Imitá e Kurashi di Jeremias

“Konfia den SEÑOR, sea fuerte, bo kurason tuma kurashi. Sí, konfia den SEÑOR!”—SALMO 27:14, Beibel na papiamentu koriente.

1. Ki bendishon riku Testigunan di Yehova ta disfrutá di dje?

TESTIGUNAN DI YEHOVA ta biba den un paradeis spiritual. (Isaias 11:6-9) Den e mundu masha turbulento aki, nan ta biba den un ambiente spiritual úniko huntu ku otro kristiannan, kendenan ta na pas ku Yehova Dios i ku otro. (Salmo 29:11; Isaias 54:13) Anto nan paradeis spiritual ta kresiendo. Tur ku ta ‘hasi e boluntat di Dios di kurason’ ta yuda e paradeis ei bira mas grandi. (Efesionan 6:6) Kon? Dor di biba na armonia ku prinsipionan bíbliko i dor di siña otro hende pa hasi meskos i asina invitá nan pa benefisiá di e bendishonnan riku di e paradeis ei.—Mateo 28:19, 20; Juan 15:8.

2, 3. Kiko kristiannan berdadero tin ku soportá?

² Sin embargo, e echo ku nos ta biba den un paradeis spiritual no ta nifiká ku nos no ta haña nos ku prueba. Ainda nos ta imperfekto i ta sufri di e dolónan di malesa, behes i ku tempu, morto. Ademas, nos ta mira e kumplimentu di e profesianan relashoná ku “e último dianan.” (2 Timoteo 3:1) Guera, krímen, malesa, hamber i otro problemanan severo ta asotá henter humanidat, i Testigunan di Yehova no ta un eksepshon.—Marko 13:3-10; Lukas 21:10, 11.

³ Fuera di tur e kosnan ei, nos ta bon konsiente di e echo ku apesar di e siguridat di nos paradeis spiritual, tòg nos ta konfrontá oposishon fuerte serka esnan ku no ta un parti di dje. Hesus a spièrta su siguidónan: “Pasobra boso no ta di mundu, ma ami a skohe boso for di den mundu, p’esei mundu ta odia boso. Kòrda riba e palabra ku mi a bisa boso: ‘Un esklabo no ta mas ku su shon.’ Si nan a persiguí mi, boso tambe nan lo persiguí.” (Juan 15:18-21) Awe tambe ta meskos. Mayoria hende ainda no ta komprondé òf apresiá nos forma di adorashon. Algun di nan ta kritiká nos, hasi bofon di nos òf asta odia nos, manera Hesus a spièrta. (Mateo 10:22) Hopi bes hende ta hasi esfuerso pa perhudiká nos dor di plama informashon falsu i malisioso via medionan di komunikashon. (Salmo 109:1-3) Sí, nos tur ta konfrontá situashonnan difísil, i algun di nos kisas ta kuminsá bira deskurashá. Kon nos por perseverá?

4. Unda nos ta akudí pa haña yudansa pa perseverá?

⁴ Yehova ta yuda nos. Bou di inspirashon, e salmista a skirbi: “Hopi ta e aflikshonnan di e hustu, ma SEÑOR ta libr’é for di nan tur.” (Salmo 34:19; 1 Korintionan 10:13) Hopi di nos por konfirmá e echo ku ora nos pone nos pleno konfiansa den Yehova, e ta duna nos e fortalesa pa soportá kualke situashon difísil. Nos amor pa Yehova i e goso ku tin poné nos dilanti ta yuda nos lucha kontra desanimashon i miedu. (Hebreonan 12:2) Pues, apesar di difikultat, nos ta sigui para firme.

E Palabra di Dios A Fortalesé Jeremias

5, 6. (a) Ki ehèmpelnan nos tin di adoradónan berdadero ku a logra perseverá? (b) Kon Jeremias a reakshoná ora ku Yehova a yam’é pa bira profeta?

⁵ Atraves di henter historia, sirbidónan fiel di Yehova a haña goso apesar di sirkunstansianan difísil. Algun di nan a biba durante tempunan di huisio ora ku Yehova a ehekutá  su furia riba esnan infiel. Entre e adoradónan fiel ei tabatin Jeremias i algun di su kontemporáneonan, i tambe e kristiannan di promé siglo. E ehèmpelnan históriko ei ta pará den Beibel pa enkurashá nos, i nos por siña hopi dor di studia nan. (Romanonan 15:4) Por ehèmpel, laga nos konsiderá Jeremias.

