Bo Por Hasi Dios Kontentu

NOS realmente por tin efekto riba Dios su sintimentunan? Dios por ta kontentu? Un dikshonario ta definí e palabra “Dios” komo “e realidat supremo òf apsoluto.” Ke tal si e realidat asombroso ei ta simplemente un forsa? Un forsa ku no tin personalidat por ta kontentu? Klaru ku nò. Pero tuma nota kiko Beibel ta bisa di Dios.

Hesukristu a bisa: “Dios ta spiritu.” (Juan 4:24) Un spiritu ta un forma di bida ku ta distinto di ser humano. Ounke un spiritu ta invisibel pa wowo di hende, e tin un kurpa—“un kurpa spiritual.” (1 Korintionan 15:44; Juan 1:18) Usando idioma simbóliko, Beibel ta bisa asta ku Dios tin wowo, orea, man, etcetera. * Dios tin un nòmber tambe: Yehova. (Salmo 83:18, NW) Pues e Dios di Beibel ta un persona spiritual. (Hebreonan 9:24) “E ta e Dios bibu i e Rei eterno.”—Jeremias 10:10.

Komo un persona bibu i real, Yehova por pensa i aktua. E ta manifestá kualidatnan i sintimentunan, loke e ta gusta i loke e no ta gusta. De echo, den Beibel tin masha hopi ekspreshon ku ta revelá kiko ta agrad’é òf desagrad’é. Miéntras e diosnan i ídolonan ku hende a traha ta djis reflehá e karakterístikanan òf kualidatnan di nan inventornan humano, e Dios todopoderoso, Yehova, ta e Originadó di e emoshonnan ku el a inkulká den hende.—Génesis 1:27; Isaias 44:7-11.

Sin duda, Yehova ta “e Dios felis.” (1 Timoteo 1:11, NW) No ta den su obranan di kreashon so e ta alegrá, sino tambe e tin deleite den kumpli ku su propósito. Yehova ta deklará mediante profeta Isaias: “Lo mi kumpli ku tur loke ta agradá mi . . . Di bèrdat mi a papia; di bèrdat lo mi kumpli kuné. Mi a plania esaki, siguramente lo mi hasié.” (Isaias 46:9-11) E salmista a kanta: “Laga SEÑOR regosihá den su obranan.” (Salmo 104:31) Ma tin algu mas ku ta un fuente di alegria pa Dios. E ta bisa: “Sea sabí, mi yu, i hasi mi kurason kontentu.” (Proverbionan 27:11) Imaginá bo, nos por hasi Dios kontentu!

Kon Nos Por Hasi Dios Su Kurason Kontentu

Pensa riba kon e kabes di famia, Noe, a hasi Yehova su kurason kontentu. Noe “a haña grasia den bista di SEÑOR” pasobra e “tabata un hòmber . . . perfekto den su generashonnan.” Distinto di e malbadonan di e tempu ei, Noe su fe i obedensia a agradá Dios asina tantu ku manera e Skritura ta bisa, “Noe tabata kana ku Dios.” (Génesis 6:6, 8, 9, 22) “Pa medio di fe Noe . . . ku  temor di Dios a prepará un arka pa salbashon di e hendenan di su kas.” (Hebreonan 11:7) Yehova tabata masha kontentu ku Noe i el a bendishon’é huntu ku su famia ku e oportunidat di sobrebibí e periodo turbulento ei di historia humano.

E patriarka Abraham tambe tabata masha konsiente di Yehova su sintimentunan. Su konosementu íntimo di Dios su manera di pensa tabata hopi bisto ora Yehova a inform’é ku lo e destruí Sodoma i Gomora pa motibu di nan degenerashon. Abraham tabata konosé Yehova sufisiente bon p’e konkluí ku tabata impensabel di parti di Dios pa mata e hustunan huntu ku e malbadonan. (Génesis 18:17-33) Añanan despues, Abraham a obedesé un òrdu di Yehova i el a kasi “ofresé Isaak,” pasobra “el a konsiderá ku Dios ta poderoso pa lanta hende asta for di morto.” (Hebreonan 11:17-19; Génesis 22:1-18) Abraham tabata asina konsiente di Dios su sintimentunan i el a desplegá un fe i obedensia asina grandi ku den Beibel el a wòrdu yamá “amigu di Dios.”—Santiago 2:23.

Un otro hòmber ku a hasi esfuerso pa hasi Dios su kurason kontentu tabata Rei David di antiguo Israel. Yehova a bisa di dje: “Mi a haña David, yu hòmber di Isaí, un hòmber konforme mi kurason, kende lo hasi henter mi boluntat.” (Echonan 13:22) Promé ku David a konfrontá e gigante Goliat, el a pone su pleno konfiansa den Dios i a bisa Rei Saul di Israel: “E SEÑOR, kende a libra mi for di gara di leon i for di gara di ber, e lo libra mi for di man di e filisteo aki.” Yehova a bendishoná David su konfiansa den Dje, loke a permití David kaba ku Goliat. (1 Samuel 17:37, 45-54) David tabata ke pa no solamente su akshonnan sino tambe ‘e palabranan di su boka i e meditashon di su kurason ta aseptabel den bista di SEÑOR.’—Salmo 19:14.

