Neutralidat Ta Stroba Amor Kristian?

SER kristian ta enserá mas ku lesa Beibel, hasi orashon i alabá Dios riba djadumingu. E ta enserá hasi obranan tantu pa Dios komo pa hende. Beibel ta bisa: “No laga nos stima ku palabra ni ku lenga, ma ku echo i bèrdat.” (1 Juan 3:18) Hesus tabatin interes sinsero den otro hende, i kristiannan kier imit’é. Apòstel Pablo a hasi un apelashon na su rumannan den fe pa nan semper ‘abundá den e trabou di Señor.’ (1 Korintionan 15:58) Pero kiko ta e trabou di Señor? E ta enserá purba kambia gobièrnu su polítika pa benefisiá hende pober i oprimí? Esei ta loke Hesus a hasi?

Ounke e hendenan a purba konvensé Hesus pa el a intervení den asuntunan polítiko òf apoyá un partido, el a nenga di hasi esei. El a rechasá Satanas su oferta p’e haña  poder riba tur reino di mundu, el a evitá di mete den un disputa tokante pagamentu di belasting, i el a retirá ora un movementu popular kier a hasié rei. (Mateo 4:8-10; 22:17-21; Juan 6:15) Pero su posishon neutral no a strob’é di traha na bienestar di otro hende.

Hesus a konsentrá riba loke lo a trese benefisio permanente pa otro hende. Ounke el a trese alivio temporal p’e sinku mil hendenan ku el a alimentá i p’e enfermonan ku el a kura, su siñansa a habri kaminda pa henter humanidat haña bendishonnan eterno. Hesus a bira konosí, no komo un organisadó di kampañanan di alivio, sino simplemente komo “e Maestro.” (Mateo 26:18; Marko 5:35; Juan 11:28) El a bisa: “Pa esaki mi a nase i pa esaki mi a bin den mundu, pa duna testimonio di e bèrdat.”—Juan 18:37.

Predikando Algu Mihó ku Polítika

E bèrdat ku Hesus a siña hende no tabata un teoria polítiko. E bèrdat aki mas bien a enfoká riba e Reino, di kua e mes lo a bira Rei. (Lukas 4:43) E Reino aki ta un gobièrnu selestial, i lo e remplasá tur gobernashon humano i trese pas permanente pa humanidat. (Isaias 9:6, 7; 11:9; Daniel 2:44) P’esei, e ta e úniko berdadero speransa pa humanidat. En bes di animá hende pa laga nan futuro den man di ser humano, no ta mas amoroso di nos parti pa papia ku nan tokante un speransa sigur pa futuro? Beibel ta bisa: “No konfia den prensnan, den yu di hende, den kende no tin salbashon. Su spiritu ta sali, e ta bolbe na tera; e mes dia ei su pensamentunan ta peresé. Bendishoná ta esun, kende su yudansa ta e Dios di Jakòb, kende su speransa ta den SEÑOR su Dios.” (Salmo 146:3-5) Pues en bes di manda su disipelnan bai prediká tokante kon pa drecha gobièrnunan, Hesus a siña nan prediká e ‘evangelio di e reino.’—Mateo 10:6, 7; 24:14.

Esaki anto ta “e trabou di Señor” ku predikadónan kristian mester hasi. Pa motibu ku súpditonan di e Reino di Dios tin ku stima otro, e Reino lo logra eliminá pobresa dor di repartí e rekursonan di humanidat den un manera balansá. (Salmo 72:8, 12, 13) Esaki ta un bon notisia i sigur e ta meresé pa nos predik’é.

Awe Testigunan di Yehova ta organisá pa hasi e “trabou di Señor” aki den 235 pais. Na armonia ku Hesus su mandamentu, nan ta respetá tur gobièrnu. (Mateo 22:21) Pero tambe nan ta obedesé e siguiente palabranan ku Hesus a dirigí na su oyentenan: “Boso no ta di mundu, ma ami a skohe boso for di den mundu.”—Juan 15:19.

Algun persona ku un tempu tabata aktivo den polítika a kambia despues ku nan a studia Beibel kuidadosamente. Un polítiko italiano kende tabata miembro di Akshon Katóliko, un organisashon kontrolá pa iglesia, a bisa: “Mi a drenta polítika pasobra mi a sinti ku un hende mester kontribuí aktivamente n’e desaroyo polítiko i sosial di komunidat.” Despues di a retirá komo alkalde di stat pa por a prediká e Reino di Dios komo Testigu di Yehova, el a splika pakiko e intentonan di  hende sinsero den polítika ta frakasá. “Mundu ta loke e ta, no pasobra hende desente no a purba mehorá kondishonnan sosial, sino mas bien, pasobra e maldat di e hopinan a vense e esfuersonan sinsero di e pokonan.”

E echo ku kristiannan berdadero ta keda leu for di polítika pa por prediká e úniko berdadero speransa pa humanidat no ta nifiká ku nan no por yuda otro hende den maneranan práktiko. E personanan ku nan ta yuda bira súpditonan di e Reino di Dios ta siña kambia nan aktitutnan destruktivo, respetá outoridat, mehorá nan bida di famia, i tene un punto di bista balansá di rikesa material. Asta mas importante ainda, Testigunan di Yehova ta yuda hende disfrutá di un relashon íntimo ku Dios.

Hende ku ta prediká e Reino di Dios ta benefisiá e komunidat den kua nan ta biba. Pero mas ku esei, nan ta yuda hende pone konfiansa den un gobièrnu ku ta real i ku lo trese pas permanente pa tur hende ku ta stima Dios. Komo resultado di nan posishon neutral, e kristiannan aki ta liber pa duna e yudansa mas práktiko i mas duradero ku ta disponibel awe.

[Kuadro/Plachi na página 7]

Di Polítika pa Predikashon di e Reino di Dios

Komo mucha, Átila a siña e teologia di liberashon for di e pastornan di su parokia na Belém, Brazil. El a keda kontentu di tende ku un dia humanidat lo ser librá for di opreshon i el a djòin un grupo di aktivista, kaminda el a siña organisá marcha di protesta i kampaña di desobedensia sivil.

Pero tambe Átila tabata gusta duna lès n’e yunan di e miembronan di e grupo den un buki ku nan a dun’é, esta, e buki Scuchando e Gran Maestro. * E buki ta papia di bon kondukta i obedensia na outoridatnan. Esaki a pone Átila puntra su mes pakiko esnan ku ta apoyá teologia di liberashon no ta sigui e normanan moral haltu di Hesus i pakiko algun ta lubidá hende oprimí ora nan yega na poder. Pues, el a bandoná e grupo aktivista. Despues, Testigunan di Yehova a yama na su kas i a papia kuné tokante e Reino di Dios. No a tarda muchu ku el a kuminsá studia Beibel i siña tokante e berdadero solushon p’e opreshon di humanidat.

Rònt di e mesun tempu ei, Átila a asistí na un seminario katóliko tokante religion i polítika. E instruktornan a splika ku “esakinan ta dos banda di e mesun medaya.” Tambe el a asistí na un reunion na Salòn di Reino. Esta un diferensia! Loke a hala su atenshon ta ku no tabatin hende ta huma, bebe ni konta chiste opseno. El a disidí di djòin nan den nan trabou di prediká, i un poko tempu despues el a batisá. Awor e por mira pakiko teologia di liberashon no ta e berdadero solushon p’e problemanan di hende pober.

[Nota]

[Plachinan na página 6]

E posishon neutral di kristiannan no ta stroba nan di yuda otro hende