Pastornan Mester Mete den Polítika?

“UN ARSOBISPU kanades a bisa peregrinonan ku pa yuda hende pober, pastornan mester drenta polítika . . . Asta si e sistema polítiko no ta parse di ta kuadra ku e boluntat di Dios, ‘nos tin ku drenta aden pa nos por trese hustisia pa hende pober.’”—Catholic News.

Informenan di lidernan grandi di iglesia ku ta boga pa nan mete den polítika no ta nada nobo; ku nan tin puestonan polítiko tampoko no ta nada straño. Algun a purba di trese kambio den polítika. Otronan ta ser atmirá i rekordá pa nan kampañanan riba kuestionnan manera igualdat rasial i abolishon di sklabitut.

No opstante, hopi laiko no ta sinti nan kómodo ora nan pastornan ta duna opinion riba asuntunan polítiko. Un artíkulo tokante teologia polítiko, den e revista Christian Century, a bisa ku “baidónan di misa protestant sa kuestioná e enbolbimentu públiko di nan pastornan den polítika.” Hopi hende religioso ta haña ku misa ta un lugá muchu sagrado pa polítika.

Esaki ta lanta algun pregunta interesante ku ta importante pa tur hende ku ta deseá di mira un mihó mundu. Kleronan ku ta prediká kristianismo por trese kambio den polítika? * Ta Dios ta manda pastornan mete den polítika pa logra un mihó gobièrnu i un mihó mundu? E propósito original di kristianismo tabata pa introdusí un manera nobo pa hasi polítika?

Kon Polítika den Nòmber di Kristu A Kuminsá

Historiadó Henry Chadwick ta bisa den e buki The Early Church (E Iglesia di Promé Aya) ku e kongregashon kristian di promé siglo tabatin e fama di “no ta interesá den buska poder den e mundu aki.” E tabata un “komunidat no-polítiko, diskreto i pasifista.” A History of Christianity ta bisa: “Mayoria kristian tabata konvensí ku nan miembronan no tabatin mag di aseptá puestonan polítiko di estado . . . Na kuminsamentu di siglo 3 Hipólito a bisa ku segun e kustumber kristian, un magistrado síviko por a djòin Iglesia solamente si el a renunsiá su puesto.” Sin embargo, gradualmente hòmbernan ku tabatin set pa poder a kuminsá dirigí kosnan den hopi kongregashon, dunando nan mes títulonan pa impreshoná. (Echonan 20:29, 30) Algun tabata kier ta tantu lider religioso komo polítiko. Un kambio inesperá den gobièrnu di Roma a duna e lidernan di iglesia ei e oportunidat ku nan tabata buska.

Na aña 312 di nos era, e emperador pagano di Roma, Constantino, a kuminsá haña simpatia p’e asina yamá kristiannan. Pa asombro di  hopi hende, e obispunan di iglesia tabata dispuesto pa sera un kombenio ku e emperador pagano a kambio di e privilegionan ku el a konsedé nan. Henry Chadwick a skirbi ku “iglesia a haña mas i mas influensia den desishonnan polítiko importante.” Ki efekto tal metementu den polítika tabatin riba lidernan di iglesia?

Kon Polítika A Influensiá Pastornan

Un di esnan ku mas a propagá e idea ku Dios ta usa lidernan di iglesia komo polítiko tabata Agustin, un teólogo katóliko di siglo 5 ku tabatin hopi influensia. El a imaginá su mes kon iglesia ta goberná riba e nashonnan i trese pas pa humanidat. Pero historiadó H. G. Wells a skirbi: “E historia di Europa for di siglo 5 te na siglo 15 ta trata prinsipalmente e manera ku intento pa realisá e gran idea di un gobièrnu mundial divino a frakasá.” Kristiandat no a trese pas ni na Europa, pa no papia mes di mundu. Loke un tempu nan a kere tabata kristianismo a pèrdè su kredibilidat den bista di hopi hende. Kiko a bai robes?