Kiko di nos? Kon nos por hasi Yehova kontentu? Mas nos siña di Dios su sintimentunan, mas konsiente nos lo bira ku nos por hasi Dios su kurason kontentu. Pues segun ku nos ta lesa Beibel, ta esensial pa nos hasi esfuerso pa siña tokante Dios su sintimentunan pa nos por wòrdu ‘yená ku e konosementu di su boluntat den tur sabiduria spiritual i komprondementu pa nos kana na un manera digno di Señor, pa agrad’é den tur sentido.’ (Kolosensenan 1:9, 10) Konosementu, na su turno, ta yuda nos edifiká fe. Esaki ta vital pasobra “sin fe ta imposibel pa agradá [Dios].” (Hebreonan 11:6) Sí, dor di hasi esfuerso pa edifiká un fe firme i dor di armonisá nos bida ku e boluntat di Yehova, nos por hasi su kurason kontentu. Na mes momentu, nos mester tene kuidou pa nos no hasi Yehova su kurason tristu.

No Hasi Dios Tristu

Den e relato tokante e dianan di Noe nos ta haña un ehèmpel di kon hende por hasi Yehova tristu. N’e tempu ei “tera tabata yen di violensia. Anto Dios a tira un bista riba tera, i mira, e tabata korupto, pasobra tur karni a korumpí nan kaminda riba tera.” Kon Dios a sinti ora el a mira e degenerashon i e violensia? Beibel ta bisa ku “a duel SEÑOR ku el a traha hende riba tera i e tabata tristu den su kurason.” (Génesis 6:5, 6, 11, 12) E komportashon di hende a bira asina malu ku esaki a duel Dios i su aktitut pa ku e generashon malbado promé ku Diluvio a kambia. Pa motibu ku Dios tabata disgustá ku nan maldat, su aktitut pa ku nan a kambia for di unu di Kreadó di hende pa Ehekutor di hende.

 Yehova a sinti su mes tristu tambe ora su propio pueblo, e antiguo nashon di Israel, kontinuamente tabata ignorá su sintimentunan i su guia amoroso. E salmista a bisa den forma di lamento: “Kuantu biaha nan a bira rebelde kontra dje den e tera seku, i a hasié tristu den desierto! Bes tras bes nan a tenta Dios, i a provoká Esun Santu di Israel.” Ma “e, siendo miserikòrdioso, a pordoná nan inikidat, i no a destruí nan; hopi biaha el a kita su rabia for di riba nan, i no a lanta tur-tur su furia.” (Salmo 78:38-41) Ounke ku ta pa nan mes falta e israelitanan rebelde a sufri e konsekuensianan di nan piká, Beibel ta bisa nos ku “den tur nan aflikshon [Dios] tabata afligí.”—Isaias 63:9.

Yehova tabatin sintimentu tierno p’e pueblo di Israel i el a duna muestra amplio di esei. Apesar di esei, “kontinuamente nan tabata hasi bofon di e mensaheronan di Dios, i tabata despresiá su palabranan i hasi bofon di su profetanan, te ora ku e furia di SEÑOR a lanta kontra su pueblo, te ora ku no tabatin remedi mas.” (2 Krónikanan 36:16) Finalmente, nan rebeldia terko a “hasi su spiritu santu [asina] tristu” ku nan a pèrdè Yehova su aprobashon. (Isaias 63:10) Ku ki resultado? Dios a ehersé hustisia dor di kita su protekshon for di nan, lokual a pone nan sufri kalamidat ora e babilonionan a konkistá Huda i a destruí Yerusalèm. (2 Krónikanan 36:17-21) Ta hopi tristu ora hende opta pa hiba un bida di piká ku ta ofendé i angustiá nan Kreadó!

Beibel ta mustra bon kla ku mal kondukta ta pone Dios pena profundamente. (Salmo 78:41) Kosnan ku ta disgustá Dios i ku e ta asta odia ta entre otro orguyo, gañamentu, asesinato, práktika di magia, miramentu di destino, adorashon di antepasado, inmoralidat, homoseksualidat, infieldat matrimonial, insesto i opreshon di hende pober.—Levítiko 18:9-29; 19:29; Deuteronomio 18:9-12; Proverbionan 6:16-19; Jeremias 7:5-7; Malakias 2:14-16.