⁶ Na un edat hóben Jeremias a haña e yamada pa sirbi komo profeta den Huda. Esaki no tabata un asignashon fásil. Mayoria di e pueblo tabata adorá diosnan falsu. Ora ku Jeremias a kuminsá su sirbishi, Josias tabata rei, i ounke e sí tabata fiel, tur e otro reinan ku a siguié tabata infiel. Ademas, mayoria di esnan responsabel pa instruí e pueblo—e profetanan i e saserdotenan—no tabata na banda di e bèrdat. (Jeremias 1:1, 2; 6:13; 23:11) Pues, kon Jeremias a sinti ora ku Yehova a yam’é pa bira profeta? E tabatin miedu! (Jeremias 1:8, 17) Jeremias ta kòrda su promé reakshon: “Mi a bisa: ‘Ai, Señor DIOS! Mira, mi no sa kon pa papia, pasobra mi ta un mucha.’”—Jeremias 1:6.

7. Kon e hendenan den Jeremias su teritorio a reakshoná, i kon e mes a reakshoná?

⁷ Mayoria di e hendenan den Jeremias su teritorio no a reakshoná faborabel, i hopi bes el a konfrontá oposishon feros. Na un okashon Pasur, un saserdote, a gòlpia Jeremias i a pon’é den sepa. Jeremias a konta kon el a sinti e biaha ei: “Lo mi no kòrda riba [Yehova], ni papia mas den su nòmber.” Podisé bo tambe tin biaha a sinti meskos, ku gana di entregá. Tuma nota ta kiko a yuda Jeremias perseverá. El a bisa: “E ora ei esei [e palabra òf mensahe di Dios] ta bira manera kandela den mi kurason, será den mi wesunan; mi ta kansá di ten’é paden, i mi no por mas.” (Jeremias 20:9) E palabranan di Dios tin e mesun efekto riba bo?

E Kompañeronan di Jeremias

8, 9. (a) Ki debilidat profeta Urias a desplegá, i ku ki resultado? (b) Dikon Baruk tabata deskurashá, i kon el a ser yudá?

⁸ Jeremias no tabata su so den su trabou komo profeta. E tabatin kompañero, i esaki lo mester a enkurash’é. Pero tabatin okashon ku su kompañeronan no a aktua sabí. Por ehèmpel, un otro profeta ku yama Urias tabata okupá dunando spièrtamentunan kontra Yerusalèm i Huda, “palabranan similar na tur esnan di Jeremias.” Sin embargo, ora ku Rei Joakim a duna òrdu pa mata Urias, e profeta a haña miedu i a hui bai Egipto. Pero esei no a skap’é. E hòmbernan di e rei a persiguié, kaptur’é i tres’é bèk na Yerusalèm, kaminda nan a mat’é. Esei lo mester tabata un shòk grandi pa Jeremias!—Jeremias 26:20-23.

⁹ Un otro kompañero di Jeremias tabata su sekretario Baruk. Baruk tabata un bon ayudante pa Jeremias, pero na un okashon e tambe a stòp di wak su sirkunstansia for di un punto di bista spiritual. El a kuminsá keha, bisando: “Ai di mi! Pasobra SEÑOR a añadí tristesa na mi doló; mi ta kansá di  mi kehamentu i mi no a haña deskanso.” Baruk, tur deskurashá, a kuminsá pèrdè apresio pa kosnan spiritual. Pero tòg Yehova bondadosamente a duna Baruk konseho sabí, i Baruk a korigí su manera di pensa. E ora ei Dios a sigur’é ku lo e sobrebibí e destrukshon di Yerusalèm. (Jeremias 45:1-5) Jeremias lo mester a sintié hopi enkurashá ora ku Baruk a rekuperá su balansa spiritual.

Yehova A Sostené Su Profeta

10. Ki sosten Yehova a primintí Jeremias?

¹⁰ Loke ta mas importante ta ku Yehova no a bandoná Jeremias. El a komprondé kon su profeta a sinti i a dun’é e fortalesa i sosten ku e tabatin mester. Por ehèmpel, na prinsipio di Jeremias su sirbishi ora ku Jeremias a ekspresá duda ku lo e ta kualifiká, Yehova a bis’é: “‘No tene miedu di nan, pasobra ami ta ku bo pa libra bo,’ SEÑOR ta deklará.” Anto despues di a duna su profeta informashon tokante su asignashon, Yehova a bisa: “‘Nan lo bringa kontra bo, ma nan lo no vense bo, pasobra ami ta ku bo pa libra bo,’ SEÑOR ta deklará.” (Jeremias 1:8, 19) Ki un gran konsuelo! I Yehova a kumpli ku su palabra.

11. Kon nos sa ku Yehova a kumpli ku su promesa di sostené Jeremias?

¹¹ Pues, despues di tabata será den sepa i ekspon’é na bofon públiko, Jeremias a bisa ku konfiansa: “SEÑOR ta ku mi manera un guerero poderoso; p’esei esnan ku ta persiguí mi lo trompeká i nan lo no prevalesé. Nan lo keda masha brongosá.” (Jeremias 20:11) Añanan despues ora ku hende a purba mata Jeremias, Yehova a sigui ta kuné, i meskos ku Baruk, Jeremias a sobrebibí e destrukshon di Yerusalèm komo un hòmber liber, miéntras ku su persiguidónan i esnan ku a  ignorá su spièrtamentunan a muri òf ser hibá komo katibu na Babilonia.

