. El a bisa ku e propósito ta “pa konosé sabiduria i instrukshon, pa diserní e dichonan di komprondementu, pa risibí instrukshon den kondukta prudente, hustisia, huisio i rektitut; pa duna prudensia na e simpelnan, konosementu i disernimentu na e hóbennan.” (Proverbionan 1:1-4) Pues, segun ku boso ta lesa i apliká e palabranan di Proverbionan—i tambe di e restu di Beibel—boso lo kultivá hustisia i rektitut, i Yehova lo ta kontentu ku boso ta hala serka dje. (Salmo 15:1-5) Mas boso kultivá sano huisio, prudensia, konosementu i disernimentu, mas mihó desishonnan boso lo tuma.

¹¹ Ta irasonabel pa ferwagt ku un hóben lo aktua sabí den e manera aki? Nò, pasobra tin hopi hóben kristian ku ta hasi esei. Komo resultado, otro hende ta respetá nan i ‘no ta menospresiá nan hubentut.’ (1 Timoteo 4:12) Nan mayornan ku rason ta orguyoso di nan, i Yehova ta bisa ku nan ta hasi su kurason kontentu.  (Proverbionan 27:11) Maske nan ta yòn, nan por tin sigur ku e palabranan inspirá aki ta apliká na nan: “Wak hende hustu, opservá hende drechi: hende di pas tin porvenir.”—Salmo 37:37, BPK.

Skohe Bon

12. Menshoná un desishon importante ku hóbennan tin ku tuma. I dikon e desishon ei tin konsekuensianan riba término largu?

¹² Hubentut ta un tempu pa skohe i pa tuma desishon, i algun di nan lo tin konsekuensianan duradero. Algun desishon ku boso tuma awor lo influensiá boso bida pa hopi aña largu. Desishonnan sabí ta kontribuí na un bida felis i eksitoso. Desishonnan ku no ta sabí por mancha e restu di boso bida. Ban wak kon esei ta sierto relashoná ku dos desishon ku boso tin ku tuma. Esun promé: Ken boso ta skohe pa asosiá òf anda kuné? Dikon esaki ta importante? Wèl, e proverbio inspirá ta bisa: “Esun ku anda ku hende sabí lo ta sabí, ma un kompañero di hende bobo lo sufri daño.” (Proverbionan 13:20) Ku otro palabra, ku tempu nos lo bira meskos ku e hendenan ku nos ta anda kuné: sabí òf bobo. Kua di nan boso ta preferá di ta?

13, 14. (a) Fuera di kontakto direkto ku hende, kiko mas asosiashon ta enserá? (b) Ki eror hóbennan mester evitá?

¹³ Ora boso ta pensa di asosiashon, probablemente boso ta pensa riba anda ku hende. Esei ta korekto, pero e ta enserá mas kos. Ora boso ta wak un programa na televishon, ta skucha muzik, ta lesa un buki, ta bai wak un pelíkula, òf ta usa sierto rekursonan riba Internet, boso ta teniendo asosiashon. Si e propósito di e asosiashon ei ta pa satisfasé inklinashonnan violento i inmoral òf e ta stimulá uso di droga, buracheria òf kualke otro kos kontrali na prinsipionan bíbliko, boso ta den kompania di hende “bobo,” kendenan ta aktua komo si fuera Yehova no ta eksistí.—Salmo 14:1.

¹⁴ Podisé boso ta pensa ku ya ku boso ta asistí na reunionnan kristian i ta aktivo den kongregashon, boso ta sufisiente fuerte i lo no ser afektá dor di un pelíkula violento òf un álbum di muzik ku tin bon ritmo pero letranan kuestionabel. Kisas boso ta pensa ku lo no tin ningun mal konsekuensia si boso djis tira un bista na un website pornográfiko riba Internet. Pero apòstel Pablo ta bisa boso ku boso manera di pensa ta robes! El a bisa: “Mal kompania ta daña bon kustumber.” (1 Korintionan 15:33)  Lamentablemente, hopi hóben kristian ku bon prospekto a daña nan bon kustumbernan dor di mal asosiashon. Pues anto, sea desididu pa evitá tal asosiashon. Si boso hasi esei, boso lo sigui e konseho aki di Pablo: “No sea konforme e mundu aki, ma sea transformá pa medio di e renobamentu di boso mente, pa boso por komprobá kiko ta e bon i agradabel i perfekto boluntat di Dios.”—Romanonan 12:2.