Kiko Yehova ta pensa di idolatria? Eksodo 20:4 i 5 ta bisa: “No traha ningun imágen grabá pa bo mes, ni nada semehante na loke tin ariba den shelu, ni abou riba tera, ni den e awa bou di tera. No adorá nan ni sirbi nan.” Pakiko nò? Pasobra un dios falsu “ta un abominashon pa SEÑOR.” (Deuteronomio 7:25, 26) Apòstel Juan a spièrta: “Yu chikitunan, warda boso di ídolonan.” (1 Juan 5:21) I apòstel Pablo a skirbi: “Mi stimánan, hui for di idolatria.”—1 Korintionan 10:14.

Buska e Aprobashon di Dios

Dios su “komunion íntimo [ta] ku e hende rekto.” “Esnan perfekto den nan kaminda ta su delisia.” (Proverbionan 3:32; 11:20) Di otro banda, hende ku na un manera terko ta sigui ofendé Dios dor di ignorá òf desafiá su sintimentunan hustu, pronto lo paga pa nan echonan. (2 Tesalonisensenan 1:6-10) Sí, no ta falta muchu p’e pone fin na tur e maldat ku ta reina awe.—Salmo 37:9-11; Sofonias 2:2, 3.

Sin embargo, Beibel ta mustra bon kla ku Yehova “no ke pa ningun hende bai pèrdí, ma pa tur bin na repentimentu.” (2 Pedro 3:9) Lo e preferá di mustra su kariño pa hende hustu ku ta stim’é en bes di ekspresá su disgustu riba esnan ku no ke kambia. Yehova tin plaser no “den e morto di e malbado, ma mas bien ku e malbado bira for di su kaminda i biba.”—Ezekiel 33:11.

 Pues niun hende no tin nodi bira e blanko di Yehova su rabia. Yehova “ta yen di kompashon i ta miserikòrdioso.” (Santiago 5:11) Ku pleno konfiansa den e sintimentunan di Dios, bo por ‘tira tur bo preokupashon riba dje, pasobra e ta perkurá pa bo.’ (1 Pedro 5:7) Bo por ta sigur ku esnan ku ta hasi Dios su kurason kontentu tin e perspektiva maravioso di disfrutá di su aprobashon i amistat. P’esei, aworakí ta mas urgente ku nunka pa ‘trata di siña loke ta agradabel na Señor.’—Efesionan 5:10.

Ta algu sumamente maravioso ku Dios den su bondat inmeresí a revelá su kualidat- i sintimentunan glorioso! I ta den bo alkanse pa hasi su kurason kontentu. Si bo ta deseá di hasi esei, nos ta animá bo pa tuma kontakto ku Testigunan di Yehova den bo bisindario. Gustosamente nan lo mustra bo e kosnan práktiko i realístiko ku nan a haña den nan esfuerso pa agradá Dios.

[Nota]

[Kuadro na página 7]

Pakiko Beibel Ta Deskribí Dios den Términonan Humano?

Siendo ku “Dios ta spiritu,” nos no por mir’é ku nos wowo literal. (Juan 4:24) P’esei Beibel ta usa idioma simbóliko, manera komparashon, metáfora i antropomorfismo pa yuda nos komprondé e poder, mahestat i aktividatnan di Dios. Antropomorfismo ta nifiká atribuí karakterístikanan humano na algu no-humano. Pues maske nos no sa kon e kurpa spiritual di Dios ta, Beibel ta bisa ku Dios tin wowo, orea, man, brasa, dede, pia i kurason.—Génesis 8:21; Eksodo 3:20; 31:18; Jòb 40:9; Salmo 18:9; 34:15.

E idioma deskriptivo ei no ta nifiká ku e kurpa spiritual di Dios tin e mesun miembronan ku kurpa humano tin. No mester interpretá e ekspreshonnan ei den sentido literal. Nan ta djis pa yuda hende haña un mihó komprondementu di Dios. Sin idioma simbóliko, lo ta difísil, pa no bisa imposibel, pa simpel hende komprondé kualke deskripshon di Dios. Sin embargo, esei no kier men sí ku ta hende a inventá e personalidat di Yehova Dios. Beibel ta splika bon kla ku ta hende a ser kreá den imágen di Dios, i no Dios den imágen di hende. (Génesis 1:27) Dor ku eskritornan di Beibel tabata “inspirá pa Dios,” e deskripshon ku nan a duna di e personalidat di Dios, en realidat ta e manera ku Dios mes a deskribí su kualidatnan—e mesun kualidatnan ku el a inkulká den diferente grado den su kreashon humano. (2 Timoteo 3:16, 17) No ta trata aki di kualidat di hende den Dios, sino realmente di kualidat di Dios den hende.

[Plachi na página 4]

Noe a haña fabor den bista di Dios

[Plachi na página 5]

Abraham tabata masha konsiente di Dios su sintimentunan

[Plachi na página 6]

David a pone su pleno konfiansa den Yehova

[Plachi na página 7]

Ora bo ta lesa Beibel, bo por siña kon pa hasi Dios kontentu

[Rekonosementu pa Potret na página 4]

Kortesia di Anglo-Australian Observatory, potrèt saká dor di David Malin