12. Apesar di tin motibunan pa ta deskurashá, kiko nos mester keda kòrda?

¹² Meskos ku Jeremias, tin hopi Testigu di Yehova awe ta soportá aflikshon. Manera a keda menshoná kaba, algun aflikshon ta ser kousá dor di nos propio imperfekshonnan, tin ta debí na e situashon kaótiko ku mundu ta den, i otronan ta dor di hende ku ta oponé nos trabou di prediká. E aflikshonnan ei por deskurashá nos. Meskos ku Jeremias, nos por yega na e punto ku nos ta puntra nos mes si nos por sigui ku nos sirbishi. De echo, nos por ferwagt ku de bes en kuando nos ta sinti nos mes deskurashá. Desanimashon ta tèst kon profundo nos amor pa Yehova ta. P’esei laga nos ta desididu pa no laga desanimashon pone nos kita for di Yehova su sirbishi manera Urias a hasi. Mas bien, laga nos imitá Jeremias i sea sigur di Yehova su sosten.

Kon pa Lucha Kontra Desanimashon

13. Kon nos por imitá e ehèmpel di Jeremias i David?

¹³ Jeremias tabata den kontakto regular ku Yehova Dios, i a kont’é su sintimentunan di mas profundo i a rog’é pa fortalesa. Esei ta un ekselente ehèmpel pa nos imitá. David di pasado, ku tambe a akudí na e mesun Fuente di fortalesa, a skirbi: “Skucha mi palabranan, o SEÑOR, konsiderá mi meditashon. Paga atenshon na e bos di mi klamor, mi Rei i mi Dios, pasobra ta na bo mi ta hasi orashon.” (Salmo 5:1, 2) E relato inspirá di e bida di David ta mustra ku bes tras bes Yehova a reakshoná riba e orashonnan ku David a hasi pa pidi yudansa. (Salmo 18:1, 2; 21:1-5) Den un manera similar, ora ku nos ta bou di preshon pisá òf nos problemanan ta parse insuperabel, nos por haña un gran konsuelo dor di akudí na Yehova den orashon i deshogá nos kurason na dje. (Filipensenan 4:6, 7; 1 Tesalonisensenan 5:16-18) Yehova no ta nenga di skucha nos. Al kontrario, e ta sigurá nos ku ‘e ta perkurá pa nos.’ (1 Pedro 5:6, 7) Sin embargo, lo no ta rasonabel pa hasi orashon na Yehova anto kaba keda sin skucha loke e tin di bisa, tòg?

14. Ki efekto e palabranan di Yehova tabatin riba Jeremias?

¹⁴ Kon Yehova ta papia ku nos? Laga nos ban bèk na Jeremias. Komo ku Jeremias tabata un profeta, Yehova a komuniká kuné direktamente. Jeremias ta deskribí e efekto ku e palabranan di Dios tabatin riba su kurason: “Bo palabranan a wòrdu hañá i mi a kome nan, i bo palabranan a bira un goso pa mi i e delisia di mi kurason; pasobra mi a wòrdu yamá na bo nòmber, o SEÑOR Dios di ehérsitonan.” (Jeremias 15:16) Sí, Jeremias tabata hopi kontentu pa e echo ku el a wòrdu yamá na Yehova su nòmber, i Yehova su palabranan tabata presioso pa e profeta. P’esei, meskos ku apòstel Pablo, Jeremias tabata ansioso pa deklará e mensahe konfiá na dje.—Romanonan 1:15, 16.

15. Kon nos por inkulká e palabranan di Yehova den nos kurason, i dor di meditá riba kiko nos lo ta desididu pa no keda ketu?

¹⁵ Yehova no ta komuniká direktamente ku ningun hende awe. Sin embargo, nos tin e palabranan di Dios den Beibel. P’esei, si nos ta serio den nos studio di Beibel i ta meditá profundamente riba loke nos ta siña, e palabranan di Dios lo bira pa nos kurason tambe ‘un goso i delisia.’ I ta masha emoshonante ku nos ta karga Yehova su nòmber ora ku nos ta bai kompartí e palabranan ei ku otro hende. Laga nos no lubidá nunka ku no tin ningun otro hende na mundu awe ku ta deklará e nòmber di Yehova. Ta solamente su Testigunan ta anunsiá e evangelio òf bon nobo di Dios su Reino establesí i ta siña hende mansu pa bira disipel di Hesukristu. (Mateo 28:19, 20) Esta bendishoná nos ta! En bista di loke Yehova amorosamente a konfia na nos, kon nos por keda ketu?