15. Kua ta e di dos desishon ku hóbennan tin ku tuma, i ki preshon tin biaha hende ta pone riba nan relashoná ku esaki?

¹⁵ Awor laga nos wak un di dos desishon ku boso ta konfrontá. Lo yega un tempu ku boso tin ku disidí kiko boso ke hasi ora boso kaba skol. Si boso ta biba den un pais kaminda trabou ta skars, kisas boso lo sinti e preshon pa gara mesora e mihó trabou ku tin disponibel. Si boso ta biba den un pais próspero, kisas tin hopi oportunidat, di kua algun ta masha atraktivo. Ku masha bon intenshon boso maestronan òf mayornan kisas ta insistí pa boso sigui tras di un karera ku ta ofresé siguridat finansiero, kisas asta rikesa. Sin embargo, e preparashon pa un karera asina lo por limitá severamente e tempu ku boso por dediká na sirbi Yehova.

16, 17. Splika kon diferente teksto bíbliko por yuda un persona hóben haña un punto di bista balansá di trabou.

¹⁶ Kòrda konsultá Beibel promé ku boso tuma un desishon. Beibel ta animá nos pa traha pa nos pan di kada dia, i esei ta indiká ku nos ta responsabel pa mantené nos mes. (2 Tesalonisensenan 3:10-12) No opstante, tin mas kos enbolbí den skohe un karera. Nos ta animá boso pa lesa e siguiente tekstonan bíbliko i pensa kon nan por yuda un persona hóben p’e ta balansá den e asuntu di skohe un karera: Proverbionan 30:8, 9; Eklesiastés 7:11, 12; Mateo 6:33; 1 Korintionan 7:31; 1 Timoteo 6:9, 10. Despues di a lesa e versíkulonan aki, boso a mira kiko ta Yehova su punto di bista den e asuntu di skohe un karera?

¹⁷ Trabou nunka mester bira asina importante ku e ta haña prioridat riba nos sirbishi na Yehova. Si boso por tin e kualifikashonnan nesesario pa un trabou rasonabel ounke ku boso tin solamente un edukashon di skol sekundario, esei ta bon. Si boso tin mester di mas preparashon despues di skol sekundario, esei ta algu ku boso mester konsiderá huntu ku boso mayornan. Sin embargo, nunka pèrdè for di bista “e kosnan mas importante,” esta, e kosnan spiritual. (Filipensenan 1:9, 10, NW) No kometé e mesun eror ku Baruk, e sekretario di Jeremias. El a pèrdè apresio pa su privilegio di sirbishi i a kuminsá ‘buska kosnan grandi pa su mes.’ (Jeremias 45:5) El a lubidá momentániamente ku ningun di e “kosnan grandi” di e mundu aki lo tres’é mas serka Yehova ni yud’é sobrebibí e destrukshon di Yerusalèm. I esei ta konta pa nos awe tambe.

Apresiá Kosnan Spiritual

18, 19. (a) Di kiko mayoria di boso bisiñanan ta sufri, i kiko boso mester sinti pa nan? (b) Dikon hopi hende no ta sinti hamber spiritual?

¹⁸ Boso a yega di mira potrèt den medionan di komunikashon di muchanan den paisnan kaminda tin hamber? Si ta asina, siguramente boso a sinti hopi duele di nan. Boso ta sinti e mesun duele pa hende den boso bario? Dikon boso mester sinti duele di nan? Pasobra mayoria di nan tambe ta muriendo di hamber. Nan ta sufri di e hamber ku Amos a profetisá di dje: “‘Mira, dianan ta bin,’ SEÑOR Dios ta deklará, ‘ku lo mi manda hamber riba e tera; no hamber pa pan ni set pa awa, ma mas bien pa tende e palabranan di SEÑOR.’”—Amos 8:11.

¹⁹ Ta bèrdat ku mayoria di esnan ku ta sufri di e hamber spiritual aki no ta “konsiente di nan nesesidat spiritual.” (Mateo 5:3, NW) Hopi di nan no ta sinti hamber spiritual. Tin  di nan asta ta sinti ku nan ta bon alimentá. Pero si nan ta sinti asina ta pasobra nan ta alimentá nan mes ku e “sabiduria di e mundu,” un sabiduria sin balor ku ta inkluí materialismo, spekulashon sientífiko, opinionnan tokante moralidat i otro kosnan por estilo. Tin hende ta sinti ku “sabiduria” moderno ta hasi e siñansanan di Beibel ouderwets. Sin embargo, “mundu dor di su mes sabiduria no a konosé Dios.” E sabiduria di e mundu lo no yuda boso hala serka Dios. E no ta nada otro ku “bobedat dilanti di Dios.”—1 Korintionan 1:20, 21; 3:19.