Hopi lider religioso ku a pretendé di ta prediká kristianismo a sinti nan atraí na polítika ku bon intenshon, pero despues nan a haña nan metí den kosnan malu. Por ehèmpel, Martin Luther, un predikadó i traduktor di Beibel, ta famoso pa su esfuersonan pa reformá Iglesia Katóliko. Sin embargo, su posishon balente kontra doktrina di iglesia a hasié popular serka esnan ku tabatin motibunan polítiko pa rebeldiá. Luther a pèrdè e rèspèt di hopi hende ora e tambe a kuminsá ekspresá su opinionnan riba asuntunan polítiko. Na promé instante, e tabata na fabor di e kampesinonan ku a rebeldiá kontra e noblenan opresivo. Anto, ora e rebelion a bira violento, el a animá e noblenan pa aplastá e rebelion, loke nan a hasi tambe masakrando míles di kampesino. No tabata nada straño anto ku e kampesinonan a konsider’é un traidó. Tambe Luther a animá e noblenan den nan mes rebelion kontra e emperador katóliko. De echo, e protestantnan, manera a kuminsá yama e siguidónan di Luther, a forma un movementu polítiko for di kuminsamentu. Kon poder a afektá Luther? Wèl, el a korumpí Luther. Por ehèmpel, ounke na promé instante e no tabata di akuerdo pa obligá disidentenan religioso bai kontra nan boluntat, despues el a animá su amigunan polítiko pa kima esnan ku tabata kontra boutismo di mucha.

Tambe tin e kaso di Johannes Calvijn ku tabata un klero famoso na Ginebra, pero ku tambe a bin haña un enorme influensia polítiko. Ora Michael Servet a demostrá ku e siñansa di Trinidat no tin base bíbliko, Calvijn a usa su influensia polítiko pa sostené e ehekushon di Servet, kende a ser kimá na staka. E hendenan aki sí a desviá kompletamente for di e siñansanan di Hesus!

Podisé nan a lubidá loke Beibel ta bisa na 1 Juan 5:19: “Henter mundu ta bou di kontròl di e malbado.” Nan tabatin un deseo sinsero pa reformá e polítika di nan tempu? Òf ta e posibilidat di haña poder i amigu den puestonan haltu a atraé nan? Sea kual sea e kaso, nan mester a kòrda e palabranan inspirá di Santiago, disipel di Hesus: “Boso no sa ku amistat ku mundu ta enemistat pa ku Dios? P’esei, ken ku kier ta amigu di mundu ta hasi su mes enemigu di Dios.” (Santiago 4:4) Santiago tabata sa ku Hesus a bisa di su siguidónan: “Nan no ta di mundu, meskos ku ami no ta di mundu.”—Juan 17:14.

 Sin embargo, ounke hende ta rekonosé ku kristiannan no mester ta parti di e maldat di e mundu aki, hopi di nan no ta dispuesto pa keda neutral pa loke ta polítika, i berdaderamente no ser parti “di mundu.” Nan ta pretendé ku e posishon neutral ei ta stroba kristiannan di mustra amor na otro hende pa medio di obra. Nan ta kere ku lidernan di iglesia mester laga tende nan bos i yuda kombatí korupshon i inhustisia. Pero e neutralidat ku Hesus a siña hende ta realmente inkompatibel ku interes aktivo den otro hende? Un kristian por keda leu for di asuntunan polítiko ku ta kousa divishon i tòg duna otronan yudansa práktiko? E siguiente artíkulo ta analisá e preguntanan aki.

[Nota]

[Plachi na página 4]

Den nan set pa haña poder polítiko, lidernan di iglesia a komprometé nan mes ku gobernantenan, manera Emperador Constantino

[Rekonosementu]

Musée du Louvre, Paris

[Plachinan na página 5]

Kiko a atraé lidernan religioso bon konosí na polítika?

Agustin

Luther

Calvijn

[Rekonosementu]

Agustin: ICCD Photo; Calvijn: Kuadro di Holbein, for di e buki The History of Protestantism (Vol. II)