 Tene Kuidou ku Nos Asosiashon

16, 17. Kiko tabata Jeremias su punto di bista di asosiashon, i kon nos por imit’é?

¹⁶ Jeremias ta menshoná un kos mas ku a yud’é tin kurashi. El a bisa: “Mi no a sinta huntu ku esnan ku ta hasi bofon, ni mi no a regosihá. Mi tabata sinta mi so, pasobra bo man tabata riba mi, i bo a yena mi ku indignashon.” (Jeremias 15:17) Jeremias a preferá di ta su so, ku ser korumpí dor di mal amigu. Awe nos tambe ta mira e asuntu meskos ku Jeremias. Nos no ta lubidá nunka e spièrtamentu di apòstel Pablo ku “mal kompania ta daña bon kustumber,” asta kustumbernan bon ku nos por tabatin pa hopi aña.—1 Korintionan 15:33.

¹⁷ Mal kompania por permití e spiritu di mundu kontaminá nos manera di pensa. (1 Korintionan 2:12; Efesionan 2:2; Santiago 4:4) Pues laga nos entrená nos mente pa identifiká kiko ta mal asosiashon i laga nos evitá nan kompletamente. (Hebreonan 5:14) Si Pablo tabata na bida awe, kiko bo ta pensa lo el a bisa un kristian ku ta wak pelíkulanan inmoral òf violento òf deportenan violento? Ki konseho lo el a duna na un ruman ku ta buska amistat ku hende totalmente deskonosí riba Internet? Kiko lo el a pensa di un kristian ku ta pasa oranan largu dilanti televishon òf hungando wega di vidio, pero ku no tin bon kustumbernan di studio personal?—2 Korintionan 6:14b; Efesionan 5:3-5, 15, 16.

Keda den e Paradeis Spiritual

18. Kiko lo yuda nos keda spiritualmente fuerte?

¹⁸ Nos paradeis spiritual ta masha presioso pa nos. No tin nada den e mundu djawe ku por ser kompará kuné. Asta hende inkrédulo ta komentá tokante e amor, konsiderashon i bondat ku kristiannan tin pa otro. (Efesionan 4:31, 32) Tòg mas ku nunka, nos tin ku lucha kontra desanimashon. Bon asosiashon, orashon i bon kustumbernan di studia por yuda nos keda spiritualmente fuerte. E kosnan ei lo fortalesé nos pa konfrontá kualke prueba ku pleno konfiansa den Yehova.—2 Korintionan 4:7, 8.

19, 20. (a) Kiko lo yuda nos perseverá? (b) Na ken e siguiente artíkulo ta dirigí, i pa ken tambe e ta di interes?

¹⁹ Nunka nos mester permití esnan ku ta odia nos mensahe bíbliko intimidá nos i pone nos debilitá nos fe. Meskos ku e enemigunan ku a persiguí Jeremias, esnan ku ta lucha kontra nos ta luchando kontra Dios. Nan lo no prevalesé. Yehova, kende ta hopi mas fuerte ku nos oponentenan, ta bisa nos: “Konfia den SEÑOR, sea fuerte, bo kurason tuma kurashi. Sí, konfia den SEÑOR.” (Salmo 27:14, BPK) Ku nos speransa den Yehova profundamente ankrá den nos kurason, laga nos ta determiná pa no kansa di hasi bon. Laga nos tin e konfiansa ku—meskos ku Jeremias i Baruk—nos lo kosechá si nos no kansa.—Galationan 6:9.

²⁰ Bringa kontra desanimashon ta un lucha konstante pa hopi kristian. Pero hóbennan ta konfrontá prueba- i difikultatnan spesial. Pero tambe nan tin gran oportunidatnan. E siguiente artíkulo ta dirigí direktamente na e hóbennan meimei di nos. Lo e ta di interes tambe pa mayornan i pa tur adulto dediká den kongregashon ku pa medio di palabra, ehèmpel i sosten direkto, ta den posishon pa yuda esnan mas yòn den kongregashon.

Kon Lo Bo Kontestá?

• Dikon nos por ferwagt situashonnan ku lo deskurashá nos, i na ken nos mester akudí pa yudansa?

• Kon Jeremias a vense desanimashon apesar di tabatin un asignashon difísil?

• Kiko lo laga nos kurason tin ‘goso i delisia’ asta meimei di difikultat?

[Preguntanan di Estudio]

[Plachi na página 9]

Jeremias a pensa ku e tabata muchu yòn i sin eksperensia pa ta un profeta

[Plachi na página 10]

Asta ora Jeremias tabata ser persiguí, e tabata sa ku Yehova ta kuné “manera un guerero poderoso”