20. Dikon no ta rasonabel ku un hende ke imitá esnan ku no ta adorá Yehova?

²⁰ Ora boso ta wak e potrètnan ei di e muchanan hambrá, boso sa deseá pa boso ta manera nan? Klaru ku nò! Sin embargo, algun hóben den famianan kristian a demostrá ku nan sí tin gana di ta manera e hendenan rònt di nan ku spiritualmente ta muriendo di hamber. Probablemente, e hóbennan ei ta kere ku hóbennan den mundu ta gosa di bida sin ningun preokupashon. Nan ta lubidá ku e hóbennan ei ta alehá for di Yehova. (Efesionan 4:17, 18) Tambe nan ta lubidá riba e mal efektonan di hamber spiritual. Algun di e mal efektonan ei ta embaraso hubenil indeseá i e efektonan físiko i emoshonal di inmoralidat, humamentu, buracheria i di uso di droga. Hamber spiritual ta kousa un aktitut rebelde, un sintimentu profundo di desesperashon i un falta di propósito den bida.

21. Kon nos por protehá nos mes pa nos no adoptá e mal aktitutnan di esnan ku no ta adorá Yehova?

²¹ P’esei, ora boso ta na skol meimei di muchanan ku no ta adorá Yehova, no laga nan aktitutnan kontrolá boso. (2 Korintionan 4:18) Algun di nan lo papia ku menospresio tokante asuntunan spiritual. Fuera di esei, medionan di komunikashon lo produsí propaganda fini ku indirektamente ta bisa ku ta normal pa kometé inmoralidat, bira burachi òf papia palabra malu. Resistí e influensia ei. Sigui anda òf asosiá regularmente ku hende ku ta ‘tene fe i un bon konsenshi.’ Sòru pa semper boso tin hopi di hasi “den e trabou di Señor.” (1 Timoteo 1:19; 1 Korintionan 15:58) Keda okupá na Salòn di Reino i den sirbishi di vèlt. Durante boso añanan na skol, partisipá de bes en kuando den e sirbishi di pionero ousiliar. Fortalesé boso punto di bista spiritual den e manera aki, i boso lo no pèrdè boso balansa.—2 Timoteo 4:5.

22, 23. (a) Dikon hopi bes un hóben kristian lo tuma desishonnan ku otro hende no ta komprondé? (b) Kiko hóbennan ta ser enkurashá pa hasi?

 ²² Mirando asuntunan for di un punto di bista spiritual probablemente lo pone boso tuma desishonnan ku otro hende lo no komprondé. Por ehèmpel, tabatin un hóben kristian ku hopi talento musikal i ku a sobresalí den tur vak na skol. Ora ku el a kaba skol, el a bai traha huntu ku su tata den un negoshi di limpia bentana ya asina e por a sigui ku e vokashon ku el a skohe komo pionero, esta, un predikadó di tempu kompletu. Su maestronan di skol no por a komprondé e motibu di su desishon, pero si boso a hala serka Yehova, nos tin sigur ku boso sí ta komprondé.

²³ Segun ku boso ta pensa riba e manera pa usa e rekursonan presioso di boso hubentut, ‘montoná pa boso mes e tesoro di un bon fundeshi pa futuro, pa boso por gara loke ta e bida berdadero.’ (1 Timoteo 6:19) Sea desididu pa ‘kòrda riba boso Magnífiko Kreadó’ den boso hubentut, i pa restu di boso bida. Esei ta e úniko manera pa traha pa un futuro eksitoso, un futuro ku lo no kaba nunka.

Na Ki Konklushon Boso A Yega?

• Ki konseho inspirá ta yuda hóbennan den nan planiamentu pa futuro?

• Kua ta algun manera ku un hóben por “hala serka Dios”?

• Kua ta algun desishon ku un persona hóben ta tuma ku lo tin efekto riba su futuro?

[Preguntanan di Estudio]

[Plachinan na página 15]

Boso lo laga aktividatnan personal apsorbá tur boso energia i entusiasmo hubenil?

[Plachi na página 16, 17]

Hóbennan kristian sabí ta keda enfoká riba kosnan spiritual